Garuda Purana · Chapter 1.127

śrīgaruḍamahāpurāṇam- 127
brahmovāca /
māghamāse śuklapakṣe sūryarkṣeṇa yutā purā /
ekādaśī tathā caikā bhīmena samupoṣitā

āścarya tu vrataṃ kṛtvā pitṝṇāmanṛṇo 'bhavat /
bhīmadvādaśī vikhyātā prāṇināṃ puṇyavardhinī

nakṣatreṇa vināpyeṣā brahmahatyādi nāśayet /
vinihanti mahāpāpaṃ kunṛpo viṣayaṃ yathā

kuputtrastu kulaṃ yadvatkubhāryā ca patiṃ yathā /
adharmaṃ ca yathā dharmaḥ kumantrī ca yathā nṛpam

ajñānena yathā jñānaṃ śaucamāśaucakaṃ yathā /
aśraddhayā yathā śraddhā satyañcaivānṛtairyathā

himaṃ yathoṣṇamāhanyādanarthaṃ cārthasaṃcayaḥ /
yathā prakartināddānaṃ tapo vai vismayādyathā

aśikṣayā yathā putro gāvo dūragatairyathā /
krodhena ca yathā śāntiryathā vittamavaddhanāt

jñānenaiyathā vidyā niṣkāmena yathā phalam /
tathaiva pāpanāśāya prokteyaṃ dvādaśī śubhā

brahmahatyā surā pāna steyaṃ gurvaṅganāgamaḥ /
yugapattuprajātānihanti tripuṣkaram

na cāpi naimiṣaṃ kṣetraṃ kurukṣetraṃ prabhāsakam /
kālindī yamunā gaṅgā na caiva na sarasvatī

caiva sarvatīrthāni ekādaśyāḥ samāni hi /
na dānaṃ na japo homo na cānyatsukṛtaṃ kracit

ekataḥ pṛthivīdānamekato harivāsaraḥ /
tato 'pyekā mahāpuṇyā iyamekādaśī varā

asminvarāhapuruṣaṃ kṛtvā devaṃ tu hāṭakam /
ghaṭopari nave pātre kṛtvā vai tāmrabhājane

sarvabījabhṛte viprāḥ sitavastrāvagaṇṭhite /
sahiraṇyapradīpādyaiḥ kṛtvā pūjāṃ prayatnanaḥ

varāhāya namaḥ pādau kroḍākṛtaye namaḥ kaṭim /
nābhiṃ gaṃbhīraghoṣayā uraḥ śrīvatsadhāriṇe

bāhuṃ sahasraśirase grīvāṃ sarveśvarāya ca /
mukhaṃ sarvātmane pūjyaṃ lalāṭaṃ prabhavāya ca

keśāḥ śatamayūkhāya pūjyā devasya cakriṇaḥ /
vidhinā pūjayitvā tu kṛtvā jāgaraṇaṃ niśi

śrutvā purāṇaṃ devasya māhātmyapratipādakam /
prātarviprāya dattvā ca yācakāya śubhāya tat

kanakakroḍasahitaṃ sannivedya paricchadam /
paścāttu pāraṇaṃ kuryānnātitṛptaḥ sakṛdvrataḥ

evaṃ kṛtvā naro vidyānna bhūya stanapo bhavet /
upoṣyaikādaśīṃ puṇyāṃ mucyate vai ṛṇatrayāt /
mano 'bhilaṣitāvāptiḥ kṛtvā sarvavratādikam