Garuda Purana · Chapter 1.128

iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe ekādaśīmāhātmyaṃ nāma saptaviṃśatyuttaraśatatamo 'dhyāyaḥ
śrīgaruḍamahāpurāṇam- 128
brahmovāca /
vratāni vyāsa vakṣyāmi yaistuṣṭaḥ sarvado hariḥ /
śāstrodito hi niyamo vrataṃ tacca tapo matam

niyamāstu viśeṣāḥ syuḥ vratasyāsya damādayaḥ /
nityaṃ triṣavaṇaṃ snāyādadhaḥ śayī jitendriyaḥ

strīśūdrapatitānāṃ tu varjayedabhibhāṣaṇam /
pavitrāṇi ca pañcaiva juhuyāccaiva śaktitaḥ

kṛcchrāṇyetāni sarvāṇi caretsukṛtavānnaraḥ /
keśānāṃ rakṣaṇārthaṃ tu dviguṇaṃ vratamācaret

kāṃsyaṃ māṣaṃ masūraṃ cacaṇakaṃ koradūṣakam /
śākaṃ madhu parānnaṃ ca varjayedupavāsavān

puṣpālaṅkāravastrāṇi dhūpagandhānulepanam /
upavāsena duṣyettu dantadhāvanamañjanam

dantakāṣṭhaṃ pañcagavyaṃ kṛtvā prātarvrataṃ caret /
asakṛjjalapānācca tāmbūlasya ca bhakṣaṇāt

upavāsaḥ praduṣyeta divāsvapnā kṣamaithunāt /
kṣamā satyaṃ dayā dānaṃ śaucamindriyanigrahaḥ

devapūjāgnihavane santoṣosteyameva ca /
sarvavrateṣvayaṃ dharmaḥ sāmānyo daśadhāsmṛtaḥ

nakṣatradarśanānnaktamanaktaṃ niśi bhojanam /
gomūtraṃ ca pala dadyādardhāṅguṣṭhaṃ tu gomayam

kṣīraṃ saptapalaṃ dadyāddadhnaścaiva palatrayam /
ghṛtamekaphalaṃ dadyātpalamekaṃ kuśodakam

gāyattryā caiva gandheti āpyāyasva dṛ dadhigrahaḥ /
tejo 'sīti ca devasya brahmakūrcavrataṃ caret

agnyādhānaṃ pratiṣṭhāṃ tu yajñadānavratāni ca /
vedavratavṛṣotsargacūḍākaraṇamekhalāḥ

māṅgalyamabhiṣekaṃ ca malamāse vivarjayat /
darśāddarśasya cāndraḥ syāttriṃśāhobhistu sāvanaḥ

ravisaṃkramaṇātsauro nākṣatraḥ saptaviṃśatiḥ /
sauro māso vivāhāya yajñādau sāvanasthitiḥ

yugmāgniyugabhūtāni ṣaṇmunyorvasurandhrayoḥ /
rudreṇa dvādaśī yuktā caturdaśyātha pūrṇimā

pratipadyapyamāvāsyā tithyormasyaṃ mahāphalam /
etadvyastaṃ mahāghoraṃ hanti puṇyaṃ purā kṛtam

prārabdhatapasā strīṇāṃ rajo hanyādvrataṃ na hi /
anyairdānādikaṃ kuryātkāyikaṃ svayameva ca

krodhātpramādāllobhādvā vratabhaṅgo bhavedyadi /
dinatrayaṃ na bhuñjīta śiraso muṇḍanaṃ bhavet

asāmarthye śarīrasya putrādīnkārayedvratam /
vratasthaṃ mūrchitaṃ vipraṃ jalādīnyanupāyayet