Garga Samhita · Chapter 5.19

kṛṣṇasya vrajāgamanotsavam
śrīnārada uvāca -
itthaṃ niśamya bhaktasya vacanaṃ bhaktavatsalaḥ /
smṛtvā vākyaṃ svakathitaṃ gaṃtuṃ cakre'cyuto matim

baladevaṃ sthāpayitvā kāryabhāreṣu sarvataḥ /
hemāḍhyaṃ kiṃkaṇojālaṃ caṃcalāśvaniyojitam

rathamāruhya sūryābhamuddhavena samanvitaḥ /
bhaktānāṃ darśanaṃ dātuṃ prayayau naṃdagokulam

govardhanaṃ gokulaṃ ca paśyan vṛndāvanaṃ vanam /
prāpto'bhūtpuline kṛṣṇaḥ kṛṣṇātīre manohare

koṭiśaḥ koṭiśo gāvo dṛṣṭvā kṛṣṇaṃ vrajādhipam /
ādhāvantyaḥ sarvatastaṃ snehasnutapayodharāḥ

udāsyakarṇavālām̐śca raṃbhamāṇāḥ savatsakāḥ /
mukhe kavalasaṃyuktā aśrumukhyo gatavyathāḥ

sarathaṃ sāruṇaṃ sāśvaṃ śaradarkaṃ yathā ghanāḥ /
rurudhustaṃ rathaṃ rājanuddhavasya prapaśyataḥ

śrīgopālo haristāsāṃ vadannāma pṛthak pṛthak /
śrīhastena tadaṃgāni spṛśan harṣaṃ jagāma ha

tatsamīpe gavāṃ vṛndaṃ gataṃ vīkṣya vrajārbhakāḥ /
śrīdāmādyā vismitāśca dūrādūcuḥ parasparam

gopā ūcuḥ -
rathaṃ sakumbhadhvajavāyuvegaṃ
sukāṃsyapatradhvaniniḥsvanaṃ tam /
śatāśvayuktaṃ śatasūryaśobhaṃ
gāvaḥ kathaṃ vā rurudhuḥ sakhāyaḥ

anyo na cāsmin hi gavāṃ praharṣaṇai-
rāyāti kiṃtu vrajarājanaṃdanaḥ /
sphuraṃti cāṃgāni hi dakṣiṇāni naḥ
śrīnīlakaṃṭhaḥ pratanoti toraṇam

śrīnārada uvāca -
itthaṃ vicārya manasā gopāḥ sarve samāgatāḥ /
dadṛśurmādhavaṃ mitraṃ gataṃ vastu yathā janāḥ

avaplutya rathātkṛṣṇaḥ paripūrṇatamaḥ svayam /
puro nidhāya tānsarvāndorbhyāṃ tatpremavihvalaḥ

muṃcannetrābjavārīṇi parirebhe pṛthakpṛthak /
aho bhakteśca māhātmyaṃ vaktuṃ ko'sti mahītale

te sarva rurudurgopā muṃcanto'śrūṇi maithila /
pravaktuṃ na samarthāḥ śrīkṛṣṇavikṣepavihvalāḥ

paripūrṇatamaḥ sākṣāddevo madhurayā girā /
āśvāsayāmāsa natān premānandasamākulān

uddhavaḥ preṣito vaktuṃ śrīkṛṣṇenārbhakaiḥ saha /
āgataṃ kathayāmāsa śrīkṛṣṇaṃ naṃdapattane

śrutvā''gataṃ naṃdasūnuṃ śrīkṛṣṇaṃ gopavallabham /
ānetuṃ nirgatāḥ sarve paripūrṇamanorathāḥ

bherīmṛdaṃgaiḥ paṭahaiḥ kalasvanai-
ratpūrṇakumbhairdvijavedaghoṣaṇaiḥ /
gandhākṣatairmaṃgalalājamiśritaiḥ
śrīnaṃdarājo'bhiyayau yaśodayā

tataḥ puraskṛtya madonnataṃ gajaṃ
sindūraśuṇḍādhṛtahemaśṛṅkhalam /
samāyayau śrīvṛṣabhānumukhyo
bhāvān kṛtistatra kalāvatīyutaḥ

naṃdopanandā vṛṣabhānavaśca
gopāśca vṛddhāstaruṇārbhakāśca /
sragveṇuguñjāparipicchayuktā
vinirgatāḥ pūrṇamanorathāste

gāyaṃta ārānnṛpanandanaṃdanaṃ
nṛtyaṃta ācālitapītavāsasaḥ /
vaṃśīdharā vetraviṣāṇapāṇayaḥ
praharṣitā darśanalālasā bhṛśam

sakhimukhebhyo harimāgataṃ parāṃ
niśabhya rādhā śayanātsamutthitā /
tābhyaḥ svabhūṣāḥ pradadau praharṣitā
prītā svagandhiṃ navapadminī yathā

dvātriṃśadaṣṭau kila ṣoḍaśa dve
yūthairyutā maithila gopikānām /
āruhya rādhā śibikāṃ manojñāṃ
samāyayau śrīdharadarśanārtham

tathā hi gopyaḥ kila koṭiśaśca
tyaktvā'tha sarvaṃ svagṛhasya kṛtyam /
vyatyastavastrābharaṇā nṛpeśa
samāyayuḥ premacalanmano'ṅgāḥ

sarvaṃ vrajaṃ pādapagomṛgadvijaṃ
premāturaṃ vīkṣya samāgataṃ kimu /
śrīnaṃdarājaṃ pitaraṃ ca mātaraṃ
nanāma kṛṣṇaḥ kṛtamastakāṃjaliḥ

śrīnandarājastanayaṃ cirāgataṃ
pragṛhya dorbhyāṃ hṛdaye nidhāya tam /
saṃsnāpayāmāsa sunetrajairjalai-
ryaśodayā prāptamanorathaścirāt

nandopanandānvṛṣabhānuvṛddhān
sarvānnamaskṛtya ca tatkṛtāśīḥ /
tathā vayasyaiśca parasparaṃ vā
laghūṃśca hastagrahaṇaiḥ sthito'bhūt

tataḥ samāruhya rathaṃ hariḥ svayaṃ
nidhāya naṃdaṃ ca gaje yaśodayā /
naṃdopanaṃdaiḥ sahito gavāṃ gaṇaiḥ
śrīnaṃdarājasya puraṃ viveśa saḥ

tadaiva devāḥ kila puṣpavarṣā-
mācāralājān puragopikāśca /
pracakrire tatra jayeti maṃgalaṃ
śabdaṃ ca gopā gṛhamāgate harau

dhanyaḥ sakhā te paramuddhavo'ya-
manena sākṣātkila darśito'tra /
tvaṃ jīvanaṃ gopajanasya gopā
ūcurgirā gad‌gadayedamārtāḥ

idaṃ mayā te kathitaṃ nṛpeśa
punarvraje hyāgamanaṃ hareśca /
kimicchasi śrotumatho surāsuraiḥ
paraṃ caritraṃ śubhadaṃ vicitram

iti śrīgargasaṃhitāyāṃ mathurākhaṃḍe śrīnāradabahulāśvasaṃvāde
śrīkṛṣṇāgamanotsavo nāmaikonaviṃśo'dhyāyaḥ