Garga Samhita · Chapter 5.20

rādhākṛṣṇakṛtaṃ ṛbhuṛṣi-muktidānam
bahulāśva uvāca -
agre cakāra kiṃ sākṣād‌ bhagavān vrajamaṇḍale /
rādhāyai gopikābhyaśca kathaṃsviddarśanaṃ dadau

gopīmanorathaṃ kṛtvā mathurāmājagāma ha /
etanme brūhi vipreṃdra tvaṃ parāvaravittamaḥ

śrīnārada uvāca -
saṃdhyāyāṃ rādhayā''hūtaḥ śrīkṛṣṇo bhagavānsvayam /
ekāṃte śītalaṃ śaśvajjagāma kadalīvanam

sphārasphuranameghagṛhaṃ raṃbhācandanacarcitam /
kṛṣṇāgarutsīkaraṃ ca sudhāraśmigalatsudham

etādṛśaṃ vanaṃ rādhā viyogānalavarcasā /
bhasmībhūtaṃ hi satataṃ kṛṣṇāśā tāṃ hi rakṣati

tatraiva sarve gopīnāṃ śatayūthāḥ samāgatāḥ /
tasyai nivedanaṃ cakrurmādhavāgamanasya hi

utthāya sahasā sākṣād‌vṛṣabhānuvarātmajā /
ānetumāyayau kṛṣṇaṃ sakhībhiḥ parivāritā

dadāvāsanapādyārghānupacārānmanoharān /
vadaṃtī sādaraṃ vākyaṃ kuśalaṃ kuśalādhikā

yuvakaṃdarpakoṭīnāṃ mādhuryyahāriṇaṃ harim /
dṛṣṭvā rādhā jahau duḥkhaṃ brahma jñātvā guṇaṃ yathā

prasannā tatra śṛṅgāramakarotkīrtinaṃdinī /
tayā no'kāri śrṛṃgāraḥ pāṃthe kṛṣṇe gate sati

na candanaṃ ca tāṃbūlaṃ bhojanaṃ ca sudhāsamam /
na kṛtaṃ divyaśayanaṃ hāsyaṃ vā na kṛtaṃ kvacit

paripūrṇatamaṃ kṛṣṇaṃ paripūrṇatamapriyā /
ānaṃdāśrūṇi muṃcaṃtī prāha gad‌gadayā girā

rādhovāca -
kiyad‍dūre yadupurī nāgataṃ kiṃ karoṣi hi /
kiṃ vade'haṃ raho duḥkhaṃ bhavato'śeṣasākṣiṇaḥ

saudāsarājamahiṣī damayaṃtī ca maithilī /
nāstyatra kāṃ puraskṛtya vade'haṃ virahaṃ ripum

matsamānāśrayā gopyo gadituṃ na kṣamāḥ kvacit /
śaraccandracakorīva mayūrīva ghanaṃ navam

śrīvṛndāvanacaṃdraṃ tvāṃ ghanaśyāmaṃ samutsahe /
tava sakhyoddhavenāśu dhanyena tvaṃ pradarśitaḥ /
anyaḥ ko'pi vraje nāsti yasya premṇā tvamāgataḥ

śrīnārada uvāca -
evaṃ vadantī satataṃ rudantīṃ
parāṃ priyāṃ vīkṣya ghṛṇāturāṅga /
āśvāsayāmāsa nayena sadyaḥ
pragṛhya dorbhyāṃ sravadaṃbunetraḥ

śrībhagavānuvāca -
mā śokaṃ kuru rādhe tvaṃ tvatprītyā'haṃ samāgataḥ /
āvayorbhedarahitaṃ tejaścaikaṃ dvidhā janaiḥ

yathā hi dugdhadhāvalye tathā''vāṃ sarvadā śubhe /
yatrāhaṃ tvaṃ sadā tatra viśleṣo na hi cāvayoḥ

pūrṇa brahma paraṃ cāhaṃ taṭasthā tvaṃ jagatprasūḥ /
viśleṣa āvayormadhye mṛṣā jñānena paśya sat

yathākāśasthito nityaṃ vāyu sarvatrago mahān /
tathā jalaṃ sūkṣmarūpaṃ tejo vyāptaṃ yathaidhasi

antarbahiryathā pṛthvī pṛthagbhūtā varānane /
tathā vikārarahito malavattriguṇairaham

tathā tvaṃ paśya mad‌bhāvaṃ sadānaṃdo bhavettataḥ /
ahaṃ mameti bhāvena dvitīyo'sti varānane

yāvadvano madhyagatastadutthitaḥ
svaṃ rūpamarkaṃ na hi dṛk prapaśyati /
tāvatparātmānamasau pradhānajai-
rguṇaistathā teṣu gateṣu paśyati

guṇeṣu saktaṃ kila bandhanāya
raktaṃ manaḥ puṃsi ca muktaye syāt /
mano dvayoḥ kāraṇamāhurārā-
jjitvā'tha tatkau vicaredasaṃgaḥ

sarva hi bhāvaṃ manasaḥ parasparaṃ
na hyekato bhāmini jāyate tataḥ /
premaiva kartavyamato mayi svataḥ
premṇā samānaṃ bhuvi nāsti kiṃcit

śrīnārada uvāca -
iti vākyaṃ hareḥ śrutvā prasannā kīrtinaṃdinī /
gopikābhiḥ samaṃ kṛṣṇaṃ pūjayāmāsa mādhavam

atha rātryāṃ hariḥ sākṣātkārtikyāṃ rāsamaṃḍale /
gatvā nanāda muralīṃ gopībhī rādhayā saha

yamunānikaṭe rājan rādhayā rādhikāpatiḥ /
rāmābhiḥ sundarībhiśca rāsaraṃge rarāja ha

yāvatīrgopikā rāse tāvad‌rūpadharo hariḥ /
reme vṛṃdāvane divye harirvṛndāvaneśvaraḥ

kvaṇannūpuramaṃjīro vanamālāvirājitaḥ /
pītāṃbaraḥ padmadhārī prabhātārkakirīṭadhṛk

vidyullatāsphuratprodyaddhemakuṇḍalamaṇḍitaḥ /
vetrabhṛd‌vādayanvaṃśīṃ naṭaveṣo ghanadyutiḥ

sphuratkaustubharat‍nāḍhyaḥ pracalatsnigdhakuṇḍalaḥ /
rarāja rādhayā rāse yathā ratyā ratīśvaraḥ

śacyā śakro yathā svarge ghanaścaṃcalayā yathā /
vṛndayā vṛndakāraṇye tathā vṛndāvaneśvaraḥ

vṛndāvanaṃ ca pulinaṃ vanānyupavanāni ca /
paśyan gopīgaṇaiḥ sārddhaṃ giriṃ govardhanaṃ yayau

gopīnāṃ śatayūthānāṃ mānaṃ vīkṣya vrajeśvaraḥ /
bhagavān rādhayā sākaṃ tatraivāṃtaradhīyata

atha govardhanād‍dūre suṃndaraṃ yojanatrayam /
śrīkhaṇḍagaṃdhasaṃyuktaṃ sa yayau rohitācalam

latākuñjanikuñjāśca paśyañjalpaṃstayā saha /
vicacāra girau ramye kāñcanīlatikālaye

tatra devasaro ramyaṃ badrināthena nirmitam /
pāṭhīnakūrmanakrādihaṃsa sārasasaṅkulam

sahasradalapadmaiśca maṇḍitaṃ taditastataḥ /
bhramaradhvanisaṃyuktaṃ puṃskokilarutavratam

vikasat padmagaṃdhāḍhyaṃ tattīraṃ mandamārutam /
ramayā rādhayā sārddhaṃ mādhavo niṣasāda ha

tattīraṃ pratapasyaṃtaṃ ṛbhuṃ nāma mahāmunim /
padaikena sthitaṃ śaśvat śrīkṛṣṇadhyānatatparam

ṣaṣṭivarṣasahasrāṇi ṣaṣṭivarṣaśatāni ca /
nirannaṃ nirjalaṃ śāṃtaṃ śrīkṛṣṇastaṃ dadarśa ha

papraccha vīkṣya taṃ rādhā hasantī prāha mādhavam /
māhātmyaṃ kuru bhakto'yaṃ paśya bhaktiṃ mahāmuneḥ

he ṛbho iti kṛṣṇena proktamuccairvacaḥ śubham /
na śrutaṃ tena kiñcidvā caramaṃ prāpitena vai

haristadā taddhṛdayād‌ babhūvāśu tirohitaḥ /
dhyānād‌gataṃ hariṃ vīkṣya munīṃdraścātivismitaḥ

netre unmīlya dadṛśe śrīkṛṣṇaṃ rādhayā''gatam /
ghanaṃ caṃcalayevāḍhyaṃ rañjayantaṃ diśo daśa

utthāta sadyo haribhaktitatparaḥ
pradakṣiṇīkṛtya hariṃ sarādhikam /
praṇamya mūrdhnā nipapāta pādayo-
ruvāca kṛṣṇaṃ bahugad‌gadākṣaraḥ

śrīṛbhuruvāca -
namaḥ kṝṣṇāya kṛṣṇāyai rādhāyai mādhavāya ca /
paripūrṇatamāyai ca paripūrṇatamāya ca

ghanaśyāmāya devāya śyāmāyai satataṃ namaḥ /
rāseśvarāya satataṃ rāseśvaryai namo namaḥ

golokātīta līlāya līlāvatyai namo namaḥ /
asaṃkhyāṃḍādhidevyai ca asaṃkhyāṃḍanidhaye namaḥ

bhūbhārahārāya bhuvaṃ gatābhyāṃ
macchāṃtaye cātra samāgatābhyām /
parasparaṃ saṃdhitavigrahābhyāṃ
namo yuvābhyāṃ harirādhikābhyām

śrīnārada uvāca -
ityuktvā kṛṣṇapādābje prakṣarad‌ bāṣpalocanaḥ /
premānandasamāyukto jahau prāṇānmahāmuniḥ

tadaiva nirgataṃ jyotirdaśasūryasamaprabham /
paribhramad daśadiśaḥ śrīkṛṣṇe līnatāṃ gatam

bhaktasya bhaktiṃ śrīkṛṣṇo vīkṣya vai premalakṣaṇām /
ānaṃdāśrukalāṃ muṃcan premṇā taṃ cājuhāva ha

punaḥ śrīkṛṣṇapādābjātkṛṣṇasārūpyavānmuniḥ /
nirgataḥ koṭikaṃdarpasannibho'tinatānanaḥ

dorbhyāṃ pragṛhya hṛdaye taṃ nidhāya kṛpākaraḥ /
āśvāsya kalyāṇakaraṃ karaṃ divyaṃ dadhāra ha

pradakṣiṇīkṛtya hariṃ ca rādhikāṃ
praṇamya cāruhya rathaṃ manoharam /
golokalokaṃ prayayāvṛbhurmuni-
rvirañjayanmaithila maṇḍalaṃ diśām

śrīrādhikā vismayamāgatā bhṛśaṃ
dṛṣṭvā parāṃ muktimṛbhormahāmuneḥ /
ānandavārīṇi vimuñcatī ciraṃ
jagāda kṛṣṇaṃ vṛṣabhānunaṃdinī

iti śrīgargasaṃhitāyāṃ mathurākhaṃḍe śrīnāradabahulāśvasaṃvāde
rāsotsave ṛbhumokṣo nāma viṃśo'dhyāyaḥ