Garga Samhita · Chapter 5.18

uddhavasya mathurā-pratyāvartanam -
barhiṣmatībhavā ūcuḥ -
aho layābdhau kṛpayā hariryā-
mud‍dhṛtya vārāhatanurmahātmā /
tāmanvadhāvad‍dhṛtaśiṃjinīśaro
bhūtvā dayāluḥ pṛthurādirājaḥ

latāgopya ūcuḥ -
svayaṃ sudhāṃ vā na vibhajya pūrvaṃ
dhanvantarirviśvabhiṣaṅ‍mahātmā /
tad‌baddhavaireṣu surāsureṣu
bhūtvā'tha yoṣitpradadau kalipriyaḥ

nāgeṃdrakanyā ūcuḥ -
athecchatīmenamaho varaṃ hariḥ
samāgatāṃ śūrpaṇakhāṃ mahāvane /
cakāra saumitrisakhaḥ kurūpiṇī-
maho kṛtaṃ tasya tayā kimapriyam

samudrakanyā ūcuḥ -
nityaṃ gṛhaśataṃ yāṃtī dātrī duḥkhaṃ sukhaṃ janān /
svīyā kathaṃ suśīlā ca caṃcalā'sminkathaṃ sthitā

apsarasa ūcuḥ -
asya prītyā karṇanāse gate vai rāvaṇasvasuḥ /
tyajaṃtu vārtāṃ tenāpi bhavatīnāṃ kṛpā kṛtā

divyā ūcuḥ -
sarveśvaro baliṃ nītvā baliṃ baddhvā dayāparaḥ /
adhaḥ kṣipanmuktināthaścitraṃ tatkathayā'bhavat

ādivyā ūcuḥ -
śatarūpāyutaṃ śāṃtaṃ tapasyantaṃ manuṃ purā /
daityairbādhāṃ gataṃ paścād‌rarakṣāsau dayānidhiḥ

satvavṛttaya ūcuḥ -
pūrvaṃ kaṣṭagataṃ bhaktaṃ dhruvaṃ kāyādhavaṃ ca vai /
paścād‌rarakṣa kṛpayā na pūrvaṃ dīnavatsalaḥ

rajovṛttaya ūcuḥ -
rukmāṃgadahariścandrāṃbarīṣāṇāṃ satāṃ hariḥ /
satyaṃ parīkṣan pradadau punarbhāgavatīṃ śriyam

tamovṛttaya ūcuḥ -
vṛṃdā yena chalaṃ prāptā chalinā balinā purā /
chalamayyā balinyā'dya kubjayā chalito hyayam

kṛpāṇī hyekato vakrā ghātayaṃtī janānbahūn /
kimu kubjā trivakrā ca śrīkṛṣṇena tribhaṃginā

paśyaṃtīnāṃ kṛṣṇamārgaṃ netre duḥkhaṃ gate bhṛśam /
avadhiḥ pādavikṣepaṃ vāmanasya karoti hi

pītatvaṃ tvaggatā pādau śaithilyaṃ pragatau ca naḥ /
mano vibhramatāmugrāṃ mādhave mādhavaṃ vinā

sapat‍nīhāracihnāḍhyamāgataṃ tamuṣaḥkṣaṇe /
hā daiva kasminsamaye drakṣyāmo naṃdanaṃdanam

śrīnārada uvāca -
iti kṛṣṇaṃ ciṃtayantyo gopikā premavihvalāḥ /
utkaṇṭhitāstā rurudurmūrchitā dharaṇīṃ gatāḥ

pṛthak pṛthak samāśvāsya vacobhirnayanaipuṇaiḥ /
saṃbodhya gopikāḥ sarvāḥ prāha rādhāṃ tadoddhavaḥ

uddhava uvāca -
paripūrṇatame kṛṣṇe vṛṣabhānuvarātmaje /
gaṃtumājñā dehi mahyaṃ namastubhyaṃ vrajeśvari

pratipatraṃ dehi śubhe śrīkṛṣṇāya mahātmane /
tena taṃ ca praṇamyāśu samāneṣye tavāṃtikam

śrīnārada uvāca -
atha rādhā lekhanīṃ ca nītvā pātraṃ maṣestvaram /
samācāraṃ ciṃtayantī tāvadaśrūṇi susruvuḥ

yadyatpatraṃ samānītaṃ rādhayā lekhanīyutam /
tattadārdrīkṛtaṃ jātaṃ nayanāmbujavāribhiḥ

aśrupravāhaṃ muṃcantīṃ kṛṣṇadarśanalālasām /
uddhavo vismayanprāha rādhāṃ kamalalocanām

uddhava uvāca -
kathaṃ likhasi rādhe tvaṃ kathaṃ duḥkhaṃ karoṣi hi /
sarvāṃ tasmai vadiṣyāmi vyathāṃ tvallekhanaṃ vinā

śrīnārada uvāca -
iti śrutvā vacastasya rādhayā gatabādhayā /
sarvābhirgopikābhiśva pūjito'bhūttadoddhavaḥ

natvā pradakṣiṇīkṛtya rādhāṃ rāseśvarīṃ parām /
gopīgaṇamanujñāpya natvā natvā punaḥ punaḥ

rathamāruhya divyābhaṃ rat‍nabhūṣaṇabhūṣitam /
gatabhṛtyābhimāno'sau saṃdhyāyāṃ naṃdamāyayau

mārtaṃḍa udayaṃ prāpte natvā gopīṃ yaśomatīm /
naṃdarājamanujñāpya navanaṃdāṃstadoddhavaḥ

vṛṣabhānūpanaṃdāśca samanujñāpya lokataḥ /
tathā kṛṣṇasakhīn sarvān rathamāruhya nirgataḥ

dūraṃ tamanugāḥ sarve gopā gopīgaṇāstathā /
sa nivṛtyātha tānsnehādudhavo mathurāṃ yayau

ekāṃte cākṣayavaṭe kṛṣṇātīre manohare /
natvā kṛṣṇaṃ parikramya premagad‌gadayā girā /
prāha sravannetrapadma uddhavo buddhisattamaḥ

uddhava uvāca -
kiṃ deva kathanīyaṃ me bhavato'śeṣasākṣiṇaḥ /
vidhatsva śaṃ rādhikāyā gopīnāṃ dehi darśanam

śrīkṛṣṇaṃ devadeveśaṃ samāneṣye tavāntikam /
itthaṃ vākyaṃ ca me bhūtaṃ rakṣa rakṣa kṛpānidhe

prahlādarukmāṃgadayoḥ pratijñāṃ
baleśca khaṭvāṃganṛpasya sākṣāt /
yathāṃbarīṣadhruvayostathā me
kṛtā ca bhakteśvara rakṣa rakṣa

iti śrīgargasaṃhitāyāṃ mathurākhaṃḍe śrīnāradabahulāśvasaṃvāde
gopīvākye uddhavāgamanaṃ nāmāṣṭādaśo'dhyāyaḥ