Garga Samhita · Verses 2.10-2

śrīkṛṣṇa gocāraṇavarṇanam -
śrīnārada uvāca -
gopecchayā rāmakṛṣṇau gopālau tau babhūvatuḥ /
gāścārayantau gopālaiḥ vayasyaiśceraturvane

agre pṛṣṭhe tadā gāvaḥ carantyaḥ pārśvayordvayoḥ /
śrīkṛṣṇasya balasyāpi paśyantyaḥ suṃdaraṃ mukham

ghaṃṭāmaṃjīrajhaṃkāraṃ kurvantyastā itastataḥ /
kiṃkiṇījālasaṃyuktā hemamālālasad‌galāḥ

muktāgucchairbarhipicchaiḥ lasatpucchācchakesarāḥ /
sphuratāṃ navarat‍nānāṃ mālājālairvirājitāḥ

śṛṅgayorantare rājan śiromaṇimanoharāḥ /
hemaraśmiprabhāsphūrjjat śṛṅgapārśvapraveṣṭanāḥ

āraktatilakāḥ kāścitpītapucchāruṇāṃghrayaḥ /
kailāsagirisaṃkāśāḥ śīlarūpamahāguṇāḥ

savatsā mandagāminya ūdhobhāreṇa maithila /
kuṃḍodhnyaḥ pāṭalāḥ kāścit lakṣantyo bhavyamūrtayaḥ

kāścitpītā vicitrāśca śyāmāśca haritāstathā /
tāmrā dhūmrā ghanaśyāmā ghanaśyāme gatekṣaṇāḥ

laghuśṛṅgyo dīrghaśṛṅgya uccaśṛṅgyo vṛṣaiḥ saha /
mṛgaśṛṅgyo vakraśṛṅgyaḥ kapilā maṃgalāyanāḥ

śādvalaṃ komalaṃ kāntaṃ vīkṣantyo'pi vane vane /
koṭiśaḥ koṭiśo gāvaścarantyaḥ kṛṣṇapārśvayoḥ

puṇyaṃ śrīyamunātīraṃ tamālaiḥ śyāmalairvanam /
nīpairnimbaiḥ kadambaiśca pravālaiḥ panasairdrumaiḥ

kadalīkovidārāmraiḥ jambubilvairmanoharaiḥ /
aśvatthaiśca kapitthaiśca mādhavībhiśca maṃḍitam

babhau vṛndāvanaṃ divyaṃ vasantartumanoharam /
nandanaṃ sarvatobhadraṃ kṣipaccaitrarathaṃ vanam

yatra govardhano nāma sunirjharadarīyutaḥ /
rat‍nadhātumayaḥ śrīmān mandāravanasaṃkulaḥ

śrīkhaṃḍabadarīraṃbhā devadāruvaṭairvṛtaḥ /
palāśaplakṣāśokaiścāriṣṭārjunakadambakaiḥ

pārijātaiḥ pāṭalaiśca caṃpakaiḥ pariśobhitaḥ /
karaṃjajālakuñjāḍhyaḥ śyāmairindrayavairvṛtaḥ

kalakaṃṭhaiḥ kokilaiśca puṃskokilamayūrabhṛt /
gāścārayan tatra kṛṣṇo vicacāra vane vane

vṛndāvane madhuvane pārśve tālavanasya ca /
kumudvane bāhule ca divyakāmavane pare

bṛhatsānugireḥ pārśve girernandīśvarasya ca /
suṃdare kokilavane kokiladhvanisaṃkule

ramye kuśavane saumye latājālasamanvite /
mahāpuṇye bhadravane bhāṃḍīropavane nṛpa

lohārgale ca yamunātīre tīre vane vane /
pītavāsaḥparikaro naṭaveṣo manoharaḥ

vetrabhṛdvādayanvaṃśīṃ gopīnāṃ prītimāvahan /
mayūrapicchabhṛnmaulī sragvī kṛṣṇo babhau nṛpa

agre kṛtvā gavāṃ vṛndaṃ sāyaṃkāle hariḥ svayam /
rāgaiḥ samīrayanvaṃśīṃ śrīnandavrajamāviśat

veṇuvaṃśīdhvaniṃ śrutvā śrīvaṃśīvaṭamārgataḥ /
gorajobhirnabho vyāptaṃ vīkṣya gehād‌vinirgatāḥ

dūrīkartuṃ hyādhibādhāmāhartuṃ sukhamuttamam /
vismartuṃ na samarthāstaṃ draṣṭuṃ gopyaḥ samāyayuḥ

saṃkocavīthīṣu na saṃgṛhītaḥ
śanaiścalan gogaṇasaṃkulāsu /
siṃhāvaloko gajabālalīlai-
rvadhūjanaiḥ paṃkajapatranetraḥ

sumaṃḍitaṃ maithilagorajobhi-
rnīlaṃ paraṃ kuntalamādadhānaḥ
hemāṅgadī maulivirājamāna
ākarṇavakrīkṛtadṛṣṭibāṇaḥ

godhūlibhirmaṃḍitakundahāraḥ
karṇopari sphūrjitakarṇikāraḥ /
pītāṃbaro veṇuninādakāraḥ
pātu prabhurvo hṛtabhūribhāraḥ

iti śrīgargasaṃhitāyāṃ vṛndāvanakhaṇḍe
śrīkṛṣṇa gocāraṇavarṇanaṃ nāma daśamo'dhyāyaḥ