Garga Samhita · Chapter 2.11

dhenukāsuramokṣaḥ -
śrīnārada uvāca -
ekadā sabalaḥ kṛṣṇaścārayan gā manoharāḥ /
gopālaiḥ sahitaḥ sarvairyayau tālavanaṃ navam

dhenukasya bhayād‌gopā na gatāste vanāntaram /
kṛṣṇo'pi na gatastatra bala eko viveśa ha

nīlāṃbaraṃ kaṭau baddhvā baladevo mahābalaḥ /
paripakvaphalārthaṃ hi tadvane vicacāra ha

bāhubhyāṃ kaṃpayan tālān phalasaṃghaṃ nipātayan /
garjaṃśca nirbhayaḥ sākṣādananto'nantavikramaḥ

phalānāṃ patatāṃ śabdaṃ śrutvā krodhāvṛtaḥ kharaḥ /
madhyāhne svāpakṛdduṣṭo bhīmaḥ kaṃsasakho balī

āyayau saṃmukhe yoddhuṃ baladevasya dhenukaḥ /
balaṃ paścimapādābhyāṃ nihatyorasi satvaram

cakāra kharaśabdaṃ svaṃ paridhāvan muhurmuhuḥ /
gṛhītvā dhenukaṃ śīghraṃ balaḥ paścimapādayoḥ

cikṣepa tālavṛkṣe ca hastenaikena līlayā /
tena bhagnaśca tālo'pi tālānpārśvasthitān bahūn

pātayāmāsa rājendra tadad‌bhutamivābhavat /
punarutthāya daityeṃdro balaṃ jagrāha roṣataḥ

yojanaṃ nodayāmāsa gajaṃ prati gajo yathā /
gṛhītvā taṃ balaḥ sadyo bhrāmayittvā'tha dhenukam

bhūpṛṣṭhe pothayāmāsa mūrchito bhagnamastakaḥ /
kṣaṇena punarutthāya krodhasaṃyuktavigrahaḥ

mūrdhni kṛtvā catuḥśṛṅgaṃ dhṛtvā rūpaṃ bhayaṃkaram /
gopān vidrāvayāmāsa śṛṅgaistīkṣṇairbhayaṅkaraiḥ

agre palāyitān gopān dudrāvāśu madotkaṭaḥ /
śrīdāmā taṃ ca daṃḍena subalo muṣṭinā tathā

stokaḥ pāśena taṃ daityaṃ sa tatāḍa mahābalam /
kṣepaṇenārjunoṃ'śuśca daityaṃ lattikayā kharam

viśālarṣabha etyāśu pādena svabalena ca /
tejasvī hyardhacaṃdreṇa devaprasthaścapeṭakaiḥ

varūthapaḥ kaṃdukena saṃtatāḍa mahākharam /
atha kṛṣṇo'pi taṃ nītvā hastābhyāṃ dhenukāsuram

bhrāmayitvā''śu cokṣepa girigovardhanopari /
śrīkṛṣṇasya prahāreṇa mūrchito ghaṭikādvayam

punarutthāya svatunuṃ vidhunvan dārayanmukham /
śṛṅgābhyāṃ śrīhariṃ nītvā dhāvandaityo nabhogataḥ

cakāra tena khe yuddhamūrdhvaṃ vai lakṣayojanam /
gṛhītvā dhenukaṃ daityaṃ śrīkṛṣṇo bhagavānsvayam

cikṣepādho bhūmimadhye cūrṇitāsthiḥ sa mūrcchitaḥ /
punarutthāya śṛṅgābhyāṃ nādaṃ kṛtvātibhairavam

govardhanaṃ samutpāṭya śrīkṛṣṇe prāṇitotkharaḥ /
giriṃ gṛhītvā śrīkṛṣṇaḥ prākṣipattasya mastake

detyo giriṃ gṛhītvā'tha śrīkṛṣṇe prāhiṇod‌balī /
kṛṣṇo govardhanaṃ nītvā pūrvasthāne samākṣipat

punardhāvan mahādaityaḥ śṛṅgābhyāṃ dārayanbhuvam /
balaṃ paścimapādābhyāṃ tāḍayitvā jagarja ha

nanāda tena brahmāṃḍaṃ praijad‌bhūkhaṃḍamaṃḍalam /
hastābhyāṃ saṃgṛhītvā taṃ baladevo mahābalaḥ

bhūpṛṣṭhe pothayāmāsa mūrcchitaṃ bhagnamastakam /
punastatāḍa taṃ daityaṃ muṣṭinā hyacutāgrajaḥ

tena muṣṭiprahāreṇa sadyo vai nidhanaṃ gataḥ /
tadeva vavṛṣurdevāḥ puṣpairnandanasaṃbhavaiḥ

dehād‌vinirgataḥ so'pi śyāmasundaravigrahaḥ /
sragvī pītāṃbaro devo vanamālāvibhūṣitaḥ

lakṣapārṣadasaṃyuktaḥ sahasradhvajaśobhitaḥ /
sahasracakradhvanibhṛddhayāyutasamanvitaḥ

lakṣacāmaraśobhāḍhyo'ruṇavarṇo'tirat‍nabhṛt /
divyayojanavistīrṇo manoyāyī manoharaḥ

kiṃkiṇījālasaṃyukto ghaṇṭāmaṃjīrasaṃyutaḥ /
hariṃ pradakṣiṇīkṛtya sabalaṃ divyarūpadhṛk

divyaṃ rathaṃ samāruhya dyotayanmaṃḍalaṃ diśām /
jagāma daityo he rājan golokaṃ kaṃprakṛteḥ param

śrīkṛṣṇo dhenukaṃ hatvā sabalo bālakaiḥ saha /
tadyaśastu pragāyad‌bhirbabhau gokulagogaṇaiḥ

rājovāca -
mune muktiṃ kathaṃ prāptaḥ pūrvaṃ ko dhenukāsuraḥ /
kathaṃ kharatvamāpanna etanme brūhi tattvataḥ

śrīnārada uvāca vairocanerbaleḥ putro nāmnā sāhasiko balī /
nārīṇāṃ daśasāhasrai reme vai gandhamādane

vāditrāṇāṃ nūpurāṇāṃ śabdo'bhūttadvane mahān /
guhāyāmāsthitasyāpi śrīkṛṣṇaṃ smarato muneḥ

durvāsaso'tha tenāpi dhyānabhaṅgo babhūva ha /
nirgataḥ pādukā''rūḍho durvāsāḥ kṛśavigrahaḥ

dīrghaśmaśruryaṣṭidharaḥ krodhapuṃjānaladyutiḥ /
yasya śāpādviśvamidaṃ kaṃpate sa jagāda ha

durvāsā uvāca -
uttiṣṭha gardabhākāra gardabho bhava durmate /
varṣāṇāṃ tu caturlakṣaṃ vyatīte bhārate punaḥ

māthure maṃḍale divye puṇye tālavane vane /
baladevasya hastena muktiste bhavitā'sura

nārada uvāca -
tasmād‌balasya hastena śrīkṛṣṇastaṃ jaghāna ha /
prahlādāya varo datto na vadhyo me tavānvayaḥ

iti śrīgargasaṃhitāyāṃ vṛndāvanakhaṇḍe
dhenukāsuramokṣo nāma ekādaśo'dhyāyaḥ