Garga Samhita · Chapter 2.10

vaideha uvāca //
yadrajodurlabhaṃ loke yogināṃ bahujanmabhiḥ //
tatpādābjaṃ hareḥ sākṣādbabhau kāliyamūrddhasu

ko'yaṃ ko'yaṃ pūrvaṃ kuśalakṛtkāliyo phaṇināṃ varaḥ //
enaṃ veditumicchāmi brūhi devarṣisattama

nārada uvāca //
svāyaṃbhuvāntare pūrvaṃ nāmnā vedaśirā muniḥ //
viṃdhyācale tapo'kārṣīdbhṛguvaṃśasamudbhavaḥ

tadāśrame tapaḥ kartuṃ prāptohyaśvaśirā muniḥ //
taṃ vīkṣya raktanayanaḥ prāha vedaśirā ruṣā

vedaśirā uvāca //
mamāśrame tapo vipra mā kuryāssukhadaṃ nahi //
anyatra te tapoyogyā bhūmirnāsti tapodhana

śrīnārada uvāca //
śrutvātha vedaśiraso vākyaṃ hyaśvaśirā muniḥ //
krodhayukto raktanetraḥ prāha taṃ munipuṃgavam

aśvaśirā uvāca //
mahāviṣṇoriyaṃ bhūmirna te me munisattama //
katibhirmunibhiścātra na kṛtaṃ tapa uttamam

śvasansarpa iva tvaṃ bho vṛthā krodhaṃ karoṣi hi //
sadā sarpo bhava tvaṃ hi bhūyātte garuḍādbhayam

vedaśirā uvāca //
tvaṃ mahā durabhiprāyo laghudrohe mahodyamaḥ //
kāryārthī kāka iva kau tvaṃ kāko bhava durmate

śrīnārada uvāca //
āvirāsīttato viṣṇuritthaṃ ca śapatostayoḥ //
svasvaśāpādduḥkhitayoḥ sāṃtvayāmāsa tau girā

śrībhagavānuvāca //
yuvāṃ tu me samau bhaktau bhujāviva tanau munī //
svavākyaṃ tu mṛṣākartuṃ samarthohaṃ munīśvarau

bhaktavākyaṃ mṛṣākartuṃ necchāmi śapatho mama //
te mūrdhni he vedaśiraścaraṇau me bhaviṣyataḥ

tadā te garuḍādbhītirna bhaviṣyati karhicit //
śṛṇume'śvaśiro vākyaṃ śocaṃ mā kuru mā kuru

kākarūpepi sujñānaṃ te bhaviṣyati niścitam //
paraṃ traikālikaṃ jñānaṃ saṃyutaṃ yogasiddhibhiḥ

śrīnārada uvāca //
ityuktvātha gate viṣṇau muniraśvaśirā nṛpa //
sākṣātkākabhuśaṃḍo'bhūdyogīṃdro nīlaparvate

rāmabhakto mahātejā sarvaśāstrārthadīpakaḥ //
rāmāyaṇaṃ jagau yo vai garuḍāya mahātmane

cākṣuṣe hyantare prāpte dakṣaḥ prācetaso nṛpa //
kaśyapāya dadau kanyā ekādaśa manoharāḥ

tāsāṃ kadrūśca yā śreṣṭhā sādyaivaṃ rohiṇī smṛtā //
vasudevapriyā yasyāṃ baladevo'bhavatsutaḥ

sā kadrūśca mahāsarpāñjanayāmāsa koṭiśaḥ //
mahodbhaṭānviṣavalānugrānpaṃcaśatānanān

mahāmaṇidharānkāṃścidduḥsahāṃśca śatānanān //
teṣāṃ vedaśirānāma kāliyo'bhūnmahāphaṇī

teṣāmādau phaṇīndrobhūccheṣo'naṃtaḥ parātparaḥ //
sodyaiva valadevo'sti rāmonaṃto'cyutāgrajaḥ

ekadā śrīhariḥ sākṣādbhagavānprakṛteḥ paraḥ //
śeṣaṃ prāha prasannātmā meghagambhīrayā girā

śrībhagavānuvāca //
bhūmaṃḍalaṃ samādhātuṃ sāmarthyaṃ kasyacinnahi//
tasmādenaṃ mahīgolaṃ mūrdhni tvaṃ hi samuddhara

anaṃtavikramastvaṃ vai yatonanta iti smṛtaḥ //
idaṃ kāryaṃ prakartavyaṃ janakalyāṇahetave

śeṣa uvāca //
avadhiṃ kuru yāvattvaṃ dharoddhārasya me prabho //
bhūbhāraṃ dhārayiṣyāmi tā vatte vacanādiha

śrībhagavānuvāca //
nityaṃ sahasravadanairuccāraṃ ca pṛthakpṛthak //
madguṇasphuratāṃ nāmnāṃ kuru sarpendra sarvataḥ

mannā-māni ca divyāni yadāyāṃtyavasānatām //
tadā bhūbhāramuttārya phaṇiṃstvaṃ susukhī bhava

śeṣa uvāca //
ādhārohaṃ bhaviṣyāmi madādhāraśca kobhavat //
nirādhāraḥ kathaṃ toye tiṣṭhāmi kathaya prabho

śrībhagavānuvāca .//
ahaṃ ca kamaṭho bhūtvā dhārayiṣyāmi te tanum //
mahābhāramayīṃ dīrghāṃ mā śokaṃ kuru matsakhe

śrīnārada uvāca //
tadā śeṣaḥ samutthāya natvā śrīgaruḍadhvajam //
jagāma nṛpa pātālādadhau vai lakṣayojanam

gṛhītvā svakareṇedaṃ gariṣṭhaṃ bhūmimaṃḍalam //
dadhāra svaphaṇe śeṣopyekasmiṃścaṃḍavikramaḥ

saṃkarṣaṇe'tha pātāle gate'nante parātpare //
anye phaṇīndrāstamanu viviśurbrahmaṇoditāḥ

atale vitale kecitsutale ca mahātale //
talātale tathā kecitsaṃprāptāste rasātale

tebhyastu bahmaṇā dattaṃ dvīpaṃ ramaṇakaṃ bhuvi //
kālīyapramukhāstasminnavasansukhasaṃvṛtāḥ

iti te kathitaṃ rājankāliyasya kathānakam//
bhuktidaṃ muktidaṃ sāraṃ kiṃ bhūyaḥ śrotumicchasi

iti śrīmadgargasaṃhitāyāṃ vṛndāvanakhaṇḍe śeṣopākhyānavarṇanaṃ nāma daśamo'dhyāyaḥ // १०