Garga Samhita · Chapter 2.9

brahmaṇaḥ kṛṣṇastutiḥ -
brahmovāca -
kṛṣṇāya meghavapuṣe capalāmbarāya
piyūṣamiṣṭavacanāya parātparāya /
vaṃśīdharāya śikhicaṃdrikayānvitāya
devāya bhrātṛsahitāya namo'stu tasmai

kṛṣṇastu sākṣātpuruṣotamaḥ svayaṃ
pūrṇaḥ pareśaḥ prakṛteḥ paro hariḥ /
yasyāvatārāṃśakalā vayaṃ surā
sṛjāma viśvaṃ kramato'sya śaktibhiḥ

sa tvaṃ sākṣātkṛṣṇacandrāvatāro
nandasyāpi putratāmāgataḥ kau /
vṛndāraṇye gopaveśena vatsān
gopairmukhyaiścārayan bhrājase vai

hariṃ koṭikandarpalīlābhirāmaṃ
sphuratkaustubhaṃ śyāmalaṃ pītavastram /
vrajeśaṃ tu vaṃśīdharaṃ rādhikeśaṃ
paraṃ sundaraṃ taṃ nikuṃje namāmi

taṃ kṛṣṇaṃ bhaja harimādidevamasmin
kṣetrajñaṃ kamiva viliptameghameva /
svacchāṅ‌gaṃ paramadhiyājñacaityarūpaṃ
bhaktyādyairviśadavirāgabhāvasaṃghaiḥ

yāvanmanaśca rajasā prabalena vidvan
saṃkalpa eva tu vikalpaka eva tāvat /
tābhyāṃ bhavenmanasijastvabhimānayoga-
stenāpi buddhivikṛtiṃ kramataḥ prayānti

vidyud‌dyutistvṛtuguṇo jalamadhyarekhā
bhūtolmukaḥ kapaṭapāntharatiryathā ca /
itthaṃ tathā'sya jagatastu sukhaṃ mṛṣeti
duḥkhāvṛtaṃ viṣayaghūrṇamalātacakram

vṛkṣā jalena calatāpi calā ivātra
netreṇa bhūricalitena caleva bhūśca /
evaṃ guṇaḥ prakṛtijairbhramato janasthaṃ
satyaṃ vaded‌guṇasukhādidameva kṛṣṇa

duḥkhaṃ sukhañca manasā prabhavañca supte
mithyā bhavetpunaraho bhuvi jāgare'sya /
itthaṃ vivekaghaṭitasya janasya sarvaṃ
svapnabhramādṛtajagatsatataṃ bhaveddhi

jñānī visṛjya mamatāmabhimānayogaṃ
vairāgyabhāvarasikaḥ satataṃ nirīhaḥ /
dīpena dīpakaśatañca yathā prajātaṃ
paśyet tathā''tmavibhavaṃ bhuvi caikatattvam

bhakto bhajedajapatiṃ hṛdi vāsudevaṃ
nirdhūmavahniriva muktaguṇasvabhāvaḥ /
paśyan ghaṭeṣu sajaleṣu yathendumekaṃ
etādṛśaḥ paramahaṃsavaraḥ kṛtārthaḥ

stuvanti vedāḥ satatañca yaṃ sadā
harermahimnaḥ kila ṣoḍaśīṃ kalām /
kadāpi jānanti na te triloke
vaktuṃ guṇāṃstasya jano'sti kaḥ paraḥ

vaktraiścaturbhistvahameva devaḥ
śrīpañcavaktraḥ kila pañcavaktraiḥ /
sahasraśīrṣāstu sahasravaktraiḥ
ya stauti sevāṃ kurute ca tasya

viṣṇuśca vaikuṇṭhanivāsakṛcca
kṣirodavāsī harireva sākṣāt /
nārāyaṇo dharmasutastathāpi
golokanāthaṃ bhajate bhavantam

aho'tidhanyo mahimā murāre-
rjānanti bhūmau munayo na mānavāḥ /
surāsurā vā manavo budhāḥ punaḥ
svapne'pi paśyanti na tatpadadvayam

varaṃ hariṃ guṇākaraṃ sumuktidaṃ parātparam /
rameśvaraṃ guṇeśvaraṃ vrajeśvaraṃ namāmyaham

tāmbūlasundaramukhaṃ madhuraṃ bruvantaṃ
bimbādharaṃ smitayutaṃ sitakundadantam /
nīlālakāvṛtakapolamanoharābhaṃ
vande calatkanakakuṇḍalamaṇḍanārham

sundaraṃ tu tava rūpameva hi
manmathasya manaso haraṃ param
āvirastu mama netrayoḥ sadā
śyāmalaṃ makarakuṇḍalāvṛtam

vaikuṇṭhalīlāpravaraṃ manoharaṃ
namaskṛtaṃ devagaṇaiḥ paraṃ varam /
gopālalīlābhiyutaṃ bhajāmyahaṃ
golokanāthaṃ śirasā namāmyaham

yuktaṃ vasantakalakaṇṭhavihaṃgamaiśca
saugandhikaṃ tvaraṇapallavaśākhisaṃgam /
vṛndāvanaṃ sudhitadhīrasamīralīlaṃ
gacchan harirjayati pātu sadaiva bhaktān

harati kamalamānaṃ lolamuktābhimānaṃ
dharaṇirasikadānaṃ kāmadevasya bāṇam /
śravaṇaviditayānaṃ netrayugmaprayāṇaṃ
bhaja yaduta samakṣaṃ dānadakṣaṃ kaṭākṣam

śaraccandrākāraṃ nakhamaṇisamūhaṃ sukhakaraṃ
suraktaṃ hṛtpūrṇaṃ prakaṭitatamaḥkhaṇḍanakaram /
bhaje'haṃ brahmāṇḍesakalanarapāpābhidalanaṃ
harerviṣṇordevairdivi bharatakhaṇḍe stutamalam

mahāpadme kiṃ vā paridhiriva cābhāti satataṃ
kadādityasphūrjad‌rathacaraṇa itthaṃ dhvanidharaḥ /
yathā nyastaṃ cakraṃ śatakiraṇayuktaṃ tu hariṇā
sphuracchrīmañjīraṃ haricaraṇapadme tvadhigatam

kaṭyāṃ pītāmbaraṃ divyaṃ kṣudraghaṇṭikayā'nvitam /
bhajāmyahaṃ cittaharaṃ kṛṣṇasyākliṣṭakarmaṇaḥ

bhaje kṛṣṇakroḍe bhṛgumunipadaṃ śrīgṛhamalaṃ
tathā śrīvatsāṅkaṃ nikaṣaruciyuktaṃ dyutiparam /
gale hīrāhārān kanakamaṇimuktāvalidharān
sphurat tārākārān bhramaravalibhārān dhvanikarān

vaṃśīvibhūṣitamalaṃ dvijadānaśīlaṃ
siṃdrūravarṇamatikīcakarāvalīlam /
hemāṃgulīyanikaraṃ nakhacaṃdrayuktaṃ
hastadvayaṃ smara kadambasugandhapṛktam

śanaiścalan mānasarājahaṃsa-
grīvākṛtau kandhara uccadeśe /
kādambinīmānaharau karau ca
bhajāmi nityaṃ harikākapakṣau

kaladarpaṇavad‌viśadaṃ sukhadaṃ
navayauvanarūpadharaṃ nṛpatim /
maṇikuṇḍalakuntalaśāliratiṃ
bhaja gaṇḍayugaṃ ravicandrarucim

khacitakanakamuktā raktavaidūryavāsaṃ
madanavadanalīlā sarvasaundaryarāsam /
aruṇavidhusakāśaṃ koṭisūryaprakāśaṃ
ghaṭitaśikhisuvīṭaṃ naumi viṣṇoḥ kirīṭam

yad‌dvārideśe na gatirguhendra
gaṇeśatārīreśadivākarāṇām /
ājñāṃ vinā yānti na kuñjamaṇḍalaṃ
taṃ kṛṣṇacandraṃ jagadīśvaraṃ bhaje

(anuṣṭup)
iti kṛtvā stutiṃ brahmā śrīkṛṣṇasya mahātmanaḥ /
punaḥ kṛtāñjalirbhūtvā svavijñaptiṃ cakāra ha

aparādhaṃ tu putrasya mātṛvattvaṃ kṣamasva ca /
ahaṃ tvannābhikamalātsambhavo'haṃ jagatpate

kāhaṃ lokapatiḥ kva tvaṃ koṭibrahmāṇḍanāyakaḥ /
tasmād‌vrajapate deva rakṣa māṃ madhusūdana

māyayā yasya muhyanti devadaityanarādayaḥ /
svamāyayā tanmohāya mūrkho'haṃ hyudyato'bhavam

nārāyaṇastvaṃ govinda nāhaṃ nārāyaṇo hare /
brahmāṇḍaṃ tvaṃ vinirmāya śeṣe nārāyaṇaḥ purā

yasya śrībrahmaṇi dhāmni prāṇaṃ tyaktvā tu yoginaḥ /
yatra yāsyanti tasmiṃstu sakulā pūtanā gatā

vatsānāṃ vatsapānāñca kṛtvā rūpāṇi mādhava /
vicacāra vane tvaṃ tu hyaparādhānmama prabho

tasmātkṣamasva govinda prasīda tvaṃ mamopari /
agaṇayyāparādhaṃ me sutopari pitā yathā

tvadabhaktā ratā jñāne teṣāṃ kleśo viśiṣyate /
pariśramātkarṣakāṇāṃ yathā kṣetre tuṣārthinām

tvad‌bhaktibhāve niratā bahavastvad‌gatiṃ gatāḥ /
yogino munayaścaiva tathā ye vrajavāsinaḥ

dvidhā ratirbhavedvarā śrutācca darśanācca vā /
aho hare tu māyayā babhūva naiva me ratiḥ

ityuktvā'śrumukho bhūtvā natvā tatpādapaṃkajau /
punarāha vidhiḥ kṛṣṇaṃ bhaktyā sarvaṃ kṣamāpayan

ghoṣeṣu vāsināmeṣāṃ bhūtvā'haṃ tvatpadāmbujam /
yadā bhajeyaṃ sugatistadā bhūyānna cānyathā

vayaṃ tu gopadeheṣu saṃsthitāśca śivādayaḥ /
sakṛtkṛṣṇaṃ tu paśyantastasmāddhanyāśca bhārate

ahobhāgyaṃ tu kṛṣṇasya mātāpitrostava prabho /
tathā ca gopagopīnāṃ pūrṇastvaṃ dṛśyase vraje

muktāhāraḥ sarvaviśvopakāraḥ
sarvādhāraḥ pātu māṃ viśvakāraḥ /
līlāgāraṃ sūrikanyāvihāraḥ
krīḍāpāraḥ kṛṣṇacandrāvatāraḥ

śrīkṛṣṇa vṛṣṇikulapuṣkara nandaputra
rādhāpate madanamohana devadeva /
saṃmohitaṃ vrajapate bhuvi te'jayā māṃ
govinda gokulapate paripāhi pāhi

karoti yaḥ kṛṣṇahareḥ pradakṣiṇāṃ
bhavejjgattīrthaphalaṃ ca tasya tu /
te kṛṣṇalokaṃ sukhadaṃ parātparaṃ
golokalokaṃ pravaraṃ gamiṣyati

śrīnārada uvāca -
ityabhiṣṭūya govindaṃ śrīmad‌vṛndāvaneśvaram /
natvā trivāraṃ lokeśaścakāra tu pradakṣiṇam

tatra cālakṣito bhūtvā netreṇājñāṃ dadau hariḥ /
punaḥ praṇamya svaṃ lokamātmabhūḥ pratyapadyata

atha kṛṣṇo vanācchīghramānayāmāsa vatsakān /
yatrāpi puline rājan gopānāṃ rājamaṃḍalī

gopārbhakāśca śrīkṛṣṇaṃ vatsaiḥ sārdhaṃ samāgatam /
kṣaṇārdhaṃ menire vīkṣya kṛṣṇamāyāvimohitāḥ

ta ūcurvatsakaiḥ kṛṣṇa tvaraṃ tvaṃ tu samāgataḥ /
kuruṣva bhojanaṃ cātra kenāpi na kṛtaṃ prabho

tataśca vihasan kṛṣṇo'bhyavahṛtyārbhakaiḥ saha /
darśayāmāsa sarvebhyaścarmājagarameva ca

sāyaṃkāle sarāmastu kṛṣṇo gopaiḥ parāvṛtaḥ /
agre kṛtvā vatsavṛndaṃ hyājagāma śanairvrajam

govatsakaiḥ sitasitāsitapītavarṇai
raktādidhūmraharitairbahuśīlarūpaiḥ /
gopālamaṇḍalagataṃ vrajapālaputraṃ
vande vanāt sukhadagoṣṭhakamāvrajantam

ānando gopikānāṃ tu hyāsītkṛṣṇasya darśane /
yāsāṃ yena vinā rājan kṣaṇo yugasamo'bhavat

kṛtvā goṣṭhe pṛthagvatsān bālāḥ svaṃ svaṃ gṛhaṃ gatāḥ /
jaguścāghāsuravadhamātmano rakṣaṇaṃ hare

iti śrīgargasaṃhitāyāṃ vṛndāvanakhaṇḍe
brahmastutiḥ nāma navamo'dhyāyaḥ