Scripture Library

Ganesha Purana · Chapter 2.51.55

2.51.55.1

adhyāya ५१ prāraṃbha :-
vyāsa uvāca /
kathamārādhitastena kāśīrājena vighnarāṭ /
kathaṃ ca carmadehena gataḥ sthānamanuttamam

2.51.55.2

etanme śaṃsa bhagavañśṛṇvaṃstṛpyāmi na kvacit /
ka uvāca /
samyakśṛṇu mahābuddhe kathāṃ pāpapraṇāśinīm

2.51.55.3

kathayāmi mahābuddhe itihāsaṃ purātanam /
yathā nirvāsano bhūpaḥ svānandabhavanaṃ gataḥ

2.51.55.4

mahimānaṃ parijñāya mudgalājjñānasāgarāt /
kāyena manasā vācā gaṇeśe bhaktimānabhūt

2.51.55.5

godānāni mahābhaktyā gajādānānyanekaśaḥ /
rathāśvagṛhadhānyāni daśa dānānyajānapi

2.51.55.6

vināyakaprītaye sa dadātyeva dine dine /
miṣṭānnabhojanairviprāṃstoṣayitvā dhanādibhiḥ

2.51.55.7

gaṇeśadṛḍhabhaktiṃ sa yācate sma dine dine /
māghaśuklacaturthyāṃ sa bhaumavāre śubhe dine

2.51.55.8

snānaṃ cakre uṣaḥkāle sandhyāṃ nityavidhiṃ tathā /
bhūṣayitvā tathātmānaṃ nānālaṃkaraṇāṃśukaiḥ

2.51.55.9

ākāyaṃ sakalāṃllokānbrāhmaṇānsuhṛdo'parān /
pūjayāmāsa vividhai ratnaraṃśukasaṃcayaiḥ

2.51.55.2.51.10

vāraṃvāraṃ paśyati sma vimānāgamanaṃ nṛpaḥ /
sabhāto gantukāmāṃstānniṣedhati muhurmuhaḥ

2.51.55.11

tato vināyako jñātvā kālaṃ tasya mahātmanaḥ /
preṣayāmāsa dūtābhyāṃ vimānaṃ dyutimattaram

2.51.55.12

gaṇeśa uvāca /
pramodāmoda gatvā tu kāśīrājaṃ dharātale /
madbhaktamatrānaya te vimānavaramāsthitam

2.51.55.13

ka uvāca /
tadājñāṃ prāpya taṃ natvā divo lokādubhau tadā /
divyaṃ vimānamādāya kāśīrājaṃ samīyatuḥ

2.51.55.14

tattejodharṣitā lokā menire pralayānalam /
kecicca menire vyabhre vidyutpātamivāgatam

2.51.55.15

tarkayāmāsurapare patantaṃ ravimaṇḍalam /
ghaṇṭānāṃ caiva tūryāṇāṃ gandharvāpsarasāṃ svanam

2.51.55.16

śrutvā'nye jajñire yānaṃ gaṇeśakṛpayāgatam /
aṅgaṇe kāśirājasya samuttīrṇaṃ śriyā lasat

2.51.55.17

āgatau rājanikaṭe pramodāmodasaṃjñakau /
gaṇau divyāmbaradharau divyabhūṣāvirājitau

2.51.55.18

divyamālyānulepādyairdivyadīptyā smarāviva /
vināyakasvarūpau tau natvā rājā nijāsane

2.51.55.19

upaviśya prapūjyāśu yāvatpṛcchati tau nṛpaḥ /
tāvattāvūcaturdūtau sarvaloke'tha ...

2.51.55.2.51.20

śṛṇu rājanpravakṣyāmi vākyaṃ vaināyakaṃ śubham /
na bhaktastriṣu lokeṣu tvattaḥ pratīkaro nṛpaḥ/
tvāṃ dhyāyaṃti divārātraṃ śṛṇvati śṛṇvati tvadguṇānvadate'niśam

2.51.55.21

dhanyo'si janmasāphalyaṃ kṛtaṃ puṇyavatā tvayā /
tvaddarśanātkṣiprataraṃ naṣṭaṃ pāpaṃ tamo mahat

2.51.55.22

na jānīvastapaḥ kiṃ te kṛtaṃ janmāntareṣu ca/
parabrahmasvarūpo'yaṃ bālarūpī vināyakaḥ

2.51.55.23

bhavatāṃ gṛhamāgatya nānālīlā adarśayat /
devasya devabhaktasya mahimā naiva gocaraḥ

2.51.55.24

yato vināyako devastvāṃ cintayati sarvadā /
tvadarthaṃ preṣitaṃ yānaṃ divyaṃ vaibhavasaṃyutam

2.51.55.25

na yāvo divyalokaṃ tvāṃ tadājñāvaśavartinau /
śīghramānayatāṃ kāśīrājamityāha nau vibhuḥ

2.51.55.26

śṛṇvatsu sarvalokeṣu śuśrāva sa vacastayoḥ /
amṛtābdhau nimagno'bhūdānandāśru sṛjanmuhuḥ

2.51.55.27

dehāvasthāṃ punarlabdhvā praṇamya tau uvāca saḥ /
dhanyaṃ janma ca pitarau niṣṭhā bhaktiśca sampadā

2.51.55.28

yaddurlabho mayā dṛṣṭau caraṇau vāṃ śubhāvahau /
vināyakasvarūpeṇa prāptau netuṃ paraṃ sthalam

2.51.55.29

ikṣusāgaramadhyasthaṃ durdarśaṃ carmacakṣuṣām /
yannirguṇaṃ cidānandaṃ paraṃ brahma sanātanam

2.51.55.2.51.30

viśvotpattisthitilayahetubhūtamagocaram /
yadaṇubhyo'pyaṇutaraṃ sthūlātsthūlataraṃ ca yat

2.51.55.31

sarvatragamasaktaṃ ca sākāraṃ guṇabhoktṛ ca /
nānārūpamarūpaṃ ca bhūbhāraharaṇodyatam

2.51.55.32

tena me raṅakabhūtasya kṛpeyaṃ mahatī kṛtā/
ityuktvā sa namaskṛtya sarvānāliṃgya prekṣya ca

2.51.55.33

dūtāvūce tvāruhataṃ praṇipātapuraḥ saram /
paścādahaṃ samārokṣye vimānaṃ martyadurlabham

2.51.55.34

amātyābhyāṃ namaskṛtya putraṃ datvā tayoḥ kare/
prajānāṃ pālanaṃ kāryaṃ dharmeṇa ca balena ca

2.51.55.35

mudgalena ca tatproktamanubhūtamidaṃ mayā /
ityuktvā carmadehena ruroha yānamuttamam

2.51.55.36

adhiṣṭhitaṃ tu dūtābhyāṃ pūjitābhyāmanekadhā /
āruḍhasya ca tatrāsya deho'bhūdravisannibhaḥ

2.51.55.37

divyairgandhairalaṃkāraistābhyāṃ saṃpūjitoṃ'śukaiḥ /
gatau tau vāyuvegena darśayantau ca tau nṛpam

2.51.55.38

bhūtapretapiśācānāṃ lokaṃ duṣkṛtakarmaṇām /
yatra te vikṛtākārā ūrdhvapādā adhomukhāḥ

2.51.55.39

pṛṣṭhabhāgamukhāḥ kecinmastakākṣāstathā'pare /
hṛdi netrāḥ pṛṣṭhanetrāḥ sūkṣmakaṇṭhā mahodarāḥ

2.51.55.2.51.40

yathā raśmau jālagate bhramanti paramāṇavaḥ /
tathā bhramanti gagane'nekarūpāḥ suduḥkhinaḥ

2.51.55.41

ko'yaṃ loko dūtavarau brūtaṃ ma iti so'bravīt

2.51.55.51

(२२३६)
iti śrīgaṇeśapurāṇe krīḍākhaṇḍe ekapaṃcāśattamo'dhyāyaḥ

2.51.55.1

adhyāya ५२ prāraṃbha :-
dūtāvūcatuḥ /
pretabhūtapiśācānāṃ loko'yaṃ rājasattama /
nindāpaiśūnyatāsteyakṛto yāntyatra bhūpate

2.51.55.2

tato'gre paśyati smāsau lokāvasurarakṣasām /
yatra te vividhākārā ūrdhvakeśā bhayānakāḥ

2.51.55.3

ghorāsyāśca lalajjihvā meghanādādharopamāḥ/
agnikuṇḍanibhāṃstānsa dṛṣṭvā papraccha tau punaḥ

2.51.55.4

keṣāmidaṃ puraṃ dūtau gadataṃ me'nupacchataḥ /
tāvūcaturayaṃ loko duṣṭadānavarakṣasām

2.51.55.5

śrautasmārtakriyāhīnā atra tiṣṭhanti pāpinaḥ /
tadagre sa dadarśātha lokaṃ gandharvasevitam

2.51.55.6

raupyasvargagṛhā yatra ratnakāṃcanabhūmayaḥ /
naranāryaḥ kāmaratyo nṛtyagānaviśāradāḥ

2.51.55.7

atisaukhyakaraṃ taṃ sa dṛṣṭvā papraccha tau punaḥ/
keṣāmidaṃ puraṃ dūtau gadataṃ me'nupṛcchataḥ

2.51.55.8

tāvūcatuḥ /
gandharvanagaraṃ cedaṃ devasthāneṣu gāyakāḥ/
prāpnuvanti mahāpuṇyādidaṃ puramanuttamam

2.51.55.9

siddhacāraṇayakṣāṇāṃ guhyakānāṃ puraṃ mahat /
nānāvrataistathā dānairgamyaṃ puṇyasamuccacaiḥ

2.51.55.2.52.10

dūtau ca tau nṛpaṃ paścāddarśayetāṃ garīyasīm/
indrasya nagarīṃ ramyāmaśvamedhaśatārjitām

2.51.55.11

suvarṇaratnagodānarathāśvagajadānataḥ/
gamyāṃ tīrthābhiṣekādyaiḥ puṇyairnānāvidhairapi

2.51.55.12

yatrendrabhavanaṃ ramyaṃ darśayetāmubhau nṛpam /
nṛpo nirīkṣya tau proce yacchrutaṃ dṛṣṭameva tat

2.51.55.13

agnilokaṃ tato'gre tau darśayetāṃ nṛpaṃ śubham /
yatrāgnihotriṇo vahnitejaso bhāntyanekaśaḥ

2.51.55.14

tato'gre darśayetāṃ tau yamalokaṃ śubhāśubham /
yatra puṇyakṛto yānti tathā pāpakṛto'pi ca

2.51.55.15

sa dharmaḥ sukṛtāṃ bhāti krūro duṣkṛtakarmaṇām /
sukṛtaḥ sarvabhogāṃstu duṣkṛto narakānapi

2.51.55.16

bhuṃjate prāṇinaḥ svasvakarmabhogānanekaśaḥ /
kumbhīpāke ca pacyante chidyante cāsipatrakaiḥ

2.51.55.17

ayoghanena tāḍyante kṛtyante kaṇṭakairapi /
tāmisraṃ cāndhatāmisre kṛmikuṇḍe sapūyake

2.51.55.18

pātyante narake ghore duṣkṛtaḥ prāṇinaḥ sa tān /
nirīkṣyāmīlayannetre yātaṃ yātamiti bruvan

2.51.55.19

tato'gre darśayetāṃ tau kauberaṃ lokamuttamam /
atyāścaryakaraṃ śakralokādativaraṃ param

2.51.55.2.52.20

ratnakāṃcanayuktāni gṛhāṇi dīptimanti ca /
ratnakāṃcanadānena tulādānaiśca koṭiśaḥ

2.51.55.21

prāpnuvanti mahābhāgāḥ kauberaṃ lokamuttamam /
tato'gre darśayetāṃ tau vāruṇaṃ lokamuttamam

2.51.55.22

tīrthānna dānato labhyaṃ kuberabhavanātigam /
apsu sarve śuṣkadehā vasanti sukhabhoginaḥ

2.51.55.23

vāpīkūpataḍāgānāṃ dṛśyante jaladāyinaḥ /
tato'gre darśayetāṃ tau vāyulokaṃ sukhāvaham

2.51.55.24

dadate vyajanaṃ grīṣme sauśīraṃ karpuraṃ jalam /
vasanti vāyuloke te svecchānātivihāriṇaḥ

2.51.55.25

tato'gre darśayetāṃ tau sūryalokaṃ durāsadam /
paṃcāgnisādhanaratāḥ sūryabhaktiparāyaṇāḥ

2.51.55.26

avāptakāmā munayaḥ sarve te sūryavarcasaḥ /
nivasanti nirābādhā brahmakalpaśataṃ narāḥ

2.51.55.27

nākṣatraṃ candralokaṃ ca darśayetāṃ nṛpaṃ tataḥ /
muktāphalasuvarṇānāṃ dānena somayāgataḥ

2.51.55.28

prāpnuvanti mahātmāno lokamenaṃ supuṇyataḥ /
golokaṃ ca tato'gre tau darśayetāṃ nṛpaṃ tadā

2.51.55.29

gosahasrāṇi ye dadyurbrāhmaṇebhyo yathāvidhi /
romasaṃkhyaistu kalpaiste goloke nivasanti hi

2.51.55.2.52.30

satyalokaṃ tato'gre tau darśayetāṃ cirantanam /
satyavratā vedavido vedādhyayanatatparāḥ

2.51.55.31

sadācārāḥ śāstravidaḥ purāṇapāṭhakāśca ye/
annadānaratā yajñakartārastīrthasevinaḥ

2.51.55.32

apratigrāhakā viprāḥ paropakṛtikāriṇaḥ /
tapasvino dānaparāḥ satyalokaṃ vrajanti te

2.51.55.33

gavyūtyaṣṭasahasreṇa vistīrṇaṃ tāvadāyatam /
yatra brahmā munigaṇairgaṇai rājarṣiṇāṃ paraiḥ

2.51.55.34

devarṣīṇāṃ dānavānāṃ gandharvāpsarasāṃ tathā /
stūyamāno divārātraṃ sevyate bhaktitatparaiḥ

2.51.55.35

yatrendra bhavanāmāni gṛhyāṇi paritā lasan /
taṃ dṛṣṭavā nṛpatirlokaṃ vismitaḥ prāha tau tadā

2.51.55.36

nṛpa uvāca /
dhanyo'smyanugṛhīto'smi gaṇeśena kṛpāvatā /
bhavadbhyāṃ ca yato dṛṣṭāḥ svargalokāḥ sudurlabhāḥ

2.51.55.37

ka uvāca/
taṃ punardarśayetāṃ tau vaikuṇṭhaṃ viśrutaṃ triṣu /
lokeṣu tatra gacchanti vaiṣṇavā bhaktitatparāḥ

2.51.55.38

sarvalokeṣu śreṣṭhaṃ taṃ nopamā yasya vidyate /
śepo na varṇane śakto'nekavaktro na cātmabhūḥ

2.51.55.39

urjaṃsnāyī jhaṣasnāyī meṣasnāyī tilānnadaḥ /
godo gītādhyayanavānprāṇināṃ copakṛcca yaḥ

2.51.55.2.52.40

viṣṇulokaṃ vrajatyāśu sahasra paṃcayojanam /
sūryacandraprakāśāni viśvakarmakṛtāni ca

2.51.55.41

mandirāṇi prabhāsanti ratnakāṃcana rājataiḥ /
yeṣu nā praviśatyeva tamoratnamarīcibhiḥ

2.51.55.42

parivārayuto lakṣmyā yatra tiṣṭhati daityahā /
jaharṣa nṛpavaryo'sau dṛṣṭvā tatpuṇyasaṃcayāt

2.51.55.43

tato'gre darśayetāṃ tau kailāsaṃ giriśālayam /
merostu śikhare ramye'yutayojanavistṛte

2.51.55.44

ravicandraprakāśāni harmyāṇi yatra bhānti ca /
yatra paṃcākṣarajapā rudrādhyāyajapāśca ye

2.51.55.45

anekasādhanaratāḥ puṇyavanto vrajanti ha /
taṃ dṛṣṭavā prāha nṛpatirvināyakaprasādataḥ

2.51.55.46

dṛṣṭvā sarve devalokāḥ puṇyadā darśanānnṛṇām /
tato'greṇa raviścandraḥ sahasrayojanāvadhi

2.51.55.47

vimānaprabhayā yāti na ca paśyanti kiṃcana /
meghanādanibhaṃ śabdaṃ śuśrāva duḥsahaṃ nṛpaḥ

2.51.55.48

girivaryaprakāśānāṃ bhramarāṇāṃ samantataḥ /
kasya śabdaḥ śrūyate'yamiti papraccha tau nṛpaḥ

2.51.55.49

kadā drakṣyāmi devasya pādapadmamiti sphuṭam /
dadarśa purato rājā śaktiṃ bhrāmarikāṃ dṛḍhām

2.51.55.2.52.50

anekādityasaṅakāśāṃ brahmāṇḍagrāsasāhasām /
prasāritamukhāṃ bhīmāṃ dṛṣṭvā mūrchāmiyānnṛpaḥ

2.51.55.51

āśvāsya ninyatustaṃ tu dūtāvagre nṛpaṃ tadā /
tata ādhāraśaktiṃ sa tato'pyatibhayaṅakarām

2.51.55.52

dṛṣṭavā cakampe nṛpatirbhrāmarīmastake sthitām /
karālakeśāṃ lamboṣṭhīṃ dīrghajihvāṃ prabhāyutām

2.51.55.53

āśvāsito vrajannagre so'paśyatkāmadāyinīm /
ādhāraśaktiṃ saṃviṣṭāṃ yojanāyutavistṛtām

2.51.55.54

bhramanti parvatā yasyāḥ śvāsavāyuvivartanāt /
vajrātiniṣṭhurairdehairyasyāstiṣṭhati sā purī

2.51.55.55

vadataḥ sma nṛpaṃ dūtau paśya svānandapattanam /
yaddhyānaparitṛpto'si koṭisūryanibhaṃ śubham

2.51.55.56

ratnakāṃcanasaṃbhinnā bhāti yatra gṛhāḥ pare /
muktārajatasūryāśmanimitāśca sahasraśaḥ

2.51.55.57

nīlāśmakuṭṭimā yatra pumāṃso yatra vahnibhāḥ /
yatra vāpīkūpataḍāgā bhānti ca sarāṃsi ca

2.51.55.58

svacchaśītāmbunīlāni pītaratnataṭāni ca /
yadambupānānna jarā na kṣudrogo nṛṇāṃ bhavet

2.51.55.59

ākrīḍā vimalā nānāvṛkṣavallīvirājitāḥ/
divyauṣadhyo divā sūryakoṭibhā bhānti yatra ca

2.51.55.2.52.60

candrapṛṣṭhe prapaśyanti kalaṃkaradite mukham /
vilāsinījanā yatra sarvadā'dhogate niśi

2.51.55.61

yatrapuṣpavanāmodaḥ śramaṃ hanti vihāriṇām /
ikṣusāgaratīraṃ tatprāpyotterurmudā yutāḥ

2.51.55.52

iti śrīgaṇeśapurāṇe krīḍākhaṃḍe dvipañcāśattamo'dhyāyaḥ

2.51.55.1

adhyāya ५३ prāraṃbha –
brahmovāca /
papurikṣurasaṃ puṇyanicayairlabhyamaṃjasā /
tanmadhye padminī śvetā sahasradalapadmayuk

2.51.55.2

sahasrakiraṇaprakhyaṃ tasyāṃ yatpadmamuttamam /
tanmadhye tasya devasya paryaṃkotimanoharaḥ

2.51.55.3

divyāstaraṇasaṃpanno divyadhūpaiḥ sudhūpitaḥ/
divyanānākusumavānsvaprabhai ratnasaṃcayaiḥ

2.51.55.4

bhāsayanprabhayā sarvā diśo vidiśa eva ca /
vyajanairvījyamānaḥ sa tatra śete vināyakaḥ

2.51.55.5

koṭicandranibho nānālaṃkāro nāgabhūṣaṇaḥ /
rambhāstambhanibhaṃ śuṇḍādaṇḍaṃ radanasundaram

2.51.55.6

dadhaddivyāmbaracchanno bhālanetraḥ kirīṭavān /
kuṇḍale cāṃgade mudrā kaṭisūtraṃ mahādhanam

2.51.55.7

siddhibuddhī siddhihetū pādau sarvahato'sya ha/
aṇimāgarimāśvetacāmarairvījitaḥ sma ha

2.51.55.8

jvālinī tejinī dīpyamāne cobhayataḥ sthite /
divyagandhena liptāṃgo divyamālāvibhūṣitaḥ

2.51.55.9

mahimā prathimādāya sthite dṛṣṭisamīpataḥ /
javaṃ gaṇḍūṣapātraṃ ca chatraṃ kāṃcanaratnayuk

2.51.55.2.53.10

tato dūtau kare dhṛtvā taṃ nṛpaṃ purato'sna tu /
īkṣete vāgavasaraṃ tato devo'nvabudhyata

2.51.55.11

tau dūtāvūcaturdevamānīto'yaṃ tavājñayā/
praṇamya ca sthitau dūraṃ tadājñāpekṣakāvubhau

2.51.55.12

tasminprabuddhe rājā sa praṇanāma kṛtāṃjaliḥ /
uvāca paramaprītyā dhanyo vaṃśo mamādya ha

2.51.55.13

pitarau janma vidyā ca tapo dṛṣṭiḥ sutādayaḥ /
yena me darśitaṃ brahma dhyeyaṃ padayugaṃ tava

2.51.55.14

na brahmaloke kailāse śakraloke'pi vaibhavaḥ /
etādṛśo'darśi mayā nānyaloke'pi kaścana

2.51.55.15

dūtāvūca āsyatāṃ sa tatastau ca niṣedatuḥ /
tatto'paśyadbālarūpaṃ dvibhujaṃ sa vināyakam

2.51.55.16

yena tau nihatau daityau devāntakanarāntakau /
atigauraṃ komalāṃge himakarpūrasannibham

2.51.55.17

na śaśāka tadā vaktuṃ bāṣparuddhamahāgalaḥ /
ānandāśrunadī pūrairāsiṃcastatpadadvayam

2.51.55.18

vijñāya tanmahābhaktimutthāpyāliṃgya vighnarāṭ /
mūrdhnyāghrātaśca pitṛvadbahukālagataḥ sutaḥ

2.51.55.19

devo'pi bāṣpakaṇṭho'bhūdubhau romāṃcasaṃyatau /
ubhau sukhābdhi saṃmagnau dehātītau yathā munī

2.51.55.2.53.20

uvāca vacanaṃ paścādbālarūpī vināyakaḥ /
tvadgṛhe'nekadhā tāta krīḍatā yatkṛtaṃ mayā

2.51.55.21

tatkṣāntaṃ hi tvayā sarvaṃ śubhaṃ vā yadi vā'śubham /
nihatā bahavo daityā dharābhāraśca saṃhṛtaḥ

2.51.55.22

pālitāḥ sādhulokāśca sthāpitā dharmasetavaḥ /
tavājñayā punaryātaḥ kaśyapaṃ sṛṣṭikārakam

2.51.55.23

praṇamya taṃ nijaṃ lokaṃ prāpto'muṃ sarvavaibhavam /
tvāmeva paricintyāhaṃ viśrāntiṃ na labhe kvacita

2.51.55.24

tavādibhāvaṃ jñātvā'haṃ mudgalaṃ munipuṃgavam /
apreṣayaṃ tava gṛhe tadanugrahatastvayā

2.51.55.25

prāptaṃ sthānaṃ mudgalena bhaktenedaṃ tvayā'pi ca /
yadagamyaṃ sadā devairbrahmādyairmunipuṃgavaiḥ

2.51.55.26

ka uvāca /
pītvā vāgamṛtaṃ tasya nṛpo natvā punaḥpunaḥ /
uvāca dhairyamālambya tuṣṭāva ca yathāmati

2.51.55.27

nṛpa uvāca /
namāmi te nātha padāravindaṃ brahmādibhirdhyeyatamaṃ śivāya /
yatpadmapāśāsiparaśvadhādicihnitaṃ vighnaharaṃ nijānām

2.51.55.28

yadarcyate viṣṇuśivādibhiḥ surairanekakāryārthakarairnaraiśca /
anekaśo vighnavināśadakṣaṃ saṃsārataptāmṛtavṛṣṭikāri

2.51.55.29

namāmi te nātha mukhāravindaṃ trilocanaṃ vahniravīndutāram /
kṛpākaṭākṣāmṛtasecanena tāpatrayonmūlanadṛṣṭaśakti

2.51.55.2.53.30

namāmi te nātha karāravindamanekahetikṣatadaityasaṃgham /
anekabhaktābhayadaṃ sureśa saṃsārakūpottaraṇāvalambam

2.51.55.31

tvameva sattvātmatayā bibharṣi sṛjasyajo rājasatāmavāpya /
tamoguṇādhāratayā ca haṃsi carācaraṃ te vaśagaṃ gaṇeśa

2.51.55.32

yaḥ śuddhacetā bhajate'niśaṃ tvāmākramya vighnā paridhāvasi tvam /
sa tvāṃ vaśe kṛtya sukhaṃ hi śete vatsaṃ yathā gauriva dhāvasi tvam

2.51.55.33

ye'nye bhajantaḥ samavāpya tāpānsaṃsāracakre bahudhā bhramantaḥ /
kadāpi te'nugrahamāpya te'pi bhajanti mānuṣyamavāpya te'pi

2.51.55.34

dharārajaḥ ko'pi mimīta nāke tārā gaṇaṃ vārimucāṃ ca dhārāḥ /
nālaṃ guṇānāṃ gaṇānāṃ hi kartuṃ śeṣo vidhātā tava varṣapūgaiḥ

2.51.55.35

nirākṛteste yadi nākṛtiḥ syādupāsanākarmavidhirvṛthā syāt /
guṇaprapaṃcaḥ prakṛtervilāsā janasya bhogaśca tathā katham syāt

2.51.55.36

satsaṃgatiścetsadanugrahaḥ syātsakarmaniṣṭhā sadanusmṛtiśca /
cittasya śuddhirmahatī kṛpā te jñānaṃ vimuktiśca na durlabhā syāt

2.51.55.37

ka uvāca /
iti stotraṃ samākarṇya parituṣṭo vināyakaḥ /
uvāca kāśīrājaṃ sa varaṃ vṛṇu hṛdi sthitam

2.51.55.38

nṛpa uvāca /
jātaṃ varasya kṛtyaṃ me yatrāhaṃ hi samāgataḥ /
itaḥ punarjanmamṛtī na syātāṃ tadvidhīyatām

2.51.55.39

ka uvāca /
stotreṇa prītastaṃ prāha tatheti divyadehinam /
sthāpayāmāsa nikaṭe kalpakoṭiyugāvadhi

2.51.55.2.53.40

mune stotraṃ mayā tasmātprāptaṃ tasya prasādataḥ /
nāradāya mayā proktaṃ nārado gautamāya ca

2.51.55.41

prāha so'pi munīnsarvānsarvakāmaphalapradam /
jñānendre mokṣadaṃ vighnanāśanaṃ pāvanaṃ param

2.51.55.42

yaḥ paṭhetsa labhedbhaktiṃ gaṇeśasannidhau naraḥ /
vidyākāmo labhedvidyāṃ trisandhyaṃ yaḥ paṭhennaraḥ

2.51.55.43

putrakāmo labhetputrāṃjayakāmo labhejjayam /
evaṃ sarvaṃ samākhyātaṃ yadyatpṛṣṭaṃ tvayā mune

2.51.55.44

ākhyānaṃ kāśirājasya kimanyacchrotumicchasi /
bhṛguruvāca /
iti śrutvā brahmavākyaṃ vyāso niḥsaṃśayo giraḥ

2.51.55.45

punaḥ papraccha sumatirvistareṇa kathāntaram /
vyāsa uvāca /
śuklasyātidaridrasya hṛtaṃ dāridryamādarāt

2.51.55.46

bhuktvā kadannaṃ tadgehe kāśirājaṃ sametya ca /
kiṃ cakāra sa devo'pi kāśirājaśca tadvada

2.51.55.47

kathaṃ tau nihatau daityau bhūbhāraśca kathaṃ hṛtaḥ /
sthāpitaśca kathaṃ dharmastanme śaṃsa yathāvidhi

2.51.55.48

ka uvāca /
kathayāmi samāsena caritaṃ bālarūpiṇaḥ /
hṛtvā śuklasya dāridryaṃ yadyattena kṛtaṃ mune

2.51.55.53

(२३४५)
iti śrīgaṇeśapurāṇe krīḍākhaṃḍe rājñasyānandaprāptivarṇanaṃ nāma tripaṃcāśattamo'dhyāyaḥ

2.51.55.1

adhyāya ५४ prāraṃbha :-
ka uvāca /
bhuktvā śuklagṛhe devo yāvatkrīḍati catvare /
kṣaṇaṃ suṣvāpa madhye sa tato nāgarikā janāḥ

2.51.55.2

bhojanāya samārambhaṃ kṛtvā munisutasya ha /
kāśirājagṛhaṃ tāvadākārayitumāgatāḥ

2.51.55.3

tānūce kāśirājastu krīḍankrīḍannito gataḥ /
paśyanti sma tato lokā gṛhegṛhe vināyakam

2.51.55.4

śuklasya sa gṛhaṃ yāta iti kecitsamūcire /
tato janā ninindustaṃ devaṃ śuklamakiṃcanam

2.51.55.5

janā ūcuḥ /
uṣṭrastu kaṇṭakānbhuṃkte hitvā komalapallavān /
asmānāḍhayānvihāyāsau daridrasya gṛhaṃ gataḥ

2.51.55.6

vṛthaiveśvaratāṃ nīto rājñā bālo yadīśvaraḥ /
syādayaṃ cettadā kuryātsaṃtuṣṭiṃ sarvacetasām

2.51.55.7

kadannaṃ tadapi svalpaṃ kathaṃ bhokṣyati bālakaḥ /
kecitsatpuruṣāsteṣu tamānayitumutsukāḥ

2.51.55.8

itastataḥ pradhāvanti vijñātuṃ vināyakam /
papracchurmārgagāṃllokānkvaciddṛṣṭo vināyakaḥ

2.51.55.9

pṛṣṭvā pṛṣṭvā vrajanti sma janāstadbhakti
tatparāḥ / keciducuḥ śuklagṛhaṃ gataḥ syāditi tānprati

2.51.55.2.54.10

te śīghraṃ tadgṛhaṃ yātā jñātvā suptaṃ vināyakam /
atiṣṭhansāttvikāstūṣṇīṃ prabuddhaḥ syādyadā vibhuḥ

2.51.55.11

tadainaṃ prārthayāmeti rājasāstu tamabruvan /
uttiṣṭha yāhi re bhauktumannaṃ paryuṣitaṃ bhavet

2.51.55.12

tvadarthaṃ nagare lokāḥ kolāhalaṃ prakurvate /
daridrasyāsya śuklasya śuklabhikṣāratasya ha

2.51.55.13

paryāptiścāsya bhikṣāyā jāyate na kadācana /
na jalaṃ ko'pi pibati tasya gehe kathaṃ bhavān /
bhuktavānkutsitaṃ cānnaṃ kaśyapasyātmajo'pi san

2.51.55.14

kecittaṃ vividhairvākyairninindustuṣṭuvuḥ pare /
muniruvāca /
evaṃ śrutvā sarvavākyamuvāca kaśyapātmajaḥ

2.51.55.16

deva uvāca /
bhaktyopapāditaṃ cānnaṃ bhuktamadya yathecchataḥ /
padamātraṃ hi gantuṃ me śaktistṛptasya nāsti ca //१५/
grāsamātraṃ hi bhoktuṃ me vāṃchā nāstyadhunā janāḥ /
ka uvāca /
evaṃ niṣṭhuratāṃ jñātvā janāste virasāstadā

2.51.55.17

ūcuḥ parasparaṃ kecitkartavyaṃ kiṃ hi bālake /
so'pi vihvalatāṃ jñātvā puravāsijanasya ha

2.51.55.18

eko'nantatvamāpede ghaṭākāśa iva kṣaṇāt /
jalakumbhagato yadvatsavitā'nekarūpavān

2.51.55.19

pratigṛhaṃ gato nānākrīḍāsakto'bhavadvibhuḥ /
kvacitsopāna mārgeṣu kvaciddolāgato'pi ca

2.51.55.2.54.20

kvacicca paryaṃkagataḥ kvacitsaudhagato'pi ca/
krīḍate hasate kvāpi gṛhabālairbhunakti ca

2.51.55.21

adhyeti kvāpi śāstrāṇi pāṭhayatyapi kutracit /
taṃ dṛṣṭvā svagṛhaṃ yātaṃ kāśirājena saṃyutam

2.51.55.22

jahṛṣe sa gṛhasvāmī dhanyo'hamiti cābravīt /
evaṃ sarvagṛhe rājasahito'sau vināyakaḥ

2.51.55.23

kvacidabhyajyate tailaiḥ snāti kvāpi śubhairjalaiḥ /
pādaprakṣālanaṃ kvāpi kriyate paramādarāt

2.51.55.24

upacāraiḥ ṣoḍaśabhiḥ pūjyate kvāpi bhaktitaḥ /
bhujyate paramānnena bālabhāvādyathā tathā

2.51.55.25

kvacinnānāparimalaiḥ kastūrīcandanādibhiḥ /
arcyate sumanobhiśca naivedyairvividhairapi /
sevyate gṛhapatnībhiḥ śiśubhiḥ sevakairapi

2.51.55.26

bhuktvā yatheṣṭhaṃ suṣvāpa pādasaṃvāhanādibhiḥ /
vedāparāyaṇarataḥ kvāpi gānaratastu saḥ

2.51.55.27

śṛṇoti satkathāṃ kvāpi harerapi kathāṃ kvacit /
kvacicca pramadānṛtyaṃ paśyati sma nṛpeṇa saḥ

2.51.55.28

ārārtikyaiśca vividhaiḥ kvāpi nīrājyate vibhuḥ /
kvacicca pāśahasto'sau krīḍate kṣudrabālakaiḥ

2.51.55.29

purāṇaṃ vācyate kvāpi dharmaśāstraṃ smṛtistathā/
evaṃ sarvagṛhe bhuktvā sarveṣāṃ kāmapūrakaḥ

2.51.55.2.54.30

yasya yasya yathā vāṃcchā tathā tāṃ vyadadhādvibhuḥ/
suprasanno mahādevo yathākalpadrumo'pi ca

2.51.55.31

yathā cintāmaṇiḥ kāmadhenurvā'khilakāmadā/
dīnanātheti yannāma kṛtaṃ tatsārthakaṃ tadā

2.51.55.32

devadundubhayo neduḥ puṣpavṛṣṭirgṛhe gṛhe /
dṛṣṭvetthaṃ kāśirājā'sau bhrānta ūce nijānprati

2.51.55.33

ayaṃ vināyako bālaḥ sannidhau mama tiṣṭhati/
sa kathaṃ sarvagṛhagaḥ pūjyate sarvamānavaiḥ

2.51.55.34

gṛhe gṛhe tu sa kathaṃ tiṣṭhatyatrāpi sāmpratam /
yo māmākārayati taṃ vadāmi ca punaḥ punaḥ

2.51.55.35

vinā vināyakaṃ yāmi kathaṃ bhoktuṃ bhavadgṛhe /
gṛhamadhyasthitaṃ cānnaṃ bhuṃje kāśyapasaṃyutaḥ

2.51.55.36

taṃ bhuktavantaṃ tyaktvaiva bahisthamata dṛṣṭavān /
itastato'bruvaṃllokā dṛḍhavismitamānasāḥ

2.51.55.37

nānāgṛhagato bhuṃkte kāśirājayuto vibhuḥ /
ākarṇya vacanaṃ teṣāṃ hasannūce nṛpaḥ sa tān

2.51.55.38

vinā māṃ sa kathaṃ yāto bhoktuṃ nānāgṛhāniti /
tato gṛhāṇi dvitrīṇi gatvā rājā hi dṛṣṭavān

2.51.55.39

svaṃ ca kaśyapaputraṃ ca bhuktavantaṃ gṛhe gṛhe /
etasminnantare prāptau snātvā tau munisattamau

2.51.55.2.54.40

bhuktyarthaṃ bhramamāṇau tau sanakaśca sanandanaḥ /
purīṃ mahotsavayutāṃ vināyakamayīṃ śubhām

2.51.55.41

yadyadgṛhaṃ praviśatastatra tatra vināyakam /
paśyataḥ smaratastau tu yātaḥ sma bahireva ca

2.51.55.42

bhuktaṃ ca bhuktavantaṃ ca suptaṃ krīḍantameva ca /
japantaṃ ca paṭhantaṃ ca pāṭhayantaṃ ca paśyataḥ

2.51.55.43

evaṃ sarvatra taṃ dṛṣṭvā parasparamathocatuḥ /
na sthalaṃ bhojanārthāya dṛśyate'thātra nirmalam

2.51.55.44

yāvaḥ śuklagṛhaṃ kartā sa nānātithyamādarāt /
ityuktvā tadgṛhaṃ yāto dṛṣṭastatrāpi kāśyapaḥ

2.51.55.45

adhomukhau kṣudhārtau tau yātaḥ sma nagarādbahiḥ/
paśyataḥ sma parāṃ mūrtiṃ sphuṭāṃ vaināyakīṃ śubhām

2.51.55.46

antarhadi ca netre sve nimīlyonmīlya vā punaḥ/
adhaścordhvaṃ cāntarāle dikṣu caiva vidikṣu ca

2.51.55.47

tasthatustau tataḥ paścāddhyānastimitavīkṣaṇau /
kṣaṇamuddhāṭya nayane vināyakasvarūpiṇam

2.51.55.48

parasparaṃ paśyati sma sanakastaṃ paro'pi tam /
yaṃ devaṃ tau dhyāyataḥ sma paśyatastaṃ vināyakam

2.51.55.49

sarvavyāpī sarvarūpa āvirāsīttayoḥ puraḥ/
daśabāhuḥ siṃhagataḥ siddhibuddhivirājitaḥ

2.51.55.2.54.50

suprakāśaṃ kirīṭaṃ ca kuṇḍale cāṃgade dadhat /
divyagandhaṃ ca mālyaṃ ca nāgaṃ candrārddhameva ca

2.51.55.51

kastūrītilakaṃ divye vasane daśanaprabhe/
saumyatejāḥ sumanasāṃ duṣṭānāṃ durnirīkṣaṇaḥ

2.51.55.52

tyaktvā bhramantu tattvajñau praṇametāṃ vināyakam /
baddhvā karapuṭaṃ tau taṃ tuṣṭuvāte mahāmatī

2.51.55.53

tau ūcatuḥ /
nityamadvaitamaparaṃ paraṃ brahma sanātanam /
tameva parayā bhaktyā paṃcabhūtātmakaṃ vibhum

2.51.55.55

carācaragataṃ sarvarūpiṇaṃ parameśvaram /
bhramanti yasya romāñcagatā brahmāṇḍakoṭayaḥ ५४
sa kathaṃ stavanīyo'sau vedāntānāmagocaraḥ /
āvayorvāñchitaṃ deva tvayā jñātvā prapūritam

2.51.55.56

na vidmo mahimānaṃ te bālarūpadharasya ha /
bhūbhāraharaṇārthāya kāśyapaṃ rūpamuttamam

2.51.55.57

ka uvāca /
antardadhe tu tadrūmupabhayoḥ stuvatoḥ puraḥ /
na paśyato yadā rūpaṃ tadā tau śramavarjitau

2.51.55.58

prāsādaṃ paramaṃ kṛtvā mūrtiṃ vaināyakīṃ śubhām /
brahmavāditraghoṣaiśca yathā dṛṣṭaṃ śubhe dine

2.51.55.59

sthāpayāmāsaturnāma varado'yaṃ vināyakaḥ /
gaṇeśatīrthamiti ca tatra yatsara uttamam

2.51.55.2.54.60

sthāpitaṃ nāma tasyāpi tatra tatkhyātimāgamat /
atra snānena dānena gaṇeśa pūjanena ca

2.51.55.61

sarvāṃnkāmānavāpnoti hitvā pāpaṃ purātanam /
tatreyurmunayaḥ sarve devāśca sadigīśvarāḥ

2.51.55.62

dṛṣṭvā saṃpūjitaṃ devaṃ stutvā natvā yayuḥ punaḥ /
muniruvāca /
evaṃ tau bālarūpasya prabhāvaṃ draṣṭumāgatau

2.51.55.63

dṛṣṭaprabhāvau saṃtuṣṭau svasthānamāpatuḥ param /
ya idaṃ śṛṇuyādbhaktyā bālasya caritaṃ śubham

2.51.55.64

sarvānkāmānavāpnoti pretyaṃ brahmamayo bhavet /
na bālagrahapīḍā syātsarvatra vijayī bhavet

2.51.55.54

(२४०९)
iti śrīgaṇeśapurāṇe krīḍākhaṇḍe bālacarite catuḥpaṃcāśattamo 'dhyāyaḥ

2.51.55.1

adhyāya ५५ prāraṃbha :
muniruvāca /
tayostu gatayoḥ paścānmohāpanno mahānṛpaḥ /
kāśirājo hayārūḍho bhramati sma gṛhe gṛhe

2.51.55.2

vināyakamacakṣāṇaḥ kva gato bhoktyumityuta /
vihāya māṃ kathaṃ yāto miṣṭhānnaṃ bhoktumekaśaḥ

2.51.55.3

gṛhe gṛhe paryapṛcchatkva gato'sau vināyakaḥ /
idānīṃ bahirāyāto bhuktvā krīḍitumutsukaḥ

2.51.55.4

kāśirājena sahito vṛthā tvaṃ pṛcchase katham /
evaṃ nirākṛtaḥ sarvaiḥ puravāsijanairasau

2.51.55.5

paramaṃ śramamāpanno kuṭumbyakiṃcano yathā /
kecidūcuḥ śuklagṛhe krīḍate'sau vināyakaḥ

2.51.55.6

tato harṣayutaḥ śuklagṛhaṃ yāto nṛpastadā /
dadarśa cāṃgaṇe tasya bālaṃ vṛṣagataṃ vibhum

2.51.55.7

dṛṣṭvā taṃ vṛṣabhārūḍhaṃ trinetramiva cāparam /
praṇamya parayā bhaktyā baddhāṃjalipuṭo'bravīt

2.51.55.8

nṛpa uvāca /
na bāle sādhucaritaṃ na jñānaṃ sneha eva ca /
vihāya māṃ kathaṃ bhuktaṃ miṣṭānnaṃ vividhaṃ tvayā

2.51.55.9

ka uvāca /
evamākarṇya tadvākyamuvāca sa vināyakaḥ /
yatra yatra mayā bhuṃkte tatra bhuktaṃ tvayā'pi ca

2.51.55.2.55.10

mithyā tvaṃ bhāṣase manda bālasvamasi buddhitaḥ /
vadiṣyanti janāḥ sarve paccheti ca sasākṣikam

2.51.55.12

śrutvā vaināyakaṃ vākyaṃ janā ūcurnṛpaṃ tadā /
idānīṃ hi tvayā bhuktaṃ vināyakasamīpataḥ //११/
kathaṃ mithyā bhāṣase tvaṃ vṛddhaḥ sannṛpasattama /
tataḥ prakṛtimāpanno jñātavānsa nṛpo'bravīt

2.51.55.13

ajñeyā te parā māyā yogināmapi mohinī/
dhanyo'si sarvarūpeṇa sarvatra mānito yataḥ

2.51.55.14

ka uvāca /
romāṃcāṃcitagātraḥ sa dhyānamevānvapadyata /
tato vaināyakaṃ rūpaṃ svayamevānvapadyata

2.51.55.15

yathā jalaṃ jalaṃ kṣiptaṃ jalatvaṃ pratipadyate /
punarmāyābalenāsau bhinnamūrtirnṛpottamaḥ

2.51.55.16

sa tu taṃ śibikārūḍhaṃ nināya nijamandiram /
nānāvāditranirghoṣairnṛtyairgītairanekaśaḥ

2.51.55.17

śuśubhe bālako'tīva deveṣu madano yathā /
anuyāti sapatnīko bhaktyā śuklaḥ śanaiḥ śanaiḥ

2.51.55.18

parāvartya mukhaṃ dṛṣṭo bālena vrīḍatā bhṛśam /
kathaṃ prayāto dattvā'smai varaṃ kaṃ ca na toṣakam

2.51.55.19

ityevaṃ manasā tasmai dadau sampattimuttamām /
kuberasampadaḥ śreṣṭhāṃ sarvāścaryakarīṃ vibhuḥ

2.51.55.2.55.20

śuklaḥ parāvṛtto dīnaḥ sapatnīko mahāmanāḥ /
kadannabhakṣaṇāddevo ruṣṭaḥ kiṃ tviti cintayan

2.51.55.21

nāpaśyatāṃ parṇakuṭīṃ cintāṃ paramikāṃ yayau /
tatastu sevakāḥ śuklaṃ sugandhatailamardanaiḥ

2.51.55.22

snāpayitvā'pyalaṃcakrurbhūṣaṇaiḥ kāṃcanāṃśukaiḥ /
tathaiva tasya patnīṃ ca balādiva niyojitāḥ

2.51.55.23

atyāścaryayutau cobhau paśyataḥ sarvasampadaḥ /
ratnakāṃcanabhittīśca maṃcānnānāsanāni ca

2.51.55.24

muktāmaṇigaṇaiścitrāṇyanekāni sthale sthale /
kāṃcanāni ca bhāṇḍāni vastrāṇyācchādanāni ca

2.51.55.25

bhakṣyāṇyanekarūpāṇi khādyāni vividhāni ca /
dṛṣṭvetthaṃ sakalaṃ caubhau parasparamabhāṣatām

2.51.55.26

kimidaṃ bhavanaṃ kṣudraṃ jātamindragṛhopamam /
tataḥ śuklo'bravītpatnīṃ vināyakaprasādataḥ

2.51.55.27

sarvaṃ jānīhi subhage na samakṣaṃ mahāvibhuḥ /
dadāti tu parākṣe'sau alpamātreṇa toṣayan

2.51.55.28

svayaṃ dattaṃ bahutaramalpameva hi manyate /
bhaktyopapāditaṃ svalpaṃ manyate bahulaṃ vibhuḥ

2.51.55.29

tasmādbhayena kāmena snehena ripubhāvataḥ /
smartavyo namanīyaśca stavyaḥ pūjyo hitāya ca

2.51.55.2.55.30

muniruvāca / tatastu nagare guptau narāntakasamīritau /
āstāṃ dūtau ciraṃ kālaṃ śūraśca capalastathā

2.51.55.31

yaccaṇḍaśabdāttrailokyaṃ kampate'śvatthapatravat /
yacchiraḥkampataḥ kampaṃ yānti devāḥ savāsavāḥ

2.51.55.32

parākrame bale śabde trailokye na samastayoḥ /
ayaṃ tu śibikāmadhye hantavyo munidehajaḥ

2.51.55.33

yato'nena hatā daityā balinaḥ pūrvamāgatāḥ /
teṣāṃ pratikṛtiḥ kāryetyevamūcuḥ parasparam

2.51.55.34

vidyudrūpaṃ samāsthāya garjataḥ sma mahāravau /
tattejasā pratihatacakṣuṣā vīrasaṃcayāḥ /
kimidaṃ kimidamiti cukruśurbhṛśavihvalāḥ

2.51.55.35

etasminnantare prāptau śibikānikaṭaṃ tu tau /
vāhāḥ palāyitāḥ sarve tyaktvā taṃ ca vināyakam

2.51.55.36

dhṛtau vināyakenobhau hastābhyāṃ balinau balāt /
utpāṭituṃ dharaṇyā sa bhrāmayāmāsa tāvubhau

2.51.55.37

karurṇādramanāḥ paścātsthāpayāmāsa bhūtale/
hantavyaḥ puruṣeṇāsau yaḥ parākramato'dhikaḥ

2.51.55.38

maśake nihate kaḥ syātpumarthaḥ puruṣasya ha /
tataḥ papraccha tau kasya dūtau vā kathyatāmiti

2.51.55.39

svaśaktyā tu kṛte yatne na doṣaḥ puruṣasya ha /
evaṃ tadvacanaṃ śrutvā procatuḥ purataḥ sthitau

2.51.55.2.55.40

karuṇābdhirbhavānkhyāto dinanāthaḥ pitā'si naḥ /
sekakṛccopanetā ca vidyādo'bhayado'paraḥ

2.51.55.41

annadaḥ paṃcapitaro vikhyātā bhuvanatraye /
āvāṃ dūtau guptarūpau narāntakasamīritau

2.51.55.42

tava vighnakarau deva rakṣitau kṛpayā tvayā /
bhūtaṃ bhavyaṃ bhavaccaiva sarvaṃ jānāsi sarvavit

2.51.55.43

ye ye vaireṇa tvāṃ yātā hatāste kṣaṇamātrataḥ /
etasminnantare paurā vināyakamathābruvan

2.51.55.44

kimetau rakṣitau devaduṣṭau lokabhayaṃkarau /
anayorupakārastu kṛto'pakṛtaye bhavet

2.51.55.45

pannagāya payo dattaṃ viṣameva hi jāyate /
muniruvāca /
tānuvāca tato devaḥ pūrvamevānayormayā

2.51.55.46

abhayaṃ dattamadhunā viparītaṃ kathaṃ bhavet /
ityuktvā'mocayattau sa tato rājā'bravītpunaḥ

2.51.55.47

aparādhānasaṃkhyātānkṣāntvā tau mocitau ripū /
maraṇe jīvane jantoricchā te kāraṇaṃ matā

2.51.55.48

ityuktvā mandiraṃ prāptau kāśirājavināyakau /
natvā tau sarvalokāśca svaṃ svaṃ bhavanamāgaman

2.51.55.49

praśaṃsanto nṛpaṃ nānārūpiṇaṃ ca vināyakam

2.51.55.55

(२४५८)
iti śrīgaṇeśapurāṇe krīḍākhaṃḍe dūtamocanaṃ nāma paṃcapaṃcāśattamo'dhyāyaḥ

Original text: gaṇeśapurāṇam · Sanskrit Wikisource contributors · Sanskrit Wikisource · CC BY-SA 4.0