Ganesha Purana · Chapter 1.6

// atha ṣaṣṭho'dhyāyaḥ //
sūta uvāca //
iti tadvacanaṃ śrutvā cyavano bhṛgunandanaḥ /
tvarayāsvamupādāya kalaśaṃ jalasaṃbhṛśam

duḥkhita paraduḥkhena tūṣṇīmevā gamadgṛham /
taṃ bhṛguḥ paripapraccha vilaṃbakāriṇaṃ sutam

bhṛguruvāca //
kimapūrvaṃ tvayā dṛṣṭaṃ lakṣyase ca kito yathā /
vilambaśca kathaṃ jāto vada putra mamāgrataḥ

putra uvāca //
saurāṣṭra deśe vikhyāte daivate nagare mune /
somakānta itikhyāto rājā rājīvalocanaḥ

cakre rājyaṃ bahutithaṃ dharmeṇa pālayanprajāḥ /
durbhagatvaṃ gato daivāt putra rājyaṃ niveśyasaḥ

patnyāsudharmayāyukto bharturājñā bhṛtāpitaḥ /
subala jñānagamyābhyāṃ prakṛtibhyāmihāgataḥ

galatkuṣṭhī kṛmiyuto vibhramandurgamaṃ saraḥ /
sahasrabhagatāprāpto yathendro gautamānmuneḥ

kvasā sudharmā cārvaṅgī kva galatkuṣṭhavānpatiḥ /
iti me pṛcchato vṛttaṃ tadīyaṃ gatavānkṣaṇaḥ

tadīyaiḥ karuṇāvākyairmano me kalilaṃ tvabhūt /
tatohaṃ kalaśaṃ pūrṇaṃ kṛtvā śīghramupāgataḥ

sūta uvāca //
sarvaṃ cā kathayattasmai tayāyatkathitaṃ vacaḥ /
śrutvātacca punaḥ putraṃ cyavanaṃ bhṛgurabravīt

bhṛguruvāca //
sarvānānayatān śīghraṃ putra gaccha mamājñayā /
drakṣyāmi kautukaṃ teṣāṃ svīyaṃ vā darśayāmi tān

sūta uvāca //
itthaṃ sa coditaḥ pitrā cyavanaḥ karuṇānidhiḥ /
jagāma saraso bhūmiṃ sudharmāṃ draṣṭumutsukaḥ

tasminneva kṣaṇemātyau phalakandabharānvitau /
subala jñānagamyau tāvāgatau rājasaṃnidhim

tataūce sa tu muniḥ sudharmāṃ cārulocanām /
pitā me svāśramaṃ sarvānākārayati suvrate

iti tadvacanaṃ śrutvā sudharmā śokavihvalā /
tadaiva sāvadhānāttanuḥprāṇaivāgate

suśīlā rājapatnī sā pītvā tadvacanāmṛtam /
agamatsāsucārvaṅgī prakṛti dvaya saṃyutā

somakāntena patinā muni putrasaraḥsarā /
gaṇeśaskandasahitā śivevaśivasaṃyutā

śuśubhe mārgamadhye sā vācaspatipuraḥsarā /
mantraghoṣayutaṃ prāpa bhṛgorāśrama maṇḍalam

nānāpuṣpalatākīrṇaṃ nānāpakṣivināditam /
mārjārānakulāḥ śyenāgajāgāvomayūrakāḥ

bhujaṃgā pakṣiṇaḥ siṃhāvyāghrāḥ krīḍanti yatra ca /
na ca vāyurbhṛśaṃ vāti na sūryastapate bhṛśam

na varṣati bhṛśaṃ megho varṣate ca tadicchayā /
viviśuste harṣayutā muniputra puraḥsarāḥ

tatrādbhutaṃ vyāghramṛgājinasthaṃ dadarśa sūryapratimaṃ bhṛguṃ tam /
rājātha patnī prakṛti dvayaṃ ca nanāma baddhāñjalirabravīcca

rājovāca //
adyāśiṣo me saphalā dvijendra dvijeritā dharmacayastapopi /
ājanmatohaṃ paripūta eṣa piturjananyāśca sujīvitaṃ me

bhavadṛśiḥ saṃprati hantyayainaḥ pūrvārjitaiḥ puṇyacayauḥ kṛtāpi /
āgāmi kalyāṇakarī munīndra kālatraye janma karoti pūtam

saurāṣṭradeśe khalu devatākhye pure kṛtaṃ rājyamamoghadṛṣṭe /
bhītena pāpādvijadevatādi pūjākṛtā nītimatā munīndraḥ

ākasmikaṃ me duritaṃ kimetat prādurbabhūvogrataraṃ durantam /
yenāhamīdṛk kudaśāṃ praṇīto jāne na kiṃcitpratikāramatra

apāyatāṃ yānti kṛtā upāyā yuṣmatkṛtopāyamupāyamīhe /
nirvairatāṃ yānti hi jātivairāstavāśramevāṃ śaraṇaṃ prapannaḥ

sūta uvāca //
śrutveti vacanaṃ tasya bhṛgustu karuṇāyutaḥ /
uvāca somakāntaṃ taṃ dhyānenālokya suvrataḥ

bhṛguruvāca //
upāyaṃ vacmi nṛpate nacintāṃ kartumarhasi /
mamāśramagatāduḥkhaṃ nahirvindanti janminaḥ

janmāntara kṛtaṃ caiva duritaṃ te nṛpottama /
yene māṃ gamitovasthāṃ kathayiṣye tadapyaham

kurvantu bhojanaṃ sarve cirakālaṃ bubhukṣitāḥ /
vanādvanāntarāṃ yātāḥ śrāntāḥ klāntānanābhṛśam

sūta uvāca //
ityuktvā snāpayāmāsa sutailābhyaṅgapūrvakam /
bhojayāmāsa cānnāni ṣaḍrasāni tvanekaśaḥ

bubhujustepi viśrāntā bhṛgoramitatejasaḥ /
ājñayā munivaryasya susnātāḥ suṣṭhvalaṃkṛtāḥ

suṣupurmṛduśayyāyāṃ hitvā cintāṃ duratyayām /
muninā kalpitāyāṃte svarājyaṃ gamitāiva

// iti śrīgaṇeśapurāṇe upāsanākhaṇḍe bhṛgorāśramāgamanaṃ nāma ṣaṣṭho'dhyāyaḥ