Ganesha Purana · Chapter 1.14

// atha caturdaśo'dhyāyaḥ //
rājovāca //
tataḥ kimakarod brahmā vīkṣyāṃḍāni sahasraśaḥ /
kathaṃ ca sṛṣṭimakarodājñāṃ prāpya gajānanāt

bhṛguruvāca //
abhavadgarvasaṃpannaḥ svātmanyevaṃ vicārayat /
vedmiśāstrāṇivedāṃśca purāṇānyāgamānapi

jñānavijñānasaṃpannaḥ śāpānugrahaśaktimān /
brahmāṇḍāni ca dṛṣṭāni sṛṣṭīnāṃ racanāstathā

idānīṃ sṛṣṭikaraṇe'śakyaṃ me naiva kiñcana /
ityevaṃ garvasampanne sṛṣṭyarthaṃ kamalodbhave

vighnā nānāvidhā bhūpa prādurāsansahasraśaḥ /
taṃ veṣṭayitvā brahmāṇaṃ sthitāḥ paramadāruṇāḥ

yathāmattāḥ puṣparasaiḥ saradhā madhujālakam /
trinetrāḥ pañcahastāśca kūpāsyāḥ saptapāṇayaḥ

tryandhrayaḥ pañcatuṇḍāśca saptatuṇḍāḥ ṣaḍaṅghrayaḥ /
daśāsyāḥ pañcapādāśca tāladantā vṛkodarāḥ

nānārūpā mahāsatvāḥ saṃkhyātuṃ na ca te kṣamāḥ /
cakampe druhiṇasteṣāṃ nānārāvānniśamyatān

kecittaṃ muṣṭibhirjaghnurnemuścanunuvuḥ pare /
catuḥśikhāsu saṃgṛhya dolayāmāsurādarāt

catvāryapi mukhānyasya jahasustaṃ tathāpare /
nininduśca praśaṃsāṃ ca cakruḥ kecinsiṣevire

mocayāmāsurapare babandhurapare punaḥ /
mocituṃ punarapyanye vicakarṣuritastataḥ

āliliṃguśca taṃ keciccucumbuḥ śiśuvatpare /
aṣṭaśmaśruṣutaṃ dhṛtvā nanarte koṣṭahastavān

evaṃ sa paravān brahmā cintāśoka samanvitaḥ /
akharvaṃ sṛṣṭigarvaṃ taṃ tatyāja hṛdisaṃgatam

jagāma mahatīṃ mūrchāṃ nirāśaḥ svasyajīvane /
muhūrtamātre tu gate sasmāra manasā vibhum //
prārthayāmāsa kāruṇyādrudanniva gajānanam

brahmovāca //
na cāyuṣyaṃ svalpaṃ vividha janane sakta manaso,
na me tattvajñānaṃ bhavajaladhitāraṃ suvimalam /
janurbhūmau labdhvā tava bhajanato yāmi paramāṃ,
kadā bhuktiṃ muktiṃ nirupama sukhāṃ vā khilaguro /१५//
tvatkaṭākṣāmṛtenākto bhaktaḥ sīdati te vibho /
iyaṃ lajjātavaivāstāṃ na me mṛtyuścirāyuṣaḥ

bhṛguruvāca //
ityasau prārthayanneva śuśrāva gaganeritām /
giraṃ tapasveti tataḥ prārthayāmāsa tāṃ punaḥ

antarhitāśca te vighnāḥ śrutāyāṃ nabhasogiri /
nānārūpā mahāvīryā muktvā taṃ kamalāsanam

sa muktaścintayāmāsa padmayonirmahāyaśāḥ /
vināmantraṃ vināsthānaṃ kathaṃ tapsye tapo mahat

iti vyākula cittosau babhrāma jalamadhyataḥ /
ananya manasā dhyāyan gajānanamanāmayam

mukuṭena virājantaṃ muktāratnayujā śubham /
raktacandana liptāṅgaṃ sindūrāruṇamastakam

muktādāmalasatkaṇṭhaṃ sarpayajñopavītinam /
anarghya ratnaghaṭita bāhubhūṣaṇabhūṣitam

sphuranmarakatabhrājadaṃgulīyaka śobhitam /
mahā hi veṣṭita bṛhannābhiśobhimahodaram

vicitra ratnakhacita kaṭisūtra virājitam /
suvarṇasūtra vilasadraktavastrasamāratam

bhālacandraṃ lasaddantanta śobhārājatkaraṃ param /
evaṃ dhyāyati tasmiṃstu punareva nabho vacaḥ

udiyāya vaṭaṃ paśya vaṭaṃ paśyeti sundaram /
śrutveti vacanaṃ brahmā punaścintāmavāpa saḥ

// iti śrīgaṇeśapurāṇe upāsanākhaṇḍe brahmacintāvarṇanaṃ nāma caturdaśo'dhyāyaḥ