Ganesha Purana · Chapter 1.15

adhyāya १५ prāraṃbhaḥ –
bhṛguruvāca //
vyāsāyākathayaccāgre brahmā lokapitāmahaḥ /
somakāṃta pravakṣyāmi kathāṃ śṛṇuta sādaram

brahmovāca //
tato'haṃ sumahatsvapnaṃ dadarśa munisattama/
bhramatā bhramatā vyoma jale dṛṣṭo vaṭo mahān

mahāvātātapādbhistu naṣṭe sthāvarajaṃgame /
avaśiṣṭa: kathamayameka eva vaṭo mahān

evaṃ saṃśayamāpannastat patre bālakaṃ laghum /
caturbāhuṃ samukuṭaṃ kuṃḍalābhyāṃ virājitam

maṇimuktāmayaṃ dāma bibhratkaṃṭhe suśobhitam /
ardhacandra raktavastraṃ kaṭisūtraṃ tathaiva ca

ekadantaṃ nakhapurgajāsyaṃ tejasā jvalat /
dṛṣṭvaivaṃ tarkayāmāsa bālakaṃ kathamatra vai

puṣkareṇa ca tadbālaṃ jalaṃ manmastake'kṣipat /
tato'hamājahāsoccaiściṃtānaṃda samanvitaḥ

mayyā hasati bālaḥ sa uttatāra vaṭāttataḥ /
sa mamāṃkaṃ samāgatya maṃjuvākyaṃ jagāda ha

bāla uvāca //
laghorlaghutaro'si tvaṃ vṛthā vṛddho'pi mūḍhadhīḥ /
vighnairabhihato'si tvaṃ sṛṣṭiciṃtā samāvṛtaḥ

tapaściṃtā paro nityaṃ bibhramaṃ jalamadhyagaḥ /
sarvaṃ ciṃtāharaṃ te'hamupāyaṃ caturānana

upādiśāmi te maṃtramekākṣaramimaṃ mama /
puraścaraṇa mārgeṇa daśalakṣaṃ japasva tam

tataḥ pratyakṣatāṃ yāsye dāsye sāmarthyamuttamam /
dṛṣṭvaivaṃ svapnamāścaryaṃ pratibuddho'bhavaṃ hyaham

śuśoca ca kadā me syāddarśanaṃ parameśituḥ /
dṛṣṭasvapno'bhavaṃ magna ānaṃdamaya sāgare

tataḥ snātvā paraṃ maṃtraṃ jajāpa bahuvāsaram /
ekapādena kamale tiṣṭhan dhyāyan gajānanam

jitendriyo jitāhāraḥ kāṣṭhapāṣāṇavat sthiraḥ /
divyavarṣasahasraṃ sa tapastepe paraṃ mahat

tato me mukhato jvālāḥ prādurāsan durāsadāḥ /
tābhiḥ sarvāṇi bhūtāni pīḍāmāpuḥ sudāruṇām

tato gajānano dṛṣṭvā tāṃ niṣṭhāṃ mama sudṛḍhām /
tutoṣa parayā bhaktyā prādurāsīttataḥ puraḥ

koṭi sūrya samāna śrīrjvālāmālīva havyabhuk /
dahanniva trilokīṃ sa saṃharanniva rodasī

paraśukamaladhārī divya māyā vibhūṣaḥ /
sakala duritahārī sarva saundarya kośaḥ /
karivara mukha śobhī bhaktavāṃchā prapoṣaḥ /
sura manuja munīnāṃ sarva vighnaika nāśaḥ

tejorāśimahaṃ dṛṣṭvā cakampe vyāsa sanmune /
ciṃtāmavāpa paramāṃ vyagracitto japāccyutaḥ

ācchāditānīkṣaṇāni smṛtiśca vilayaṃ gatā /
dṛṣṭvedṛśīmavasthāṃ tāṃ śīghraṃ prāhātha vighnarāṭ

gaṇeśa uvāca //
na bhayaṃ kuru lokeśa sa evāhaṃ samāgataḥ /
yena te mantra ādeśi svapna ekākṣaraḥ śubhaḥ

tena siddhiranuprāptā varaṃ dātuṃ samāgataḥ /
saumyabhāvaprapanno'smi varaṃ varaya suvrata

dāsyāmi te prasanno'haṃ yadyatte hṛdi vartate /
mayi prasanne sarvaṃ tad bhavitā nātra saṃśayaḥ

muniruvāca //
itthaṃ niśamya gaṇanātha vaco viśuddhaṃ brahmā jaharṣa paramaprasamīkṣamāṇaḥ /
natvā carācaragurūṃ sakalaiḥ śirobhiḥ prāha prasannahṛdayaḥ saphalaṃ janurme

brahmovāca //
yo vedānāṃ saśāstrāṇāṃ jñānināṃ yogināmapi /
sarvopaniṣadāṃ caiva gocaro na kadācana

sa puṇyanicayairme'dya yātaḥ pratyakṣatāṃ vibhuḥ /
anādi nidhano'naṃto'prameyo nirguṇo'pi ca

yadi prasanno deveśa vighneśa karuṇākara /
tava bhaktiṃ dṛḍhāṃ dehi yayā duḥkha na naḥ spṛśet

idānīṃ dehi sāmarthyaṃ nānā nirmāṇane mama /
vighnāni ca śamaṃ yāntu yadi tuṣṭo'si me prabho

smṛtamātraḥ sadā me tvaṃ sarvaṃ kāryaṃ samāpaya /
ante muktiṃ sthirāṃ dehi jñānaṃ ca vimalaṃ mama

gajānana uvāca //
evamastu kuruṣva tvaṃ sṛṣṭiṃ nānāvidhāṃ bahuma /
māṃ smṛtvā sarva vighnāni nāśaṃ yāsyanti sarvataḥ

dṛḍhā bhaktiḥ śubhaṃ jñānaṃ matprasādā dbhaviṣyati /
niḥśaṃkaṃ kuru kāryāṇi sarvāṇi caturānana

munirūvāca //
evaṃ labdhavaro brahmā pūjayāmāsa taṃ vibhum /
yadyaccite 'ciṃtayat sa tattadevopatiṣṭhate

pūjārthaṃ devadevasya gaṇeśasya prasādataḥ /
dakṣiṇāvasare dve tu kanyake samupasthite

cāruprasanna nayana vadanaiḥ suvirājate/
aneka ratnakhacita nānālaṃkāra śobhite

divyagandhayute divya vastra mālā vibhūṣate /
te tasmai dakṣiṇārthaṃ sa kalpayāmāsa padmabhūḥ

raṃbhāgarbheṇa nīrājyaṃ divyapuṣpāṃjaliṃ dadau /
sahasranāmabhiḥ stutvā pradakṣiṇamathākarota

namasya prārthayāmāsa dīnānāṃ śaṃkaro bhava /
evaṃ saṃpūjitastena brahmaṇā parameṣṭhinā

tataḥ prasanno bhagavān vighnahartā gajānanaḥ /
siddhibuddhī gṛhītvā te antardhānamagādvibhuḥ

kastataḥ kārayāmāsa sṛṣṭiṃ pūrvavadāyatām /
ājñayā parameśasya prasādācca prasannadhīḥ

(५५०)
iti śrīgaṇeśapurāṇa upāsanākhaṃḍe gajānanapūjānirūpaṇaṃnāma paṃcadaśo'dhyāyaḥ