Ganesha Purana · Chapter 1.13

// atha trayodaśo'dhyāyaḥ //
vyāsa uvāca //
pañcāsya caturāsyaśca sahasramastakopi ca /
gajāsyaṃ varadaṃ devaṃ kathamete pratuṣṭhuvuḥ

brahmovāca //
prasādonmukha vighneśa kṛpāpāṅga nirīkṣaṇāt /
prāptabuddhi prasādāste keśāstaṃnunuvustadā

brahmaviṣṇumaheśā ūcuḥ //
ajaṃ nirvikalpaṃ nirākāramekaṃ nirānandamadvaitamānanda pūrṇam /
paraṃ nirguṇaṃ nirviśeṣaṃ nirīhaṃ parabrahmarūpaṃ gaṇeśaṃ bhajema

guṇātītamādyaṃ cidānandarūpaṃ cidābhāsakaṃ sarvagaṃ jñānagamyamam /
munidhyeyamākāśarūpaṃ pareśaṃ parabrahmarūpaṃ gaṇeśaṃ bhajema

jagatkāraṇaṃ kāraṇajñānarūpaṃ surādiṃ sukhādiṃ yugādiṃ gaṇeśam /
jagadvyāpinaṃ viśvavandyaṃ sureśaṃ parabrahmarūpaṃ gaṇeśaṃ bhajema

rajoyogato brahmarūpaṃ śrutijñaṃ sadākāryasaktaṃ hṛdācintyarūpam /
jagatkārakaṃ sarvavidyānidhānaṃ parabrahmarūpaṃ gaṇeśaṃ natāsmaḥ

sadāsattvayogaṃ mudākrīḍamānaṃ surārīnharantaṃ jagatpālayantam /
anekāvatāraṃ nijājñānahāraṃ sadāviṣṇurūpaṃ gaṇeśaṃ namāmaḥ

tamoyoginaṃ rudrarūpaṃ trinetraṃ jagaddhārakaṃ tārakaṃ jñānahetum /
anekāgamaiḥsvaṃ janaṃ bodhayantaṃ sadāśarvarūpaṃ gaṇeśaṃ namāmaḥ

tamastomahāraṃ janājñānahāraṃ trayīvedasāraṃ parabrahmapāram /
munijñānakāraṃ vidūrevikāraṃ sadābrahmarūpaṃ gaṇeśaṃ namāmaḥ

nijairoṣadhīstarpayantaṃ karoghaiḥ saraughānkalābhiḥ sudhāsrāviṇībhiḥ /
dineśāṃśu santāpahāraṃ dvijeśaṃ śaśāṅkasvarūpaṃ gaṇeśaṃ namāmaḥ

prakāśasvarūpaṃ nabhovāyurūpaṃ vikārādihetuṃ kalākālabhutam /
anekakriyānekaśaktisvarūpaṃ sadāśaktirūpaṃ gaṇeśaṃ namāmaḥ

pradhānasvarūpaṃ mahatatvarūpaṃ dharāvārirūpaṃ digīśādirūpam /
asatsatsvarūpaṃ jagaddhetubhūtaṃ sadāviśvarūpaṃ gaṇeśaṃ natāsmaḥ

tvadīye manaḥsthāpayedaṅghriyugme janovighnasaṅghān napīḍāṃ labheta /
lasatsūryabimbe viśāle sthitoyaṃ janodhvānta pīḍāṃ kathaṃ vā labheta

vayaṃ bhrāmitāḥ sarvathā jñānayogādalabdhātavāṅghri bahūnvarṣapūgān /
idānīmavāptāstavaiva prasādāt prapannān sadā pāhi viśvaṃbharādya

brahmovāca //
evaṃ stuto gaṇeśastu saṃtuṣṭobhūnmahāmune /
kṛpayā parayopetobhidhātuṃ tān pracakrame

gaṇeśa uvāca //
yadarthaṃ kleśitā yūyaṃ yadarthamihacāgatāḥ /
prītohamanayāstutyā varaṃmattovṛṇītatam

kṛtaṃ ca mama yat stotraṃ bhavadbhirbhāvitātmabhiḥ /
stotrarājamitikhyātaṃ bhaviṣyati mamājñayā

idaṃ yaḥ paṭhet prātarutthāyadhīmāṃ strisandhyaṃ sadā bhaktiyukto viśuddhaḥ /
saputrān śriyaṃ sarvakāmān labheta parabrahmarūpo bhavedantakāle

brahmovāca //
iti tadvacanaṃ śrutvā santuṣṭāste tamabruvan /
tadīkṣayā rajaḥsattvatamoguṇasamudbhavāḥ

trayaūcuḥ //
yadi tuṣṭosi deveśa sṛṣṭisaṃhārakāraka /
tavāṅghri kamalenostu bhaktiravyacibhāriṇī

kiṃ cāsmāṃbhiḥ prakartavyamājñāpayatu no bhavān /
ayameva varosmākaṃ vāñchitodviradānana

iti śrutvā vacasteṣāṃ punaḥ prāha gajānanaḥ /
bhaviṣyati mahābhāgā mayibhaktirdṛḍhāhivaḥ

saṃkaṣṭāni yathā yūyaṃ tariṣyatha mahāntyapi /
bhavat khyātyai pravakṣyāmi kāryāṇi ca pṛthak pṛthak

sṛṣṭikartā bhava brahman rajoguṇa samudbhavaḥ /
pālanaṃ kuru viṣṇotvaṃ vyāpakaḥ sattvasaṃśrayaḥ

hara saṃhara sarvaṃ tvaṃ tamoguṇa samudbhavaḥ /
brahmovāca //
vedaśāstrapurāṇāni sṛṣṭisāmarthyameva ca

dadau gaṇeśonyāṃ vidyāṃ brahmaṇe paramātmane /
viṣṇave bhagavān prādāt yogātsvacchanda rūpatām

ekākṣaraṃ ṣaḍarṇaṃ ca mantraṃ sarvāgamāṃstathā /
harāya bhagavānprādācchaktiṃ saṃharaṇepi ca

tatobrahmādīnamanāstrailokyeśaṃ jagadgurum /
uvāca prāñjalirbhūtvā varadaṃ tamibhānanam

brahmovāca //
yathāgṛhītaśaktistu vācyāvācyaṃ vivaktina /
tathānekavidhāṃ sṛṣṭimadṛṣṭvā kvāpi kiñcana

karttuṃ vāpi vibhorājñā vibhedaṃ kathamutsahe /
itaḥ kūpa itovāpītyevaṃ prāptaṃ mayā katham

tato gajānanaḥ prāha divyaṃ cakṣuḥ pradāyatam /
brahmāṇaṃ vedaśāstrajñaṃ tathā vyākulitaṃ prabhuḥ

gajānana uvāca //
bahirantaḥ śarīreme saṃkhyātītāni padmaja /
brahmāṇḍāni tvamadyaiva vibhramanti vilokaya

brahmovāca //
tato gajānanenā sau svodare śvāsavāyunā /
nīto dadarśa dhātāpi brahmāṇḍāni tvanekaśaḥ //
audumbarāṇīvatarau teṣu vā maśakāniva

bhedayāmāsa tatraikaṃ parameṇa svatejasā /
tadantaḥ sakalāṃ sṛṣṭiṃ dadarśa kamalāsanaḥ

brahmāṇaṃ cā paraṃ tatra viṣṇumindraṃ prajāpatim /
śaṃkaraṃ bhāṣkaraṃ vāyuṃ vanāni saritombupam

sāgarān yakṣagandharvānapsaraḥ kinnaroragān /
ṛṣīnpuṇyajanānsādhyānmanuṣyānparvatāndrumān

udbhijānjārajānjantūn svedajānaṇḍajānapi /
pṛthvīṃ ca saptapātālānyavyayānyekaviṃśatim

dadarśa viśvaṃ cāhaṃ vai bhāvābhāvaṃ carācaram

yadyadbrahmā bhedayāmāsa cāṇḍaṃ tasmiṃstasmin sarvamevaṃ dadarśa /
dṛṣṭvā bhrāntiṃ pūrvavatsaṃprapede teṣāmantaṃ sarvathā nādhyagacchat

na sthātuṃ naiva vā gantuṃ śaśāka kamalāsanaḥ /
upaviśya tato brahmā tuṣṭāvadviradānanam

brahmovāca //
vande devaṃ devadevaṃ gaṇeśaṃ brahmaṇḍānāṃ naiva saṃkhyāyadaṃge /
abhroḍunāṃ sāgare vā jhaṣāṇāṃ kaḥ saṃkhyātā śarkarāṇāṃ ca tīre

lajjā nametrāsti surendravandya pādāravindaṃ tava yadvilokya /
bhrānto bhavaṃ jñānanidhau prasanne mokṣopi tucchaḥ kimutānyavārttā

dṛṣṭaṃ ca nānārtha yutaṃ sureśa brahmāṇḍakūṭaṃ jaṭhare tvadīye /
sthātuṃ bahirgantumapīhaneśastvadanyadevaṃ śaraṇaṃ navedmi

tataḥ prasanno bhagavānananto vai gajānanaḥ /
bahirniṣkāsayāmāsa brahmāṇaṃ khinnamānasam

nāsikārandhra mārgeṇa hariṃ tadanuyāyinam /
tāmasaṃ ca haraṃ devo brahmaṇāsaha saṃgatam

niḥsārayāmāsa vibhuḥ śrutirandhrādgajānanaḥ /
śayātesmatadaṃgetā bubhauhariharausukham

// iti śrīgaṇeśapurāṇe upāsanākhaṇḍe brahmastuti varṇanaṃ nāma trayodaśo'dhyāyaḥ