Ganesha Purana · Chapter 1.12

// atha dvādaśo'dhyāyaḥ //
sūta uvāca //
iti śrutvā tu vacanaṃ nirgataṃ brahmaṇomukhāt /
harṣeṇa mahatāyukto muniḥ papraccha taṃ punaḥ

vyāsa uvāca //
avadhānaṃ mayā prāptaṃ pītvāvāgamṛtaṃ tava /
idānīṃ śrotumicchāmi mantrarājamimaṃpitaḥ

ko jajāpa kathaṃ siddhimavāpa ca gajānanāt /
etaṃ me saṃśayaṃ cchindhi tvattonyonāsti me guruḥ

bhṛguruvāca //
ityevaṃ muninā pṛṣṭosau jagāda vadatāṃ varaḥ /
kṛpayāvanataṃ brahmā taṃ vyāsaṃ rājasattama

brahmovāca //
sādhusādhu tvayā pṛṣṭaṃ puṇyavānasi sāmpratam /
nahyapuṇyavatāṃ brahman kathāyāḥ śravaṇeratiḥ

upāsanāmārgamimaṃ samyaktvāṃ bodhayāmyaham /
snigdhe prajñādhike śiṣye yato gopyaṃ na kiñcana

ॐkārarūpībhagavānuktaste gaṇanāyakaḥ /
yathā sarveṣu kāryeṣu pūjyate sau vināyakaḥ

nirvighnakāmanāvadbhirnocedvighnaṃ karoti saḥ /
tathoṃkārabījayukta ॐkārapallavānvitāḥ

mantrāḥ sarvāgameproktā anye ye niṣphalāśca te /
sadasadvyaktamavyaktaṃ sarvaṃ hi gaṇanāyakaḥ

evaṃ sarve devasiddhamunirākṣasakinnarāḥ /
gandharvāścāraṇānāgāyakṣaguhyakamānavāḥ

upāsakā gaṇeśasya sarvelokāścarācarāḥ /
ataeva gaṇeśāddhi paraṃ kiñcinnavidyate //
idānīṃ kathayiṣyāmi kathāmekāṃ purātanīm

mantrarāja japenāyaṃ yathā tuṣṭo gajānanaḥ /
kadāciddaivayogena pralaye samupasthite

vāyubhiḥ parvatābhinnāḥ patitāḥ paritodiśam /
tapanti dvādaśādityāḥ śoṣayitvā jalaṃ mahat

jvālāmālī mahāvahnirakhilaṃ jvalayatyapi /
saṃvartakā mahāmeghā varṣanti paritojalam

hastihastopamābhistu dhārābhirdvijasattama /
ullaṅghayanti maryādāṃ sāgarāḥ saritopi ca

evaṃ sarve vinaśyanti ābrahmasthāvarādayaḥ /
evaṃ māyāmaye naṣṭe vikāresau gajānanaḥ

aṇubhyoṇutaraṃ rūpaṃ kṛtvā kvāpi vyavasthitaḥ /
tataḥ kāle bahutaregatendha tamasāvṛte

ekākṣaraṃ punarbrahma nādayuktamajāyata /
vaikārikaṃ punārūpaṃ yadānandamayaṃ sthitam

māyāvikāramāsādyatadevābhūdgajānanaḥ /
tata eva ca saṃbhūtā guṇāḥ satvaṃrajastamaḥ

tatastrayaḥ samutpannā viṣṇurbrahmā haropi ca /
māyayā racitaṃ sarvaṃ trailokyaṃ sacarācaram

tatastanmāyayā bhrāntā babhramuste surāstrayaḥ /
tameva janakaṃ svasya draṣṭuṃ praṣṭuṃ samutsukāḥ

kimasmābhiḥ karmakāryamiti jijñāsayā mune /
ekaviṃśati svargāṇi pūrvamūrdhvaṃ vilokyate

antarīkṣaṃ tathā tiryak paścāt pātālamāyayuḥ /
adṛṣṭvā paramātmānaṃ tapaścerustato bhṛśam

nirāhārā japaparā divyavarṣa sahasrakam /
śrāntāḥ khedamanuprāptāstataste pṛthivīṃ punaḥ

vicinvato yayurdraṣṭuṃ vanānyupavanāni ca /
saritaḥ sāgarān śailān śikharāṇi guhāpi ca

tato jalāśayaṃ te tu mahāntaṃ dadṛśuḥ surāḥ /
nānājalacarairvṛkṣaiḥ pakṣibhirvividhairyutam

balākābhiścakravākairhaṃsaiḥ kāraṇḍakairapi /
nāditaṃ nalinījālaṃ bisakhaṇḍāśanerataiḥ

snātvā viśramya tattīre samuttīrya puro yayuḥ /
nānāvīci samāyuktaṃ mahāntaṃ taṃ jalāśayam

sudustarataraṃ puṃsāṃ jhaṣanakrasamākulam /
īkṣāṃcakru sudurdarśaṃ pralayānala sannibham

koṭisūryapratikāśaṃ tejārāśiṃ puro mune /
cintāmāpuḥ parāṃ te tu tejasā hṛtadṛṣṭayaḥ

tato gagana mārgeṇa tejo madhyādvinirgatāḥ /
kṣudhātṛṣāpariśrāntā niśvasaṃto muhurmuhuḥ

nindantaśca śapantaśca svātmānaṃ jātasādhvasāḥ /
tatoti karuṇāviṣṭo lokādhyakṣo khilārthavit

darśayāmāsa tān rūpaṃ manonayana nandanam /
pādāṅgulīnakhaśrībhirjitaraktābjakesaram

raktāmbara prabhāvāttu jitasandhyārkamaṇḍalam /
kaṭisūtraprabhājālairjitahemādriśekharam

khaḍgakheṭadhanuḥśaktiśobhicārucaturbhujam /
suvāsaṃ pūrṇimācandra jitakānti mukhāmbujam

aharniśaṃ prabhāyuktaṃ padmacāru sulocanam /
anekasūryaśobhājinmukuṭabhrājimastakam

nānātārāṅkita vyoma kāntijiduttarīyakam /
varāhadaṃṣṭrāśobhājidekadanta virājitam

airāvatādi dikpāla bhayakārisu puṣkaram /
dṛṣṭvaiva sahasā devaṃ praṇemustemudāmune /
pādāmbujamupaspṛśya tatastotraṃ pracakramuḥ

// iti śrīgaṇeśapurāṇe upāsanākhaṇḍe gajānanadarśanaṃ nāma dvādaśo'dhyāyaḥ