Dharmasamuccaya · Chapter 23

// iti dānavargo dvāviṃśaḥ //
(23) śīlavargaḥ
śīlaṃ sūrya iva śobhate
dhanānāmuttamaṃ śīlaṃ sūryo jyotiṣmatāmiva /
vihāya gacchati dhanaṃ śīlaṃ sthitamivāgrataḥ

śīlena tridaśān yāti dhyānagocarameva vā /
nāsti śīlasamaṃ jyotirasmiṃlloke paratra ca

alpena hetunā svarga prāpnoti svargakāmikaḥ /
tasmād duścaritaṃ hitvā nityaṃ sucarito bhavet

cetanābhāvitaṃ dānaṃ śīlaṃ ca parirakṣitam /
nīyate devasandattaṃ pañcakāmaguṇānvitam

surakṣitena śīlenaiva sukhaṃ prāptuṃ śakyate
na mātā na pitā nārthā dayitā nāpi bāndhavāḥ /
na sukhā (ste) tathā dṛṣṭā yathā śīlaṃ surakṣitam

śīlavān puruṣo sukhamavāpnute
śīlaṃ trāṇamihāmutra śīlaṃ gatirihottamam /
śīlavān puruṣo nityaṃ sukhāt sukhamavāpnute

dānaśīlasamācārā ye narā śubhacāriṇaḥ /
te yānti devasadanaṃ racitāḥ svena karmaṇā

nidhānamavyayaṃ śīlaṃ śīlasaukhyamatarkitam /
śīlādhikā hi puruṣā nityaṃ sukhavihāriṇaḥ

śīlaṃ rakṣatu medhāvī yathā yānaṃ sukhatrayam /
praśaṃsāvṛttalābhaṃ ca pretya svarge ca modate

śīlavān nirvāṇaṃ prāpnoti
śīlavān yo hi puruṣaḥ śīlamevāti sevate /
sasukho nirvṛttiṃ yāti yatra mṛtyurna vidyate

anādimati saṃsāre tṛṣṇāmohādibhirvṛte /
jyotirbhūta sadāśīlaṃ tasmācchīlamanāvilam

śīlaṃ dhanamasaṃhārya rājacaurodakādibhiḥ /
tasmācchīlaṃ sadā sevyaṃ dauḥśīlyaṃ ca vigarhitam

śīlābhiratapuruṣaḥ nirvāṇaṃ hyantike sthitam /
śīlavān puruṣo dhanyaḥ śīlavāṃścāpi sevyate

ravivad bhrājate śīlaṃ dauḥśīlyaṃ caiva garhitam /
nirmalaṃ vītakāntāraṃ nirjvaraṃ vītakāṅkṣi ca

śīlapraśastasambuddhairnirvāṇapuragāmikam /
āyuryāti dhruvaṃ dhīmān nityaṃ śīlenaṃ vṛṃhitam

śīlarahitāḥ paśubhiḥ samāḥ
na bibhenmṛtyukāle ca śīlena parirakṣitaḥ /
śīlamādyantakalyāṇaṃ sarvasaukhyapravartakam /
śīlavān puruṣo dhanyo dauḥśīlyābhirataḥ paśuḥ

tīraṃ naiva samāyānti puruṣāḥ śīlavarjitāḥ /
kāryākārya na vindanti tasmācchīlaṃ samācaret

śīlavastreṇa ye channāste channāḥ puruṣā matāḥ /
śīlena varjitā ye tu nagnāste paśubhiḥ samāḥ

śīlavān puruṣaḥ svarga gacchati
śīlavān puruṣaḥ svagamudyānamiva gacchati /
bandhuvanmanyate tatra śīlavān (su) pramāgataḥ

śuciśīlasamācārāḥ śubhadharmasamanvitāḥ /
devalokopagāsteṣu janāḥ sukṛtakāriṇaḥ

śīlena paribṛṃhitā guṇā vardhante
yo na prārthayate kāmān śīlavān puruṣaḥ sadā /
guṇāstasya pravardhante śīlena paribṛṃhitāḥ

śīlaṃ svargasya sopānam
mahārghamuttamaṃ śīlamasmiṃlloke paratra ca /
tasmāt prahāya traiguṇyaṃ śīlameva sadā caret

devebhyo rocate taddhi trāṇaṃ śīlaṃ śubhānvitam /
bhāvitaṃ paramaṃ dhanyaṃ paralokopagāmikam

śīlavān yadi jānīyāt phalaṃ śīlasya yādṛśam

śastraṃ sutīkṣṇamādāya vāṇaṃ chindyādihātmanaḥ /
astropamasya nindyasya abhisaukhyasamanvitam

śīlasya phalaṃ sugatena pradarśitam
phalaṃ śīlasya vimalaṃ sugatena pradarśitam /
ādau śastaṃ tathā madhye nidhane śastameva tat

phalaṃ śīlasya vipulaṃ sukhāt sukhamuttamam /
śīlacaryā paraṃ saukhyaṃ dhanacaryā na tādṛśī

narā dhanena hīyante śīlena na kathañcana /
śocate puruṣastena pṛthak vā tadvirājate

śubhaṃ tasmānmunivaraiḥ praśastaṃ sārvagāmikam /
udyānamiva gacchanti puruṣāḥ śubhacāriṇaḥ /
devalokasamaṃ teṣāṃ saukhyānāmākaraṃ (param)

svargagamanārtha śīlaṃ samācaret
suśīlitasya śīlasya bhakṣitasyāpyanekaśaḥ /
phalaṃ vipacyate svargastasmācchīlaṃ samācaret

śīlaṃ svargasya sopānamākaraṃ sukhanirvṛte /
śīlavarjī hi puruṣo na kvacit sukhamedhate

śīlavān asaṃkhyāni saukhyāni labhate
śīlāmbhasā prasannena viprakīrṇena sarvadā /
snātvā gacchanti puruṣā devaloke ca nirvṛte /
yaddivyamālyābharaṇairdivyaiḥ saukhyaiḥ samanvitāḥ

ramate devabhavane tat sarva śubhahetukam /
asaṃkhyāni ca saukhyāni vardhamānāni sarvadā

labhate puruṣaḥ sarva yaḥ śīlamanuvartate /
śubhacārī sadā satyaḥ pūjyate so 'parājitaḥ

anekasaukhyadāyakaṃ śīlamācaraṇīyam
śubhena śobhate martyaḥ pūjyate rājabhiḥ sadā /
śubhena śobhate martyastasmācchīlaṃ samācaret

anekasaukhyajanakaṃ sarvamāśvāsakārakam /
śīlaṃ sucaritaṃ kārya duṣkṛtaṃ ca vivarjayet

ye dānaśīlakarttāraḥ svargatadgatamānasāḥ /
teṣāṃ sakalmaṣaṃ śīlaṃ viṣamiśraṃ yathaudanam

nānāvidhasya śīlasya rakṣitasyāpyanekaśaḥ /
śubhakāryavipākāya deveṣu paripacyate

śīlāmbhasā prasanneṣu saṅkīrṇeṣu ca sarvadā /
snātvā gacchanti manujā devāṃścātyantikaṃ sukham

dānaśīlāḥ sadā dāntāḥ sarvabhūtahite ratāḥ /
jñānayuktā maitracitā gatāste devasammitim

hatadoṣāḥ kriyāvantaḥ śīlaratnena bhūṣitāḥ /
sarvasattvadayāvantaḥ suralokeṣu te budhāḥ

viśuddhakāñcanaprakhyā nirdhmātamalakalmaṣāḥ /
samyak karma susaṃlagnā devalokeṣu te budhāḥ

sarvasattvadayāvantaḥ sarvasattvahitaiṣiṇaḥ /
sarvapāpaviraktā ye teṣāṃ vāsaḥ surālaye

ahanyahani ye śīlaṃ rakṣanti suparīkṣakāḥ /
ahanyahani teṣāṃ hi sukhaṃ bhavati naikaśaḥ

śīlavājinamārūḍhā devabhavanaṃ prayānti
śīlavājinamārūḍhāḥ puruṣāstattvacintakāḥ /
prayānti devabhavanaṃ krīḍāyuktamanekaśaḥ

yā krīḍā devabhavane yacca saukhyamanuttamam /
tat samagrasya śīlasya phalamuktaṃ tathāgataiḥ

devasukhaṃ śīlajameva
yaddivyamālyābharaṇā divyāmbaravibhūṣitāḥ /
krīḍanti vibudhāḥ sarve tatsarva śubhahetukam

padmotpalavane ramye vanopavanabhūṣite /
svarge ramanti ye devāstat sarva śubhajaṃ phalam

yadākāśa ivātasthurdivyaratnavibhūṣitāḥ /
virājante 'malā devāstacchīlasya mahat phalam

yatkānaneṣu ramyeṣu citreṣu puṣpiteṣu ca /
ramanti giripṛṣṭheṣu surāstacchīlajaṃ phalam

svagṛhaṃ hi yathā martyāḥ praviśanti gatavyathāḥ /
tathā śīlasamācārāḥ prayānti tridivaṃ narāḥ

etat sujīvitaṃ śreṣṭhaṃ yacchīlaparirakṣaṇam /
maraṇānāṃ paraṃ mṛtyuḥ yacchīlaparivarjanam

śīlamanupamaṃ kāryam
etān guṇān sadā matvā priyatvamapi cātmanaḥ /
śīlaṃ surakṣitaṃ kārya dauḥśīlyaṃ ca vivarjayet

śīlacārī sadā dāntaḥ kṣamāvāṃśca sudarśanaḥ /
sopānamiva cārūḍhaṃ prayātyānandasannidhim

śīlena plavabhūtena saṃsārottaraṇam
phalaṃ śīlasya tu sukhaṃ devalokeṣu pacyate /
śīlena plavabhūtena saṃsārāduttaranti ca

śīlāmbhasā viśuddhā ye svāyattā dhīracetasaḥ /
jāmbūnadamayaiḥ puṣpaiste 'trārcanti divaukasaḥ

ye navādātamanaso nityaṃ śīlena bhūṣitāḥ /
te yānti devasadanaṃ yatra saukhyamanantakam

saukhyāt saukhyataraṃ yānti narāḥ sukṛtakāriṇaḥ /
krīḍanti devasadane śīlena paribṛṃhitāḥ

śīlasopānamārūḍhāḥ sugatiṃ prayānti
śīlasopānamāruhya jñānena paribṛṃhitāḥ /
narāḥ prayānti sugatiṃ jñānena ca parāyaṇā

suprasannena manasāśīlaṃ yadabhirakṣitam /
tasya śīlasya śītasva sukhametadupasthitam

śīlasya pariṇāmo sukhadāyakaḥ
surakṣitasya śīlasya bhāvitasyāpyanekaśaḥ /
pariṇāme sukhībhūtvā nirvāṇaṃ cādhigacchati

śīlaṃ rakṣatyupāyena śīlaṃ nayati saṅgatim /
tasmācchīlaṃ sadā rakṣyaṃ pariṇāmo 'sya śītalaḥ

mṛtyukāle samutpanne śīlavānakutobhayaḥ /
na me durgatinā trāṇaṃ śīlaṃ hi trāṇamuttamam

kutsitaśīlasya kutsitaḥ pariṇāmaḥ
kācābhrapaṭalaṃ yasya śīlaṃ bhavati kutsitam /
sa kutsitena śīlena kutsito jāyate naraḥ

śīlavirahitaḥ mūḍho bhavati svargamapi na yāti
śīlamūlena labdhvedaṃ sukhaṃ svargeṣu dehibhiḥ /
tṛṣṇākṣayo na bhavati sa paścāt paritapyate

tasmācchīlavatā nityaṃ śīlameva viśiṣyate /
niḥśīlaḥ puruṣo mūḍho na svargamadhirohati

pañcakāmopamaṃ divyaṃ yadidaṃ bhujyate sukham /
tacchīlasya viśuddhasya prāpyate hi phalaṃ mahat

yattejaḥ kāñcanasyāsya meruparvataśālinaḥ /
tacchīlatejasastejaḥ kalāṃ nārhati ṣoḍaśīm

dīpyamānaiḥ sadā śīlaiḥ nirdhātukanakatviṣā /
saṃyuktāstridivaṃ yānti paṇḍitā svena karmaṇā

trividhaśīlasya trividhaṃ phalam
hīnamadhyaviśiṣṭasya śīlasya trividhasya vai /
phalaṃ hi trividhaṃ dṛṣṭaṃ hīnamadhyottamaṃ tathā

pramādarahitaṃ śīlamapramādopabṛṃhitam /
nityaṃ tat sukhadaṃ dṛṣṭaṃ dharmateyaṃ vyavasthitā

śīlaprabhayā sūryasahastrasyādi parābhavaḥ
śīlodbhavā yā vimalā prabhā bhavati dehinām /
na sā sūryasahastrasya saṃyuktasya bhaviṣyati

śīlaṃ saptavidhaṃ ramyaṃ yo rakṣati narottamaḥ /
sa kāmaṃ bhuñjati phalaṃ sugatena ca deśitam

śīlacaryā vinā svarga na yānti
śīlacaryā samāśritya samyagdarśanatatparaḥ /
martyalokād divaṃ yānti na kaṣṭaṃ tapacāriṇaḥ

yacchīlaṃ śīlasaṃsparśa pariṇāme 'pi śītalam /
niṣevate sadāmūḍhaḥ sa paścāt paritapyate

saptavidhena śīlena devasānnidhyaṃ prāpyate
śīlaṃ saptavidhaṃ dhanyamavisaṃvādakaṃ padam /
śīlena rakṣitaḥ puruṣo devānāmantikaṃ gataḥ

śīlena śobhanaṃ phalaṃ milati
yathā pakṣairdṛḍhaiḥ pakṣī svedacchatraṃ nihanti (vai) /
tathā naro dṛḍhaḥ śīlairdevalokāya kalpyate

śrutimātraṃ ca (tacchīlaṃ) ramyād ramyataraṃ ca tat /
labhate puruṣaḥ kartā phalaṃ śīlasya śobhanam

dānaśīlataporatnaṃ hṛdayaiśca samāśritam /
devatā vā manuṣyo vā labhate paramaṃ padam

antarbahiśca niḥsārāḥ puruṣā dharmavarjitāḥ /
saṃsārāt phalakāṅkṣibhyaḥ saddharmo na (ca) rocate

antarbahiśca ye sārāste narā vastuto dṛḍhāḥ /
ye dharmacāriṇaḥ śāntāḥ parasattvahitaiṣiṇaḥ

anuttaraḥ śīlavatāṃ sugandhaḥ
na ketakī campakapuṣpagandhā, tamālake nāgarucaśca gandhaḥ /
prayānti gandhā hiṃ yathā sureṇa, anuttaraḥ śīlavatāṃ sugandhaḥ

dauḥśīlyaṃ sadā varjyam
tasmācchīlaṃ sadā kārya dānajñānatapodhanaiḥ /
dauḥśīlyaṃ ca sadā varjyaviṣaśastrānalopanam

śīlena eva sukhamavāpnute
evaṃ surakṣitaṃ śīlaṃ narān nayati saṅgatim /
na hi śīlādṛte kaścit padaṃ sukhamavāpnute

devaguṇasadṛśaṃ śīlaṃ sadācaret
tasmād devaguṇaṃ matvā śīlameva sadācaret /
na śīlasadṛśaṃ kiñcidanyat trāṇamihāsti vai