Dharmasamuccaya · Chapter 2

// iti jitavargaḥ prathamaḥ //
(2) dharmopadeśavargaḥ
guruḥ kīdṛgbhavet?
yo hi deśayate dharma kṣemaṃ nirvāṇagāminam /
sa sarvabandhanacchettā gururbhavati dehinām

chittvā mohamayaṃ pāśaṃ yo hi deśayate śivam /
sanmārgadeśakaḥ prokto durmārgavinivārakaḥ

dharmasya pravaratvam yena dharmeṇa manujāstaranti bhavasāgaram /
saddharmaprabaraḥ prokto na dharmo laukiko hi saḥ

kṣetrāṇīmāni catvāri vidyante yasya dehinaḥ /
tasyedaṃ saphalaṃ janma kathitaṃ mārgadeśakaiḥ

sakalendriyatāṃ prāpya labdhvā buddhasya śāsanam /
yo na dharmarato martyaḥ sa paścādanutapyate

yamasāyujyam vyāsaktamanasāṃ nityaṃ nityaṃ kāmagaveṣiṇām /
putradāraprasaktānāmantako 'bhyeti dehinām

cittasya vaśīkaraṇam saṅkalpadoṣamanasaṃ taistairdoṣaiḥ samākulam /
cittaṃ nayatyupāyena cittabaddhā hi dehinaḥ

durdamasyāticaṇḍasya siddhiprepsorviśeṣataḥ /
na cittasya vaśaṃ gacchet śatrubhūtaṃ hi tannṛṇām

saśrutena sudiṣṭena bhāvitenāpyanekaśaḥ /
dharmeṇa śāmyate cittaṃ jālineva yathā hayaḥ

saddharmaśravaṇaphalam saddharmaśravaṇaṃ kṛtvā pāpād viramate pumān /
śreyase pratipattiṃ ca nityamevopapadyate

saddharmaśravaṇaṃ kṛtvā manaḥ prahalādamṛcchati /
kuśalaṃ cāsya sumahat sandhāne sampratīkṣate

śrutvā bhavati dharmātmā śrutvā pāpaṃ na kurvate /
śrutvā karmaphalaṃ jñātvā nirvāṇamadhigacchati

śrutvā vedayate dharma śrutvā buddhaḥ prasīdati /
śrutvā dharmaṃ vimokṣāya yatate paṇḍito naraḥ

dharmalakṣaṇatattvajñaḥ śrutvā bhavati mānavaḥ /
tasmācchrutvā prayatnena buddhiḥ kāryā prayatnataḥ

śrutvā saṃsāravimukhāṃ kathāṃ sugatadeśitām /
prahāya tṛṣṇāṃ vividhāṃ prayāti padamavyayam

caturvidhāṃ pratyayitāṃ dharmāṇāṃ codamavyayau /
śrutvā tāṃ jñāyate sarvā pumān śraddhāvibhāvitaḥ

skandhāyatanadhātūnāṃ yadetallakṣaṇadvayam /
śrutvā tajjñāyate sarva tasmāt dharmaparo bhavet

prabalā ye trayo doṣāḥ sarvasaṃsārabandhanāḥ /
te praṇaśyantyaśeṣeṇa saddharmaśravaṇena vai

pravṛtterlakṣaṇaṃ kṛtsnaṃ nivṛtteścāpyaśeṣataḥ /
śrutimāṃstat prajānāti tasmācchrutamanuttamam

mṛtyukālopapannasya vedanārtasya dehinaḥ /
na vyathā śrutamālambya svalpāpi hṛdi jāyate

samyagjñānena ye dagdhāḥ kleśavṛkṣāḥ samantataḥ /
na teṣāmudbhavo bhūyaḥ kadācidupalabhyate

apramādavidagdhaṃ hi śrutaṃ sarva sukhodayam /
śreyasaśva śrutaṃ mūlaṃ tasmācchrutaparo bhavet

saddharmaśravaṇaṃ śrutvā vṛddhāṃścopāsya paṇḍitaḥ /
prayātyanuttamaṃ sthānaṃ jarāmaraṇavarjitam

dharmeṇa vartate śrutvā duḥkhānmucyeta vai yathā /
śrutvā bhavati maitryātmā tasmācchreyaḥ paraṃ śrutam

kāyavāṅmanasāṃ buddhiḥ śrutvā bhavati dehinām /
tasmāt sadbuddhikāmo yastena śrotavyamādarāt

śrutvā bhāvaṃ samāśritya dṛḍhavīryaparākramam /
taranti puruṣāstūrṇa tribhava vipulaṃ mahat

śrutvā yaḥ puruṣaḥ sarvairdhanavānabhijāyate /
aśrutārthadhanairyuktaṃ daridraṃ prāhustaṃ budhāḥ

saddharmanāśaphalam
saddharmadhananaṣṭasya guruṇā varjitasya ca /
viphalaṃ jīvitaṃ ceṣṭaṃ pāpairupahatasya ca

pramādādīnāmaniṣṭaphalasādhanatvam
pramādinaḥ kusīdastha pāpamitrasya dehinaḥ /
jīvitaṃ niṣphalaṃ dṛṣṭaṃ bījamuptaṃ yathosare

śāstraprāmāṇyam
śrutadṛṣṭivinirmuktamarthamāhurvicakṣaṇāḥ /
na cakṣurbhyāṃ vinirmuktamarthamityabhidhīyate

dharmasevanāgrahaḥ yo hi dharma parityajya adharmamanutiṣṭhati /
sa bhaiṣajyaṃ parityajya vyādhimevopasevate

sevatāṃ sevatāṃ puṃsāṃ dharmo bhavatyanekaśaḥ /
varṣāṇāṃ samavāyena yathodyānaṃ pravardhate

iha vajrāsane bhūmirna saṃsāre 'nyathā bhavet /
bodhicittasamutthānaṃ bodhiprāptistathottamā

dharmacārī praśāntātmā kāyotthāyī samāhitaḥ /
avaśyaṃ śubhabhāgīsyāt sa pramādena vañcitaḥ

jñānasevanāgrahaḥ tasmājjñānaguṇānmatvā jñānaṃ seveta paṇḍitaḥ /
nahyajñānena saṃyuktaṃ pumān kaścit pratibhavet

dharmānusāriṇī śraddhā dharmānusāriṇī śraddhā yathā yāti sukhāvahā /
sātidurgatisanyaktā vyasaneṣu mahad balam

pradīpakalpā tamasi vyādhitānāmivauṣadham /
arthānāṃ netra bhūtā sā daridrāṇāṃ mahadbalam

bhavādyairhriyamāṇānāṃ pūrvabhūtā sukhāvahā /
pramādamadamattānāṃ sā pramādavighātikā

śāntapadaprāpteḥ phalam sa hi yattatpadaṃ śāntaṃ nirvāṇamunibhirvṛtam /
tat prāpayatyakhedena samyagjñānapuraḥsaram