Devi Bhagavata Purana · Chapter 8.10

bhuvanakośavarṇane hiraṇmayakimpuruṣavarṣavarṇanam
śrīnārāyaṇa uvāca
hiraṇmaye nāma varṣe bhagavānkūrmarūpadhṛk /
āste yogapatiḥ so'yamaryamṇā pūjya īḍyate

aryamovāca
ॐ namo bhagavate akūpārāya sarvasattvaguṇa-
viśeṣaṇāya nopalakṣitasthānāya namo varṣmaṇe
namo bhūme namo'vasthānāya namaste /
yad‌rūpametannijamāyayārpita-
marthasvarūpaṃ bahurūparūpitam /
saṃkhyā na yasyāstyayathopalambhanā-
ttasmai namaste'vyapadeśarūpiṇe

jarāyujaṃ svedajamaṇḍajod‌‍bhidaṃ
carācaraṃ devarṣipitṛbhūtamaindriyam /
dyauḥ khaṃ kṣitiḥ śailasaritsamudraṃ
dvīpagraharkṣetyabhidheya ekaḥ

yasminasaṃkhyeyaviśeṣanāma-
rūpākṛtau kavibhiḥ kalpiteyam /
saṃkhyā yayā tattvadṛśāpanīyate
tasmai namaḥ sāṃkhyanidarśanāya te

evaṃ stuvati deveśamaryamā saha varṣapaiḥ /
gīyate cāpi bhajate sarvabhūtabhavaṃ prabhum

tathottareṣu kuruṣu bhagavānyajñapūruṣaḥ /
ādivārāharūpo'sau dharaṇyā pūjyate sadā

sampūjya vidhivaddevaṃ tad‍bhaktyārdrārdrahṛtkajā /
bhūmiḥ stauti hariṃ yajñavārāhaṃ daityamardanam

bhūruvāca
ॐ namo bhagavate mantratattvaliṅgāya yajñakratave
mahādhvarāvayavāya mahāvarāhāya namaḥ karmaśuklāya
triyugāya namaste

yasya svarūpaṃ kavayo vipaścito
guṇeṣu dāruṣviva jātavedasam /
majjanti mathnā manasā didṛkṣavo
gūḍhaṃ kriyārthernama īritātmane

dravyakriyāhetvayaneśakartṛbhi-
rmāyāguṇairvastubhirīkṣitātmane /
anvīkṣayāṅgātiśayātmabuddhibhi-
niṃrastamāyākṛtaye namo'stu te

karoti viśvasthitisaṃyamodayaṃ
yasyepsitaṃ neṣmitumīkṣiturguṇaiḥ /
māyā yathā'yo bhramate tadāśrayaṃ
grāvṇo namaste guṇakarmasākṣiṇe

pramathya daityaṃ prativāraṇaṃ mṛdhe
yo māṃ rasāyā jagadādisūkaraḥ /
kṛtvāgradaṃṣṭraṃ niragādudanvataḥ
krīḍannivebhaḥ praṇatāsmi taṃ vibhum

kimpuruṣe varṣe'sminbhagavantaṃ dāśarathiṃ ca sarveśam /
sītārāmaṃ devaṃ śrīhanumānādipūruṣaṃ stauti

ॐ namo bhagavate uttamaślokāya nama iti /
āryalakṣaṇaśīlavratāya nama upaśikṣitātmane
upāsitalokāya namaḥ / sādhuvādanikaṣaṇāya namo
brahmaṇyadevāya mahāpuruṣāya mahābhāgāya nama iti /
yattadviśuddhānubhavātmamekaṃ
svatejasā dhvastaguṇavyavastham /
pratyak praśāntaṃ sudhiyopalambhanaṃ
hyanāmarūpaṃ nirahaṃ prapadye

martyāvatārastviha martyaśikṣaṇaṃ
rakṣovadhāyaiva na kevalaṃ vibho /
kuto'nyathā syād''ramataḥ sva ātmanaḥ
sītākṛtāni vyasanānīśvarasya

na vai sa ātmātmavatāṃ suhṛttamaḥ
saktasvilokyāṃ bhagavānvāsudevaḥ /
na strīkṛtaṃ kaśmalamaśnuvīta
na lakṣaṇaṃ cāpi vihātumarhati

na janma nūnaṃ mahato na saubhagaṃ
na vāṅ na cuddhirnākṛtistoṣahetuḥ /
tairyadvisṛṣṭānapi no vanaukasa-
ścakāra sakhye bata lakṣmaṇāgrajaḥ

suro'suro vāpyathavā naro'naraḥ
sarvātmanā yaḥ sukṛtajñamuttamam /
bhajeta rāmaṃ manujākṛtiṃ hariṃ
ya uttarānanayatkosalān divam

śrīnārāyaṇa uvāca
evaṃ kimpuruṣe varṣe satyasandhaṃ dṛḍhavratam /
rāmaṃ rājīvapatrākṣaṃ hanumān vānarottamaḥ

stauti gāyati bhaktyā ca saṃpūjayati sarvaśaḥ /
ya etacchṛṇuyāccitraṃ rāmacandrakathānakam /
sarvapāpaviśuddhātmā yāti rāmasalokatām

-
iti śrīmaddevībhāgavate mahāpurāṇe'ṣṭādaśasāhasryāṃ saṃhitāyāmaṣṭamaskandhe
bhuvanakośavarṇane hiraṇmayakimpuruṣavarṣavarṇanaṃ nāma daśamo'dhyāyaḥ