Devi Bhagavata Purana · Chapter 8.9

bhuvanakośavarṇane harivarṣaketumālaramyakavarṣavarṇanam
śrīnārāyaṇa uvāca
harivarṣe ca bhagavānnṛhariḥ pāpanāśanaḥ /
vartate yogayuktātmā bhaktānugrahakārakaḥ

tasya taddayitaṃ rūpaṃ mahābhāgavato'suraḥ /
paśyanbhaktisamāyuktaḥ stauti tad‍guṇatattvavit

prahlāda uvāca
ॐ namo bhagavate narasiṃhāya namastejastejase
āvirāvirbhava vajradaṃṣṭra karmāśayān randhaya randhaya
tamo grasa grasa ॐ svāhā / abhayaṃ mamātmani
bhūyiṣṭhāḥ // ॐ kṣauṃ //
svastyastu viśvasya khalaḥ prasīdatāṃ
dhyāyantu bhūtāni śivaṃ mitho dhiyā /
manaśca bhadraṃ bhajatādadhokṣaje
āveśyatāṃ no matirapyahaitukī

māgāradārātmajavittabandhuṣu
saṅgo yadi syād‍bhagavatpriyeṣu naḥ /
yaḥ prāṇavṛttyā parituṣṭa ātmavān
siddhyatyadūrānna tathendriyapriyaḥ

yatsaṅgalabdhaṃ nijavīryavaibhavaṃ
tīrthaṃ muhuḥ saṃspṛśatāṃ hi mānasam /
haratyajo'ntaḥ śrutibhirgato'ṅgajaṃ
ko vai na seveta mukundavikramam

yasyāsti bhaktirbhagavatyakiñcanā
sarvairguṇaistatra samāsate surāḥ /
harāvabhaktasya kuto mahad‍guṇā
manorathenāsati dhāvato bahiḥ

harirhi sākṣād‍bhagavāñcharīriṇā-
mātmā jhaṣāṇāmiva toyamīpsitam /
hitvā mahāṃstaṃ yadi sajjate gṛhe
tadā mahattvaṃ vayasā dampatīnām

tasmād‌rajorāgaviṣādamanyu-
mānaspṛhābhayadainyādhimūlam /
hitvā gṛhaṃ saṃsṛticakravālaṃ
nṛsiṃhapādaṃ bhajatāṃ kuto bhayam

evaṃ daityapatiḥ so'pi bhaktyānudinamīḍate /
nṛhariṃ pāpamātaṅgahariṃ hṛtpadmavāsinam

ketumāle ca varṣe hi bhagavānsmararūpadhṛk /
āste tadvarṣanāthānāṃ pūjanīyaśca sarvadā

etenopāsate stotrajālena ca ramābdhijā /
tadvarṣanāthā satataṃ mahatāṃ mānadāyikā

ramovāca
oṃ hrāṃ hrīṃ hrūṃ sma namo bhagavate
hṛṣīkeśāya sarvaguṇaviśeṣairvilakṣitātmane
ākūtīnāṃ cittīnāṃ cetasāṃ viśeṣāṇāṃ cādhipataye
ṣoḍaśakalāya chandomayāyānnamayāyāmṛtamayāya
sarvamayāya mahase ojase balāya kāntāya
kāmāya namaste ubhayatra bhūyāt /
striyo vrataistvāṃ hṛṣīkeśvaraṃ svato
hyārādhya loke patimāśāsate'nyam /
tāsāṃ na te vai paripāntyapatyaṃ
priyaṃ dhanāyūṃṣi yato'svatantrāḥ

sa vai patiḥ syādakutobhayaḥ svataḥ
samantataḥ pāti bhayāturaṃ janam /
sa eka evetarathā mitho bhayaṃ
naivātmalābhādadhimanyate param

yā tasya te pādasaroruhārhaṇaṃ
na kāmayetsākhilakāmalampaṭā /
tadeva rāsīpsitamīpsito'rcito
yad‍bhagnayāñcā bhagavan pratapyate

matprāptaye'jeśasurāsurādaya-
stapyanta ugraṃ tapa aindriye dhiyaḥ /
ṛte bhavatpādaparāyaṇānna māṃ
vidantyahaṃ tvaddhṛdayā yato'jita

sa tvaṃ mamāpyacyuta śīrṣṇi vanditaṃ
karāmbujaṃ yattvadadhāyi sātvatām /
bibharṣi māṃ lakṣya vareṇya māyayā
ka īśvarasyehitamūhituṃ vibhuḥ

evaṃ kāmaṃ stuvantyeva lokabandhusvarūpiṇam /
prajāpatimukhā varṣanāthāḥ kāmasya siddhaye

ramyake nāmavarṣe ca mūrtiṃ bhagavataḥ parām /
mātsyāṃ devāsurairvandyāṃ manuḥ stauti nirantaram

manuruvāca
ॐ namo bhagavate mukhyatamāya namaḥ sattvāya
prāṇāyaujase balāya mahāmatsyāya namaḥ /
antarbahiścākhilalokapālakai-
radṛṣṭarūpo vicarasyurusvanaḥ /
sa īśvarastvaṃ ya idaṃ vaśe naya-
nnāmnā yathā dārumayīṃ naraḥ striyam

yaṃ lokapālāḥ kila matsarajvarā
hitvā yatanto'pi pṛthak sametya ca /
pātuṃ na śekurdvipadaścatuṣpadaḥ
sarīsṛpaṃ sthāṇu yadatra dṛśyate

bhavān yugāntārṇava ūrmimālini
kṣoṇīmimāmoṣadhivīrudhāṃ nidhim /
mayā sahorukrama te'ja ojasā
tasmai jagatprāṇagaṇātmane namaḥ

evaṃ stauti ca deveśaṃ manuḥ pārthivasattamaḥ /
matsyāvatāraṃ deveśaṃ saṃśayacchedakāraṇam

dhyānayogena devasya nirdhūtāśeṣakalmaṣaḥ /
āste paricaranbhaktyā mahābhāgavatottamaḥ

iti śrīmaddevībhāgavate mahāpurāṇe'ṣṭādaśasāhasryāṃ saṃhitāyāmaṣṭamaskandhe
bhuvanakośavarṇane harivarṣaketumālaramyakavarṣavarṇanaṃ nāma navamo'dhyāyaḥ