Chandogya Upanishad (with commentary) · Chapter 7.25

ChUpBh_7,24.2 yadi svamahimni pratiṣṭhito bhūmā kathaṃ tarhyapratiṣṭha ucyate /
śṛṇu /
go 'śvādīha mahimetyācakṣate /
gāvaścāśvāśca go 'śvaṃ dvandvaikavadbhāvaḥ /
sarvatra gavāśvādi mahimeti prasiddhaṃ tadāśritastatpratiṣṭhaścaitro bhavati, yathā nāhamevaṃ svato 'nyaṃ mahimānamāśrito bhūmā caitravaditi bravīmyatra hetutvenānyo hyanyasminpratiṣṭhita iti vyavahitena sambandhaḥ /
kintvevaṃ bravīmīti hovāca-sa evetyādi //2//
iti cchāndogyopaniṣadi saptamādhyāyasya caturviṃśaḥ khaṇḍaḥ
=======================================================================
START ChUp 7,25.1
sa evādhastāt sa upariṣṭāt sa paścāt sa purastāt sa dakṣiṇataḥ sa uttarataḥ |
sa evedaṃ sarvam iti |
athāto 'haṃkārādeśa eva |
aham evādhastād aham upariṣṭād ahaṃ paścād ahaṃ purastād ahaṃ dakṣiṇato 'ham uttarato 'ham evedaṃ sarvam iti

ChUpBh_7,25.1 kasmātpunaḥ kvacinna pratiṣṭhita ityucyate /
yasmātsa eva bhūmādhastānna tadvyatirekeṇānyadvidyate yasminpratiṣṭhitaḥ syāt /
tathopariṣṭādityādi samānam /
sati bhūmno 'nyasminbhūmā hi pratiṣṭhitaḥ syānna tu tadasti /
sa eva tu sarvam /
atastasmādasau na kvacitpratiṣṭhitaḥ /
yatra nānyatpaśyatītyadhikaraṇādhikartavyatānirdeśātsa evādhastāditi ca parokṣanirdeśāddraṣṭarjīvādanyobhūmā syādityāśaṅkā kasyacinmā bhūdityathāto 'nantaramahaṅkārādeśo 'haṅkāreṇā'diśyata ityahaṅkārādeśaḥ /
draṣṭurananyatvadarśanārthaṃ bhūmaiva nirdiśyate 'haṅkāreṇāhamevādhastādityādinā //1 //
START ChUp 7,25.2
athāta ātmādeśa eva |
ātmaivādhastād ātmopariṣṭād ātmā paścād ātmā purastād ātmā dakṣiṇata ātmottarata ātmaivedaṃ sarvam iti |
sa vā eṣa evaṃ paśyann evaṃ manvāna evaṃ vijānann ātmaratir ātmakrīḍa ātmamithuna ātmānandaḥ sa svarāḍ bhavati |
tasya sarveṣu lokeṣu kāmacāro bhavati |
atha ye 'nyathāto vidur anyarājānas te kṣayyalokā bhavanti |
teṣāṃ sarveṣu lokeṣv akāmacāro bhavati