Brihat Parashara Hora Shastra · Chapter 93

atha abhuktamūlaśāntyadhyāyaḥ

jyeṣṭhāmūlamayoryasmādadhipāvindrarākṣasau /
mahāvairāt tayoḥ sandhirmahādoṣapradaḥ smṛtaḥ

abhuktamūlajaṃ putraṃ putrīṃ vā'pi parityajet /
athavā'bdāṣṭakaṃ tātastanmukhaṃ na vilokayet

taddoṣaparihārārthamatha śāntividhiṃ bruve /
tatrā'dau doṣabahulyān mūlaśāntirnigadyate

janmato dvādaśāhe vā tadṛkṣe vā śubhe dine /
jātasya vā'ṣṭame varṣe śāntiṃ kuryād vidhānataḥ

susame ca śubhe sthāne gomayenopalepite /
maṇḍapaṃ svagṛhāt prācyāmudīcyāṃ vā prakalpayet

caturdvārasamāyuktaṃ toraṇādyairalaṅkṛtam /
kuṇḍaṃ grahādiyajñārthaṃ tadbahiśca prakalpayet

suvarṇena tadardhena tadardhārdhena vā punaḥ /
nakṣatradevatārūpaṃ kuryād vittānusārataḥ

śyāmavarṇaṃ mahograṃ ca dviśiraskaṃ vṛkānanam /
khaḍgacarmadharaṃ tadvad dhyeyaṃ kuṇapavāhanam

suvarṇasya ca mūlyaṃ vā sthāpayitvā prapūjayet /
suvarṇaṃ sarvadaivatyaṃ yataḥ śāstreṣu niścitam

ācāryaṃ varayet paścāt svastivācanupūrvakam /
kalaśasthāpanaṃ kuryāt svagṛhyoktavidhānataḥ

pañcagavyādikaṃ kṣepyaṃ kalaśe tīrthavāri ca /
śatauṣadhyādikaṃ tatra śatacchidraghaṭe kṣipet

vaṃśapātraṃ ca saṃsthāpya tatra vai paścimāmukham /
arceyennirṛtiṃ devaṃ śuklavastrākṣatādibhiḥ

indraṃ tadadhidevaṃ ca jalaṃ pratyadhidaivatam /
svasvaśākhoktamantreṇa pradhānādīnprapūjayet

devādhidevaprītyarthaṃ homaṃ kuryādyathāvidhi /
aṣṭottaraṃ sahasraṃ vā śataṃ vā niyatendriyaḥ

mṛtyupraśamanārthaṃ ca mantraṃ trayambakaṃ japet /
prārthayecca tato devamabhiṣekārthamādarāt

bhadrāsanopaviṣṭasya sastrīputrasya mantravit /
ācāryo yajamānasya kuryāt prītyābhiṣecanam

vastrāntaritakumbhābhyāṃ snāpayettadanantaram /
śuklāmbaradharastadvat śvetagandhānulepanaḥ

dhenuṃ payasvinīṃ dadyādācāryāya ca śaktitaḥ /
ṛtvigbhyo dakṣiṇāṃ dadyād brāhmaṇāṃścāpi bhojayet

yatpāpaṃ yacca me dauḥsthyaṃ sarvagātreṣvavasthitam /
tatsarvaṃ bhakṣayājya tvaṃ lakṣmīṃ puṣṭiṃ ca vardhaya

anenaiva tu mantreṇa samyagājyaṃ vilokayet /
mūlagaṇḍodbhavastaivaṃ sarpapāpaṃ praṇaśyati