Brihat Parashara Hora Shastra · Chapter 94

atha jyeṣṭhādi gaṇḍaśāntyadhyāyaḥ

jyeṣṭhāgaṇḍāntajātastu pituḥ svasya ca nāśakaḥ /
tasya śāntividhiṃ vakṣye sarvavighnopaśāntaye

mūlaśāntisamaṃ sarvamātrāpi maṇḍapādikam /
indro'tra devatā tadvadadhidevo'nalastathā

vijñeyaṃ ca tathā vipra rakṣaḥ pratyadhidaivatam /
yathāśakti suvarṇena kuryādindrasvarūpakam

vajrāṅkuśadharaṃ divyaṃ gajarājoparisthitam /
śālitaṇḍulasaṃyuktakumbhasyopari pūjayet

svasvagṛhyoktamantreṇa gandhapuṣpākṣatādibhiḥ /
abhiṣekaṃ ca homaṃ ca kuryād brāhmaṇabhojanam

indrasūktaṃ japed bhaktyā mantraṃ mṛtyuñjayaṃ tathā /
prārthayedindradevaṃ ca tataḥ śāntimavāpnuyāt

atha vā śaktyabhāve tu kuryād godānameva hi /
yataḥ samastabhūdānād godānamatiricyate

mūlendrāhimaghāgaṇḍajāte dadyād gavāṃ trayam /
goyugmaṃ pauṣṇadāsrotthe gaṇḍānte ca dvijanmane

anyagaṇḍe ca duryoge gāmekāṃ hi pradāpayet /
gorabhāve ca viprāya dadyāt tanmūlyameva hi

jyeṣṭhanakṣatrajā kanyā vinihanti dhavāgrajam /
viśākhāntyapadotpannā kanyā devaraghātinī

tasyāḥ pradānakāle'to godānamapi kārayet /
āśleṣāntyatripādotthau mūlādyatripadodbhavau

kanyāsutau hataḥ śvaśrūṃ śvaśurañca yathākramam /
tayorvivāhakāle'taḥ śāntiṃ kuryād vicakṣaṇaḥ

tattadoṣavināśāya yathāvittānusārataḥ /
dhavāgrajadyabhāve tu na doṣāya prajāyate