Brihat Parashara Hora Shastra · Chapter 91

atha grahaṇajātaśāntyadhyāyaḥ

sūryendugrahaṇe kāle yeṣāṃ janma bhaved dvija /
vyādhiḥ kaṣṭaṃ ca dāridryaṃ teṣāṃ mṛtyubhayaṃ bhavet

ataḥ śāntiṃ pravakṣyāmi janānāṃ hitakāṅkṣayā /
sūryasyendośca graheṇaṃ yasminṛkṣe prajāyate

tannakṣatrapate rūpaṃ suvarṇena prakalpayet /
sūryagrahe sūryarūpaṃ suvarṇena svaśaktitaḥ

candragrahe candrarūpaṃ rajatena tathaiva ca /
rāhurūpaṃ prakurvīta sīsakena vicakṣaṇaḥ

śucau deśe samaṃ sthānaṃ gomayena pralepayet /
tatra ca sthāpayed vastraṃ nūtanaṃ sumanoharam

trayāṇāmeva rūpāṇāṃ sthāpanaṃ tatra kārayet /
sūryagrahe pradātavyaṃ sūryaprītikaraṃ ca yat

raktākṣataṃ raktagandhaṃ raktamālyāmbarādikam /
candragrahe pradātavyaṃ candraprītikaraṃ ca yat

śvetagandhaṃ śvetapuṣpaṃ śvetamālyāmbarādikam /
rāhave ca pradātavyaṃ kṛṣṇapuṣpāmbarādikam

dadyānnakṣatranāthāya śvetagandhādikaṃ tathā /
sūryaṃ sampūjayeddhīmānākṛṣṇeti ca mantrataḥ

athā candraṃ ime devā iti mantreṇa bhaktitaḥ /
dūrvābhi pūjayedrāhuṃ kayā na iti mantrataḥ

sūryendvorarkapālāśamidbhirjuhuyāt kramāt /
tathā ca rāhoḥ prītyarthaṃ dūrvābhirdvijasattama

brahmavṛkṣasamidbhiśca bheśāya juhuyāt punaḥ /
abhiṣekaṃ tataḥ kuryāt jātasya kalahodakaiḥ

ācāryaṃ pūjayedbhaktyā suśānto vijitendriyaḥ /
brāhmaṇān bhojayetvā tu yathāśakti visarjayet

evaṃ grahaṇajātasya śāntiṃ kṛtvā vidhānataḥ /
sarvavighnaṃ vinirjitvā saubhāgyaṃ labhate naraḥ