Brihat Parashara Hora Shastra · Chapter 79

atha pravrajyāyogādhyāyaḥ

atha vipra pravakṣyāmi yogaṃ pravrajyakābhidham /
pravrajanti janā yena sampradāyāntaraṃ gṛhāt

caturādibhirekasthaiḥ pravrajyā balibhiḥ samāḥ /
ravyādibhistapasvī ca kapālī raktavastrabhṛt

ekadaṇḍī yatiścakradharo nirgranthikaḥ kramāt /
jñeyā vīryādhikasyaiva sabaleṣu bahuṣvapi

sūryeṇā'staṃ gatāste cedapi vīryasamanvitāḥ /
adīkṣitāstadā jñeyā janāstadgatabhaktayaḥ

astaṃgatā nirbalāścet sabalaśca raviryadā /
tadā ravibhavā jñeyā pravrajyā dvijasattama

janmabheśo'nyakheṭaiścedadṛṣṭaḥ śanimīkṣate /
tayorbalavaśāttatra pravrajyāmāpnuyānnaraḥ

nirbalo janmabheśaścet kevalenārkiṇekṣitaḥ /
tadā śanibhavameva pravrajyāṃ āpnuyājjanaḥ

śanidṛkkāṇasaṃsthe ca śanibhaumanavāṃśake /
śanidṛṣṭe vidhau jñeyā pravrajyā śanisambhavā

kujādiṣu jayī śukraḥ saumyago yāmyago'pi vā /
jayī saumyagataścānyaḥ parasparayutau bhavet

pravrajyākārakaḥ kheṭo yadyanyena parājitaḥ /
tadā labdhāṃ parivrajyāṃ parityajati tāṃ punaḥ

bahavo janmakāle cet pravrajyākārakā grahāḥ /
balatulyāstadā tatra pravrajyā katamā bhavet

bahavo balinaścet syuḥ pravrajyākārakā grahāḥ /
tadā prāpnoti sarveṣāṃ teṣāṃ pravrajyakāṃ dhruvam

tattadgrahadaśākāle pravrajyāṃ yāti tadbhavām /
tyaktvā gṛhītapūrvāṃ tāmanyāṃ prāpnoti mānavaḥ

dṛṣṭeṣvindvijyalagneṣu śaninā navame guruḥ /
rājayoge'tra jāto'sau tīrthikṛnna'tra saṃśayaḥ

dharmasthānagate mande grahadṛṣṭivivarjite /
rājayoge'tra yo jātaḥ sa rājā dīkṣito bhavet