બૃહત્પારાશરહોરાશાસ્ત્રમ્ · અધ્યાય 79

અથ પ્રવ્રજ્યાયોગાધ્યાયઃ

અથ વિપ્ર પ્રવક્ષ્યામિ યોગં પ્રવ્રજ્યકાભિધમ્ ।
પ્રવ્રજન્તિ જના યેન સમ્પ્રદાયાન્તરં ગૃહાત્

ચતુરાદિભિરેકસ્થૈઃ પ્રવ્રજ્યા બલિભિઃ સમાઃ ।
રવ્યાદિભિસ્તપસ્વી ચ કપાલી રક્તવસ્ત્રભૃત્

એકદણ્ડી યતિશ્ચક્રધરો નિર્ગ્રન્થિકઃ ક્રમાત્ ।
જ્ઞેયા વીર્યાધિકસ્યૈવ સબલેષુ બહુષ્વપિ

સૂર્યેણાઽસ્તં ગતાસ્તે ચેદપિ વીર્યસમન્વિતાઃ ।
અદીક્ષિતાસ્તદા જ્ઞેયા જનાસ્તદ્ગતભક્તયઃ

અસ્તંગતા નિર્બલાશ્ચેત્ સબલશ્ચ રવિર્યદા ।
તદા રવિભવા જ્ઞેયા પ્રવ્રજ્યા દ્વિજસત્તમ

જન્મભેશોઽન્યખેટૈશ્ચેદદૃષ્ટઃ શનિમીક્ષતે ।
તયોર્બલવશાત્તત્ર પ્રવ્રજ્યામાપ્નુયાન્નરઃ

નિર્બલો જન્મભેશશ્ચેત્ કેવલેનાર્કિણેક્ષિતઃ ।
તદા શનિભવમેવ પ્રવ્રજ્યાં આપ્નુયાજ્જનઃ

શનિદૃક્કાણસંસ્થે ચ શનિભૌમનવાંશકે ।
શનિદૃષ્ટે વિધૌ જ્ઞેયા પ્રવ્રજ્યા શનિસમ્ભવા

કુજાદિષુ જયી શુક્રઃ સૌમ્યગો યામ્યગોઽપિ વા ।
જયી સૌમ્યગતશ્ચાન્યઃ પરસ્પરયુતૌ ભવેત્

પ્રવ્રજ્યાકારકઃ ખેટો યદ્યન્યેન પરાજિતઃ ।
તદા લબ્ધાં પરિવ્રજ્યાં પરિત્યજતિ તાં પુનઃ

બહવો જન્મકાલે ચેત્ પ્રવ્રજ્યાકારકા ગ્રહાઃ ।
બલતુલ્યાસ્તદા તત્ર પ્રવ્રજ્યા કતમા ભવેત્

બહવો બલિનશ્ચેત્ સ્યુઃ પ્રવ્રજ્યાકારકા ગ્રહાઃ ।
તદા પ્રાપ્નોતિ સર્વેષાં તેષાં પ્રવ્રજ્યકાં ધ્રુવમ્

તત્તદ્ગ્રહદશાકાલે પ્રવ્રજ્યાં યાતિ તદ્ભવામ્ ।
ત્યક્ત્વા ગૃહીતપૂર્વાં તામન્યાં પ્રાપ્નોતિ માનવઃ

દૃષ્ટેષ્વિન્દ્વિજ્યલગ્નેષુ શનિના નવમે ગુરુઃ ।
રાજયોગેઽત્ર જાતોઽસૌ તીર્થિકૃન્નઽત્ર સંશયઃ

ધર્મસ્થાનગતે મન્દે ગ્રહદૃષ્ટિવિવર્જિતે ।
રાજયોગેઽત્ર યો જાતઃ સ રાજા દીક્ષિતો ભવેત્