Brihat Parashara Hora Shastra · Chapter 80

atha strījātakādhyāyaḥ

bahudhā bhavatā proktaṃ yajjātakaphalaṃ mune /
tannārīṇāṃ kathaṃ jñeyamiti me kathayā'dhunā

sādhu pṛṣṭaṃ tvayā vipra tadapi pravadāmyaham /
strīṇāṃ puṃbhiḥ samaṃ jñeyaṃ phalamuktaṃ vipaścitā

viśeṣastatra yo dṛṣṭaḥ saṃkṣepāt kathayāmi tat /
lagne dehaphalaṃ tasyāḥ pañcame prasavastathā

saptame patisaubhāgyaṃ vaidhavyaṃ nidhane dvija /
strīṇāmasambhavaṃ yadyat tatphalaṃ tatpatau vadet

lagnendū samabhe yasyāḥ sā nārī prakṛtisthitā /
kanyocitaguṇopetā suśīlā śubhalakṣaṇā

śubhekṣitau surūpā ca sadā dehasukhānvitā /
viṣame puruṣākārā duḥśīlā pāpavīkṣitau

pāpāḍhyau ca guṇairhīnā miśre miśraphalaṃ vadet /
lagnendvoryo balī tasya phalaṃ tasya viśeṣataḥ

lagnendvoryo balī vipra triṃśāṃśaistadadhiṣṭhitaiḥ /
graharāśivaśād vācyaṃ phalaṃ strīṇāṃ viśeṣataḥ

kanyaivāragṛhe duṣṭā bhaumatriṃśāṃśake bhavet /
kucaritrā tathā śaukre samāyā bodhane smṛtā

jaive sādhvī śanau dāsī jñarkṣe kauje chalānvitā /
śaukre prakīrṇakāmā sā baudheṃ'śe ca guṇānvitā

klībā'rkyaṃśe satī jaive kaujai duṣṭā sitarkṣake /
śaukre khyātaguṇā baudhe kalāsu nipuṇā bhavet

jaive guṇavatī mānde punarbhūścandrabhe tataḥ /
svatantrā kujātriṃśāṃśe śaukre ca kulapāṃsanā

baudhe śilpakalā'bhijñā jaive bahuguṇā śanau /
patighnī cārkabhe kauje vācālā bhārgave satī

baudhe puṃśceṣṭitā jaive rājñī mānde kulacyutā /
kauje bahuguṇā'ryarkṣe śaukre cāpyasatī matā

baudhe vijñānasaṃyutā jaive'nekaguṇānvitā /
mānde cālparatiḥ proktā dāsī kauje tathā'rkibhe

suprajñā ca bhavecchaukre baudhe duḥsthā tathā khalā /
jaive pativratā proktā mānde nīcajanānugā

mande śūnye śubhādṛṣṭe patiḥ kāpuruṣo bhavet /
carabhe ca pravāsī syāt klīvastatra jñamandayoḥ

sūrye'stabhe patityaktā bālye ca vidhavā kuje /
śanāvaśubhasandṛṣṭe yāti kanyaiva vṛddhatām

vidhavāstagataiḥ pāpaiḥ saumyaistu sadhavā satī /
miśrakheṭaiḥ pūnarbhūḥ sā jñeyā miśraphalānvitā

mithoṃ'śasthau sitārau cedanyāsaktā tadā'ṅganā /
saptame ca sthite candre tadā bharturanujñyā

śukrabhe śanibhe vāpi senduśukre ca lagnage /
mātrā saha tadā nārī vandhakī bhavati dhruvam

kujarkṣe vā tadaṃśe'ste strīlolaḥ krodhanaḥ patiḥ /
baudharkṣāṃśe tathā vidvān kalāsu nipuṇaḥ sudhīḥ

jaive sarvaguṇopetaḥ patiraste jitendriyaḥ /
śaukre saubhāgyasaṃyuktaḥ kāntaḥ strījanavallabhaḥ

saurerkṣa vātha saurāṃśe vṛddho mūrkhaśca saptame /
atīvāmṛdurarkāṃśe tadṛkṣevā'tikarmakṛt

aste karke tadaṃśe vā kāntaḥ kāmī mṛduḥ patiḥ /
miśre miśraphalaṃ vācyaṃ bhāṃśayośca balakramāt

sūrye'ṣṭamagate jātā duḥkhadāridryasaṃyutā /
kṣatāṅgī khedayuktā ca bhaveddharmaparāṅmukhī

candre'ṣṭamagate nārī kubhagā kustano kudṛg /
vastrābharaṇahīnā ca rogiṇī cātigarhitā

kuje'ṣṭamagate bālā kṛśāṅgī rogasaṃyutā /
vidhavā kāntihīnā ca śokasantāpaduḥkhitā

budheṣṭamagate jātā dharmahīnā bhayāturā /
abhimānadhanairhīnā nirguṇā kalahapriyā

gurāvaṣṭamage bālā viśīlā svalpasantatiḥ /
pṛthuvādakarā patyā tyaktā bahvaśanā bhavet

śukre'ṣṭamagate jātā pramattā dhanavarjitā /
nirdayā dharmahīnā ca malinā kapaṭānvitā

śanāvaṣṭamage jātā duḥsvabhāvā malimlucā /
pravaṃcanaparā nārī bhavet patisukhojjñitā

rāhāvaṣṭamabhāvasthe kurūpā pativarjitā /
kaṭhorahṛdayā rogairyuktā ca vyabhicāriṇī

śaśiśukrau yadā lagne mandarābhyāṃ yutau tadā /
bandhyā bhavati sā nārī sutabhe pāpadṛgyute

kujāṃśestagate sauridṛṣṭe nārī sarugbhagā /
śubhāṃśe saptame jñeyā subhagā pativallabhā

budhabhe lagnage sūtau candraśukrayute dvija /
jñeyā pitṛgṛhe nārī sā sarvasukhasaṃyutā

lagne candrajñaśukreṣu bahusaukhyaguṇānvitā /
jīva tatrātisampannā putravittasukhānvitā

lagnādaṣṭamagau syātāṃ candrārkau svarkṣagau tadā /
bandhyā'tha kākabandhyā cedevaṃ candrabudhau yadā

śanimaṅgalabhe lagne candrabhārgavasaṃyute /
pāpadṛṣṭe ca sā nārī bandhyā bhavati niścayāt

sarāhau saptame sūrye pañcame pāpasaṃyute /
śukrejyarāhavo mṛtyau mṛtāpatyā ca sā bhavet

śukrejyāvaṣṭame sārau saptame vā kujo bhavet /
śaninā dṛgyuto nārī galadgarbhā prakīrtitā

pāpakartarike lagne candre jātā ca kanyakā /
samastaṃ pitṛvaṃśaṃ ca pativaṃśaṃ hihanti sā

sasarpāgnijaleśarkṣe bhānumandāravāsare /
bhadrātithau januryasyāḥ sā viṣākhyā kumārikā

sapāpaśca śubhau lagne dvau pāpau śatrubhasthitau /
yasyā januṣi sā kanyā viṣākhyā parikīrtitā

viṣayoge samutpannā mṛtavatsā ca durbhagā /
vastrābharaṇahīnā ca śokasantaptamānasā

saptameśaḥ śubho vāpi saptame lagnato'thavā /
candrato vā viṣaṃ yogaṃ vinihanti na saṃśayaḥ

lagne vyaye sukhe vāpi saptame cā'ṣṭame kuje /
śubhadṛgyogahīne ca patiṃ hanti na saṃśayaḥ

yasmin yoge samutpannā patiṃ hanti kumārikā /
tasmin yoge samutpanno patnīṃ hanti naro'pi ca

strīhantrā pariṇītā cet patihantrī kumārikā /
tadā vaidhavyayogasya bhaṅgo bhavati niścayāt

mithoṃ'śasthau mithodṛṣṭau sitārkī vā sitarkṣake /
ghaṭāṃśe lagnage nārī pradīptaṃ madanānalam

saṃśāntiṃ nayati strībhiḥ sukhībhirmadanāturā /
parābhiḥ puruṣākārasthitabhirdvijasattama

kujajñaguruśukraiśca balibhiḥ samabhe tanau /
kuśalā'nekaśāstreṣu sā nārī brahmavādinī

krūre saptamage kaścit khecaro navame yadi /
sā pravrajyāṃ tadāpnoti pāpakhecarasaṃbhavām

vilagnādaṣṭame saumye pāpadṛgyogavarjite /
mṛtyuḥ prāgeva vijñeyastasya mṛtyurna saṃśayaḥ

aṣṭame śubhapāpau cet syātāṃ tulyabalau yadā /
saha bhartrā tadā mṛtyuṃ prāptvā svaryāti niścayāt