Brihat Parashara Hora Shastra · Chapter 77

atha sattvādiguṇaphalādhyāyaḥ

atho guṇavaśenāhaṃ kathayāmi phalaṃ dvija /
sattvagrahodaye jāto bhavetsattvādhikaḥ sudhīḥ

rajaḥkheṭodaye vijño rajoguṇasamanvitaḥ /
tamaḥkheṭodaye mūrkho bhavejjātastamo'dhikaḥ

guṇasāmyayuto jāto guṇasāmyakhagodaye /
evaṃ caturvidhā vipra jāyanto jantavo bhuvi

uttamo madhyamo nīca udāsīna iti kramāt /
teṣāṃ guṇānahaṃ vakṣye nāradāriprabhāṣitān

śamo damastapaḥ śaucaṃ kṣāntirārjavameva ca /
alobhaḥ satyavāditvaṃ jane sattvādhike guṇāḥ

śauryaṃ tejo dhṛtirdākṣyaṃ yuddhe cā'pyapalāyanam /
sādhūnāṃ rakṣaṇaṃ ceti guṇā jñeyā rajo'dhike

lobhaścāsatyavāditvaṃ jāḍyamālasyameva ca /
sevākarmapaṭutvaṃca guṇā ete tamo'dhike

kṛṣikarmaṇi vāṇijye paṭutvaṃ paśupālane /
satyāsatyaprabhāṣitvaṃ guṇasāmye guṇā ime

gataiśca lakṣaṇairlakṣya uttamo madhyamo'dhamaḥ /
udāsīnaśca viprenda taṃ tatkarmaṇi yojayet

dvābhyāmeko'dhiko yaśca tasyādhikyaṃ nigadyate /
anyathā guṇasāmyaṃ ca vijñeyaṃ dvijasattama

sevyasevakayorevaṃ kanyakāvarayorapi /
guṇaiḥ sadṛśayoreva prītirbhavati niścalā

udāsīno'dhamasyaivamudāsīnasya madhyamaḥ /
madhyamasyottamo vipra prabhavatyāśrayo mude

ato'varā varāt kanya sevyataḥ sevako'varaḥ /
guṇaistataḥ sukhotpattiranyathā hānireva hi

vīryaṃ kṣetraṃ prasūteśca samayaḥ saṅgatistathā /
uttamādiguṇe heturbalavānuttarottaram

ataḥ prasūtikālasya sadṛśo jātake guṇaḥ /
jāyate taṃ parīkṣyaiva phalaṃ vācyaṃ vicakṣaṇaiḥ

kālaḥ sṛjati bhūtani pātyatho saṃharatyapi /
iśvaraḥ sarvalokānāmavyayo bhagavān vibhu

tacchaktiḥ prakṛtiḥ proktā munibhistriguṇātmikā /
tathā vibhakto'vyakto'pi vyakto bhavati dehinām

caturdhā'vayavāstasya svaguṇaiśca caturvidhaḥ /
jāyante hyuttamo madhye udāsīno'dhamaḥ kramāt

uttame tūttamo janturmadhye'ṅge ca madhyamaḥ /
udāsīne hyadāsīno jāyate cā'dhame'dhamaḥ

uttamāṅgaṃ śaristasya madhyamāṅgamuraḥsthalam /
jaṃghādvayaudāsīnamadhamaṃ padamucyate

evaṃ guṇavaśādeva kālabhedaḥ prajāyate /
jātibhedastu tadbhedājjāyate'tra carācare

evaṃ bhagavatā sṛṣṭaṃ vibhunā svaguṇaiḥ samam /
caturvidhena kālena jagadetaccaturvidham