Brihat Parashara Hora Shastra · Chapter 76

atha paṃcamahābhūtaphalādhyāyaḥ

atha pañcamahābhūtacchāyājñānaṃ vadāmi te /
jñāyate yena kheṭānāṃ vartamānadaśā budhaiḥ

śikhibhūkhāmbuvātānāmadhipā maṅgalādayaḥ /
tattadbalāvaśājjñeyaṃ tattadbhūtabhavaṃ phalam

sabale maṅgale vahnisvabhāvo jāyate naraḥ /
budhe mahīsvabhāvaḥ syādākāśaprakṛtirgurau

śukre jalasvabhāvaśca mārutaprakṛtiḥ śanau /
miśrairmiśrasvabhāvaśca vijñeyo dvijasattama

sūrye vahnisvabhāvaśca jalaprakṛtiko vidhau /
svadaśāyāṃ grahāśchāyāṃ vyaṃjayanti svabhūtajām

kṣudhārtaścapalaḥ śūraḥ kṛśaḥ prājño'tibhakṣaṇaḥ /
tīkṣno gauratanurmānī vahniprakṛtiko naraḥ

karpūrotpalaphandhāḍhyo bhogī sthirasukhī balī /
kṣamāvān siṃhanādaśca mahīprakṛtiko naraḥ

śabdārthavit sunītijño pragalbho jñānasaṃyutaḥ /
vivṛtāsyo'tidīrghaśca vyomaprakṛtisambhavaḥ

kāntimān bhāravāhī ca priyavāk pṛthivīpatiḥ /
bahumitrā mṛdurvidvān jalaprakṛtisambhavaḥ

vāyutattvādhiko dātā krodhī gauro'ṭanapriyaḥ /
bhūpatiśca durādharṣaḥ kṛśāṅgo jāyate janaḥ

svarṇadīptiḥ śubhā dṛṣṭiḥ sarvakāryārthasiddhitā /
vijayo dhanalābhaśca vahnibhāyāṃ prajāyate

iṣṭagandhaḥ śarīre syāt susnigdhanakhadantatā /
dharmārthasukhalābhaśca bhūmicchāyā yadā bhavet

svaccā gaganajā chāyā vākpaṭutvapradā bhavet /
suśabdaśravaṇodbhūtaṃ sukhaṃ tatra prajāyate

mṛdutā svasthatā dehe jalacchāyā yadā bhavet /
tadā'bhiṣṭarasasvādasukhaṃ bhavati dehinaḥ

mālinyaṃ mūḍhatā daityaṃ rogaśca pavanodbhavāḥ /
tadā ca śokasantāpau vāyucchāyā yadā bhavet

evaṃ phalaṃ budhairjñeyaṃ sabaleṣu kujādiṣu /
nirbaleṣu tathā teṣu vaktavyaṃ vyatyayād dvija

nīcaśatrubhagaiścāpi viparītaṃ phalaṃ vadet /
phalāptirabalaiḥ kheṭaiḥ svapnacintāsu jāyate

tadduṣṭaphalaśāntyarthamapi cājñātajanmanām /
phalapaktyā daśā jñeyā vartamānā nabhaḥsadām