Brihat Parashara Hora Shastra · Chapter 75

atha paṃcamahāpuruṣalakṣaṇādhyāyaḥ

atha vakṣyāmyahaṃ pañcamahāpuruṣalakṣaṇam /
svabhoccagatakendrasthairbalibhiśca kujādibhiḥ

kramaśo rucako bhadro haṃso mālavya eva ca /
śaśaścaite budhaiḥ sarvairmahāntaḥ puruṣāḥ smṛtāḥ

dīrghānano mahotsāho svacchakāntirmahābalaḥ /
cārubhrūrnīlakeśaśca suruciśca raṇapriyaḥ

raktaśyāmo'rihantā ca mantraviccoranāyakaḥ /
krūrobhartā manuṣyāṇāṃ kṣāmā'ṅghrirdvijapūjakaḥ

vīṇāvajradhanuḥpāśavṛṣacakrāṅkitaḥ kare /
mantrābhicārakuśalī dairdhye caiva śatāṃgulaḥ

mukhadairghyasamaṃ madhyaṃ tasya vijñaiḥ prakīrtitam /
tulyastulāsahasreṇa rucako dvijapuṅgava

bhunakti vindhyasahyādripradeśaṃ saptatiṃ samāḥ /
śatreṇa vahninā vāpi sa prayāti surālayam

śārdūlapratibhah pīnavakṣā gajagatiḥ pumān /
pīnājānubhujaḥ prājñaścaturasraśca yogavit

sāttvikaḥ śobhanāṃghraśca śobhanaśmaśrusaṃyutaḥ /
kāmī śaṅkhagadācakraśarakuñjaracihnakaiḥ

dhvajalāṅgalacihnaiśca cihnitāṃghrikarāmbujaḥ /
sunāsaśśāstravid dhīraḥ kṛṣṇākuñcitakeśabhṛt

svatantraḥ sarvakāryeṣu svajanaprīṇanakṣamaḥ /
aiśvaryaṃ bhujyate cāsya nityaṃ mitrajanaiḥ paraiḥ

tulayā tulito bhārapramitaḥ strīsutānvitaḥ /
sakṣemo bhūpatiḥ pāti madhyadeśaṃ śataṃ samāḥ

haṃso haṃsasvaro gauraḥ sumukhonnatanāsikaḥ /
śleṣmalo madhupiṅgākṣo raktavarṇanakhaḥ sudhīḥ

pīnagaṇḍasthalo vṛttaśirāḥ sucaraṇo nṛpaḥ /
matsyā'ṅkuśadhanuḥśaṃkhakañjakhaṭvāṅgacihnakaiḥ

cihnatāṃghrikaraḥ strīṣu kāmārto naiti tuṣṭatām /
ṣaṇṇvatyaṃgulo dairghye jalakrīḍārataḥ sukhī

gaṅgāyamunayormadhyadeśaṃ pāti śataṃ samāḥ /
vanānte nidhanaṃ yāti bhuktvā sarvasukhaṃ bhuvi

samauṣṭhaḥ kṛśamadhyaśca candrakāntiruciḥ pumān /
sugandho nātiraktāṅgo na hrasvo nātidīrghakaḥ

samasvaccharado hastināda ājānubāhudhṛk /
mukhaṃ viśvāṃgulaṃ dairghye vistāre ca daśāṅgulam

mālavyo mālavākhyaṃ ca deśaṃ pāti sasindhukam /
sukhaṃ saptativarṣāntaṃ bhuktvā yāti sulālayam

tanudvijamukhaḥ śūro nātihrasvaḥ kṛśodaraḥ /
madhye kṣāmaḥ sujaṃghaśca matimān pararandhravit

śakto vanādridurgeṣu senānīrdanturaḥ śaśaḥ /
caṃcalo dhātuvādī ca strīśakto'nyadhānānvitaḥ

mālāvīṇāmṛdaṅgā'strarekhāṅkitakarāṃghrikaḥ /
bhūpo'yaṃ vasudhā pāti jīvan khādrisamāḥ sukhī