Brihat Parashara Hora Shastra · Chapter 48

atha viśeṣanakṣatradaśāphalādhyāyaḥ

sthānasthitivaśenaivaṃ phalaṃ proktaṃ purātanaiḥ |
mitho bhāveśasambandhātphalāni kathayāmyaham

lagneśasya gaśākāle satkītirdehajaṃ sukham |
dhaneśasya daśāyāṃ tu kleśo vā mṛtyuto bhayam

sahajeśadaśākāle jñeyaṃ pāpaphalaṃ nṛṇām |
sukhādhīśadaśāyāṃ tu gṛhabhūmisukhaṃ bhavet

pañcameśasya pāke ca vidyāptiḥ putrajaṃ sukham |
rogeśasya daśākāle dehapīḍā riporbhayam

saptameśasya pāke tu strīpīḍā mṛtyuto bhayam |
aṣṭameśadaśākāle mṛtyubhītirdhanakṣatiḥ

dharmaśasya daśāyāṃ ca bhūrillābho yaśaḥsukham |
daśameśadaśākāle sammānaṃ nṛpasaṃsadi

lābheśasya daśākāle lābhe bādhā rujobhayam |
vyayeśasya daśā nṛṇāṃ bahukaṣṭapradā dvija

daśārambhe śubhasthāne sthitasyāpi śubhaṃ phalam |
aśubhasthānagasyaivaṃ śubhasyāpi na śobhanam

pañcameśena yuktasya karmeśasya daśā śubhā |
navameśena yuktasya karmeśasyātiśabhanā

pañcameśena yuktasya grahasyāpi daśā śubhā |
tathā dharmapayuktasya daśā paramaśobhanā

sukheśasahitasyāpi dharmeśasya daśā śubhā |
pañcamasthānagasyāpi māneśasya daśāśubhā

evaṃ trikoṇanāthānāṃ kendrasthānāṃ daśāḥ śubhāḥ |
tathā koṇasthitānāṃ ca kendreśānāṃ daśāḥ śubhāḥ

kendreśaḥ koṇabhāvasthaḥ koṇeśaḥ kendrago yadi |
tayordaśāṃ śubhāṃ prāhurjyotiḥśāstravido janāḥ

ṣaṣṭhāṣṭamavyayādhīśā api koṇeśasaṃyutā |
teṣāṃ daśā'pi śubhadā kathitā kālakovidaiḥ

koṇeśo yadi kemdrasthaḥ kendreśo yadi koṇagaḥ |
tābhyāṃ yuktasya kheṭasya dṛṣṭiyuktasya caitayoḥ

daśāṃ śubhapradāṃ prāhurvidvāṃso daivacintakāḥ |
lagneśo dharmabhāvastho dharmeśo lagnago yadi

etayostu daśākāle sukhadharmasamudbhavaḥ |
karmeśo lagnarāśistho lagneśaḥ karmabhāvagaḥ

tayordaśāvipāke tu rājyalābho bhaveddhruvam |
triṣaḍāyagatānāṃ ca triṣaḍāyādhipairyujam

śubhānāmapi kheṭānāṃ daśā pāpaphalapradā |
mārakasthānagānāṃ ca mārakeśayujāmapi

randhrasthānagatānāṃ ca daśā'niṣṭaphalapradā |
evaṃ bhāveśasambandhādūranīyaṃ daśāphalam