Brihat Parashara Hora Shastra · Chapter 47

atha daśāphalādyāyaḥ

śrutāśca bahudhā bhedā daśānāṃ ca mayā mune |
phalaṃ ca kīdṛśaṃ tāsāṃ kṛpayā me taducyatām

sādhāraṇaṃ viśiṣṭañca daśānāṃ dvividhaṃ phalam |
grahāṇāṃ ca svabhāvena sthānasthitivaśena ca

grahavīryānusāreṇa phalaṃ jñeyaṃ daśāsu ca |
ādyadreṣkāṇage kheṭe daśārambhe phalaṃ vadet

daśāmadhye phalaṃ vācyaṃ madhyadreṣkāṇage khage |
ante phalaṃ tṛtīyasthe vyastaṃ kheṭe ca vakrage

daśārambhe daśādīśe lagnage śubhadṛgyute |
svocce svabhe svamaitre vā śubhaṃ tasya daśāphalam

ṣaṣṭhā'ṣṭamavyayasthe ca nīcāstaripubhasthite |
aśubhaṃ tatphalaṃ cā'tha bruve sarvadaśāphalam

mūlatrikoṇe svakṣetre svocce vā paramoccage |
kendratrikoṇalābhasthe bhāgyakarmādhipairyute

sūrye balasamāyukte nijavargabalairyute |
tasmindāye mahat saukhyaṃ dhanalābhādikaṃ śubham

atyantaṃ rājasanmānamaśvāṃdolyādikaṃ śubham |
sutādhipasamāyukte putralābhaṃ ca vindati

dhaneśasya ca sambandhe gajāntaiśvaryamādiśet |
vāhanādhipasambandhe vāhanātrayalābhakṛt

nṛpalatuṣṭirvittāḍhyaḥ senādhīśaḥ sukhī naraḥ |
vastravāhanalābhaśca daśāyāṃ balino raveḥ

nīce ṣaḍaṣṭake riḥphe durbale pāpasaṃyute |
rāhuketusamāyukte duhsthānādhipasaṃyute

tasmindāye mahāpīḍā dhanadhānyavināśakṛta |
rājakopaḥ pravāsaśca rājadaṇḍo dhanakṣayaḥ

jvarapīḍā yaśohānirbandhumitravirodhakṛta |
pitṛkṣayabhayaṃ caiva gṛhe tvaśubhameva ca

pitṛvarge manastāpaṃ jandveṣaṃ ca vindati |
śubhadṛṣṭiyute sūrye madhye tasmin kvacitsukham |
pāpagrheṇa sandṛṣṭe vadetpāpaphalaṃ budhaḥ

evaṃ sūryaphalaṃ vipra saṃkṣepāduditaṃ mayā |
viṃśottarīmatenātha bruve candradaśāphalam

svocce svakṣetrage caiva kendre lābhatrikoṇage |
śubhagraheṇa saṃyukte pūrṇe candrebalairyute

karmabhāgyādhipairyukte vāhaneśabalairyute |
ādyantaiśvaryasaubhāgyadhanadhānyādilābhakṛta

gṛhe tu śubhakāryāṇi vāhanaṃ rājadarśanam |
yatnakāryārthasiddhiḥ syād gṛhe lakṣmīkaṭākṣakṛt

mitraprabhuvaśādbhāgyaṃ rājyalābhaṃ mahatsukham |
aśvāndolyādilābhaṃ ca śvetavastrādikaṃ labhet

putralābhādisantoṣaṃ gṛhagodhanasaṃkulam |
dhanasthānagate candre tuṅge svakṣetrage'pi vā

anekadhanalābhaṃ ca bhāgyavṛddhirmahatsukham |
nikṣeparājasanmānaṃ vidyālābhaṃ ca vindati

nīce vā kṣīṇacandre vā dhanahānirbhaviṣyati |
duścikye balasaṃyukte kvacitsaukhyaṃ kvaciddhanam

durbale pāpasaṃyukte dehajāḍyaṃ manorujam |
bhṛtyapīḍā vittahānirmātṛvargajanādvadhaḥ

ṣaṣṭhāṣṭamavyaye candre durbale pāpasaṃyute |
rājadveṣo manoduḥkhaṃ dhanadhānyādināśanam

mātṛkleṣaṃ manastāpaṃ dehajāḍyaṃ manorujam |
duḥsthe candre balairyukte kvacillābhaṃ kvacitsukham |
dehajāḍyaṃ kvaciccaiva śāntyā tatra śubhaṃ diśet

svabhoccādigatasyaivaṃ nīcaśatrubhagasya ca |
bravīmi bhūmipurtasya śubhā'śubhadaśāphalam

paramoccagate bhaume svocce mūlatrikoṇage |
svarkṣe kendratrikoṇe vā lābhe vā dhanage'pi vā

sampūrṇabalasaṃyukte śubhadṛṣṭe śubhāṃśake |
rājyalābhaṃ bhūmilābhaṃ dhanadhānyādilābhakṛt

ādhikyaṃ rājasammānaṃ vāhanāmbarabhūṣaṇam |
videśe sthānalābhaṃ ca sodarāṇāṃ sukhaṃ labhet

kendre gate sadā bhaume duścikye balasaṃyute |
parākramādvittalābho yuddhe śatrujayo bhavet

kalatraputravibhavaṃ rājasammānameva ca |
daśādau sukhamāpnoti daśānte kaṣṭamādiśet

nīcādiduṣṭabhāvasthe bhaume balavivarjite |
pāpayukte pāpadṛṣṭe sā daśā neṣṭadāyikā

evaṃ rāhośca ketośca kathayāmi gṛhādikam |
tayordaśāphalajñaptyai tavā'gre dvijanandana

rāhostu vṛṣabhaṃ ketorvṛścikaṃ tuṅgasaṃjñakam |
mūlatrikoṇakaṃ jñeyaṃ yugmaṃ cāpaṃ krameṇa ca

kumbhālī ca gṛhau proktau kanyāmīnau ca kenacit |
taddāye bahusaukhyaṃ ca dhanadhānyādisampadām

mitrprabhuvaśādiṣṭaṃ vāhanaṃ putrasambhavaḥ |
navīnagṛhanirmāṇaṃ dharmacintā mahotsavaḥ

videśarājasanmānaṃ vastrālaṅkārabhūṣaṇam |
śubhayukte śubhairdṛṣṭe yogakārakasaṃyute

kendratrikooṇalābhe vā duścikye śubharāśige |
mahārājaprasādena sarvasampatsukhāvaham

yavanaprabhusanmānaṃ grhe kalyāṇasambhavam |
randhre vā vyayage rāhau taddāye kaṣṭamādiśet

pāpagraheṇa sambandhe mārakagrhasaṃyute |
nīcarāśigate vāpi sthānabhraṃśo manovyathā

vināśo dāraputrāṇāṃ kutsitānnaṃ ca bhojanam |
daśādau dehapīḍā ca dhanadhānyaparicyutiḥ

daśāmadhye tu saukhyaṃ syāt svadeśe dhanalābhakṛt |
daśānte kaṣṭamāpnoti sthānabhraṃśo manovyathā

yaḥ sarveṣu nābhogeṣu budhairatiśubhaḥ smṛtaḥ |
tasya devendrapūjyasya kathayāmi daśāphalam

svocce svakṣetrage jīve kendre lābhatrikoṇage |
mūlatrikoṇalābhe vā tuṃgāṃśe svāṃśage'pi vā

rājyalābhaṃ mahāpauruṣaṃ rājasanmānakīrtanam |
gajavājisamāyuktaṃ devabrāhmaṇapūjanam

dāraputrādisaukhyaṃ ca vāhanāṃbaralābhajam |
yajñādikarmasiddhiḥ syādvedāntaśravaṇādikam

mahārājaprasādenā'bhīṣṭasiddhiḥ sukhāvahā |
āndolikādilābhaśca kalyāṇaṃ ca mahatsukham

putradārādilābhaśca annadānaṃ mahatpriyam |
nīcāstapāpasaṃyukte jīvai riṣphāṣṭasaṃyute

sthānabhraṃśaṃ manastāpaṃ putrapīḍāmahadbhayam |
paśvādidhanahāniśca tīrthayātrādikaṃ labhet

ādau kaṣṭaphalaṃ caiva catuṣpājjīvalābhakṛt |
madhyānte sukhamāpnoti rājasammānavaibhavam

atha sarveṣu kheṭeṣu yo'tihīnaḥ prakīrtitaḥ |
tasya bhāskaraputrasya kathayāmi daśāphalam

svocce svakṣetrage mande mitrakṣetre'tha vā yadi |
mūlatrikoṇe bhāgye vā tuṃgāṃśe svāṃśage'pi vā

duścikye lābhage caiva rājasammānavaibhavam |
satkīrtirdhanalābhaśca vidyāvādavinodakṛt

mahārājaprasādena gajavāhanabhūṣaṇam |
rājayogaṃ prakurvīta senādhīśānmahatsukham

lakṣmīkaṭākṣacihnāni rājyalābhaṃ karoti ca |
gṛhe kalyāṇasampattirdāraputrādilābhakṛt

ṣaṣṭhāṣṭamavyaye mande nīce vā'staṅgate'pi vā |
viṣaśastrādipīḍā ca sthābhraṃśaṃ mahadbhayam

pitṛmātṛviyogaṃ ca dāraputrādipīḍanam |
rājavaisaḥamyakāryāṇi hyaniṣṭaṃ bandhanaṃ tathā

śubhayuktekṣite mande yogakārakasaṃyute |
kendratrikoṇalābhe vā mīnage kārmuke śanau

rājyalābhaṃ mahotsāhaṃ gajaśvāmbarasaṃkulam

atha sarvanabhogeṣu yaḥ kumāraḥ prakīrtitaḥ |
tasya tāreśaputrasya kathayāmi daśāphalam

svocce svakṣetrasaṃyukte kendralābhatrikoṇage |
mitrakṣetrasamāyukte saumye dāye mahatsukham

dhanadhānyādilābhaṃ ca satkīrtidhanasampadām |
jñānādhikyaṃ nṛpaprītiṃ satkarmaguṇavarddhanam

putradārādisaukhyaṃ ca dehārogyaṃ mahatsukham |
kṣīreṇa bhojanaṃ saukhyaṃ vyāpārāllabhate dhanam

śubhadṛṣṭiyute saumye bhāgye karmādhipe daśā |
ādhipatye balavatī sampūrṇphaladādikā

pāpagrahayute dṛṣṭe rājadveṣaṃ manorujam |
bandhujanavirodhaṃ ca videśagamanaṃ labhet

parapreṣyaṃ ca kalahaṃ mūrtakṛrcchānmahanbhayam |
ṣaṣṭhāṣṭamavyaye saumye lābhabhogārthanāśanam

vātapīḍāṃ dhanaṃ caivaṃ pāṇḍurogaṃ vinirdiśet |
nṛpacaurāgnibhītiṃ ca kṛṣigobhūmināśanam

daśādau dhanadhānyaṃ ca vidyālābhaṃ mahatsukham |
putrakalyāṇasampattiḥ sanmārge dhanalābhakṛt

madhye narendrasanmānamante duḥkhaṃ bhaviṣyati

yastamograhayormadhye kabandhaḥ kathyate budhaiḥ |
tasya ketoridānīṃ te katheyāmi daśāphalam

kendre lābhe trikoṇe va śubharāśau śubhekṣite |
svocce vā śubhavarge vā rājaprītiṃ manonugam

deśāgrāmādhipatyaṃ ca vāhanaṃ putrasambhavam |
deśāntaraprayāṇaṃ ca nirdiśet tat sukhāvaham

putradārasukhaṃ caiva catuṣpājjīvalābhakṛt |
duścikye ṣaṣṭhalābhe vā keturdāye sukhaṃ diśet

rājyaṃ karoti mitrāṃśaṃ gajavājisamanvitam |
daśadau rājayogaśca daśāmadhye mahadbhayam

ante dūrāṭanaṃ caiva dehaviśramaṇaṃ tathā |
dhane randhre vyaye ketau pāpadṛṣṭiyutekṣite

nigaḍaṃ bandhunāśaṃ ca sthānabhraṃśaṃ manorujam |
śūdrasaṅgādilābhaṃ ca kurute rogasaṃkulam

atha bhūteṣu yaḥ śukrā madarūpeṇa tiṣṭhati |
tasya daityagurorvipra kathayāmi daśāphalam

paramoccagate śukre svocce svakṣetrakendrage |
nṛpā'bhiṣekasamprāptirvāhanā'mbarabhūṣaṇam

gajāśvapaśulābhaṃ ca nityaṃ miṣṭhānnabhojanam |
akhaṇḍamaṇḍalādhīśārājasanmānavaibhavam

mṛdaṅgavādyaghoṣaṃ ca gṛhe lakṣmīkaṭākṣakṛt |
trikoṇasthe nije tasmin rājyārthagṛhahasampadaḥ

vivāhotsavakāryāṇi putrakalyāṇavaibhavam |
senādhipatyaṃ kurute iṣṭabandhusamāganam

naṣṭarājyāddhanaprāptiṃ gṛhe godhanasaṅgraham |
ṣaṣṭhāṣṭamavyaye śukre nīce vā vyayarāśige

ātmabandhujanadveṣaṃ dāravargādipīḍanam |
vyavasāyātphlaṃ naṣṭaṃ gomahiṣyādihānikṛt

dāraputrādipīḍā vā ātmabandhuviyogakṛt |
bhāgyakarmādhipatyena lagnavāhanarāśige

taddaśāyāṃ mahatsaukhyaṃ deśagrāmādhipālatā |
devālayataḍāgādipuṇyakarmasu saṃgrahaḥ

annadāne mahatsaukhyaṃ nityaṃ miṣṭhānnabhojanam |
utsāhaḥ kīrtisampattī strīputradhanasampadaḥ

svabhuktau phalamevaṃ syādbalānyanyāni bhuktiṣu |
dvitīyadyūnanāthe tu dehapīḍā bhaviṣyati

taddoṣaparihārārthaṃ rudraṃ vā tryambakaṃ japet |
svetāṃ gāṃ mahiṣīṃ davyādārogyaṃ ca tato bhavet