Brihat Parashara Hora Shastra · Chapter 46

atha daśādhyāya

sarvajño'si maharṣe tvaṃ kṛpayā dīnavatsala |
daśāḥ katividhāḥ santi tanme kathaya tattvataḥ

sādhu pṛṣṭaṃ svayā vipra lokānugrahakāriṇā |
kathayāmi tavāgre'haṃ daśabhedānanekaśaḥ

daśābahuvidhāstāsu mukhyā viṃśottarī matā |
kaiścidaṣṭottarī kaiścit kathitā ṣoḍaśottarī

dvādaśābdottarī vipra daśā pañcottarī tathā |
daśā śatasamā tadvat caturāśītivatsarā

dvisaptatisamā ṣaṣṭisamā ṣaḍtriṃśavatsarā |
nakṣatrādhārikāścetāḥ kathitāḥ pūrvasūribhiḥ

athā kāladaśā cakradaśā proktā munīśvaraiḥ |
kālacakradaśā cā'yā mānyāsarvadaśāsu yā

daśā'tha caraparyāyā sthirākhyā ca daśā dvija |
kendrādya ca daśā jñeyā kārakādigrahodbhavā

brahmagrahāśritarkṣādyā daśā proktā tu kenacit |
māṇḍūkī ca daśā nāma tathā sthūladaśā smṛtā

yogārdhajadaśā vipra dṛgdaśā ca tataḥ param |
trikoṇākhyā daśā nāma tathā rāśidaśā smṛtā

pañcasvaradaśā vipra vijñeyā yoginīdaśā |
daśā paiṇḍī tathāṃśī ca naisargikadaśā tathā

aṣṭavargadaśa sandhyādasā pācakasaṃjñikā |
anyāstārādaśādyāśca na svargāḥ sarvasammatāḥ

kṛttikātaḥ samārabhya trirāvṛtya daśādhipāḥ |
ācaṃkurāguśabukeśupūrvā vihagāḥ kramāt

vahnibhājjanmabhaṃ yāvad yā saṃkhyā navataṣṭitā |
śeṣāddaśādhipo jñeyastamārabhya daśāṃ nayet

viṃśottaraśataṃ pūrṇamāyuḥ pūrvamudāhṛtam |
kalai viṃśottarī tasmād daśā mukhyā dvijottama

daśāsamāḥ kramādeṣāṃ ṣaḍ daśā'śvā gajendavaḥ |
nṛpālā navacandrāśca navacandrā nagā nakhāḥ

daśāmanāṃ bhayātaghnaṃ bhabhogena hṛtaṃ phalam |
daśāyā bhuktavarṣādya bhogyaṃ mānād viśodhitam

lagneśāt kendrakoṇasthe rāhau lagnaṃ vinā sthite |
aṣṭottarī daśā vipra vijñeyā raudrabhāditaḥ

catuṣkaṃ tritayaṃ tasmāt catuṣkaṃ tritayaṃ punaḥ |
evaṃ svajanmabhaṃ yāvad vigaṇayya yathākramam

sūryaścandraḥ kujaḥ saumyaḥ śanirjīvastamo bhṛguḥ |
ete daśādhipā vipra jñeyāḥ ketuṃ vinā grahāḥ

rasāḥ pañcendavo nāgāḥ saptacandrāśca khendavaḥ |
go'bjāḥ sūryāḥ kunetrāśca ravyādīnāṃ daśāsamāḥ

daśābdāṃghriśca pāpānāṃ śubhānāṃ tryaṃśa eva hi |
ekaikabhe daśāmānaṃ vijñeyaṃ dvijasattama

tatastadyātabhogādhyāṃ bhuktaṃ bhogyaṃ ca sādhayet |
viṃśottarīvadevātra tatastatphalamādiśet

kṛṣṇapakṣe divā janma śuklapakṣe tathā niśi |
tadā hyaṣṭottarī cintyā phalārthañca viśeṣataḥ

candrahorāgate kṛṣṇe sūryahorāgate sitee |
lagne nṛṇāṃ phalajñaptyai vicintyā ṣoḍaśottarī

puṣyabhājjanmabhaṃ yāvad yā saṃkhyā gajataṣṭitā |
ravirbhaumo gururmandaḥ ketuścandro budho bhṛguḥ

iti kramād daśādhīśāḥ jñeyā rāhuṃ vinā grahāḥ |
rudrādyekottarāḥ saṃkhyā dhṛtyantaṃ vatsarāḥ kramāt

śukrāṃśake prajātasya vicintyā dvādaśottarī |
janmabhāt pauṣṇabhaṃ yāvat saṃkhyā hi vasutaṣṭitā

sūryo guruḥ śikhī jño'guḥ kujo mando niśākaraḥ |
vinā śukraṃ daśādhīśā dvicayāt saptataḥ samāḥ

arkāṃśa karkalagne pañcottarī matā |
mitrarkṣājjanmabhaṃ yāvat saṃkhyā saptavibhājitā

ekādiśeṣe vijñyāḥ kramātsaptadaśādhipāḥ |
ravirjño'rkasuto bhaumaḥ śukraścandro vṛhaspatiḥ

ekottarācca vijñeyā dvādaśādyāḥ kramātsamāḥ |
dhṛtyantāḥ saptakheṭānāṃ rāhuketū vinā dvija

vargottamagate lagne daśā cintyā śatābdikā |
pauṣṇbhājjanmaparyantaṃ gaṇayet saptabhirbhajet

śeṣāṅke ravito jñeyā daśā śatasamāhvayā |
raviścandro bhṛgurjñaśca jīvo bhaumaḥ śanistathā

kramadete daśādhīśā bāṇā bāṇā diśo daśa |
nakhā nakhāḥ kharāmāśca samājñeyā dvijottama

karmeśe karmage jñeyā caturāśītikā daśā |
pavanājjanmabhaṃ yāvad yā saṇkhyā saptabhājitā

śeṣe ravīndubhaumajñā guruśukraśanaiścarāḥ |
daśādhīśāḥ kramādeṣāṃ jñeyā dvādaśavatsarāḥ

mūlājjanmarkṣaparyantaṃ gaṇayedaṣṭabhirbhajet |
śeṣāddaśādhīpā jn' eyā aṣṭau ravyādayaḥ kramāt

nava varṣāṇi sarveṣāṃ viketūnāṃ nabhaḥsadām |
lagneśe saptame yasya lagne vā saptamādhipe

cintanīyā daśā tasya dvisaptatisamāhvayā |
viṃśottarīvadatrā'pi bhuktaṃ bhogyaṃ ca sādhayet

yadārko lagnarāśisthaścintyā ṣaṣṭisamā tadā |
dāsrāt trayaṃ catuṣkaṃ ca trayaṃ ceti punaḥ punaḥ

gurvarkabhūsutānāṃ ca daśā daśa daśābdakāḥ |
tataḥ śaśijñaśukrārkaputrāgūnāṃ rasābdakāḥ

śravaṇājjanmabhaṃ yāvat saṃkhyā vasuvibhājitā |
śeṣe candraravījyārabudhārkibhṛgurāhavaḥ

kramāddaśādhipāsteṣāmekādyekottarāḥ samā |
lagne dine'rkahorāyāṃ candrahorāgate niśi

sūryasyā'rdhāstayaḥ pūrvaṃ parastādūdayādapi |
pañca pañca ghaṭī sandhyā daśanāḍī prakīrtitā

sandhyādvayañca viṃśatyā nāḍikābhiḥ prakīrtitam |
dinasya viṃśatirghaṭyaḥ pūrṇasaṃjñā udāhṛtāḥ

niśāyāḥ mugdhasaṃjñāśca ghaṭikā viṃśatiśca yāḥ |
sūryodaye ca yā sandhyā khaṇḍākhyā da/sanāḍikā

astakāle ca yā sandhyā sudhākhyā daśanāḍikā |
pūrṇamugdhaghaṭīmāne dviguṇe tithibhirbhajet

tathā khaṇḍasudhāghaṭyau caturghne tithibhirbhajet |
labdhaṃ varṣādikaṃ mānaṃ sūryādīnāṃ khacāriṇām

ekādisaṃkhyayā nighnaṃ daśāmānaṃ pṛthak kramāt |
rāhuketuyutānāṃ ca navānāṃ kālasaṃjñakam

rātrau lagnāśritādrāśerdine lagneśvarāśritām |
sandhyāyāṃ vittabhāvasthānneyā cakradaśā budhaiḥ

daśā varṣāṇi rāśīnāmekaikasya daśāmitiḥ |
kramāccakrasthitānāñca vijñātavyā dvijottama

athā'haṃ śaṅkaraṃ natvā kālacakradaśāṃ bruve |
pārvatyai kathitā pūrvaṃ sādaraṃ yā pinākinā

tasyāḥ sāraṃ samuddhṛtya tavāgre dvijamandana |
śubhā'śubhaṃ manuṣyāṇāṃ yathā jānanti paṇḍitāḥ

dvādaśāraṃ likheccakraṃ tiryagūrghvasamānakam |
gṛhā dvādaśa jāyante savye'savye dvidhā dvija

dvitīyādiṣu koṣṭheṣu rāśīn meṣādikān likhet |
evaṃ dvādaśarāśyākhyaṃ kālacakramudīritam

aśvinyāditrayaṃ savyamārge cakre vyavasthitam |
rohiṇyāditrayaṃ caivamapasavye vyavisthitam

evamṛkṣavibhāgaṃ hi kṛtvā cakraṃ samuddharet |
aśvinyaditihastakṣemūlaproṣṭhapadābhidhāḥ

vahnivātādiviśvarkṣarevatyaḥ savyatārakāḥ |
etaddaśoṣupādānāmaśvinyādau ca vīkṣayet

dehajīvau kathaṃ vīkṣyau nakṣatrāṇāṃ padeṣu ca |
viśadaṃ tatprakāraṃ ca maitreya kathayāmayaham

dehajīvau meṣacāpau dāsrādyacaraṇasya ca |
meṣādyāścāpaparyantaṃ rāśipāśca daśādhipāḥ

mṛgayugme dehajīvau dvitīyacaraṇe smṛtau |
kramāt mithunaparyantaṃ rāśipāśca daśādhipāḥ

dāsrādidaśatārāṇāṃ tṛtīyacaraṇe dvija |
gaurdeho mithunaṃ jīvo dvyekārkeśadaśāṅkapāḥ

kvakṣirāmarkṣanāthāśca daśādhipatayaḥ kramāt |
aśvinyādidaśauḍūnāṃ caturthacaraṇe tathā

karkamīnau dehajīvau karkādinavarāśipāḥ |
daśādhīśāśca vijñeyā navaite dvijasattama

yamejyacitrātoyarkṣā'hīrbudhnyāḥ savyatārakāḥ |
etatpañcoḍupādānāṃ bharaṇyādau vicintayet

yāmyaprathamapādasya dehajīvāvalirjhaṣaḥ |
nāgāgartupayodhīṣurāmākṣīndvarkabheśvarāḥ

yāmyadvitīyapādasya dehajīvau ghaṭāṅgane |
rudradiṅnandacandrākṣirāmābdhīṣvaṅgabheśvarāḥ

yāmyatṛtīyapādasya dehajīvau tulāṅgane |
saptāṣṭāṅkadigīśārkagajādriramabheśvarāḥ

karko deho dhanurjīvo yāmyaturyapade dvija |
vedabāṇāgninetrendusūryeśāśāṅkabheśvarāḥ

saptamevaṃ vijānīyādasavyaṃ kathayāmyaham |
dvādaśārāṃ likheccakaṃ pūrvavad dvijasattama

dvitīyādiṣu koṣṭheṣu vṛścikād vyastamālikheet |
rohiṇī ca maghā dvīśaḥ karṇaśceti catuṣṭayam

uktaṃ cā'savyanākṣatraṃ pūrvācāryairdvijottama |
etadvedoḍupādānāṃ rohinīvannirīkṣayet

rohiṇyādipade dehajīvau karkidhanurdharau |
navadigrudrasūryendunetrāgnoṣvabdhibheśvarāḥ

dhātṛdvitīcaraṇe dehajīvau tulastriyau |
aṅkāgavasusūryeśadigaṅkavasujūkapāḥ

tṛtīyacaraṇe brāhma deehajīvau ghaṭāṅgane |
ṣaḍbāṇabdhiguṇakṣīndunandadigrudrabheśvarāḥ

rohiṇyantapade dehajīvāvalijaṣau smṛtau |
sūryendudviguṇeṣvabdhitarkaśailāṣṭabheśvarāḥ

cāndraraudrabhagāryamṇamitrenduvasuvāruṇam |
etattārāṣṭakaṃ vijñairvijñeyaṃ cāndravat kramāt

karko deho jhaṣo jīvo mṛgādyacaraṇe dvija |
vyastānmīnādikarkāntarāśipāśca daśādhipāḥ

gaurdeho mithunaṃ jīvo dvitīyacaraṇe mṛge |
tridvyekāṅkadiśīśārkacandrākṣibhavanādhipāḥ

dehajīvau nakrayugme tṛtīyacaraṇe mṛge |
tribāṇābdhirasāgāṣṭasūryeśadaśabheśvarāḥ

meṣo deho dhanurjīvo caturthacaraṇe mṛge |
vyastāccāpādimeṣāntarāśipāśca daśādhipāḥ

apasavyagaṇe tvevaṃ dehajīvadaśādikam |
pārvatyai śambhunā proktamidāvīṃkathitaṃ mayā

keṣāṃ ca kati varṣāṇi daśeśānāṃ mahāmune |
daśāyā bhuktabhogyādyaṃ tadārambha pracakṣva me

bhūtaikaviṃśagirayo navadikṣoḍaśābdhayaḥ |
sūryādīnāṃ daśābdhāḥ syū rāśīnāṃ svāmino vaśāt

narasya janmakāle vā praśnakāle yadaṃśakaḥ |
tadādinavarāśināmabdāstasyāyurucyate

sampūrṇāyurbhavedādāvardhamaṃśasya madhyake |
aṃśānte paramaṃ kaṣṭamityāhurapare budhāḥ

jñātvaivaṃ sphuṭasiddhāntaṃ rāśyaṃśaṃ gaṇayed budhaḥ |
anupātena vakṣyāmi tadupāyamataḥ param

gatatārāstribhirbhaktāḥ śeṣaṃ caiva caturguṇam |
vartamānapadenāḍhyaṃ rāśīnāmaṃśako bhavet

meṣe śataṃ vṛṣe'kṣāṣṭau mithune trigajāḥ samāḥ |
karkaṭe'ṅgagajāḥ proktāstāvantastattrikoṇayoḥ

jano yatrāṃśake jāto gatanāḍīpalādibhiḥ |
tadāṃśasya hatāḥ svābdāḥ pañcabhūmivibhājitāḥ

evaṃ mahādaśārambho bhavedaṃśādyathā kramāt |
gaṇayennavaparyantaṃ tattadāyuḥ prakīrtitam

padasya bhuktaghaṭyādyaiḥ svābdamānaṃ hataṃ tataḥ |
bhabhogāṃghrihṛtaṃ bhuktaṃ bhogyaṃ mānād viśodhitam

candrāṅkāṃśakalā bhuktāḥ svābdamānahatā hṛtāḥ |
dviśatyā bhuktavarṣādyaṃ jñeyaṃ bhogyaṃ tato budhaiḥ

savyākhye prathamāṃśo yaḥ sa deha iti kathyate |
antyāṃśo jīvasaṃjñaḥ syād vilomamapasavyake

dehādiṃ gaṇayet savye jīvādimapasavyake |
evaṃ vijñāya daivajñastatastatphalamādiśet

kālacakragatiḥ proktā tridhā pūrvamaharṣibhiḥ |
maṇḍūkākhyā gatiścaikā markaṭīsaṃjñakā'parā

siṃhāvalokanākhyā ca tṛtīyā parikīrtitā |
utplutya gamanaṃ vijñā maṇḍūkākhyaṃ pracakṣate

pṛṣṭhato gamanaṃ nāma markaṭīsaṃjñakaṃ tathā |
vāṇācca navaparyantaṃ gatiḥ siṃhāvalokanam

kanyākarkaṭayoḥ siṃhayugmayormaṇḍūykī gatiḥ |
karkakesariṇorevaṃ kathyate markaṭīṃ gatiḥ

mīnavṛścikayoścāpameṣayoḥ saiṃhikī gatiḥ |
iti sañcintya vijñeyaṃ kālacakradaśāphalam

maṇḍūkagatikāle hi savye bandhujane bhayam |
pitrorvā viṣaśastrāgnijvaracorādijaṃ bhayam

kesarīyugmamaṇḍūke māturmaraṇmādiśet |
svamṛtiṃ rājabhitiṃ vā sannipātabhayaṃ bhavet

markaṭīgamane savye dhanadhānyapaśukṣayaḥ |
piturmaraṇamālasyaṃ tatsamānāṃ ca va mṛtiḥ

savye siṃhāvaloke tu paśubhītirbhavennṛṇām |
suhṛtsnehādināśaśca samānajanapīḍanam

patanaṃ vāpi kūpādau viṣaśasrtāgnijaṃ bhayam |
vāhanāt patanaṃ vāpi jvarārtiḥ sthānanāśanam

maṇḍūkagamane vāme strīsutādiprapīḍanam |
jvaraṃ ca śvāpadād bhītiṃ vaded vijñaḥ padacyutim

markaṭīgamane vā'pi jalabhītiṃ padacyutim |
piturnāśaṃ nṛpakrodhaṃ durgāraṇyāṭanaṃ vadet

siṃhāvalokane vāme padabhraṃśaḥ piturmṛtiḥ |
tatsamānamṛtirvā'pi phalamevaṃ vicintayet

mīnāt tu vṛścike yāte jvaro bhavati niścitaḥ |
kanyātaḥ karkaṭe yāte bhrātṛbandhuvināśanam

siṃhāttu mithune yāte striyā vyādhirbhaved dhruvam |
karkaṭācca harau yāte vadho bhavati dehinām

pitṛbandhumṛtiṃ vidyāccāpānmeṣe gate punaḥ |
bhayaṃ pāpakhagairyukte śubhakheṭayute śubham

śubhaṃ vā'pyaśubhaṃ vā'pi kālacakradaśāphalam |
rāśidikbhāgato vāpi pūrvādidigtabhaścarāt

taddigāvabhāge vaktavyaṃ taddaśāsamaye nṛṇām |
yathopadeśamārgeṇa sarveṣāṃ dvijasattama

kanyātaḥ karkaṭe yāte pūrvabhāge mahatphalam |
uttaraṃ deśamāśritya śubhā yātrā bhaviṣyati

siṃhāttu mithune yāte pūrvabhāgaṃ vivarjayet |
kāryānte'pi ca naiṛtyāṃ sukhaṃ yātrā bhaviṣyati

karkaṭāt siṃhabhe yāte kāryahāniśca dakṣiṇe |
dakṣiṇāṃ diśamāśritya pratyagāgamanaṃ bhavet

mīnāttu vṛścike yāte udag gacchati saṅkaṭam |
cāpācca makare yāte saṅkaṭaṃ jāyate dhruvam

cāpānmeṣe tu yātrāyāṃ vyādhirbandho mṛtirbhavet |
vṛścike tu sukhaṃ sampat strīprāptiśca dvijottama

siṃhācca karkaṭe yāte pascimāṃ varjayeddiśam |
śubhayoge śubhaṃ brūyādaśubhe tvaśubhaṃ phalam

śūraścauraśca meṣāṃśe lakṣmīvāṃśca vṛṣāṃśake |
mithunāṃśe bhavejjñānī karkāṃśe nṛpatirbhavet

siṃhāṃśe rājamānyaśca kanyāṃśe paṇḍito bhavet |
tulāṃśe rājamantrī syād vṛścikāṃśe ca nirdhanaḥ

cāpāṃśe jñānasampanno marakāṃśe ca pāpakṛt |
kumbhāṃśe ca vaṇikkarmā mīnāṃśe dhanadhānyavān

deho jīvo'thavā yukto ravibhaumārkirāhubhiḥ |
ekaikayoge mṛtyuḥ syād bahuyoge tu kā kathā

krūrairyukte tanau rogaṃ jīve yukte mahad bhayam |
ādhī rogo bhaved dvābhyā.mapamṛtyusrtibhirbhavet

caturbhirmṛtimāpanno dehe jīve'śubhairyute |
yugapaddehajīvau ca krūragrahayutau tadā

rājacorādibhītiśca mṛtiścāpi na saṃśayaḥ |
vahnivādhā ravau jñeyā kṣīṇendau ca jalād bhayam

kuje śastrakṛtā pīḍā vāyuvādhā budhe bhavet |
gulmavādhā śanau jñeyā rāhau ketau viṣād bhayam

dehajīvagṛhe yāto budho jīvo'thavā bhṛguḥ |
sukhasmpatkarāḥ sarve rogaśokavināśanāḥ

miśragṛhaiśca saṃyukte miśraṃ phalamavāpnuyāt |
pāpakṣetradaśākāle dehajīvau tu duḥkhitau |
śubhakṣetradaśākāle śubhaṃ bhavati niścitam

śubhayuktāśubhakṣetradaśā miśraphalā smṛtā |
krūrayuktaśubhakṣetradaśā miśraphalā tathā

janānāṃ janmakāle tu yo rāśistanubhāvagaḥ |
tasya cakradaśākāle dehārogyaṃ sukhaṃ mahat

śubhe pūrṇasukhaṃ pāpe dehe rogādisambhavaḥ |
svoccādigatakheṭāḍhye rājyamānadhanāptayaḥ

dhanabhāve ca yo rāśistasya cakradaśā yadā |
tadā subhojana.m putrastrisukhaṃ ca dhanāptayaḥ

vidyāptirvākpaṭutvaṃ ca sugoṣṭhyā kālayāpanam |
śubharkṣe phalamevaṃ syāt pāpabhe phalamanyathā

tṛtīyabhāvarāśestu kālacakradaśā yadā |
tadā bhrātṛsukhaṃ śauryaṃ dhairyaṃ cāpi mahatsukham

svarṇābharaṇavastrāptiḥ sammānaṃ rājasaṃsadi |
śubharkṣe phalamevaṃ syāt pāparkṣe phalamanyathā

sukhabhāvagatarkṣasya kālacakradaśā yadā |
tadā bandhusukhaṃ bhūmigṛharājyasukhāptayaḥ

ārogyamarthalābhaśca vastravāhanajaṃ sukham |
śubharkṣe śobhanaṃ jñeyaṃ pāpabhe phalamanyathā

sutabhāvagatarkṣasya kālacakradaśā yadā |
sutastrīrājyasaukhyāptirārogyaṃ mitrasaṃgamaḥ

vidyābuddhiyaśolābho dhairyaṃ ca vikramodayaḥ |
śubharāśau śubhaṃ pūrṇaṃ pāparkṣe phalamanyathā

ripubhāvagatarkṣasya kālacakradaśā yadā |
tadā corādibhūpāgniviṣaśastrabhayaṃ mahat

pramehagulmapaṇḍvādirogāṇāmapi saṃbhavaḥ |
pāparkṣe phalamevaṃ syāt śubharkṣe miśramādiśet

jāyābhāvagatarkṣasya kālacakradaśā yadā |
tadā pāṇigrahaḥ patnīputralābhādikaṃ sukham

kṛṣiyodhanavastrāptirnṛpapūjā mahadyaśaḥ |
śubharāśau phalaṃ pūrṇaṃ pāparāśau ca taddalam

mṛtyubhāvasthitarkṣasya kālacakradaśā tadā |
sthānanāśaṃ mahad duḥkhaṃ bandhunāśaṃ dhanakṣayam

dāridryamannavidvopamaribhītiṃ ca nirdiśet |
pāparāśau phalaṃ pūrṇaṃ śubharāśau ca taddalam

dharmabhāvagatarkṣasya kālacakradaśā yadā |
tadā putrakalatrārthakṛṣigehasukhaṃ vadet

satkarmadharmasaṃsiddhiṃ mahajjanaparigraham |
śubharāśau śubhaṃ pūrṇaṃ pāparāśau ca taddalam

karmabhāvagatarkṣasya kālacakradaśā yadā |
rājyāptirbhūpasammānaṃ putradārādijaṃ sukham

satkarmaphalamaiśvaryaṃ sadgoṣṭhyā kālayāpanam |
śubharāśau phalaṃ pūrṇaṃ pāparāśau ca miśritam

lābhabhāvasthitarkṣasya kālacakradaśā yadā |
putrastrībandhusaukhyāptirbhūpaprītirmahatsukham

dhanavastrāptirārogyaṃ satāṃ saṅgaśca jāyate |
śubharāśau phalaṃ pūrṇaṃ pāparāśau ca khaṇḍitam

vyayabhāvagatarkṣasya kālacakradaśā tadā |
udyogabhaṅgamālasyaṃ dehapīḍāṃ padacyutim

dāridyaṃ karmavaiphalyaṃ tathā vyarthavyayaṃ vadet |
pāparāśau phalaṃ tvevaṃ śubharāśau ca taddalam

lagnādivyayaparyantaṃ bhānāṃ caradaśāṃ bruve |
tasmāt tadīśaparyantaṃ saṃkhyāmatra daśāṃ viduḥ

meṣāditritribhairjñeyaṃ padamojapade kramāt |
daśābdānayane kāryā gaṇanā vyutkramāt same

vṛścikādhipatī dvau ca ketubhaumau smṛtau dvija |
śanirāhu ca kumbhasya svāminau parikīrtito

dvināthakṣetrayoratra kriyate nirṇayo'dhunā |
dvāvevādhipatī vipra yuktau svarkṣe sthitau yadi

varṣa dvādaśakaṃ tatra na cedekādi cintayet |
ekaḥ svakṣetrayo'nyastu paratra yadi saṃsthitaḥ

tadā'nyatra sthitaṃ nāthaṃ parigṛhya daśāṃ nayet |
dvāvapyanyarkṣagau tau cet tamormadhye ca yo balī

tata eva daśā grāhyā kramād votkramato dvijaḥ |
balasyā'tra vicāre syādagrahāt sagraho balī

dvāveva sagrahau tau cet balī tatrādhikagrahaḥ |
grahayogasamānatve jñeyaṃ rāśibalād balam

jñeyāścarasthiradvandvāḥ kramato balaśālinaḥ |
rāśisattvasamānatve bahuvarṣo balī bhaved

ekaḥ svoccagataścā'nyaḥ paratra yadi saṃsthitaḥ |
gṛhṇīyāduccakheṭasthaṃ rāśimanyaṃ vihāya vai

uccakheṭasya sadbhāve varṣamekaṃ ca nikṣipet |
tathaiva nīcakheṭasya varṣamekaṃ viśodhayet

evaṃ sarvaṃ samālocya jātakasya phalaṃ vadet

kramādutkramato vā'pi dharmabhāvapadakramāt |
lagnarāśiṃ samārabhya vijñaścaradaśāṃ nayet

athā'haṃ saṃpravakṣyāmi sthirasaṃjñāṃ daśāṃ dvija |
care sapta sthire cā'ṣṭau dvandve nava samāḥ smṛtāḥ

sthiratvācca daśābdānāṃ sthirākhyeti nigadyate |
brahmakheṭāśritarkṣādirdaśeyaṃ parivartate

yo'sau brahmagrahaḥ proktaḥ kathaṃ sa jñāyate mune |
iti spaṣṭataraṃ brūhi kṛpā'sti yadi te mayi

ṣaṣṭhāṣṭavyayanātheṣu yo balī viṣamarkṣagaḥ |
pṛṣṭhasthito bhaved brahmāṃ balino lagnajāyayoḥ

kārakādaṣṭameśo vā brahmā'pyaṣṭabhāvagaḥ |
śanau pāte ca brahmattve brahmā tatṣaṣṭhakhecaraḥ

bahavo lakṣaṇakrāntā jñeyasteṣvadhikāṃśakaḥ |
aṃśasāmye balādhikyād vijñeyo brahmakhecaraḥ

yogārdhe ca daśāmānaṃ dvayoryogārdhasammitam |
lagnasaptamaprāṇyādirdaśeyaṃ ca pravartate

lagnasaptamayormadhye yo rāśirbalavān bhavet |
tataḥ kendrādisaṃsthānāṃ rāśīnāñca balakramāt

kārakādapi rāśīnāṃ kheṭānāṃ caivameva hi |
daśābdāścaravajjñeyāḥ kheṭānāṃ ca svabhāvadhi

dvirāśyadhipakṣeṭasya gaṇyedubhayāvadhi |
ubhayordhika saṃkhyā kārakasya daśā samāḥ

ātmakārakamārabhya kārakākhyadaśā kramāt |
lagnāt kārakaparyantaṃ saṃkhyāmatra daśāṃ viduḥ

maṇḍūkāparaparyāyā trikūṭākhyadaśā dvija |
lagnasaptamayormadhye yo rāśirbalavān bhavet

tataḥ krameṇaujarāśau same neyā tatho'tkramāt |
trikūṭānāṃ ca vijñeyāḥ sthiravacca daśā samāḥ

niryāṇasya vicārārthaṃ kaiścichūladaśā smṛtā |
lagnasaptamato mṛtyubhayoryo balavān bhavet

tadādirviṣame vipra kramādutkramataḥ same |
daśābdāḥ sthiravattatra balimārakabhe mṛtiḥ

janmalagnatrikoṇeṣu yo rāśirbalavān bhavet |
tamārbhya nayed dhīmān cariparyāyavad daśām

kramādutkramato grāhyaṃ trikoṇaṃ viṣame same |
trikoṇākhyadaśā proktā samā nāthāvasānakāḥ

lagnād dharmasya taddṛṣṭarāśīnāṃ ca daśāstataḥ |
daśamasya ca taddṛṣṭarāśīnāṃ ca nayet punaḥ

ekādaśasya taddṛṣṭarāśīnāṃ sthiravat samāḥ |
pravṛttā dṛg vaśādyasmād dṛgdaśeyaṃ tataḥ smṛtā

care vyutkramato grāhyā dṛgyogyāḥ sthirabhe kramāt |
viṣame kramato dvandve rāśayo vyutkramāt same

ṛkṣe lagnādirāśīnāṃ daśā rāśidaśā smṛtā |
bhayātaṃ ravibhirnighnaṃ bhabhogavihṛtaṃ phalam

rāśyādyaṃ lagnarāśyādau yojyaṃ dvādaśaśeṣitam |
tadārabhya kramādoje daśā jñeyotkramāt same

daśābdā bhuktabhāgaghnā triṃśatā vihṛtāh phalam |
bhuktaṃ varṣādikaṃ jñeyaṃ bhogyaṃ mānād viśodhitam

akārādīn svarān pañca prathamaṃ vinyaset kramāt |
kādihāntāṃllikhed varṇān svarādho ṅañaṇojjhitān

tiryak paṃktikrameṇaiva pañcapañcavibhāgataḥ |
na proktā ṅañaṇā varṇā nāmādau santi te nahi

ced bhavanti tadā jñeyā gajaḍāste yathākramāt |
yatra svare svanāmādyavarṇaḥ syāt tatsvarādayaḥ

kramāt paṃca daśādhīśāḥ dvādaśadvādaśābdakāḥ |
svarāṇāṃ ca kramājjñeyāḥ daśāsvantardaśādayaḥ

pūrvameva mayā proktā varṇadākhyā daśā dvija |
idānīṃ śambhunā proktā kathyate yoginī daśā

maṅgalā piṅgalā dhanyā bhrāmarī bhadrikā tathā |
ulkā siddhā saṃkaṭā ca yoginyo'ṣṭau prakīrtitāḥ

maṅgalāto'bhavaccandraḥ piṅgalāto divākaraḥ |
dhanyāto devapūjyo'bhūd bhrāmarīto'bhavat kujaḥ

bhardikāto budho jātastatholkātaḥ śanaiścaraḥ |
siddhāto bhārgavi jātaḥ saṃkaṭātastamo'bhavad

janmarkṣa ca tribhiryuktaṃ vasubhirbhāgamāharet |
ekādiśeṣe vijñeyā yoginyoḥ maṅgalādikāḥ

ekādyekottarā jñeyāḥ kramādāsāṃ daśāsamāḥ |
nakṣatrayātabhogābhyāṃ bhuktaṃ bhogyaṃ ca sādhayet

yeṣāṃ yadāyuḥ saṃproktaṃ paiṇḍamāṃśaṃ nisargajam |
takṣat teṣāṃ daśā jñeyā paiṇḍī cāṃśī nisargajā

balī lagnārkacandrāṇāṃ yattasya prathamā daśā |
tatkendrādigatānāṃ ca jñeyā balavaśāttataḥ

aṣṭavargabalenaiṣāṃ phalāni paricintayet |
aṣṭavargadaśāścaitāḥ kathitāḥ pūrvasūribhiḥ

parāyurdvādaśo bhāgastasya sandhyā prakīrtitā |
tanmitā lagnabhādīnāṃ kramāt sandhyādaśā smṛtā

sandhyā rasaguṇā kāryā candravahnihṛtā phalam |
saṃsthāpyaṃ prathame koṣṭhe tadardhaṃ triṣu vinyaset

tribhāgaṃ vasukoṣṭheṣu vinyasya tatphalaṃ vadet |
evaṃ dvādaśabhāveṣu pācakāni prakalpayet

viṃśattaridaśevā'tra kaiścit tārādaśā smṛtā |
āśaṃkurāguśabukeśvādisthāneṣu tārakāḥ

anmasampatvipatkṣemapratyariḥ sādhako badhaḥ |
maitraṃ paramamaitraṃ ca kendrasthabalino grahāt

jñeyā tārādaśā vipra nāmatulyaphalapradā |
yasya kendre sthitaḥ kheṭo daśeyaṃ tasya kīrtitā

iti te kathitā vipra daśa bhedā anekadhā |
etadantardaśābhedān kathayiṣyāmi cāgrataḥ