Bṛhatkathāślokasaṃgraha · Chapter 9

tato madāndhavanitā kapolasthalakauśalam
sarojapattraṃ karajaiś chettum ārabdha gomukhaḥ ||

pattracchedyaṃ tatas tasyāḥ saritas taradambhasi
sajīvam iva saṃpannaṃ calatvāt paṭuraṃhasaḥ ||

anukūlaṃ prasarpantaṃ praśaṃsantaś ca gomukham
pattracchedyam apaśyāmo muktāvayavasaṃkaram ||

astmābhir anuyuktaś ca kathayeti savistaram
gomukho vyākaroti sma pattracchedasya lakṣaṇam ||

ihāryaputra vijñeyaṃ pattracchedyaṃ samāsataḥ
tryasraṃ ca caturasraṃ ca dīrghaṃ vṛttaṃ ca bhedataḥ ||

tryasraiḥ catuṣpadaśailā niṣpadyante gṛhādi ca
caturasraiḥ saśālāni purāṇi puruṣādi ca ||

dīrghe nadanadīmārga pratānabhujagādayaḥ
vṛtte bhūṣaṇasaṃyoga śakuntamithunādayaḥ ||

gomukhe kathayaty evam āgatya marubhūtikaḥ
aho nu mahad āścaryam āryaputrety abhāṣata ||

asau hariśikhenoktaḥ sarvam eva bhavādṛśām
kūpakacchapakalpānām āścaryaṃ sthūlacakṣuṣām ||

paśya duḥśraddadhāneti tam uktvā marubhūtikaḥ
idam āścaryam ity uccaiḥ pulinaṃ no vyadarśayat ||

tato hariśikhenoktaṃ kṛtvā hasitam ulbaṇam
āścaryaṃ pulinaṃ paśya namas tasmai sacakṣuṣe ||

nimnena salilaṃ yāti pulinaṃ sikatāsthalam
āścaryaṃ yadi tan mūḍha dveṣaḥ kaḥ salile tava ||

so 'bravīt kena pulinam āścaryam iti bhāṣitam
puline yat tad āścaryam atha vā dṛśyatām iti ||

tenoktaṃ puline santi sikatāḥ kiṃ tad adbhutam
nety ukte tena dṛṣṭvā tu pulinaṃ gomukho 'bravīt ||

mā mā bhadramukhaṃ kaścit paribhūn marubhūtikam
mayā hi puline dṛṣṭaṃ saṃniviṣṭaṃ padadvayam ||

uktaṃ hariśikhenāpi yady āścaryaṃ padadvayam
atyāścaryam idaṃ paśya padakoṭīś caturdaśa ||

tenoktaṃ sānubandhāsu nāścaryaṃ padakoṭiṣu
idaṃ vicchinnasaṃtānaṃ tenāścaryaṃ padadvayam ||

tenoktaṃ yadi śeṣāṇi parāmṛṣṭāni pāṇinā
bhaveyur iti tenoktaṃ tataḥ syād eva vālukā ||

yeyaṃ tīrataroḥ śākhā pulinaṃ yāvad āgatā
tayā gatvāvatīrṇaḥ syāt kaścin nāgarako yadi ||

etām eva samālambya dūram ālambapallavām
nivarteteti tenokte parṇākīrṇā mahī bhavet ||

kasya tarhīti tenokte divyasyety abravīt sa tam
divyānāṃ katamasyeti sa vidyādharam ādiśat ||

na spṛśanti bhuvaṃ devāḥ sthūlatvād yakṣarakṣasām
dūraṃ padāni majjanti pulineṣu viśeṣataḥ ||

tapaḥkṣāmaśarīratvāt siddhānām ṛṣibhiḥ saha
avyaktāṅgulipārṣṇyādi nikṣepaṃ jāyate padam ||

anyeṣāṃ ca manuṣyāṇām upapattyā niyujyate
avagāḍhaṃ bhavaty agre viparītaṃ tu yoṣitaḥ ||

bhārākrāntaḥ sa cety ukte bhuyo hariśikho 'bravīt
śilāpādapaśatrūṇāṃ ko 'sya bhāro bhaved iti ||

śilāyām avagāḍhaṃ syāt parṇakīrṇaṃ ca pādape
śatrau na śatruṃ puline ramaṇīye 'vatārayet ||

tasmād asiddhavidyāsya bhāro vidyādharī yataḥ
na vidyāsiddhim āptvāpi jāyante paṅguvṛttayaḥ ||

āropitaṃ ca tenāsyā jaghanaṃ dakṣiṇaṃ bhujam
nimagnaṃ yena tasyedaṃ dakṣiṇaṃ kāminaḥ padam ||

patitair uttamāṅgāc ca keśadhūpādhivāsitaiḥ
mālatīkusumair vāsam avakīrṇaṃ na paśyasi ||

ramaṇīyatarāṃ caiṣāṃ na tyakṣyati sa nimagnām
tenānyatrāpi dṛśyantāṃ padāni nipuṇair iti ||

tataḥ paurair madīyaiś ca vicinvadbhir itas tataḥ
strīpuṃsayor adṛśyanta padāni salilāntike ||

sahāsmābhis tam uddeśaṃ gatvā dṛṣṭvā ca gomukhaḥ
tena nāgarakenāpi bhāvyam ity etad uktavān ||

kathaṃ vettheti pṛṣṭaś ca sa vihasyedam uktavān
jñeyaṃ kim atra durjñānam atha vā kathayāmi vaḥ ||

paracittānuvṛttiś ca svacittasya ca nigrahaḥ
yeyaṃ nāgarakair uktā sā nāgarakatā matā ||

mantharaṃ parisarpantīṃ kāminīm anugacchati
ayaṃ nāgarako yasmād atikramya na gacchati ||

idānīm eva tau yātau padavī dṛśyatām iyam
tathā hi caraṇākrānti natam adyāpi śādvalam ||

iti tām anugacchanto navāṃ caraṇapaddhatim
saptaparṇam apaśyāma pravṛttabhramarotsavam ||

tanmūle yāni vṛttāni raho viharamāṇayoḥ
svayam ācaritānīva gomukhas tāny avarṇayat ||

iha sā kupitā tasmai tena ceha prasāditā
ayaṃ sakusumaś cātra kḹptaḥ pallavasaṃstaraḥ ||

śrāntā cātropaviṣṭā sā tathā cedaṃ nirūpyatām
āsanaṃ jaghanākrānti jātajarjarapallavam ||

nidhāya jaghane hastau vinamayya gurutrikam
iyaṃ vijṛmbhamāṇāyā magnāgracaraṇā mahī ||

evaṃ nirūpayantaś ca saptaparṇatalād vayam
niryāntīm anvagacchāma tayoś caraṇapaddhatim ||

athāgamyam apaśyāma candrasūryānalānilaiḥ
mādhavīgahanaṃ veśma kāminām anivāritam ||

vāruṇīpānasaṃjāta madabhṛṅgaviluptayā
puṣpavatyā pariṣvaktaṃ śyāmayā tan nirantaram ||

dṛṣṭvā ca gomukhenoktam atraivāste sa kāmukaḥ
pracchannaṃ ramaṇīyaṃ ca na hīdaṃ tyāgam arhati ||

na cāpi darśanaṃ yuktam āsīnasya yathāsukham
tasmān muhūrtam anyatra kvacid viśramyatām iti ||

nīlaśītalamūlasya dūrvayā vaṭaśākhinaḥ
chāyayā ca palāśānām atiṣṭhāma tale tataḥ ||

gomukhas tu tad ālokya latāgṛhakam unmukhaḥ
nāsty asāv atra kāmīti saśiraḥkampam uktavān ||

tato hariśikhenoktaṃ pūrvam astīti bhāṣase
idānīm api nāstīti sarvathonmattako bhavān ||

tenoktam idam atrastaṃ niṣkrāntaṃ mādhavīgṛhāt
śikhaṇḍimithunaṃ kasmān mūkam andha na paśyasi ||

yadi kaścid bhaved atra trastam etat tatas tataḥ
muktārtakekam uḍḍīya vṛkṣadurgaṃ viśed iti ||

tataḥ prasthāpayāmi sma vicetuṃ parivārakān
calayantaś tu hastāṃs te śūnyam ākhyaṃl latāgṛham ||

svayaṃ tatrāpy apaśyāma racitaṃ prastaraṃ mahat
prakīrṇapallavanyāsaṃ kiśoraluṭhitair iva ||

taruśākhāvasaktaṃ ca hāranūpuramekhalam
anyatrānyatra ca kṣaumam ambhoruhadalāruṇam ||

patitārkanikāśaṃ ca vidyādharadhanaṃ kvacit
varmaratnaṃ sphuradratna prabhākuñcitalocanam ||

sarvaṃ tad grāhayāmi sma puruṣair bhūṣaṇādikam
tasmai niryātayiṣyāmi dṛṣṭāyety atha gomukhaḥ ||

abravīd vairiṇā nūnaṃ sa nītaḥ saha kāntayā
tābhyāṃ hi paratantrābhyāṃ bhūṣaṇādīdam ujjhitam ||

dīrghāyuṣkaṃ ca taṃ vitta snigdhās tasya śiroruhāḥ
lagnāḥ pādapaśākhāyām adyāpi hi sugandhayaḥ ||

evaṃ nirūpayantaś ca samantād dattadṛṣṭayaḥ
nātidūram atikramya kvacit tuṅgatarau vane ||

baddhaṃ skandhe kadambasya pañcabhir lohaśaṅkubhiḥ
vidyādharam apaśyāma lepavidyādharācalam ||

athāvatāryatām eṣa skandhād ity abhidhāya tān
apasṛtya tataś chāyām āśrayāmi sma śākhinaḥ ||

gomukhas tv abravīn naite kenacil lohaśaṅkavaḥ
śakyāḥ kraṣṭum upayena sarvair api surair iti ||

athāham abruvaṃ smṛtvā rājājalpan mayā śrutam
etā oṣadhayaḥ pañca sadāsthāḥ kila varmaṇi ||

viśalyakaraṇī kācit kācin māṃsavivardhanī
vraṇasaṃrohiṇī kācit kācid varṇaprasādanī ||

mṛtasaṃjīvanī cāsāṃ pañcamī paramauṣadhiḥ
yadi varmaṇi tāḥ santi tābhiḥ saṃjīvyatām iti ||

muhūrtād iva cāgatya vismito gomukho 'bravīt
prasādād aryaputrasya jīvitaḥ sa nabhaścaraḥ ||

tā mahauṣadhayo dṛṣṭā nihitās tasya varmaṇi
śalyaprote ca hariṇe prayuktāḥ kramaśas tataḥ ||

tatra dṛṣṭaprabhāvābhiḥ sa vidyādharasundaraḥ
akṛtāṅgaḥ kṛtaḥ sadyaḥ samāśvasyeti bhāṣate ||

jīvitaḥ kena baddho 'ham ity athāhaṃ tam uktavān
asmākam aryaputreṇa prakārais caturair iti ||

tenoktaṃ kiṃ ca yuṣmākam aryaputro 'pi vidyate
āmeti ca mayā prokte tenoktaṃ na sa mānuṣaḥ ||

asmākam aryaputro 'pi devo vidyādharo 'pi vā
prasīdantu tam ākhyāta prasādaṃ cakṣuṣām iti ||

mayoktam aryaputreṇa vayam ājñāpitā yathā
jīvayitvābhyanujñeyo mā sma paśyat sa mām iti ||

kṛtopakāras tvāṃ draṣṭuṃ nāyam icchati lajjayā
punaḥsaṃdarśanāyātas tāta prasthīyatām iti ||

atha visrastahastena dattvā jānunipātanam
viniśvasya ca tenoktaṃ dainyagadgadayā girā ||

idānīm asmi sumṛtaḥ prāṇadānopakāriṇam
svāminaṃ yan na paśyāmi bhaviṣyacakravartinam ||

pradāya yadi me prāṇān paścāt tāpena khedyate
evaṃ muñcāmi bhūyas tān na cet paśyatu mām iti ||

mayā datte 'bhyanujñāne paśyatv evaṃ karotv iti
gāṃ spṛśañ jānuśirasā sa mām idam abhāṣata ||

vidyādharo 'mṛtagatiḥ kauśikasya muneḥ sutaḥ
sarvavidyādhareśena praṇaman dṛśyatām iti ||

ehīha ca mayāhūya spṛṣṭaḥ pṛṣṭhe nirāmayaḥ
suhṛddṛṣṭyā ca dṛṣṭaḥ san prahṛṣṭaḥ samupāviśat ||

tato hariśikhenoktam uktaṃ vṛṣasutena yat
satyaṃ tat priyasaṃbhāṣo mahānāgarako hy ayam ||

idaṃ śrutvāmitagatir idam asmān abhāṣata
nedaṃ nāgarakatvaṃ me śrūyatāṃ ca kathā yathā ||

asti prāleyaśailasya manonayanahāriṇi
śikhare kauśiko nāma munis tulyāśmakāñcanaḥ ||

taṃ ca bindumatī nāma tyaktanandanakānanā
ārādhitavatī yatnāt sudīrghaṃ kālam apsarāḥ ||

ekadā kauśikenoktā varaṃ brūhīti sābravīt
yadi me bhagavān prītaḥ tato 'patyaṃ dadātv iti ||

tena cotpāditaṃ tasyām apatyayugalaṃ kramāt
ahaṃ ca putraḥ putrī ca matsvasā matsanāmikā ||

so 'haṃ saṃvardhitas tena nāsti tad yan na śikṣitam
dhārayāmi ca tadvidyās tena vidyādharo 'bhavam ||

ekadā pitaraṃ dṛṣṭvā rudantam aham abruvam
mādṛśaṃ putram utpādya kiṃ roditi bhavān iti ||

tenoktaṃ cakravartitvaṃ na te paśyāmi putraka
aṅgād aṅgān madīyāt tu vṛthā jāto bhavān iti ||

mayoktaṃ mama yaḥ svāmī sa mahyaṃ kathyatām iti
tenoktaṃ cakracartī yaḥ sa cāpy anviṣyatām iti ||

mayoktaṃ cakravartitvaṃ yaiś cihnair avagamyate
dṛṣṭvā tāni dhiyā mahyam ācaṣṭāṃ bhagavān iti ||

tenoktaṃ śatruṇā baddhaṃ yas tvāṃ śaṅkubhir āyasaiḥ
jīvayiṣyati jānīyāt svāminaṃ taṃ bhavān iti ||

mama tv aṅgārako nāma vyālakaś cābhavat suhṛt
saudaryo gamayāmi sma tābhyāṃ kālaṃ sukhaṃ saha ||

atha vāyupatho nāma rājā tena sahāgamam
kāśyapasthalakaṃ nāma puraṃ mānasalobhanam ||

tatraikadā vicaratā mayopavanacariṇī
dṛṣṭā kanyāparivārā kanyakā kusumālikā ||

praśasyavarṇasaṃsthānā sā me buddhau sthirā sthitā
praśastir iva vinyastā bhittau vindhyaśilābhṛtaḥ ||

tām ādāya tayā sārdhaṃ suhṛdbhyāṃ ca manoharāḥ
rataye saṃcarāmi sma saridgiritarusthalīḥ ||

aṅgārakam athāpaśyaṃ paśyantaṃ kusumālikām
rāgād apatrapātrāsaṃ vakragrīvānirīkṣitam ||

lakṣito 'ham aneneti lakṣayitvā sahānujaḥ
anāmantryaiva māṃ nīco nīcair utthāya yātavān ||

ahaṃ tu jātavailakṣyāt saṃraktāc ca tatas trasan
na jānāmi kva yāmīti cakitaḥ saha kāntayā ||

adya cemāṃ samāsādya ramaṇīyāṃ nagāpagām
avatīrṇo 'smi puline komalāmalavāluke ||

suratānubhave yogyaṃ dṛṣṭvā tac ca susaṃvṛtam
latāgṛham ahaṃ prāptaḥ phullaśyāmālatāvṛtam ||

yac ca śeṣam aśeṣaṃ tat kathitaṃ gomukhena vaḥ
tasmād āptopadeśo 'yaṃ na nāgarakatā mama ||

ko hi vidyādharair baddham avidyādharasainyapaḥ
mocayen mādṛśaṃ tasmāt tathedam ṛṣibhāṣitam ||

sevante sevakāḥ sevyān prajñāprāṇadhanādibhiḥ
yena tenātmarakṣārthaṃ madvidyā gṛhyatām iti ||

sadyaḥ kṛtopakāreṇa mayā mandādareṇa ca
na gṛhītābruvaṃ cainam anugaccha priyām iti ||

abravīc ca dinād asmāt pareṇāham aharniśam
apramatto bhaviṣyāmi bhavato deharakṣaṇe ||

smartavyaḥ saṃkaṭe cāham ity uktvā naḥ praṇamya ca
vegenākāśam utpatya prāgād aṅgārakaṃ prati ||

ādityaśarmavacanaṃ vacanaṃ ca yakṣyā yānaṃ pradakṣiṇam iṣoś ca marunmṛgāṇām
prahlādināmitagateḥ kathitena jātam utkhātasaṃśayakalaṅkatayā viśuddham ||