બૃહત્કથાશ્લોકસંગ્રહ · અધ્યાય 9

તતો મદાન્ધવનિતા કપોલસ્થલકૌશલમ્
સરોજપત્ત્રં કરજૈશ્ છેત્તુમ્ આરબ્ધ ગોમુખઃ ॥

પત્ત્રચ્છેદ્યં તતસ્ તસ્યાઃ સરિતસ્ તરદમ્ભસિ
સજીવમ્ ઇવ સંપન્નં ચલત્વાત્ પટુરંહસઃ ॥

અનુકૂલં પ્રસર્પન્તં પ્રશંસન્તશ્ ચ ગોમુખમ્
પત્ત્રચ્છેદ્યમ્ અપશ્યામો મુક્તાવયવસંકરમ્ ॥

અસ્ત્માભિર્ અનુયુક્તશ્ ચ કથયેતિ સવિસ્તરમ્
ગોમુખો વ્યાકરોતિ સ્મ પત્ત્રચ્છેદસ્ય લક્ષણમ્ ॥

ઇહાર્યપુત્ર વિજ્ઞેયં પત્ત્રચ્છેદ્યં સમાસતઃ
ત્ર્યસ્રં ચ ચતુરસ્રં ચ દીર્ઘં વૃત્તં ચ ભેદતઃ ॥

ત્ર્યસ્રૈઃ ચતુષ્પદશૈલા નિષ્પદ્યન્તે ગૃહાદિ ચ
ચતુરસ્રૈઃ સશાલાનિ પુરાણિ પુરુષાદિ ચ ॥

દીર્ઘે નદનદીમાર્ગ પ્રતાનભુજગાદયઃ
વૃત્તે ભૂષણસંયોગ શકુન્તમિથુનાદયઃ ॥

ગોમુખે કથયત્ય્ એવમ્ આગત્ય મરુભૂતિકઃ
અહો નુ મહદ્ આશ્ચર્યમ્ આર્યપુત્રેત્ય્ અભાષત ॥

અસૌ હરિશિખેનોક્તઃ સર્વમ્ એવ ભવાદૃશામ્
કૂપકચ્છપકલ્પાનામ્ આશ્ચર્યં સ્થૂલચક્ષુષામ્ ॥

પશ્ય દુઃશ્રદ્દધાનેતિ તમ્ ઉક્ત્વા મરુભૂતિકઃ
ઇદમ્ આશ્ચર્યમ્ ઇત્ય્ ઉચ્ચૈઃ પુલિનં નો વ્યદર્શયત્ ॥

તતો હરિશિખેનોક્તં કૃત્વા હસિતમ્ ઉલ્બણમ્
આશ્ચર્યં પુલિનં પશ્ય નમસ્ તસ્મૈ સચક્ષુષે ॥

નિમ્નેન સલિલં યાતિ પુલિનં સિકતાસ્થલમ્
આશ્ચર્યં યદિ તન્ મૂઢ દ્વેષઃ કઃ સલિલે તવ ॥

સો ઽબ્રવીત્ કેન પુલિનમ્ આશ્ચર્યમ્ ઇતિ ભાષિતમ્
પુલિને યત્ તદ્ આશ્ચર્યમ્ અથ વા દૃશ્યતામ્ ઇતિ ॥

તેનોક્તં પુલિને સન્તિ સિકતાઃ કિં તદ્ અદ્ભુતમ્
નેત્ય્ ઉક્તે તેન દૃષ્ટ્વા તુ પુલિનં ગોમુખો ઽબ્રવીત્ ॥

મા મા ભદ્રમુખં કશ્ચિત્ પરિભૂન્ મરુભૂતિકમ્
મયા હિ પુલિને દૃષ્ટં સંનિવિષ્ટં પદદ્વયમ્ ॥

ઉક્તં હરિશિખેનાપિ યદ્ય્ આશ્ચર્યં પદદ્વયમ્
અત્યાશ્ચર્યમ્ ઇદં પશ્ય પદકોટીશ્ ચતુર્દશ ॥

તેનોક્તં સાનુબન્ધાસુ નાશ્ચર્યં પદકોટિષુ
ઇદં વિચ્છિન્નસંતાનં તેનાશ્ચર્યં પદદ્વયમ્ ॥

તેનોક્તં યદિ શેષાણિ પરામૃષ્ટાનિ પાણિના
ભવેયુર્ ઇતિ તેનોક્તં તતઃ સ્યાદ્ એવ વાલુકા ॥

યેયં તીરતરોઃ શાખા પુલિનં યાવદ્ આગતા
તયા ગત્વાવતીર્ણઃ સ્યાત્ કશ્ચિન્ નાગરકો યદિ ॥

એતામ્ એવ સમાલમ્બ્ય દૂરમ્ આલમ્બપલ્લવામ્
નિવર્તેતેતિ તેનોક્તે પર્ણાકીર્ણા મહી ભવેત્ ॥

કસ્ય તર્હીતિ તેનોક્તે દિવ્યસ્યેત્ય્ અબ્રવીત્ સ તમ્
દિવ્યાનાં કતમસ્યેતિ સ વિદ્યાધરમ્ આદિશત્ ॥

ન સ્પૃશન્તિ ભુવં દેવાઃ સ્થૂલત્વાદ્ યક્ષરક્ષસામ્
દૂરં પદાનિ મજ્જન્તિ પુલિનેષુ વિશેષતઃ ॥

તપઃક્ષામશરીરત્વાત્ સિદ્ધાનામ્ ઋષિભિઃ સહ
અવ્યક્તાઙ્ગુલિપાર્ષ્ણ્યાદિ નિક્ષેપં જાયતે પદમ્ ॥

અન્યેષાં ચ મનુષ્યાણામ્ ઉપપત્ત્યા નિયુજ્યતે
અવગાઢં ભવત્ય્ અગ્રે વિપરીતં તુ યોષિતઃ ॥

ભારાક્રાન્તઃ સ ચેત્ય્ ઉક્તે ભુયો હરિશિખો ઽબ્રવીત્
શિલાપાદપશત્રૂણાં કો ઽસ્ય ભારો ભવેદ્ ઇતિ ॥

શિલાયામ્ અવગાઢં સ્યાત્ પર્ણકીર્ણં ચ પાદપે
શત્રૌ ન શત્રું પુલિને રમણીયે ઽવતારયેત્ ॥

તસ્માદ્ અસિદ્ધવિદ્યાસ્ય ભારો વિદ્યાધરી યતઃ
ન વિદ્યાસિદ્ધિમ્ આપ્ત્વાપિ જાયન્તે પઙ્ગુવૃત્તયઃ ॥

આરોપિતં ચ તેનાસ્યા જઘનં દક્ષિણં ભુજમ્
નિમગ્નં યેન તસ્યેદં દક્ષિણં કામિનઃ પદમ્ ॥

પતિતૈર્ ઉત્તમાઙ્ગાચ્ ચ કેશધૂપાધિવાસિતૈઃ
માલતીકુસુમૈર્ વાસમ્ અવકીર્ણં ન પશ્યસિ ॥

રમણીયતરાં ચૈષાં ન ત્યક્ષ્યતિ સ નિમગ્નામ્
તેનાન્યત્રાપિ દૃશ્યન્તાં પદાનિ નિપુણૈર્ ઇતિ ॥

તતઃ પૌરૈર્ મદીયૈશ્ ચ વિચિન્વદ્ભિર્ ઇતસ્ તતઃ
સ્ત્રીપુંસયોર્ અદૃશ્યન્ત પદાનિ સલિલાન્તિકે ॥

સહાસ્માભિસ્ તમ્ ઉદ્દેશં ગત્વા દૃષ્ટ્વા ચ ગોમુખઃ
તેન નાગરકેનાપિ ભાવ્યમ્ ઇત્ય્ એતદ્ ઉક્તવાન્ ॥

કથં વેત્થેતિ પૃષ્ટશ્ ચ સ વિહસ્યેદમ્ ઉક્તવાન્
જ્ઞેયં કિમ્ અત્ર દુર્જ્ઞાનમ્ અથ વા કથયામિ વઃ ॥

પરચિત્તાનુવૃત્તિશ્ ચ સ્વચિત્તસ્ય ચ નિગ્રહઃ
યેયં નાગરકૈર્ ઉક્તા સા નાગરકતા મતા ॥

મન્થરં પરિસર્પન્તીં કામિનીમ્ અનુગચ્છતિ
અયં નાગરકો યસ્માદ્ અતિક્રમ્ય ન ગચ્છતિ ॥

ઇદાનીમ્ એવ તૌ યાતૌ પદવી દૃશ્યતામ્ ઇયમ્
તથા હિ ચરણાક્રાન્તિ નતમ્ અદ્યાપિ શાદ્વલમ્ ॥

ઇતિ તામ્ અનુગચ્છન્તો નવાં ચરણપદ્ધતિમ્
સપ્તપર્ણમ્ અપશ્યામ પ્રવૃત્તભ્રમરોત્સવમ્ ॥

તન્મૂલે યાનિ વૃત્તાનિ રહો વિહરમાણયોઃ
સ્વયમ્ આચરિતાનીવ ગોમુખસ્ તાન્ય્ અવર્ણયત્ ॥

ઇહ સા કુપિતા તસ્મૈ તેન ચેહ પ્રસાદિતા
અયં સકુસુમશ્ ચાત્ર કૣપ્તઃ પલ્લવસંસ્તરઃ ॥

શ્રાન્તા ચાત્રોપવિષ્ટા સા તથા ચેદં નિરૂપ્યતામ્
આસનં જઘનાક્રાન્તિ જાતજર્જરપલ્લવમ્ ॥

નિધાય જઘને હસ્તૌ વિનમય્ય ગુરુત્રિકમ્
ઇયં વિજૃમ્ભમાણાયા મગ્નાગ્રચરણા મહી ॥

એવં નિરૂપયન્તશ્ ચ સપ્તપર્ણતલાદ્ વયમ્
નિર્યાન્તીમ્ અન્વગચ્છામ તયોશ્ ચરણપદ્ધતિમ્ ॥

અથાગમ્યમ્ અપશ્યામ ચન્દ્રસૂર્યાનલાનિલૈઃ
માધવીગહનં વેશ્મ કામિનામ્ અનિવારિતમ્ ॥

વારુણીપાનસંજાત મદભૃઙ્ગવિલુપ્તયા
પુષ્પવત્યા પરિષ્વક્તં શ્યામયા તન્ નિરન્તરમ્ ॥

દૃષ્ટ્વા ચ ગોમુખેનોક્તમ્ અત્રૈવાસ્તે સ કામુકઃ
પ્રચ્છન્નં રમણીયં ચ ન હીદં ત્યાગમ્ અર્હતિ ॥

ન ચાપિ દર્શનં યુક્તમ્ આસીનસ્ય યથાસુખમ્
તસ્માન્ મુહૂર્તમ્ અન્યત્ર ક્વચિદ્ વિશ્રમ્યતામ્ ઇતિ ॥

નીલશીતલમૂલસ્ય દૂર્વયા વટશાખિનઃ
છાયયા ચ પલાશાનામ્ અતિષ્ઠામ તલે તતઃ ॥

ગોમુખસ્ તુ તદ્ આલોક્ય લતાગૃહકમ્ ઉન્મુખઃ
નાસ્ત્ય્ અસાવ્ અત્ર કામીતિ સશિરઃકમ્પમ્ ઉક્તવાન્ ॥

તતો હરિશિખેનોક્તં પૂર્વમ્ અસ્તીતિ ભાષસે
ઇદાનીમ્ અપિ નાસ્તીતિ સર્વથોન્મત્તકો ભવાન્ ॥

તેનોક્તમ્ ઇદમ્ અત્રસ્તં નિષ્ક્રાન્તં માધવીગૃહાત્
શિખણ્ડિમિથુનં કસ્માન્ મૂકમ્ અન્ધ ન પશ્યસિ ॥

યદિ કશ્ચિદ્ ભવેદ્ અત્ર ત્રસ્તમ્ એતત્ તતસ્ તતઃ
મુક્તાર્તકેકમ્ ઉડ્ડીય વૃક્ષદુર્ગં વિશેદ્ ઇતિ ॥

તતઃ પ્રસ્થાપયામિ સ્મ વિચેતું પરિવારકાન્
ચલયન્તશ્ તુ હસ્તાંસ્ તે શૂન્યમ્ આખ્યંલ્ લતાગૃહમ્ ॥

સ્વયં તત્રાપ્ય્ અપશ્યામ રચિતં પ્રસ્તરં મહત્
પ્રકીર્ણપલ્લવન્યાસં કિશોરલુઠિતૈર્ ઇવ ॥

તરુશાખાવસક્તં ચ હારનૂપુરમેખલમ્
અન્યત્રાન્યત્ર ચ ક્ષૌમમ્ અમ્ભોરુહદલારુણમ્ ॥

પતિતાર્કનિકાશં ચ વિદ્યાધરધનં ક્વચિત્
વર્મરત્નં સ્ફુરદ્રત્ન પ્રભાકુઞ્ચિતલોચનમ્ ॥

સર્વં તદ્ ગ્રાહયામિ સ્મ પુરુષૈર્ ભૂષણાદિકમ્
તસ્મૈ નિર્યાતયિષ્યામિ દૃષ્ટાયેત્ય્ અથ ગોમુખઃ ॥

અબ્રવીદ્ વૈરિણા નૂનં સ નીતઃ સહ કાન્તયા
તાભ્યાં હિ પરતન્ત્રાભ્યાં ભૂષણાદીદમ્ ઉજ્ઝિતમ્ ॥

દીર્ઘાયુષ્કં ચ તં વિત્ત સ્નિગ્ધાસ્ તસ્ય શિરોરુહાઃ
લગ્નાઃ પાદપશાખાયામ્ અદ્યાપિ હિ સુગન્ધયઃ ॥

એવં નિરૂપયન્તશ્ ચ સમન્તાદ્ દત્તદૃષ્ટયઃ
નાતિદૂરમ્ અતિક્રમ્ય ક્વચિત્ તુઙ્ગતરૌ વને ॥

બદ્ધં સ્કન્ધે કદમ્બસ્ય પઞ્ચભિર્ લોહશઙ્કુભિઃ
વિદ્યાધરમ્ અપશ્યામ લેપવિદ્યાધરાચલમ્ ॥

અથાવતાર્યતામ્ એષ સ્કન્ધાદ્ ઇત્ય્ અભિધાય તાન્
અપસૃત્ય તતશ્ છાયામ્ આશ્રયામિ સ્મ શાખિનઃ ॥

ગોમુખસ્ ત્વ્ અબ્રવીન્ નૈતે કેનચિલ્ લોહશઙ્કવઃ
શક્યાઃ ક્રષ્ટુમ્ ઉપયેન સર્વૈર્ અપિ સુરૈર્ ઇતિ ॥

અથાહમ્ અબ્રુવં સ્મૃત્વા રાજાજલ્પન્ મયા શ્રુતમ્
એતા ઓષધયઃ પઞ્ચ સદાસ્થાઃ કિલ વર્મણિ ॥

વિશલ્યકરણી કાચિત્ કાચિન્ માંસવિવર્ધની
વ્રણસંરોહિણી કાચિત્ કાચિદ્ વર્ણપ્રસાદની ॥

મૃતસંજીવની ચાસાં પઞ્ચમી પરમૌષધિઃ
યદિ વર્મણિ તાઃ સન્તિ તાભિઃ સંજીવ્યતામ્ ઇતિ ॥

મુહૂર્તાદ્ ઇવ ચાગત્ય વિસ્મિતો ગોમુખો ઽબ્રવીત્
પ્રસાદાદ્ અર્યપુત્રસ્ય જીવિતઃ સ નભશ્ચરઃ ॥

તા મહૌષધયો દૃષ્ટા નિહિતાસ્ તસ્ય વર્મણિ
શલ્યપ્રોતે ચ હરિણે પ્રયુક્તાઃ ક્રમશસ્ તતઃ ॥

તત્ર દૃષ્ટપ્રભાવાભિઃ સ વિદ્યાધરસુન્દરઃ
અકૃતાઙ્ગઃ કૃતઃ સદ્યઃ સમાશ્વસ્યેતિ ભાષતે ॥

જીવિતઃ કેન બદ્ધો ઽહમ્ ઇત્ય્ અથાહં તમ્ ઉક્તવાન્
અસ્માકમ્ અર્યપુત્રેણ પ્રકારૈસ્ ચતુરૈર્ ઇતિ ॥

તેનોક્તં કિં ચ યુષ્માકમ્ અર્યપુત્રો ઽપિ વિદ્યતે
આમેતિ ચ મયા પ્રોક્તે તેનોક્તં ન સ માનુષઃ ॥

અસ્માકમ્ અર્યપુત્રો ઽપિ દેવો વિદ્યાધરો ઽપિ વા
પ્રસીદન્તુ તમ્ આખ્યાત પ્રસાદં ચક્ષુષામ્ ઇતિ ॥

મયોક્તમ્ અર્યપુત્રેણ વયમ્ આજ્ઞાપિતા યથા
જીવયિત્વાભ્યનુજ્ઞેયો મા સ્મ પશ્યત્ સ મામ્ ઇતિ ॥

કૃતોપકારસ્ ત્વાં દ્રષ્ટું નાયમ્ ઇચ્છતિ લજ્જયા
પુનઃસંદર્શનાયાતસ્ તાત પ્રસ્થીયતામ્ ઇતિ ॥

અથ વિસ્રસ્તહસ્તેન દત્ત્વા જાનુનિપાતનમ્
વિનિશ્વસ્ય ચ તેનોક્તં દૈન્યગદ્ગદયા ગિરા ॥

ઇદાનીમ્ અસ્મિ સુમૃતઃ પ્રાણદાનોપકારિણમ્
સ્વામિનં યન્ ન પશ્યામિ ભવિષ્યચક્રવર્તિનમ્ ॥

પ્રદાય યદિ મે પ્રાણાન્ પશ્ચાત્ તાપેન ખેદ્યતે
એવં મુઞ્ચામિ ભૂયસ્ તાન્ ન ચેત્ પશ્યતુ મામ્ ઇતિ ॥

મયા દત્તે ઽભ્યનુજ્ઞાને પશ્યત્વ્ એવં કરોત્વ્ ઇતિ
ગાં સ્પૃશઞ્ જાનુશિરસા સ મામ્ ઇદમ્ અભાષત ॥

વિદ્યાધરો ઽમૃતગતિઃ કૌશિકસ્ય મુનેઃ સુતઃ
સર્વવિદ્યાધરેશેન પ્રણમન્ દૃશ્યતામ્ ઇતિ ॥

એહીહ ચ મયાહૂય સ્પૃષ્ટઃ પૃષ્ઠે નિરામયઃ
સુહૃદ્દૃષ્ટ્યા ચ દૃષ્ટઃ સન્ પ્રહૃષ્ટઃ સમુપાવિશત્ ॥

તતો હરિશિખેનોક્તમ્ ઉક્તં વૃષસુતેન યત્
સત્યં તત્ પ્રિયસંભાષો મહાનાગરકો હ્ય્ અયમ્ ॥

ઇદં શ્રુત્વામિતગતિર્ ઇદમ્ અસ્માન્ અભાષત
નેદં નાગરકત્વં મે શ્રૂયતાં ચ કથા યથા ॥

અસ્તિ પ્રાલેયશૈલસ્ય મનોનયનહારિણિ
શિખરે કૌશિકો નામ મુનિસ્ તુલ્યાશ્મકાઞ્ચનઃ ॥

તં ચ બિન્દુમતી નામ ત્યક્તનન્દનકાનના
આરાધિતવતી યત્નાત્ સુદીર્ઘં કાલમ્ અપ્સરાઃ ॥

એકદા કૌશિકેનોક્તા વરં બ્રૂહીતિ સાબ્રવીત્
યદિ મે ભગવાન્ પ્રીતઃ તતો ઽપત્યં દદાત્વ્ ઇતિ ॥

તેન ચોત્પાદિતં તસ્યામ્ અપત્યયુગલં ક્રમાત્
અહં ચ પુત્રઃ પુત્રી ચ મત્સ્વસા મત્સનામિકા ॥

સો ઽહં સંવર્ધિતસ્ તેન નાસ્તિ તદ્ યન્ ન શિક્ષિતમ્
ધારયામિ ચ તદ્વિદ્યાસ્ તેન વિદ્યાધરો ઽભવમ્ ॥

એકદા પિતરં દૃષ્ટ્વા રુદન્તમ્ અહમ્ અબ્રુવમ્
માદૃશં પુત્રમ્ ઉત્પાદ્ય કિં રોદિતિ ભવાન્ ઇતિ ॥

તેનોક્તં ચક્રવર્તિત્વં ન તે પશ્યામિ પુત્રક
અઙ્ગાદ્ અઙ્ગાન્ મદીયાત્ તુ વૃથા જાતો ભવાન્ ઇતિ ॥

મયોક્તં મમ યઃ સ્વામી સ મહ્યં કથ્યતામ્ ઇતિ
તેનોક્તં ચક્રચર્તી યઃ સ ચાપ્ય્ અન્વિષ્યતામ્ ઇતિ ॥

મયોક્તં ચક્રવર્તિત્વં યૈશ્ ચિહ્નૈર્ અવગમ્યતે
દૃષ્ટ્વા તાનિ ધિયા મહ્યમ્ આચષ્ટાં ભગવાન્ ઇતિ ॥

તેનોક્તં શત્રુણા બદ્ધં યસ્ ત્વાં શઙ્કુભિર્ આયસૈઃ
જીવયિષ્યતિ જાનીયાત્ સ્વામિનં તં ભવાન્ ઇતિ ॥

મમ ત્વ્ અઙ્ગારકો નામ વ્યાલકશ્ ચાભવત્ સુહૃત્
સૌદર્યો ગમયામિ સ્મ તાભ્યાં કાલં સુખં સહ ॥

અથ વાયુપથો નામ રાજા તેન સહાગમમ્
કાશ્યપસ્થલકં નામ પુરં માનસલોભનમ્ ॥

તત્રૈકદા વિચરતા મયોપવનચરિણી
દૃષ્ટા કન્યાપરિવારા કન્યકા કુસુમાલિકા ॥

પ્રશસ્યવર્ણસંસ્થાના સા મે બુદ્ધૌ સ્થિરા સ્થિતા
પ્રશસ્તિર્ ઇવ વિન્યસ્તા ભિત્તૌ વિન્ધ્યશિલાભૃતઃ ॥

તામ્ આદાય તયા સાર્ધં સુહૃદ્ભ્યાં ચ મનોહરાઃ
રતયે સંચરામિ સ્મ સરિદ્ગિરિતરુસ્થલીઃ ॥

અઙ્ગારકમ્ અથાપશ્યં પશ્યન્તં કુસુમાલિકામ્
રાગાદ્ અપત્રપાત્રાસં વક્રગ્રીવાનિરીક્ષિતમ્ ॥

લક્ષિતો ઽહમ્ અનેનેતિ લક્ષયિત્વા સહાનુજઃ
અનામન્ત્ર્યૈવ માં નીચો નીચૈર્ ઉત્થાય યાતવાન્ ॥

અહં તુ જાતવૈલક્ષ્યાત્ સંરક્તાચ્ ચ તતસ્ ત્રસન્
ન જાનામિ ક્વ યામીતિ ચકિતઃ સહ કાન્તયા ॥

અદ્ય ચેમાં સમાસાદ્ય રમણીયાં નગાપગામ્
અવતીર્ણો ઽસ્મિ પુલિને કોમલામલવાલુકે ॥

સુરતાનુભવે યોગ્યં દૃષ્ટ્વા તચ્ ચ સુસંવૃતમ્
લતાગૃહમ્ અહં પ્રાપ્તઃ ફુલ્લશ્યામાલતાવૃતમ્ ॥

યચ્ ચ શેષમ્ અશેષં તત્ કથિતં ગોમુખેન વઃ
તસ્માદ્ આપ્તોપદેશો ઽયં ન નાગરકતા મમ ॥

કો હિ વિદ્યાધરૈર્ બદ્ધમ્ અવિદ્યાધરસૈન્યપઃ
મોચયેન્ માદૃશં તસ્માત્ તથેદમ્ ઋષિભાષિતમ્ ॥

સેવન્તે સેવકાઃ સેવ્યાન્ પ્રજ્ઞાપ્રાણધનાદિભિઃ
યેન તેનાત્મરક્ષાર્થં મદ્વિદ્યા ગૃહ્યતામ્ ઇતિ ॥

સદ્યઃ કૃતોપકારેણ મયા મન્દાદરેણ ચ
ન ગૃહીતાબ્રુવં ચૈનમ્ અનુગચ્છ પ્રિયામ્ ઇતિ ॥

અબ્રવીચ્ ચ દિનાદ્ અસ્માત્ પરેણાહમ્ અહર્નિશમ્
અપ્રમત્તો ભવિષ્યામિ ભવતો દેહરક્ષણે ॥

સ્મર્તવ્યઃ સંકટે ચાહમ્ ઇત્ય્ ઉક્ત્વા નઃ પ્રણમ્ય ચ
વેગેનાકાશમ્ ઉત્પત્ય પ્રાગાદ્ અઙ્ગારકં પ્રતિ ॥

આદિત્યશર્મવચનં વચનં ચ યક્ષ્યા યાનં પ્રદક્ષિણમ્ ઇષોશ્ ચ મરુન્મૃગાણામ્
પ્રહ્લાદિનામિતગતેઃ કથિતેન જાતમ્ ઉત્ખાતસંશયકલઙ્કતયા વિશુદ્ધમ્ ॥