Brahmavaivarta Purana · Chapter 4.5

śrīnārāyaṇa uvāca //
golokaṃ nikhilaṃ dṛṣṭvā devāste hṛṣṭamānasāḥ //
punarājagmū rādhāyāḥ pradhānadvārameva ca

sadratnamaṇinirmāṇaṃ vedikāyugmasaṃyutam //
haridrākāramaṇinā vajrasaṃmiśritena ca

amūlyaratnaracitakapāṭena vibhūṣitam //
dvāre niyuktaṃ dadṛśurvīrabhānumanuttamam

ratnasiṃhāsanasthaṃ ca ratnābharaṇabhūṣitam //
pītavastraparīdhānaṃ sadratnamukuṭojjvalam

dvāraṃ citravicitreṇa vicitraṃ paramādbhutam //
sarvaṃ nivedanaṃ cakrurdevā dauvārikaṃ mudā

tānuvāca dvārapālo niḥśaṃkaṃ tridaśeśvarān //
nāhaṃ vinā''jñayā gaṃtuṃ dātuṃ sāṃpratamīśvaraḥ

kiṃkarānpreṣayāmāsa śrīkṛṣṇasthānameva ca //
hareranujñāṃ saṃprāpya dadau gaṃtuṃ surānmune

taṃ saṃbhāṣya yayurdevā dvitīyaṃ dvāramuttamam //
tato'dhikaṃ vicitraṃ ca suṃdaraṃ sumanoharam

dvāre niyuktaṃ dadṛśuścaṃdrabhānuṃ ca nārada //
kiśoraṃ śyāmalaṃ cāru svarṇavetradharaṃ varam

ratnasiṃhāsanasthaṃ ca ratnabhūṣaṇabhūṣitam //
gopānāṃ ca samūhena paṃcalakṣeṇa śobhitam

taṃ saṃbhāṣya yayurdevāstṛtīyaṃ dvāramuttamam //
tato'tisundaraṃ citraṃ jvalantaṃ maṇitejasā

dvāre niyuktaṃ dadṛśuḥ sūryabhānuṃ ca nārada //
dvibhujaṃ muralīhastaṃ kiśoraṃ śyāmasundaram

maṇikuṇḍalayugmena kapolasthalarājitam //
ratnadaṃḍakaraṃ śreṣṭhaṃ preṣyaṃ rādheśayoḥ param

navalakṣeṇa gopānāṃ veṣṭitaṃ ca nṛpeṃdravat //
taṃ saṃbhāṣya yayurdevāścaturthaṃ dvārameva ca

tebhyo vilakṣaṇaṃ ramyaṃ sudīptaṃ maṇitejasā //
atyadbhutavicitreṇa bhūṣitaṃ sumanoharam

dvāre niyuktaṃ dadṛśurvasubhānuṃ vrajeśvaram //
kiśoraṃ sundaravaraṃ maṇidaṇḍakaraṃ param

ratnasiṃhāsanasthaṃ ca ratnabhūṣaṇabhūṣitam //
pakvabiṃbādharoṣṭhaṃ ca sasmitaṃ sumanoharam

taṃ saṃbhāṣya yayurdevā pañcamaṃ dvārameva ca //
vajrabhittisthitaiścitravicitrairjvalitaṃ param

dvārapālaṃ ca dadṛśurdevabhānuṃ ca tatra vai //
cāru siṃhāsanasthaṃ ca ratnabhūṣaṇabhūṣitam

mayūrapicchacūḍaṃ ca ratnamālāvibhūṣitam //
kadaṃbapuṣpasaṃsaktasadratnakuṇḍalojjvalam

caṃdanāgarukastūrīkuṅkumadravacarcitam //
nṛpeṃdravaratulyaṃ ca daśalakṣaprajānvitam

taṃ vetrapāṇiṃ saṃbhāṣya yayurdevā mudā'nvitāḥ //
vilakṣaṇaṃ dvāraṣaṭkaṃ citrarājivirājitam

vajrabhittiyugmayukte puṣpamālyavibhūṣite //
dvāre niyuktaṃ dadṛśuḥ śukrabhānuṃ vrajeśvaram

nānālaṃkāraśobhāḍhyaṃ daśalakṣaprajānvitam //
śrīkhaṃḍapallavāsaktakapolaṃ kuṇḍalojjvalam

tūrṇaṃ surāstaṃ sabhāṣya yayurdvāraṃ ca saptamam //
nānāprakāracitraṃ ca ṣaḍbhyaścātivilakṣaṇam

dvāre niyuktaṃ dadṛśū ratnabhānuṃ hareḥ priyam //
caṃdanokṣitasarvāṃgaṃ puṣpamālāvibhūṣitam //
bhūṣitaṃ bhūṣaṇai ramyairmaṇiratnamanoharaiḥ

gopairdvādaśalakṣaiśca rājeṃdramiva rājitam //
ratnasiṃhāsanasthaṃ ca smerānanasaroruham

taṃ vetrahastaṃ saṃbhāṣya jagmurdeveśvarā mudā //
vicitramaṣṭamaṃ dvāraṃ saptabhyo'pi vilakṣaṇam

dauvārikaṃ te dadṛśuḥ supārśvaṃ sumanoharam //
sasmitaṃ sundaravaraṃ śrīkhaṇḍatilakojjvalam

bandhujīvādharoṣṭhaṃ ca ratnakuṇḍalamaṃḍitam //
sarvālaṃkāraśobhāḍhyaṃ ratnadaṇḍadharaṃ varam

gopairdvādaśalakṣaiśca kiśoraiśca samanvitam //
tataḥ śīghraṃ yayurdevā navamaṃ dvāramīpsitam

vajrasadratnaracitaṃ caturvedisamanvitam //
apūrvacitraracitamālajālairvirājitam

dvārapālaṃ ca dadṛśuḥ subalaṃ lalitākṛtim //
nānābhūṣaṇaśobhāḍhyaṃ bhūṣaṇārhaṃ manoharam

vajrairdvādaśalakṣaiśca saṃyuktaṃ sumanoharam //
taṃ daṇḍahastaṃ sambhāṣya surā dvārātaraṃ yayuḥ

viśiṣṭaṃ daśamaṃ dvāraṃ dṛṣṭvā te vismayaṃ yayuḥ //
sarvānirvacanīyaṃ cāpyadṛṣṭamaśrutaṃ mune

dadṛśurdvārapālaṃ ca sudāmānaṃ ca sundaram //
anivarcanīyarūpaṃ kṛṣṇatulyaṃ manoharam

gopaviṃśatilakṣāṇāṃ samūhaiḥ parivāritam //
taṃ daṇḍahastaṃ dṛṣṭvaiva jagmurdvārāṃtaraṃ surāḥ

dvāramekādaśākhyaṃ ca sucitraṃ mahadadbhutam //
dvārapālaṃ ca tatrasthaṃ śrīdāmānaṃ vrajeśvaram

rādhikāputratulyaṃ ca pītavastreṇa bhūṣitam //
amūlyaratnaracitaratnasiṃhāsanasthitam

amūlyaratnabhūṣābhirbhūṣitaṃ sumanoharam //
candanāgurukastūrīkuṃkumena virājitam

gaṇḍasthalakapolārhasadratnakuṇḍalojjvalam //
sadratnaśreṣṭharacitavicitramukuṭojjvalam

praphullamālatīmālājālaiḥ sarvāṃgabhūṣitam //
koṭigopaiḥ parivṛtaṃ rājendrādhikamujjvalam

taṃ saṃbhāṣya yayurdvāraṃ dvādaśākhyaṃ surā mudā //
amūlyaratnaracitavedikābhiḥ samanvitam

sarveṣāṃ durlabhaṃ citramadṛśyamaśrutaṃ mune //
vajrabhittisthitaṃ citraṃ sundaraṃ sumanoharam

dvāre niyuktā dadṛśurdevā gopāṃganā varāḥ //
navayauvanasaṃpannā ratnābharaṇabhūṣitāḥ

pītavastraparīdhānāḥ kabarībhārabhūṣitāḥ //
sugaṃdhimālatīmālā jālaiḥ sarvāṃgabhūṣitāḥ

ratnakaṃkaṇakeyūraratnanūpurabhūṣitāḥ //
ratnakuṃḍalayugmena gaṇḍasthalavirājitāḥ

candanāguru kastūrīkuṃkumadravacarcitāḥ //
pīnaśroṇībharānamrā nitaṃbābhārapīḍitāḥ

gopīnāṃ śatakoṭīnāṃ śreṣṭhāḥ preṣṭhā harerapi //
gopīśca koṭiśo dṛṣṭvā surāste vismayaṃ yayuḥ

saṃbhāṣya tā mudā yuktā yayurdvārātaraṃ mune //
tataśca kramaśo vipra triṣu dvāreṣu tatra vai

gopāṃganānāṃ śreṣṭhāśca dadṛśuḥ sumanoharāḥ //
varāṇāṃ ca varā ramyā dhanyā mānyāśca śobhanāḥ

sarvāḥ saubhāgyayuktāśca rādhikāyāḥ priyāśca tāḥ //
bhūṣitā bhūṣaṇai ramyaiḥ prodbhinnanavayauvanāḥ

evaṃ dvāratrayaṃ dṛṣṭvā svapnā jñānādbhutāśrutam //
adṛśyamatiramyaṃ cāpyanirūpyaṃ vicakṣaṇaiḥ

tāstāḥ saṃbhāṣya devāste vismitā yayurīśvarāḥ //
rādhikābhyaṃtaraṃ dvāraṃ ṣoḍaśākhyaṃ manoharam

sarvāsāṃ ca pradhānaṃ ca gopyaṃ gopāṃganāgaṇaiḥ //
trayastriṃśadvayasyānāṃ nikarairveṣṭitaṃ mune

teṣāmanirvacanīyairnānāguṇasamanvitaiḥ //
rūpayauvanasaṃpannai ratnālaṃkārabhūṣitaiḥ

ratnakaṃkaṇakeyūratnanūpurabhūṣitaiḥ //
sadratnakiṃkiṇījālaimardhyadeśavibhūṣitaiḥ

ratnakuṃḍalayugmena gaṃḍasthalavirājitaiḥ //
praphullamālatīmālājālairvakṣasthalojjvalaiḥ

śaratpārvaṇapadmānāṃ prabhāṃ muṣṇanmukheṃdubhiḥ //
pārijātaprasūnānāṃ mālājālena veṣṭitaiḥ //

pakvabiṃbādharoṣṭhaiśca smerānanasaroruhaiḥ //
pakvadāḍimabījābhiḥ śobhitairdaṃtapaṃktibhiḥ

cārucaṃpakavarṇābhirmadhyasthalakṛśairmune //
gajamauktikayuktābhirnāsikābhirvirājitaiḥ

khageṃdracārucaṃcūnāṃ śobhāmuṣṇābhireva ca //
gajeṃdragaṃḍakaṭhina stanabhārabharānataiḥ

pīnaśroṇibharārtaiśca mukuṃdapadamānasaiḥ //
nimeṣarahitā devā dvāraṃ ca dadṛśuśca tāḥ

lasadramaṇiratnaiśca vedikāyugmaśobhitam //
harinmaṇīnāṃ staṃbhānāṃ samūhaiḥ saṃyutaṃ sadā

siṃdūrākāramaṇibhirmadhyasthalavirājitaiḥ //
pārijāta prasūnānāṃ mālājālairvibhūṣitam

tatsaṃsparśairgaṃdhavāhaiḥ sarvatra surabhīkṛtam //
dṛṣṭvā tatparamāścaryaṃ rādhikābhyaṃtaraṃ surāḥ

śrīkṛṣṇacaraṇāṃbhojadarśanaikamanorathāḥ //
tāḥ saṃbhāṣya yayuḥ śīghraṃ pulakāṃcitavigrahāḥ

bhaktyudrekādaśrupūrṇāḥ kiṃcinnamrātmakaṃdharāḥ //
ārātte dadṛśurdevā rādhikābhyaṃtaraṃ varam

maṃdirāṇāṃ ca madhyasthaṃ catuḥśālaṃ manoharam //
amūlyaratnasārāṇāṃ sāreṇa racitaṃ param

nānāratnamaṇistaṃbhairvajrayuktaiśca bhūṣitam //
pārijātaprasūnānāṃ mālājālairvirājitam

muktāsamūhairmāṇikyaiḥ śvetacāmaradarpaṇaiḥ //
amūlyaratnasārāṇāṃ kalaśairbhūṣitaṃ mune

paṭṭasūtragraṃthiyuktaśrīkhaṃḍapallavānvitaiḥ //
maṇistaṃbhasamūhaiśca ramyaprāṃgaṇabhūṣitam

caṃdanāgurukastūrīkuṃkumadravasaṃyutam //
śukladhānyaśuklapuṣpapravālaphalataṃḍulaiḥ

parṇadūrvākṣatairlājairnirmaṃchanavibhūṣitaiḥ //
phalayuktai ratnakuṃbhaiḥ siṃdūrakuṃkumānvitaiḥ

pārijātaprasūnānāṃ mālāyuktairvirājitam //
prasūnāktairgaṃdhavāhaiḥ sarvatra surabhīkṛtam

sarvānirvacanīyaṃ ca yaddravyamanirūpitam //
brahmāṃḍe durlabhaṃ yadyadvastubhistairvirājitam

pārijātaprasūnānāṃ mālājālaiḥ suśobhitam //
ratnaśayyāsu lalitāḥ sūkṣmavastraparicchadāḥ

koṭiśo ratnakuṃbhāśca ratnapātrāṇi nārada //
amūlyāni ca cārūṇi taistaireva vibhūṣitam

nānāprakāravādyānāṃ kalanādairnināditam//
svarayaṃtraiśca vīṇābhirgopīsaṃgītasuśrutam

mohitaṃ vādyaśabdaiśca mṛdaṃgānāṃ ca nārada //
gopānāṃ kṛṣṇatulyānāṃ samūhaiḥ parivāritam//

rādhāsakhīnāṃ gopīnāṃ vṛṃdairvṛṃdairvirājitam //
rādhākṛṣṇaguṇodrekapadasaṃgītasuśrutam

evamabhyaṃtaraṃ dṛṣṭvā babhūvurvismitāḥ surāḥ// /
śuśruvurmadhuraṃ gītaṃ dadṛśurnṛtyamuttamam

tatra tasthuḥ surāḥ sarve dhyānaikatānamānasāḥ //
ratnasiṃhāsanaṃ ramyaṃ dadṛśustridaśeśvarāḥ

dhanuḥśatapramāṇaṃ ca parito vartulākṛtim//
sadratnakṣudrakalaśasamūhaiśca samanvitam

citraputtalikāpuṣpacitrakānanabhūṣitam //
tatra tejaḥsamūhaṃ ca sūryakoṭisamaprabham

prabhayā jvalitaṃ brahmannāścaryaṃ mahadadbhutam //
saptatālapramāṇaṃ tadvyāptamūrdhvaṃ samantataḥ

tejomuṣaṃ ca sarveṣāṃ mahāśramavivarjitam //
sarvavyāpi sarvabījaṃ cakṣūrodhakaraṃ param

dṛṣṭvā tejaḥsvarūpaṃ ca te devā dhyānatatparāḥ //
praṇemuḥ parayā bhaktyā bhaktinamrātmakaṃdharāḥ

paramānandasaṃyogādaśrupūrṇavilocanāḥ //
pulakāṃkitasarvāṃgā vāṃchāpūrṇamanorathāḥ

natvā tejaḥsvarūpaṃ ca tamīśaṃ tridaśeśvarāḥ //
tatrotthāya dhyānayuktāḥ pratasthustejasaḥ puraḥ

dhyātvaivaṃ jagatāṃ dhātā babhūva saṃpuṭāṃjaliḥ //
dakṣiṇe śaṃkaraṃ kṛtvā vāme dharmaṃ ca nārada

bhaktyudrekātpratuṣṭāva dhyānaikatānamānasaḥ //
parātparaṃ guṇātītaṃ paramātmānamīśvaram

// brahmovāca // //
varaṃ vareṇyaṃ varadaṃ varadānāṃ ca kāraṇam //
kāraṇaṃ sarvabhūtānāṃ tejorūpaṃ namāmyaham

maṃgalaṃ maṃgalānāṃ ca maṃgalaṃ maṃgalapradam //
samastamaṃgalādhāraṃ tejorūpaṃ namāmyaham

sthitaṃ sarvatra nirliptamātmarūpaṃ parātparam //
nirīhamavitarkyaṃ ca tejorūpaṃ namāmyaham

saguṇaṃ nirguṇaṃ brahma jyotīrūpaṃ sanātanam //
sākāraṃ ca nirākāraṃ tejorūpaṃ namāmyaham

tamanirvacanīyaṃ ca vyaktamavyaktamekakam //
svecchāmayaṃ sarvarūpaṃ tejorūpaṃ namāmyaham

guṇatrayavibhāgāya rūpatrayadharaṃ param //
kalayā te kṛtāḥ sarve kiṃ jānanti śruteḥ param

sarvādhāraṃ sarvarūpaṃ sarvabījamabījakam //
sarvāṃtakamanantaṃ ca tejorūpaṃ namāmyaham

lakṣyaṃ ṣaṅguṇarūpaṃ ca varṇanīyaṃ vicakṣaṇaiḥ //
kiṃ varṇayāmi lakṣyaṃ ca tejorūpaṃ namāmyaham

aśarīraṃ vigrahavadiṃdriyaṃ yadatīṃdriyam //
yadasākṣi sarvasākṣi tejorūpaṃ namāmyaham

gamanārhamapādaṃ yadacakṣuḥ sarvadarśanam //
hastāsyahīnaṃ yadbhoktṛ tejorūpaṃ namāmyaham

vede nirūpitaṃ vastu santaḥ śaktāśca varṇitum //
vede'nirūpitaṃ yattattejorūpaṃ namāmyaham

sarveśaṃ yadanīśaṃ yatsarvādi yadanādi yat //
sarvātmakamanātmaṃ yattejorūpaṃ namāmyaham

ahaṃ vidhātā jagato vedānāṃ janakaḥ svayam //
pātā dharmo haro hartā stotuṃ śaktā na ke'pi yat

sevayā tava dharmo'yaṃ pālane ca nirūpitaḥ//
tavājñayā ca saṃhartā tvayā kāle nirūpite

niḥśeṣotpattikarttā'haṃ tvatpādāṃbhojasevayā //
karmiṇāṃ phaladātā ca tvaṃ bhaktānāṃ ca naḥ prabhuḥ // १०७
brahmāṃḍe biṃbasadṛśe bhūtvā viṣayiṇo vayam //
evaṃ katividhāḥ saṃti teṣvananteṣu sevakāḥ

yathā na saṃkhyā reṇūnāṃ tathā teṣāmaṇīyasām //
sarveṣāṃ janakaśceśo yastaṃ stotuṃ ca ke kṣamāḥ

ekaikalomavivare brahmāṃḍamekamekakam //
yasyaiva mahato viṣṇoḥ ṣoḍaśāṃśastavaiva saḥ

dhyāyaṃte yoginaḥ sarve tavaitadrūpamīpsitam //
tvadbhaktadāsyaniratāḥ sevaṃte caraṇāṃbujam

kiśoraṃ suṃdarataraṃ yakṣaṃ kamanīyakam //
maṃtradhyānānurūpaṃ ca darśayāsmākamīśvara

navīnajaladaśyāmapītāṃbaradharaṃ varam //
dvibhujaṃ muralīhastaṃ sasmitaṃ sumanoharam

mayūrapicchacūḍaṃ ca mālatījālamaṃḍitam //
caṃdanāgurukastūrīkuṅkumadravacarcitam

amūlyaratnasārāṇāṃ sārabhūṣaṇabhūṣitam //
amūlyaratnaracitakirīṭamukuṭojjvalam

śaratpraphullapadmānāṃ prabhāmoṣyāsyacaṃdrakam //
pakvabiṃbasamānena hyadharoṣṭhena rājitam

pakvadāḍimabījābhadaṃtapaṃktimanoharam //
kelīkadaṃbamūle ca sthitaṃ rāsarasonmukham

gopīvaktrasmitatanuṃ rādhāvakṣaḥsthalasthitam //
evaṃ vāṃchitarūpaṃ te dṛṣṭuṃ ko vā na cotsukaḥ

ityevamuktvā viśvasṛṭ praṇanāma punaḥ punaḥ //
evaṃ stotreṇa tuṣṭāva dharmo'pi śaṃkaraḥ svayam

nanāma bhūyobhūyaśca sāśrupūrṇavilocanaḥ //
tiṣṭhato'pi punaḥ stotraṃ pracakrustridaśeśvarāḥ

vyāptāstatrāśrame sarve śrīkṛṣṇatejasā mune //
stavarājamimaṃ nityaṃ brahmeśadharmabhiḥ kṛtam

pūjākāle harerevaṃ bhaktiyuktaśca yaḥ paṭhet //
sudurlabhāṃ dṛḍhāṃ bhaktiṃ niścalāṃ labhate hareḥ

surāsuramunīṃdrāṇāṃ durlabhaṃ dāsyameva ca //
aṇimādikasiddhiṃ ca sālokyādi catuṣṭayam

ihaiva viṣṇutulyaśca vikhyātaḥ pūjito dhuvam //
vāksiddhirmaṃtrasiddhiśca bhavettasya suniścitam

sarvasaubhāmyasaṃyuktaṃ yaśasā pūritaṃ jagat //
putraśca vidyā kavitā niścalā kamalā tathā

patnī pativratā sādhvī suśīlā susthirāḥ prajāḥ //
kīrtiśca cirakālīnā tvaṃte kṛṣṇāṃtike gatiḥ

iti śrībrahma vaivarte mahāpurāṇe śrīkṛṣṇajanmakhaṃḍe golokavarṇane śrīkṛṣṇastotrarājapaṭhanaṃ nāma paṃcamo'dhyāyaḥ