બ્રહ્મવૈવર્ત પુરાણ · અધ્યાય 4.5

શ્રીનારાયણ ઉવાચ ॥
ગોલોકં નિખિલં દૃષ્ટ્વા દેવાસ્તે હૃષ્ટમાનસાઃ ॥
પુનરાજગ્મૂ રાધાયાઃ પ્રધાનદ્વારમેવ ચ

સદ્રત્નમણિનિર્માણં વેદિકાયુગ્મસંયુતમ્ ॥
હરિદ્રાકારમણિના વજ્રસંમિશ્રિતેન ચ

અમૂલ્યરત્નરચિતકપાટેન વિભૂષિતમ્ ॥
દ્વારે નિયુક્તં દદૃશુર્વીરભાનુમનુત્તમમ્

રત્નસિંહાસનસ્થં ચ રત્નાભરણભૂષિતમ્ ॥
પીતવસ્ત્રપરીધાનં સદ્રત્નમુકુટોજ્જ્વલમ્

દ્વારં ચિત્રવિચિત્રેણ વિચિત્રં પરમાદ્ભુતમ્ ॥
સર્વં નિવેદનં ચક્રુર્દેવા દૌવારિકં મુદા

તાનુવાચ દ્વારપાલો નિઃશંકં ત્રિદશેશ્વરાન્ ॥
નાહં વિનાઽઽજ્ઞયા ગંતું દાતું સાંપ્રતમીશ્વરઃ

કિંકરાન્પ્રેષયામાસ શ્રીકૃષ્ણસ્થાનમેવ ચ ॥
હરેરનુજ્ઞાં સંપ્રાપ્ય દદૌ ગંતું સુરાન્મુને

તં સંભાષ્ય યયુર્દેવા દ્વિતીયં દ્વારમુત્તમમ્ ॥
તતોઽધિકં વિચિત્રં ચ સુંદરં સુમનોહરમ્

દ્વારે નિયુક્તં દદૃશુશ્ચંદ્રભાનું ચ નારદ ॥
કિશોરં શ્યામલં ચારુ સ્વર્ણવેત્રધરં વરમ્

રત્નસિંહાસનસ્થં ચ રત્નભૂષણભૂષિતમ્ ॥
ગોપાનાં ચ સમૂહેન પંચલક્ષેણ શોભિતમ્

તં સંભાષ્ય યયુર્દેવાસ્તૃતીયં દ્વારમુત્તમમ્ ॥
તતોઽતિસુન્દરં ચિત્રં જ્વલન્તં મણિતેજસા

દ્વારે નિયુક્તં દદૃશુઃ સૂર્યભાનું ચ નારદ ॥
દ્વિભુજં મુરલીહસ્તં કિશોરં શ્યામસુન્દરમ્

મણિકુણ્ડલયુગ્મેન કપોલસ્થલરાજિતમ્ ॥
રત્નદંડકરં શ્રેષ્ઠં પ્રેષ્યં રાધેશયોઃ પરમ્

નવલક્ષેણ ગોપાનાં વેષ્ટિતં ચ નૃપેંદ્રવત્ ॥
તં સંભાષ્ય યયુર્દેવાશ્ચતુર્થં દ્વારમેવ ચ

તેભ્યો વિલક્ષણં રમ્યં સુદીપ્તં મણિતેજસા ॥
અત્યદ્ભુતવિચિત્રેણ ભૂષિતં સુમનોહરમ્

દ્વારે નિયુક્તં દદૃશુર્વસુભાનું વ્રજેશ્વરમ્ ॥
કિશોરં સુન્દરવરં મણિદણ્ડકરં પરમ્

રત્નસિંહાસનસ્થં ચ રત્નભૂષણભૂષિતમ્ ॥
પક્વબિંબાધરોષ્ઠં ચ સસ્મિતં સુમનોહરમ્

તં સંભાષ્ય યયુર્દેવા પઞ્ચમં દ્વારમેવ ચ ॥
વજ્રભિત્તિસ્થિતૈશ્ચિત્રવિચિત્રૈર્જ્વલિતં પરમ્

દ્વારપાલં ચ દદૃશુર્દેવભાનું ચ તત્ર વૈ ॥
ચારુ સિંહાસનસ્થં ચ રત્નભૂષણભૂષિતમ્

મયૂરપિચ્છચૂડં ચ રત્નમાલાવિભૂષિતમ્ ॥
કદંબપુષ્પસંસક્તસદ્રત્નકુણ્ડલોજ્જ્વલમ્

ચંદનાગરુકસ્તૂરીકુઙ્કુમદ્રવચર્ચિતમ્ ॥
નૃપેંદ્રવરતુલ્યં ચ દશલક્ષપ્રજાન્વિતમ્

તં વેત્રપાણિં સંભાષ્ય યયુર્દેવા મુદાઽન્વિતાઃ ॥
વિલક્ષણં દ્વારષટ્કં ચિત્રરાજિવિરાજિતમ્

વજ્રભિત્તિયુગ્મયુક્તે પુષ્પમાલ્યવિભૂષિતે ॥
દ્વારે નિયુક્તં દદૃશુઃ શુક્રભાનું વ્રજેશ્વરમ્

નાનાલંકારશોભાઢ્યં દશલક્ષપ્રજાન્વિતમ્ ॥
શ્રીખંડપલ્લવાસક્તકપોલં કુણ્ડલોજ્જ્વલમ્

તૂર્ણં સુરાસ્તં સભાષ્ય યયુર્દ્વારં ચ સપ્તમમ્ ॥
નાનાપ્રકારચિત્રં ચ ષડ્ભ્યશ્ચાતિવિલક્ષણમ્

દ્વારે નિયુક્તં દદૃશૂ રત્નભાનું હરેઃ પ્રિયમ્ ॥
ચંદનોક્ષિતસર્વાંગં પુષ્પમાલાવિભૂષિતમ્ ॥
ભૂષિતં ભૂષણૈ રમ્યૈર્મણિરત્નમનોહરૈઃ

ગોપૈર્દ્વાદશલક્ષૈશ્ચ રાજેંદ્રમિવ રાજિતમ્ ॥
રત્નસિંહાસનસ્થં ચ સ્મેરાનનસરોરુહમ્

તં વેત્રહસ્તં સંભાષ્ય જગ્મુર્દેવેશ્વરા મુદા ॥
વિચિત્રમષ્ટમં દ્વારં સપ્તભ્યોઽપિ વિલક્ષણમ્

દૌવારિકં તે દદૃશુઃ સુપાર્શ્વં સુમનોહરમ્ ॥
સસ્મિતં સુન્દરવરં શ્રીખણ્ડતિલકોજ્જ્વલમ્

બન્ધુજીવાધરોષ્ઠં ચ રત્નકુણ્ડલમંડિતમ્ ॥
સર્વાલંકારશોભાઢ્યં રત્નદણ્ડધરં વરમ્

ગોપૈર્દ્વાદશલક્ષૈશ્ચ કિશોરૈશ્ચ સમન્વિતમ્ ॥
તતઃ શીઘ્રં યયુર્દેવા નવમં દ્વારમીપ્સિતમ્

વજ્રસદ્રત્નરચિતં ચતુર્વેદિસમન્વિતમ્ ॥
અપૂર્વચિત્રરચિતમાલજાલૈર્વિરાજિતમ્

દ્વારપાલં ચ દદૃશુઃ સુબલં લલિતાકૃતિમ્ ॥
નાનાભૂષણશોભાઢ્યં ભૂષણાર્હં મનોહરમ્

વજ્રૈર્દ્વાદશલક્ષૈશ્ચ સંયુક્તં સુમનોહરમ્ ॥
તં દણ્ડહસ્તં સમ્ભાષ્ય સુરા દ્વારાતરં યયુઃ

વિશિષ્ટં દશમં દ્વારં દૃષ્ટ્વા તે વિસ્મયં યયુઃ ॥
સર્વાનિર્વચનીયં ચાપ્યદૃષ્ટમશ્રુતં મુને

દદૃશુર્દ્વારપાલં ચ સુદામાનં ચ સુન્દરમ્ ॥
અનિવર્ચનીયરૂપં કૃષ્ણતુલ્યં મનોહરમ્

ગોપવિંશતિલક્ષાણાં સમૂહૈઃ પરિવારિતમ્ ॥
તં દણ્ડહસ્તં દૃષ્ટ્વૈવ જગ્મુર્દ્વારાંતરં સુરાઃ

દ્વારમેકાદશાખ્યં ચ સુચિત્રં મહદદ્ભુતમ્ ॥
દ્વારપાલં ચ તત્રસ્થં શ્રીદામાનં વ્રજેશ્વરમ્

રાધિકાપુત્રતુલ્યં ચ પીતવસ્ત્રેણ ભૂષિતમ્ ॥
અમૂલ્યરત્નરચિતરત્નસિંહાસનસ્થિતમ્

અમૂલ્યરત્નભૂષાભિર્ભૂષિતં સુમનોહરમ્ ॥
ચન્દનાગુરુકસ્તૂરીકુંકુમેન વિરાજિતમ્

ગણ્ડસ્થલકપોલાર્હસદ્રત્નકુણ્ડલોજ્જ્વલમ્ ॥
સદ્રત્નશ્રેષ્ઠરચિતવિચિત્રમુકુટોજ્જ્વલમ્

પ્રફુલ્લમાલતીમાલાજાલૈઃ સર્વાંગભૂષિતમ્ ॥
કોટિગોપૈઃ પરિવૃતં રાજેન્દ્રાધિકમુજ્જ્વલમ્

તં સંભાષ્ય યયુર્દ્વારં દ્વાદશાખ્યં સુરા મુદા ॥
અમૂલ્યરત્નરચિતવેદિકાભિઃ સમન્વિતમ્

સર્વેષાં દુર્લભં ચિત્રમદૃશ્યમશ્રુતં મુને ॥
વજ્રભિત્તિસ્થિતં ચિત્રં સુન્દરં સુમનોહરમ્

દ્વારે નિયુક્તા દદૃશુર્દેવા ગોપાંગના વરાઃ ॥
નવયૌવનસંપન્ના રત્નાભરણભૂષિતાઃ

પીતવસ્ત્રપરીધાનાઃ કબરીભારભૂષિતાઃ ॥
સુગંધિમાલતીમાલા જાલૈઃ સર્વાંગભૂષિતાઃ

રત્નકંકણકેયૂરરત્નનૂપુરભૂષિતાઃ ॥
રત્નકુંડલયુગ્મેન ગણ્ડસ્થલવિરાજિતાઃ

ચન્દનાગુરુ કસ્તૂરીકુંકુમદ્રવચર્ચિતાઃ ॥
પીનશ્રોણીભરાનમ્રા નિતંબાભારપીડિતાઃ

ગોપીનાં શતકોટીનાં શ્રેષ્ઠાઃ પ્રેષ્ઠા હરેરપિ ॥
ગોપીશ્ચ કોટિશો દૃષ્ટ્વા સુરાસ્તે વિસ્મયં યયુઃ

સંભાષ્ય તા મુદા યુક્તા યયુર્દ્વારાતરં મુને ॥
તતશ્ચ ક્રમશો વિપ્ર ત્રિષુ દ્વારેષુ તત્ર વૈ

ગોપાંગનાનાં શ્રેષ્ઠાશ્ચ દદૃશુઃ સુમનોહરાઃ ॥
વરાણાં ચ વરા રમ્યા ધન્યા માન્યાશ્ચ શોભનાઃ

સર્વાઃ સૌભાગ્યયુક્તાશ્ચ રાધિકાયાઃ પ્રિયાશ્ચ તાઃ ॥
ભૂષિતા ભૂષણૈ રમ્યૈઃ પ્રોદ્ભિન્નનવયૌવનાઃ

એવં દ્વારત્રયં દૃષ્ટ્વા સ્વપ્ના જ્ઞાનાદ્ભુતાશ્રુતમ્ ॥
અદૃશ્યમતિરમ્યં ચાપ્યનિરૂપ્યં વિચક્ષણૈઃ

તાસ્તાઃ સંભાષ્ય દેવાસ્તે વિસ્મિતા યયુરીશ્વરાઃ ॥
રાધિકાભ્યંતરં દ્વારં ષોડશાખ્યં મનોહરમ્

સર્વાસાં ચ પ્રધાનં ચ ગોપ્યં ગોપાંગનાગણૈઃ ॥
ત્રયસ્ત્રિંશદ્વયસ્યાનાં નિકરૈર્વેષ્ટિતં મુને

તેષામનિર્વચનીયૈર્નાનાગુણસમન્વિતૈઃ ॥
રૂપયૌવનસંપન્નૈ રત્નાલંકારભૂષિતૈઃ

રત્નકંકણકેયૂરત્નનૂપુરભૂષિતૈઃ ॥
સદ્રત્નકિંકિણીજાલૈમર્ધ્યદેશવિભૂષિતૈઃ

રત્નકુંડલયુગ્મેન ગંડસ્થલવિરાજિતૈઃ ॥
પ્રફુલ્લમાલતીમાલાજાલૈર્વક્ષસ્થલોજ્જ્વલૈઃ

શરત્પાર્વણપદ્માનાં પ્રભાં મુષ્ણન્મુખેંદુભિઃ ॥
પારિજાતપ્રસૂનાનાં માલાજાલેન વેષ્ટિતૈઃ ॥

પક્વબિંબાધરોષ્ઠૈશ્ચ સ્મેરાનનસરોરુહૈઃ ॥
પક્વદાડિમબીજાભિઃ શોભિતૈર્દંતપંક્તિભિઃ

ચારુચંપકવર્ણાભિર્મધ્યસ્થલકૃશૈર્મુને ॥
ગજમૌક્તિકયુક્તાભિર્નાસિકાભિર્વિરાજિતૈઃ

ખગેંદ્રચારુચંચૂનાં શોભામુષ્ણાભિરેવ ચ ॥
ગજેંદ્રગંડકઠિન સ્તનભારભરાનતૈઃ

પીનશ્રોણિભરાર્તૈશ્ચ મુકુંદપદમાનસૈઃ ॥
નિમેષરહિતા દેવા દ્વારં ચ દદૃશુશ્ચ તાઃ

લસદ્રમણિરત્નૈશ્ચ વેદિકાયુગ્મશોભિતમ્ ॥
હરિન્મણીનાં સ્તંભાનાં સમૂહૈઃ સંયુતં સદા

સિંદૂરાકારમણિભિર્મધ્યસ્થલવિરાજિતૈઃ ॥
પારિજાત પ્રસૂનાનાં માલાજાલૈર્વિભૂષિતમ્

તત્સંસ્પર્શૈર્ગંધવાહૈઃ સર્વત્ર સુરભીકૃતમ્ ॥
દૃષ્ટ્વા તત્પરમાશ્ચર્યં રાધિકાભ્યંતરં સુરાઃ

શ્રીકૃષ્ણચરણાંભોજદર્શનૈકમનોરથાઃ ॥
તાઃ સંભાષ્ય યયુઃ શીઘ્રં પુલકાંચિતવિગ્રહાઃ

ભક્ત્યુદ્રેકાદશ્રુપૂર્ણાઃ કિંચિન્નમ્રાત્મકંધરાઃ ॥
આરાત્તે દદૃશુર્દેવા રાધિકાભ્યંતરં વરમ્

મંદિરાણાં ચ મધ્યસ્થં ચતુઃશાલં મનોહરમ્ ॥
અમૂલ્યરત્નસારાણાં સારેણ રચિતં પરમ્

નાનારત્નમણિસ્તંભૈર્વજ્રયુક્તૈશ્ચ ભૂષિતમ્ ॥
પારિજાતપ્રસૂનાનાં માલાજાલૈર્વિરાજિતમ્

મુક્તાસમૂહૈર્માણિક્યૈઃ શ્વેતચામરદર્પણૈઃ ॥
અમૂલ્યરત્નસારાણાં કલશૈર્ભૂષિતં મુને

પટ્ટસૂત્રગ્રંથિયુક્તશ્રીખંડપલ્લવાન્વિતૈઃ ॥
મણિસ્તંભસમૂહૈશ્ચ રમ્યપ્રાંગણભૂષિતમ્

ચંદનાગુરુકસ્તૂરીકુંકુમદ્રવસંયુતમ્ ॥
શુક્લધાન્યશુક્લપુષ્પપ્રવાલફલતંડુલૈઃ

પર્ણદૂર્વાક્ષતૈર્લાજૈર્નિર્મંછનવિભૂષિતૈઃ ॥
ફલયુક્તૈ રત્નકુંભૈઃ સિંદૂરકુંકુમાન્વિતૈઃ

પારિજાતપ્રસૂનાનાં માલાયુક્તૈર્વિરાજિતમ્ ॥
પ્રસૂનાક્તૈર્ગંધવાહૈઃ સર્વત્ર સુરભીકૃતમ્

સર્વાનિર્વચનીયં ચ યદ્દ્રવ્યમનિરૂપિતમ્ ॥
બ્રહ્માંડે દુર્લભં યદ્યદ્વસ્તુભિસ્તૈર્વિરાજિતમ્

પારિજાતપ્રસૂનાનાં માલાજાલૈઃ સુશોભિતમ્ ॥
રત્નશય્યાસુ લલિતાઃ સૂક્ષ્મવસ્ત્રપરિચ્છદાઃ

કોટિશો રત્નકુંભાશ્ચ રત્નપાત્રાણિ નારદ ॥
અમૂલ્યાનિ ચ ચારૂણિ તૈસ્તૈરેવ વિભૂષિતમ્

નાનાપ્રકારવાદ્યાનાં કલનાદૈર્નિનાદિતમ્॥
સ્વરયંત્રૈશ્ચ વીણાભિર્ગોપીસંગીતસુશ્રુતમ્

મોહિતં વાદ્યશબ્દૈશ્ચ મૃદંગાનાં ચ નારદ ॥
ગોપાનાં કૃષ્ણતુલ્યાનાં સમૂહૈઃ પરિવારિતમ્॥

રાધાસખીનાં ગોપીનાં વૃંદૈર્વૃંદૈર્વિરાજિતમ્ ॥
રાધાકૃષ્ણગુણોદ્રેકપદસંગીતસુશ્રુતમ્

એવમભ્યંતરં દૃષ્ટ્વા બભૂવુર્વિસ્મિતાઃ સુરાઃ॥ ।
શુશ્રુવુર્મધુરં ગીતં દદૃશુર્નૃત્યમુત્તમમ્

તત્ર તસ્થુઃ સુરાઃ સર્વે ધ્યાનૈકતાનમાનસાઃ ॥
રત્નસિંહાસનં રમ્યં દદૃશુસ્ત્રિદશેશ્વરાઃ

ધનુઃશતપ્રમાણં ચ પરિતો વર્તુલાકૃતિમ્॥
સદ્રત્નક્ષુદ્રકલશસમૂહૈશ્ચ સમન્વિતમ્

ચિત્રપુત્તલિકાપુષ્પચિત્રકાનનભૂષિતમ્ ॥
તત્ર તેજઃસમૂહં ચ સૂર્યકોટિસમપ્રભમ્

પ્રભયા જ્વલિતં બ્રહ્મન્નાશ્ચર્યં મહદદ્ભુતમ્ ॥
સપ્તતાલપ્રમાણં તદ્વ્યાપ્તમૂર્ધ્વં સમન્તતઃ

તેજોમુષં ચ સર્વેષાં મહાશ્રમવિવર્જિતમ્ ॥
સર્વવ્યાપિ સર્વબીજં ચક્ષૂરોધકરં પરમ્

દૃષ્ટ્વા તેજઃસ્વરૂપં ચ તે દેવા ધ્યાનતત્પરાઃ ॥
પ્રણેમુઃ પરયા ભક્ત્યા ભક્તિનમ્રાત્મકંધરાઃ

પરમાનન્દસંયોગાદશ્રુપૂર્ણવિલોચનાઃ ॥
પુલકાંકિતસર્વાંગા વાંછાપૂર્ણમનોરથાઃ

નત્વા તેજઃસ્વરૂપં ચ તમીશં ત્રિદશેશ્વરાઃ ॥
તત્રોત્થાય ધ્યાનયુક્તાઃ પ્રતસ્થુસ્તેજસઃ પુરઃ

ધ્યાત્વૈવં જગતાં ધાતા બભૂવ સંપુટાંજલિઃ ॥
દક્ષિણે શંકરં કૃત્વા વામે ધર્મં ચ નારદ

ભક્ત્યુદ્રેકાત્પ્રતુષ્ટાવ ધ્યાનૈકતાનમાનસઃ ॥
પરાત્પરં ગુણાતીતં પરમાત્માનમીશ્વરમ્

॥ બ્રહ્મોવાચ ॥ ॥
વરં વરેણ્યં વરદં વરદાનાં ચ કારણમ્ ॥
કારણં સર્વભૂતાનાં તેજોરૂપં નમામ્યહમ્

મંગલં મંગલાનાં ચ મંગલં મંગલપ્રદમ્ ॥
સમસ્તમંગલાધારં તેજોરૂપં નમામ્યહમ્

સ્થિતં સર્વત્ર નિર્લિપ્તમાત્મરૂપં પરાત્પરમ્ ॥
નિરીહમવિતર્ક્યં ચ તેજોરૂપં નમામ્યહમ્

સગુણં નિર્ગુણં બ્રહ્મ જ્યોતીરૂપં સનાતનમ્ ॥
સાકારં ચ નિરાકારં તેજોરૂપં નમામ્યહમ્

તમનિર્વચનીયં ચ વ્યક્તમવ્યક્તમેકકમ્ ॥
સ્વેચ્છામયં સર્વરૂપં તેજોરૂપં નમામ્યહમ્

ગુણત્રયવિભાગાય રૂપત્રયધરં પરમ્ ॥
કલયા તે કૃતાઃ સર્વે કિં જાનન્તિ શ્રુતેઃ પરમ્

સર્વાધારં સર્વરૂપં સર્વબીજમબીજકમ્ ॥
સર્વાંતકમનન્તં ચ તેજોરૂપં નમામ્યહમ્

લક્ષ્યં ષઙ્ગુણરૂપં ચ વર્ણનીયં વિચક્ષણૈઃ ॥
કિં વર્ણયામિ લક્ષ્યં ચ તેજોરૂપં નમામ્યહમ્

અશરીરં વિગ્રહવદિંદ્રિયં યદતીંદ્રિયમ્ ॥
યદસાક્ષિ સર્વસાક્ષિ તેજોરૂપં નમામ્યહમ્

ગમનાર્હમપાદં યદચક્ષુઃ સર્વદર્શનમ્ ॥
હસ્તાસ્યહીનં યદ્ભોક્તૃ તેજોરૂપં નમામ્યહમ્

વેદે નિરૂપિતં વસ્તુ સન્તઃ શક્તાશ્ચ વર્ણિતુમ્ ॥
વેદેઽનિરૂપિતં યત્તત્તેજોરૂપં નમામ્યહમ્

સર્વેશં યદનીશં યત્સર્વાદિ યદનાદિ યત્ ॥
સર્વાત્મકમનાત્મં યત્તેજોરૂપં નમામ્યહમ્

અહં વિધાતા જગતો વેદાનાં જનકઃ સ્વયમ્ ॥
પાતા ધર્મો હરો હર્તા સ્તોતું શક્તા ન કેઽપિ યત્

સેવયા તવ ધર્મોઽયં પાલને ચ નિરૂપિતઃ॥
તવાજ્ઞયા ચ સંહર્તા ત્વયા કાલે નિરૂપિતે

નિઃશેષોત્પત્તિકર્ત્તાઽહં ત્વત્પાદાંભોજસેવયા ॥
કર્મિણાં ફલદાતા ચ ત્વં ભક્તાનાં ચ નઃ પ્રભુઃ ॥ ૧૦૭
બ્રહ્માંડે બિંબસદૃશે ભૂત્વા વિષયિણો વયમ્ ॥
એવં કતિવિધાઃ સંતિ તેષ્વનન્તેષુ સેવકાઃ

યથા ન સંખ્યા રેણૂનાં તથા તેષામણીયસામ્ ॥
સર્વેષાં જનકશ્ચેશો યસ્તં સ્તોતું ચ કે ક્ષમાઃ

એકૈકલોમવિવરે બ્રહ્માંડમેકમેકકમ્ ॥
યસ્યૈવ મહતો વિષ્ણોઃ ષોડશાંશસ્તવૈવ સઃ

ધ્યાયંતે યોગિનઃ સર્વે તવૈતદ્રૂપમીપ્સિતમ્ ॥
ત્વદ્ભક્તદાસ્યનિરતાઃ સેવંતે ચરણાંબુજમ્

કિશોરં સુંદરતરં યક્ષં કમનીયકમ્ ॥
મંત્રધ્યાનાનુરૂપં ચ દર્શયાસ્માકમીશ્વર

નવીનજલદશ્યામપીતાંબરધરં વરમ્ ॥
દ્વિભુજં મુરલીહસ્તં સસ્મિતં સુમનોહરમ્

મયૂરપિચ્છચૂડં ચ માલતીજાલમંડિતમ્ ॥
ચંદનાગુરુકસ્તૂરીકુઙ્કુમદ્રવચર્ચિતમ્

અમૂલ્યરત્નસારાણાં સારભૂષણભૂષિતમ્ ॥
અમૂલ્યરત્નરચિતકિરીટમુકુટોજ્જ્વલમ્

શરત્પ્રફુલ્લપદ્માનાં પ્રભામોષ્યાસ્યચંદ્રકમ્ ॥
પક્વબિંબસમાનેન હ્યધરોષ્ઠેન રાજિતમ્

પક્વદાડિમબીજાભદંતપંક્તિમનોહરમ્ ॥
કેલીકદંબમૂલે ચ સ્થિતં રાસરસોન્મુખમ્

ગોપીવક્ત્રસ્મિતતનું રાધાવક્ષઃસ્થલસ્થિતમ્ ॥
એવં વાંછિતરૂપં તે દૃષ્ટું કો વા ન ચોત્સુકઃ

ઇત્યેવમુક્ત્વા વિશ્વસૃટ્ પ્રણનામ પુનઃ પુનઃ ॥
એવં સ્તોત્રેણ તુષ્ટાવ ધર્મોઽપિ શંકરઃ સ્વયમ્

નનામ ભૂયોભૂયશ્ચ સાશ્રુપૂર્ણવિલોચનઃ ॥
તિષ્ઠતોઽપિ પુનઃ સ્તોત્રં પ્રચક્રુસ્ત્રિદશેશ્વરાઃ

વ્યાપ્તાસ્તત્રાશ્રમે સર્વે શ્રીકૃષ્ણતેજસા મુને ॥
સ્તવરાજમિમં નિત્યં બ્રહ્મેશધર્મભિઃ કૃતમ્

પૂજાકાલે હરેરેવં ભક્તિયુક્તશ્ચ યઃ પઠેત્ ॥
સુદુર્લભાં દૃઢાં ભક્તિં નિશ્ચલાં લભતે હરેઃ

સુરાસુરમુનીંદ્રાણાં દુર્લભં દાસ્યમેવ ચ ॥
અણિમાદિકસિદ્ધિં ચ સાલોક્યાદિ ચતુષ્ટયમ્

ઇહૈવ વિષ્ણુતુલ્યશ્ચ વિખ્યાતઃ પૂજિતો ધુવમ્ ॥
વાક્સિદ્ધિર્મંત્રસિદ્ધિશ્ચ ભવેત્તસ્ય સુનિશ્ચિતમ્

સર્વસૌભામ્યસંયુક્તં યશસા પૂરિતં જગત્ ॥
પુત્રશ્ચ વિદ્યા કવિતા નિશ્ચલા કમલા તથા

પત્ની પતિવ્રતા સાધ્વી સુશીલા સુસ્થિરાઃ પ્રજાઃ ॥
કીર્તિશ્ચ ચિરકાલીના ત્વંતે કૃષ્ણાંતિકે ગતિઃ

ઇતિ શ્રીબ્રહ્મ વૈવર્તે મહાપુરાણે શ્રીકૃષ્ણજન્મખંડે ગોલોકવર્ણને શ્રીકૃષ્ણસ્તોત્રરાજપઠનં નામ પંચમોઽધ્યાયઃ