Brahmavaivarta Purana · Chapter 4.29

śrīnārāyaṇa uvāca //
atha gopāṅganāḥ sarvāḥ kāmamattatayā mune //
atiprauḍhāśca māninyo neśvaraṃ menire patim

kāścidūcuraho kṛṣṇa sasmitā vakralocanāḥ //
mālatīpuṣpamuttolya dehi me mālikāmiti

kāścidūcuraye kṛṣṇa svakroḍe'smāṃśca kurviti //
gṛhītvāśrīhareḥ skandhamāruroha ca kācana

uvāca kāciddarpeṇa pramattā prāṇavallabham //
svakīyapītavasanaṃ paridhāraya māmiti

uvāca kācidīśaṃ taṃ sindūraṃ dehi māmiti //
uvāca kācitprāṇeśaṃ śīghramāgatya sāmpratam

kṛtvā kuntalasaṃskāraṃ kuru me kabarīmiti //
kāścitsaṃprerayāmāsuḥ śrīkhaṇḍaṃ ballavāya ca

svāṃgaveṣavidhāyinyo bhūṣārthaṃ śrutimūlayoḥ //
uvāca kācitkāmena paraṃ saṃketapūrvakam

paśyantī tanmukhāmbhojaṃ sasmitā maithunāya ca //
kācijjagrāha muralīṃ balādākṛṣya mādhavam

jahāra pītavasanaṃ kṛtvā nagnaṃ ca kāminī //
kāminyaḥ kāścidityūcurmāninyo madhusūdanam

alaktakadravaṃ dehi pādayornakhareṣu ca //
uvāca kācitpremṇā taṃ gaṇḍayoḥ stanayormama

nānācitravicitrāḍhyāṃ karu patrāvalīmiti //
kṛtvā'numānaṃ manasā dṛṣṭvā tāsāṃ pramattatām

mādhavo rādhayā sārddhamantardhānaṃ cakāra ha //
atīva nirjane sthāne mudā svecchāmayo vibhuḥ

kalāmānaprakāraṃ ca śṛṃgāraṃ ca cakāra ha //
parvate parvate ramye dvīpedvīpe sunirjane //

taṭe taṭe nadīnāṃ ca sarvajantuvivarjite //
śrīgoṣṭhe ratnaśaile ca velāgaṅgātaṭe'pi ca

kālinde ca pulinde ca mandire gandhamādane //
manohare kundavane kāverītīranīraje

puṣpabhadrāpulinaje puṣpodyāne supuṣpite //
sarvatra ramaṇaṃ kṛtvā rādhāveṣaṃ vidhāya ca

jagāma malayadroṇīṃ ramyāṃ candanavāyunā //
śayyāṃ puṣpamayīṃ kṛtvā tatra reme tayā saha

atīva sukhasaṃbhogānmūrcchāṃ saṃprāpya rādhikā //
kṛtvā vakṣasi govindaṃ pulakāñcitavigrahā

dṛṣṭvā tāṃ mūrcchitāṃ kṛṣṇo ghanaśroṇipayodharām //
viluptaveṣāṃ kāmārtāṃ nagnāṃ śithilakuntalām

cetanāṃ kārayāmāsa kṛtvā vakṣasi tandritām //
vāsayāmāsa vasanaṃ rādhāyāmekhalāmbaram

kabarīṃ racayāmāsa kiṃcidvāmena vakratām //
mālatīmālyasaṃyuktāṃ kundapuṣpaiśca veṣṭitām//

tasyāḥ kapāle siṃdūratilakaṃ sundaraṃ dadau //
gaṇḍayoḥ stanayościtrāṃ cakāra patrikāṃ mudā

sālaktakāṃśca nakharāṃścitritānpādapadmayoḥ //
nakhaiḥ kṛtrimapadmāni nirmame śroṇivakṣasoḥ

utthāyātha tayā sārddhaṃ jagāma hi sarovaram //
nānāprakārapadmānāṃ rājibhiśca virājitam

nirmalasphaṭikākārajalapūrṇaṃ manoharam //
haṃsakāraṇḍavākīrṇaṃ jalakukkuṭakūjitam

madhulubdhamadhughrāṇāṃ padmasthānaṃ supadmajam //
cāruṇā kalaśabdena śabditaṃ śaśvadeva hi

tatra snātvā jalakrīḍāṃ cakāra ha tayā saha //
jalaṃ dadau rādhikāyai mudā sā mādhavāya ca

sahasradalapadme ca gṛhītvā mādhavaḥ svayam//
ekaṃ dadau rādhikāyai rarakṣa svārthamekakam

candanāgurukastūrīkuṅkumadravamīpsitam //
svāṅgaṃ dattvā rādhikāyai lilepa rādhikeśvaraḥ

tato gacchaṃstayā sārddhaṃ dadarśa purato vaṭam //
atīvottuṅgaśākhāgramativistṛtameva ca

mūle yojanaparyantaṃ chāyayā pariveṣṭitam //
uvāsa tatra govindaḥ ketakīvanasannidhau

puṣpāktena suśītena vāyunā surabhīkṛte //
citraṃ rahasyaṃ suciraṃ purāṇaṃ ca purātanam //

praharṣitaśca śrīkṛṣṇaḥ kathayāmāsa rādhikām//
etasminnantare tatra dadarśa munipuṃgavam

āgacchantaṃ ca taṃ dṛṣṭvā prasannavadanekṣaṇam //
na dṛṣṭvā hṛdaye rūpamīśasya paramātmanaḥ

dhyānādviratamagre ca paśyantaṃ bahireva tat //
sarvāvayavavakraṃ ca kṛṣṇaṃ sarvadigambaram

nāmnā'ṣṭavakraṃ jaṭilaṃ jvalantaṃ brahmatejasā //
mukhato'gnimudgirantaṃ taporāśimivotthitam

aho kiṃ vā brahmatejo mūrtimantamiha svayam //
nakhaśmaśrusudīrghaṃ ca śāṃtaṃ tejasvinaṃ param

puṭāñjaliyutaṃ bhaktyā bhītaṃ praṇatakaṃdharam //
dṛṣṭvā hasantīṃ rādhāṃ tāṃ vārayāmāsa mādhavaḥ

prabhāvaṃ kathayāmāsa munīndrasya mahātmanaḥ //
atha praṇamya govindaṃ tuṣṭāva munipuṃgavaḥ //
yatstotraṃ ca purā dattaṃ śaṃkareṇa mahātmanā

aṣṭāvakra uvāca //
guṇātīta guṇādhāra guṇabīja guṇātmaka //
guṇīśa guṇināṃ bīja guṇāyana namo'stu te

siddhisvarūpa siddhyeśa siddhibīja parātpara //
siddhisiddhiguṇādhīśa siddhānāṃ gurave namaḥ

he vedabīja vedajña vedinvedavidāṃ vara //
vedājñātādyarūpeśa vedājñeśa namo'stu te

brahmānanteśa śeṣendra dharmādīnāmadhīśvara //
sarva sarveśa śarveśa bījarūpa namo'stu te

prakṛte prākṛta prajña prakṛtīśa parātpara //
saṃsāravṛkṣa tadbīja phalarūpa namo'stu te

sṛṣṭisthityantabījeśa sṛṣṭisthityantakāraṇa //
mahāvirāṭtarorbīja rādhikeśa namo'stu te

aho yasya trayaḥ skandhā brahmaviṣṇumaheśvarāḥ //
śākhāpraśākhā vedādyāstapāṃsi kusumāni ca

saṃsāraviphalā eva prakṛtyaṃkurameva ca //
tadādhāra nirādhāra sarvādhāra namo'stu te

tejorūpa nirākāra pratyakṣānūhameva ca //
sarvākārātipratyakṣa svecchāmaya namo'stu te

ityuktvā sa muniśreṣṭho nipatya caraṇāmbuje //
prāṇāṃstatyāja yogena tayoḥ pratyakṣa eva ca

papāta tatra taddehaḥ pādapadmasamīpataḥ //
tattejaśca samuttasthau jvaladagniśikhopamam

saptatālapramāṇaṃ tu cotthāya ca papāta ha//
bhrāmaṃ bhrāmaṃ ca parito līnaṃ cābhūtpadāmbuje

aṣṭāvakrakṛtaṃ stotraṃ prātarutthāya yaḥ paṭhet //
paraṃ nirvāṇa mokṣaṃ ca samāpnoti na saṃśayaḥ

prāṇādhiko mumukṣūṇāṃ stotrarājaśca nārada //
hariṇā'ho purā datto vaikuṇṭhe śaṃkarāya ca

iti śrībrahmavaivarte ma० śrīkṛ० ja० nārāya० munimokṣaṇaprastāva ekonatriṃśo'dhyāyaḥ