Brahmavaivarta Purana · Chapter 4.28

nārada uvāca //
triṣu māseṣvatīteṣu tāsāṃ ca hariṇā saha //
vada kena prakāreṇa babhūva tanusaṃgamaḥ

vṛndāvanaṃ kiṃprakāraṃ kiṃvidhaṃ rāsamaṇḍalam //
harirekastāśca bahvyaḥ kena krīḍā babhūva ha

kutūhalaṃ bhavati me idaṃ śrotuṃ navaṃ navam //
kathayasva mahābhāga puṇyaśravaṇakīrtana

kathā purāṇasārāṇāṃ rāsayātrā hareraho //
harilīlāḥ pṛthivyāṃ tu sarvāḥ pratimanoharāḥ

sūta uvāca //
nāradasya vacaḥ śrutvā ṛṣirnārāyaṇaḥ svayam //
prahasya suprasannāsyaḥ pravaktumupacakrame

śrīnārāyaṇa uvāca //
ekadā śrīharirnaktaṃ vanaṃ vṛndāvanaṃ yayau //
śubhe śuklatrayodaśyāṃ pūrṇe candrodaye mune

yūthikāmālatīkundamādhavīpuṣpavāyunā //
vāsitaṃ kalanādena madhubhrāṇāṃ manoharam

navapallavasaṃyuktaṃ puṃskokilarutaśrutam //
navalakṣarāsavāsasaṃyuktaṃ sumanoharam

candanāgurukastūrīkuṃkumena suvāsitam //
karpūrānvitatāmbūlabhogadravyasamanvitam

prasūnaiścampakānāṃ ca kastūrīcandanānvitaiḥ//
ratiyogyairviracitairnānātalpaiḥ suśobhitam

dīptaṃ ratnapradīpaiśca dhūpena surabhīkṛtam //
nānāpuṣpaiśca racitaṃ mālājālairvirājitam

parito vartulākāraṃ tatraiva rāsamaṇḍalam //
candanāgurukastūrīkuṃkumena susaṃskṛtam

puṣpodyānaiḥ puṣpitaiśca yuktakrīḍāsarovaraiḥ//
haṃsakāraṇḍavākīrṇairjalakukkuṭakūjitaiḥ

krīḍanīyaiḥ sundaraiśca surataśramahāribhiḥ //
śuddhasphaṭikasaṃkāśatoyapūrṇaiḥ sunirmalaiḥ

dadhipūrṇaśukladhānyajalairnirmañchanīkṛtam //
rambhāstambhasamūhena sundareṇa suśobhitam

āmrapallavayuktena sūtrabandhena cāruṇā //
bhūṣitaṃ maṃgalaghaṭaiḥ sindūracandanānvitaiḥ

mālatīmālyasaṃyuktairnārikelaphalānvitaiḥ//
sa rāsamaṇḍalaṃ dṛṣṭvā jahāsa madhusūdanaḥ

cakāra tatra kutukādvinodamuralīravam //
gopīnāṃ kāmukīnāṃ ca kāmavardhanakāraṇam

tacchrutvā rādhikā sadyo mumoha madanāturā //
babhūva sthāṇuvaddehā dhyānaikatānamānasā

kṣaṇena cetanāṃ prāpya punaḥ śuśrāva sā dhvanim //
uvāsa sā samuttasthau samudvignā punaḥ punaḥ

tyaktvā cāvaśyakaṃ karma niḥsasāra drutaṃ gṛhāt //
yayau tadanusāreṇa prasamīkṣya caturdiśam

dhyāyantī caraṇāmbhojaṃ śrīkṛṣṇasya mahātmanaḥ //
tejasā ca dyotayantī sadratnasārabhūṣataiḥ

bahirbabhūvustāstrastā vareṇa hṛtacetanāḥ //
kuladharmaṃ parityajya niśaṃkāḥ kāmamohitāḥ

trayastriṃśadvayasyāśca tāḥ suśīlādayaḥ smṛtāḥ //
rādhikāyāḥ priyatamā gopīnāṃ pravarā yayuḥ

tāsāṃ paścādyayurgopyastāsāṃ saṃkhyā nibodha me//
samā veṣeṇa vayasā rūpeṇa ca guṇena ca

yayuḥ suśīlāsaṃgena sahasrāṇi ca ṣoḍaśa //
yayuścandramukhī paścātsahasrāṇi ca ṣoḍaśa

ekādaśasahasrāṇi mādhavyālyaśca niryayuḥ //
jagmuḥ kadambamālālyaḥ sa sahasrāṇi trayodaśa

yayuḥ kuntīvayasyāśca sahasrāṇi daśa smṛtāḥ //
caturdaśa sahasrāṇi yayustā yamunānugāḥ

jāhnavīsahacāriṇyaḥ sahasrāṇi yayurnava //
yayurnavasahasrāṇi padmamukhyālya eva ca

sāvitryālyaḥ paṃcadaśa sahasrāṇi yayurvrajāt //
pārijātāvayasyāśca sahasrāṇi yayurdaśa

svayaṃprabhānugāḥ sapta sahasrāṇi yayurvrajāt //
yayuḥ sudhāmukhīgopyaḥ sahasrāṇi caturdaśa

śubhānugā yayurgopyaḥ sahasrāṇi caturdaśa //
padmānugā yayurgopyaḥ sahasrāṇi caturdaśa

gaurī padmā yayurgopyaḥ sahasrāṇi caturdaśa //
yayuḥ sarvamaṅgalālyaḥ sahasrāṇi ca ṣoḍaśa

kālikālyo yayurgopyaḥ sahasrāṇi ca ṣoḍaśa //
niryayuḥ kamalālyaśca sahasrāṇi trayodaśa

durgānugā yayurgopyaḥ sahasrāṇi ca ṣoḍaśa //
yayuḥ sarasvatīpaścātsahasrāṇi trayodaśa

prajagmurbhāratīpaścātsahasrāṇi daśa vrajāt //
aparṇāsahacāriṇyaḥ sahasrāṇi caturdaśa

ratipaścādvayasyāśca sahasrāṇi yayurdaśa //
gaṅgāvayasyāḥ prayayuḥ sahasrāṇi caturdaśa

prajagmurambikāpaścātsahasrāṇi ca ṣoḍaśa //
satīpaścādyayurgopyaḥ sahasrāṇi trayodaśa

nandinīsahacāriṇyaḥ sahasrāṇi yayurdaśa //
prayayuḥ sundarīpaścātsahasrāṇi trayodaśa/

yayuḥ kṛṣṇapriyāpaścātsahasrāṇi ca ṣoḍaśa //
yayurmadhumatīpaścātsahasrāṇi ca ṣoḍaśa

yayuścampānugā gopyaḥ sahasrāṇi trayodaśa //
candanālyo yayuḥ paścātsahasrāṇi ca ṣoḍaśa

sarvā babhūvurekatra tatra tasthuḥ palaṃ mudā //
tatrāyayurgopikāśca mālāhastāśca kāścana

cārucandanahastāśca kāścittatrāyayurvrajāt //
śvetacāmarahastāśca kāścittatrāyayurmudā

tatrāyayurgopakanyāḥ kāścitkastūrikākarāḥ //
tatrāyayurgopakanyāḥ kāścitkuṃkumavāhikāḥ

kāścittatrāyayugopyastāmbūlapātravāhikāḥ //
yāvatkāñcanavastrāṇāṃ vāhikā gopakanyakāḥ //
kāścittatrāyayuḥ śīghraṃ yatra candrāvalī mudā

sarvāścaikatra saṃbhūya sasmitāśca mudānvitāḥ //
vidhāya rādhikāveṣaṃ sthānācca prayayurmudā

cakruḥ punaḥ punastāśca hariśabdajapaṃ pathi //
prāpurvṛndāvanaṃ ramyaṃ dadṛśū rāsamaṇḍalam

svargebhyaḥ sundaraṃ dṛśyaṃ rākāpatikarānvitam //
sunirjanaṃ kusumitaṃ vāsitaṃ puṣpavāyunā

nārīṇāṃ kāmajananaṃ munimohanakāraṇam //
śuśruvustatra tāḥ sarvāḥ puṃskokilakaladhvanim

atisūkṣmakalaṃ cātibhramarāṇāṃ manoharam //
prasūnamadhumattānāṃ bhramarīsaṅgasaṅginām

śubhe kṣaṇe praviveśa rādhikā rāsamaṇḍalam //
sarvābhirālibhiḥ sārdhaṃ dhyātvā kṛṣṇapadāmbujam

rādhāmārāttu saṃvīkṣya kṛṣṇastatra mudā'nvitaḥ //
jagāmānuvrajanprītyā sasmito madanāturaḥ

madhyasthāṃ sakhisaṅghānāṃ ratnālaṅkārabhūṣitām //
divyavastraparīdhānāṃ sasmitāṃ vakralocanām

gajendragāminīṃ ramyāṃ munimānasamohinīm//
navīnaveṣavayasā rūpeṇātimanoharām

talaśroṇinitambānāṃ bhāraśeṣānvitāṃ parām //
cārucampakavarṇābhāṃ śaraccandranibhānanām //
bibhratīṃ kabarībhāraṃ mālatīmālyasaṃyutam

rādhā dadarśa śrīkṛṣṇaṃ kiśoraṃ śyāmasundaram //
navayauvanasaṃpannaṃ ratnābharaṇabhūṣitam //

kandarpakoṭilāvaṇyalīlādhāma manoharam //
prāṇādhikāṃ tāṃ paśyantīṃ paśyantīṃ vakracakṣuṣā

paramādbhutarūpaṃ ca sarvatrānupamaṃ param //
vicitraveṣaṃ cūḍāṃ ca bibhrataṃ sasmitaṃ mudā

vakralocanakoṇena darśaṃdarśaṃ punaḥpunaḥ //
mukhamācchādayāñcakre vrīḍayā sasmitā satī

mūrcchāmavāpa sā sadyaḥ kāmabāṇaprapīḍitā //
pulakāñcitasarvāṅgī babhūva hatacetanā

kaṭākṣakāmabāṇaiśca viddhaḥ krīḍārasonmukhaḥ //
mūrcchāṃ prāpya na papāta tasthau sthāṇusamo hariḥ

papāta muralī tasya krīḍākamalamujjvalam //
dvitīyaṃ pītavastraṃ ca śikhipicchaṃ śarīrataḥ

kṣaṇena cetanāṃ prāpya yayau rādhāntikaṃ mudā //
kṛtvā vakṣasi tāṃ prītyā samāśliṣya cucumba saḥ

śrīkṛṣṇasparśamātreṇa saṃprāpya cetanāṃ satī //
prāṇādhikaṃ prāṇanāthaṃ samāśliṣya cucumba ha

mano jahāra rādhāyāḥ kṛṣṇastasya ca sā mune //
jagāma rādhayā sārdhaṃ rasiko ratimandiram

ratnapradīpasaṃyuktaṃ ratnadarpaṇasaṃyutam //
cārucampakaśayyābhiścandanāktābhī rājitam

karpūrānvitatāmbūlairbhogadravyaiḥ samanvitam //
uvāca rādhayā sārdhaṃ kṛṣṇastatra mudānvitaḥ

rādhayā dattatāmbūlaṃ cakhāda madhusūdanaḥ //
rāseśvarī kṛṣṇadattaṃ tāmbūlaṃ bubhuje mudā

dattaṃ carvitatāmbūlaṃ rādhāyai prabhuṇā mudā //
cakhāda bhaktvā sā tūrṇaṃ prahasya madanāturā

rādhācarvitatāmbūlaṃ yayāce mādhavo mudā //
na dadau rādhikā bhītā papāta caraṇāmbuje

etasminnantare tatra sakāmaḥ suratonmukhaḥ //
suṣvāpa rādhayā sārdhaṃ ratitalpe manohare

śṛṅgārāṣṭaprakāraṃ ca viparītādikaṃ vibhuḥ //
nakhadantakarāṇāṃ ca prahāraṃ ca yathocitam

kāmaśāstreṣu yadgopyaṃ cumbanāṣṭavidhaṃ param //
kāminīnāṃ manohāri cakāra rasikeśvaraḥ

aṅgairaṅgāni pratyaṅgaiḥ pratyaṅgāni smarāturaḥ //
cakārāśleṣaṇaṃ tatra kāmukīnāṃ sukhāvaham

śṛṅgārakuśalau tau tu kāmaśāstrasupaṇḍitau //
ratiyuddhavirāmaśca na babhūva dvayorapi

evaṃ gṛhe gṛhe ramye nānāmūrtiṃ vidhāya ca//
reme gopāṅganābhiśca suramye rāsamaṇḍale

gopīnāṃ nava lakṣāṇi gopānāṃ ca tathaiva ca //
lakṣāṇyaṣṭādaśa mune yuktāni rāsamaṇḍale

muktakeśāni nagnāni vicchinnabhūṣaṇāni ca //
veṣocchinnāni mattāni mūrcchitāni smareṇa ca

kaṅkaṇānāṃ kiṃkiṇīnāṃ valayānāṃ ca nārada //
sadratnanūpurāṇāṃ ca śabdayuktāni saṃtatam

evaṃ kṛtvā sthalakrīḍāṃ yayustāni jalaṃ mudā //
kṛtvā tatra jalakrīḍāṃ pariśrāntāni sāmpratam

tūrṇaṃ jalātsamutthāya vāsāṃsi paridhāya ca //
dadṛśurmukhapadmāni sadratnadarpaṇeṣu ca

candanāgurukastūrīdravyāṇi puṣpamālikāḥ //
mudā paridadhustāni saṃprāpuścetanāni ca //

sakarpūraṃ ca tāmbūlaṃ bhuktvā sarvāṇi kautukāt //
dadṛśurmukhapadmāni sadratne darpaṇe'male

kācitkāmāturā kṛṣṇaṃ balādākṛṣya kautukāt //
hastādvaṃśī nijagrāha vasanaṃ ca cakarṣa ha

kācitkāmapramattā ca nagnaṃ kṛtvā tu mādhavam //
nijagrāha pītavastraṃ parihasya punardadau

yuktiṃ śṛṇvityevamuktvā kācitsaṃgṛhya svāminam //
cucumba gaṇḍe bimboṣṭhe samāśliṣya punaḥpunaḥ

sasmitaṃ sakaṭākṣaṃ ca mukhacandraṃ stanonnatam //
kācicchroṇīṃ sulalitāṃ darśayāmāsa kāmataḥ

kācitkāntaṃ kare kṛtvā saṃsthāpya śroṇideśataḥ //
cakāra cūḍānirmāṇaṃ mālatīmālyasaṃyutam

kāciccūḍāṃ samākṛṣya mayūrapicchakaṃ dadau //
guñjāmālyaṃ ca cūḍāyāṃ veṣṭayāmāsa kācana

pradadau svāmine kāmātpremavardhanahetave //
kācitkāñcitsamākṛṣya nagnāṃ kṛtvā tu kāmataḥ

preṣayāmāsa kṛṣṇasya kroḍe candanacarcite //
nanṛtuśca jaguḥ kāścitkāntaṃ kṛtvā tu kāmataḥ

nartanaṃ kārayāmāsa taṃ ca kācidbalena ca //
kṛṣṇaśca vastraṃ kasyāśca vicakarṣa kutūhalāt

kāṃcitkṛtvā tu nagnāṃ ca kasyaicidaṃśukaṃ dadau //
kṛṣṇo rādhāṃ samākṛṣya vāsayāmāsa vakṣasi

tasyāśca kabarīṃ ramyāṃ sunirmāṇaṃ cakāra ha //
sindūraṃ ca dadau bhāle kastūrīṃ bindubhiḥ saha

atisūkṣmaṃ candanenduṃ kautukāttadadho dadau //
patrāvalīṃ sulalitāṃ sukapole cakāra ha

vahniśuddhāṃśukaṃ cāru paridhāryya prayatnataḥ //
padoḥ sadratnamaṃjīre gṛhītvā caraṇāmbuje

nakhanirmārjanaṃ kṛtvā sundaraṃ yāvakaṃ dadau //
bhūṣaṇairbhūṣitāṃ kṛtvā saṃpralipyānulepanaiḥ

dattvā ca mālatīmālāṃ cucumba ca punaḥ punaḥ //
cārulocanapadme ca cakārāñjanasaṃyute

pradadau nāsikāmadhye durlabhaṃ gajamauktikam//
śroṇideśe ca stanayornakhacchidraṃ cakāra ha

cakāra dantadalanaṃ pakvabimbādhare vare //
sarasaśca taṭe ramye puṣpodyāne sunirjane

bahiścandrodaye ramye puṣpacandanacarcite //
agurucandanāktena vāyunā surabhīkṛte

bhramaradhvanisaṃyukte puṃskokilarutaśrute //
bahumūrtīḥ saṃvidhāya yogināṃ paramo guruḥ

punaścakāra śṛṅgāraṃ gopīnāṃ cittahārakaḥ //
kiṃkiṇīnāṃ kaṅkaṇānāṃ nūpurāṇāṃ ca nārada

śṛṅgārodrekatastatra babhūva sundaro ravaḥ //
mūrcchāmavāpustāḥ sarvā navasaṃgamamātrataḥ

babhūvuracalāspandāḥ pulakāñcitavigrahāḥ //
śṛṅgāravirate bhūte saṃprāpuścetanāṃ punaḥ

nakhadantaprahāraṃ ca pracakāra parasparam //
kṛṣṇaḥ kararuhāghātaṃ dadau tāsāṃ kucopari

śroṇīdeśe sukaṭhine nakhacihnaṃ cakāra ha //
nīvī visraṃsitā tāsāṃ kabarī kṣudraghaṇṭikā

dūrībhūtaṃ suvasanaṃ suveṣaṃ sumanoharam //
āliṅganaṃ navavidhaṃ cumbanāṣṭavidhaṃ mudā

śṛṅgāraṃ ṣoḍaśavidhaṃ cakāra rasikeśvaraḥ //
aṅgairaṅgāni pratyaṅgaiḥ pratyaṅgāni ca yoṣitām

cakārāliṅganaṃ prītyā kāmukīnāṃ ca kāmukaḥ //
nārīṇāṃ ṣoḍaśa kalāḥ śṛṅgārastatpramāṇakaḥ //

kalābhedena tadbhedaṃ kāmaśāstravido viduḥ //
prākṛtaṃ dvādaśavidhaṃ cakāra rasikeśvaraḥ

nirūpitaṃ kāmaśāstre cakāreśastato'dhikam //
krīḍārambhe ca madhye ca viratau karma yoṣitām

prītyarthamapi kartavyaṃ cakāreśastato'dhikam //
gopīkaṅkaṇarekhābhiḥ pādālaktakacihnitaḥ //
śuśubhe kṛṣṇadehaśca yathā'drirgairikeṇa ca

evaṃbhūte pūrṇarāsasaṃbhūte rāsamaṇḍale //
samājagmuḥ surāḥ sarve sakalatrāśca sānugāḥ

suvarṇasyandanasthāśca kautukātsvagaṇāvṛtāḥ //
pulakāñcitasarvāṅgāḥ kāmabāṇaprapīḍitāḥ

ṛṣayo munayaścaiva siddhāśca pitarastathā //
vidyādharāśca gandharvā yakṣarākṣasakinnarāḥ //
sastrīkāśca samājagmurdadṛśuśca mudā'nvitāḥ

divyasyandanamāruhya śātakaumbhavinirmitam //
suśobhitaṃ ca maṇinā ratnasāraparicchadam

vahniśuddhāṃśukenaiva veṣṭitaṃ sumanoharam //
śvetacāmarayuktaṃ ca sadratnadarpaṇāmbujam

śatacakraṃ citrayuktaṃ manoyāyi manoharam //
sadratnasāranirmāṇakalaśojjvalaśekharam

samājagāma bhagavānpārvatyā saha śaṃkaraḥ //
vāmapārśve mahākālo dakṣiṇe nandikeśvaraḥ

purataḥ kārtikeyaśca svayaṃ devo gaṇeśvaraḥ //
piṅgalākṣādayaḥ sarve pārṣadāḥ paritastayoḥ

kṣetrapālādayaḥ sarve tathā'ṣṭau bhairaveśvarāḥ //
vakṣaḥsthalasthitā durgā sasmitā vakralocanā

bhāratyā saha brahmā ca śātakaumbharathasthitaḥ//
vāme saptarṣayastasya dakṣiṇe sanakādayaḥ

suvarṇasyandanasthaśca dharmaḥ sākṣī ca karmaṇām//
vakṣasthalasthitā tasya mūrtiḥ smerānanā satī

paśyantī pūrṇarāsaṃ ca sakāmā vakralocanā //
paritaḥ pārṣadāḥ sarve jvalanto brahmatejasā

śacyā saha mahendraśca rohiṇyā ca kalānidhiḥ //
svāhā sārddhaṃ svayaṃ vahniḥ sūryaśca saṃjñayā saha

samājagāma kāmaśca ratiṃ kṛtvā ca vakṣasi //
sarve grahāśca dikpālā ājagmuḥ sakalatrakāḥ

ākāśasthāśca dadṛśuḥ sarāsaṃ rāsamaṇḍalam //
kecicca mumuhustatra mūrcchāmāpuśca kecana

muhūrtaṃ ca surāḥ sarve sasmitāśca mudā'nvitāḥ//
candanadravavṛṣṭiṃ ca puṣpavṛṣṭiṃ ca cikṣipuḥ

kastūrīyuktamālyānāṃ vṛṣṭiṃ cakrurmunīśvarāḥ//
rāsaṃ dṛṣṭvā devapatnyaḥ kāmabāṇaprapīḍitāḥ

sthale ratirasaṃ kṛtvā jagāma yamunājalam //
rādhayā saha kṛṣṇaśca pūrṇabrahma sanātanaḥ

gopībhiḥ saha jagmuśca māyāḥ śrīkṛṣṇarūpikāḥ //
prapīḍitāḥ kāmabāṇaiḥ krīḍāṃ cakrurjale mudā

jalaṃ dadau rādhikāyai sakāmo mādhavaḥ svayam //
dadau sā ca mādhavāya kāmārtāyāñjalitrayam

vastraṃ jagrāha tasyāśca sā ca nagnā babhūva ha //
mālāṃ ciccheda kabarīṃ cakāra śithilāṃ hariḥ

sindūrapakṣakaṃ luptaṃ veṣaṃ ca jalatāḍanaiḥ //
bhrūvicitramoṣṭharāgaṃ luptaṃ kajjalalocanam

tāṃ ca nagnāṃ samāśliṣya nimamajja jale hariḥ //
prakṛtyā'bhyantare krīḍāṃ sutasthau ca tayā saha

tāṃ ca nagnāṃ darśayitvā gopikāṃ krīḍayā natām //
sasmitāṃ prerayāmāsa dūrato yamunājale

sā vegena samutthāya balājjagrāha mādhavam//
gṛhītvā muralīṃ kopātprerayāmāsa dūrataḥ

gṛhītvā pītavasanaṃ taṃ cakāra digambaram //
vanamālāṃ ca ciccheda dadau toyaṃ punaḥ punaḥ

hariṃ punaḥ samākṛṣya preṣayāmāsa pāthasi //
gabhīre srotasi mune nimamajja jagatpatiḥ

utthāya mādhavaḥ śīghraṃ tāṃ gṛhītvā prahasya ca //
kṛtvā vakṣasi nagnāṃ ca cucumba ca punaḥpunaḥ//
evaṃ tā mūrtayaḥ sarvā gopībhiḥ saha kautukāt //
krīḍāṃ vicakruryamunātīranīre manohare

tīraṃ gatvā tayā sārdhaṃ harirnagnaśca magnayā //
sā taṃ yayāce vasanaṃ sa ca tāṃ sasmitāṃ satīm

rādhikāyai dadau vastraṃ ramyāṃ mālāṃ ca mādhavaḥ //
pradadau haraye vastraṃ vaṃśī rāseśvarī tathā

candanāgurukastūrīṃ sarvāṅge kuṅkumānvitām//
kṛṣṇasya parayā bhaktyā dadau śroṇisthitasya ca

nirmāya cūḍāṃ lalitāṃ kāminīṃ cittamohinīm//
śobhanairmālatīmālyaiścakāra veṣṭanaṃ punaḥ

śrīkṛṣṇo rādhikāyāśca kabarīṃ sumanoharām //
kṛtvā kuṇḍalasaṃskāraṃ nirmame patrakāvalīm

dadau lalāṭe sindūraṃ kastūrībindubhiḥ saha //
tadadhaścandanenduṃ ca susūkṣmaṃ sumanoharam

nakhāṅgaṃ stanayorūrvorurasyeva ghanaṃ mudā //
dattvā tāṃ vāsayāmāsa vahniśuddhāṃśukena vai

candanāgurukastūrīkuṅkumānāṃ draveṇa saḥ //
kṛtvā vakṣasi saṃlipya cucumba ca muhurmuhuḥ

punarāśleṣaṇaṃ kṛtvā dadau mālāṃ gale punaḥ //
bhūṣaṇairbhūṣitāṃ kṛtvā mañjīracaraṇe dadau

alaktakaṃ caraṇayornakheṣu ca dadau punaḥ //
evaṃ gopāśca gopīnāṃ vidadhau ca pṛthakpṛthak

punaḥ prajagmustā mattāḥ sundaraṃ rāsamaṇḍalam//
pūrṇenducandrikāyuktaṃ ratiyogyaṃ sunirjanam

mādhavīketakīkundamālatīnāṃ manoharaiḥ //
campayūthīmallikānāṃ puṣpaiśca surabhīkṛtam

dṛṣṭvā ca sphuṭitaṃ puṣpaṃ cayanaṃ kartumīśvarī //
gopīrniyojayāmāsa kautukena ca rādhikā

kāścinniyojayāmāsa mālānirmāṇakarmaṇi //
kāścittāmbūlasajjeṣu kāściñcandanagharṣaṇe/

mālā candanatāmbūlaṃ gopīdattaṃ ca sundarī //
dadau kṛṣṇāya saṃprītyā sasmitā vakralocanā

kāścinniyojanaṃ cakruḥ kṛṣṇasaṅgītakarmaṇi //
mṛdaṅgamurajādīnāṃ vādaneṣu ca kāścana

evaṃ rāse ratiṃ kṛtvā līlayā hariṇā saha //
vijahāra ca sarvatra nirjaneṣu manoharam

puṣpodyāneṣu ramyeṣu sarasāṃ ca taṭeṣu ca //
kandare kandare ramye nadeṣu ca nadīṣu ca

atīva nirjanasthāne śmaśāne girigahvare //
vāñchiteṣu ca nārīṇāṃ trayastriṃśadvaneṣu ca

bhāṇḍīre śrīvane ramye kadambakānane tathā //
tulasīkānane kundavane campakakānane

nimbāraṇye madhuvane jambīrakānane tathā //
nālikeravane pūgavane ca kadalīvane

badarīkānane bilvavane nāriṅgakānane //
aśvatthakānane vaṃśavane dāḍimakānane

mandārakānane tālavane cūtavane tathā //
ketakīkānane'śokavane kharjūrakānane

āmrātakavane jambūgahane śālakānane //
kaṭake kānane padmavane jātivane mune

nyagrodhagahane ghore tathā śrīkhaṇḍakānane //
prahṛṣṭakesaravane sarvato'pi vilakṣaṇe

evaṃ reme kautukena kāmāttriṃśaddivāniśam //
tathā'pi mānasaṃ pūrṇaṃ na ca kiṃcidbabhūva ha

na kāminīnāṃ kāmaśca śṛṅgāreṇa nivartate //
adhikaṃ vardhate śaśvadyathā'gnirghṛtadhārayā

jagmurdevāḥ svagehaṃ ca devyaśca munayastathā //
te sarve praśaśaṃsuśca vismayaṃ ca yayurmudā

gehe gehe nṛpendrāṇāṃ lebhire janma bhārate //
dagdhāḥ kāmāgnināṃ'śena devyaḥ śṛṅgāralālasāḥ

iti śrībrahmavaivartte mahāpurāṇe śrīkṛṣṇajanmakhaṇḍe nārāyaṇanāradasaṃvāde rāsakrīḍāprastāvo nāma aṣṭāviṃśo'dhyāyaḥ