Brahmavaivarta Purana · Chapter 2.52

śrīpārvatyuvāca //
anyeṣāṃ ca kṛtaghnānāṃ yadyatkarmaphalaṃ prabho //
teṣāṃ kimūcurmunayo vedavedāṅgapāragāḥ

śrīmaheśvara uvāca //
praśnaṃ kurvati rājendre sarveṣu muniṣu priye //
tatra pravaktumārebhe ṛṣirnārāyaṇo mahān

śrīnārāyaṇa uvāca //
svadattāṃ paradattāṃ vā brahmavṛttiṃ harettu yaḥ //
sa kṛtaghna iti jñeyaḥ phalaṃ ca śṛṇu bhūmipa

yāvanto reṇavaḥ siktā viprāṇāṃ netrabindubhiḥ //
tāvadvarṣasahasraṃ ca śūlapote sa tiṣṭhati

taptāṅgāraṃ ca tadbhakṣyaṃ pānaṃ vai taptamūtrakam //
taptāṅgāre ca śayanaṃ tāḍito yamakiṅkaraiḥ

tadante ca mahāpāpī viṣṭhāyāṃ jāyate kṛmiḥ //
ṣaṣṭivarṣasahasrāṇi devamānena bhārate

tato bhavedbhūmihīnaḥ prajāhīnaśca mānavaḥ //
daridraḥ kṛpaṇo rogī śūdro nindyastataḥ śuciḥ

nārada uvāca //
hanti yaḥ parakīrttiṃ ca svakīrttiṃ vā narādhamaḥ//
sa kṛtaghna iti khyātastatphalaṃ ca niśāmaya

andhakūpe vasetso'pi yāvadindrāścaturdaśa//
kīṭairnakulagṛdhraiśca bhakṣitaḥ satataṃ nṛpa

taptakṣārodakaṃ pāpī nityaṃ pibati vai tataḥ //
saptajanmasvataḥ sarpaḥ kākaḥ pañcasvataḥ śuciḥ

devala uvāca //
brahmasvaṃ vā gurusvaṃ vā devasvaṃ vā'pi yo haret //
sa kṛtaghna iti jñeyo mahāpāpī ca bhārate

avaṭode vasetso'pi yāvadindrāścaturdaśa //
tato bhavetsurāpī sa tataḥ śūdrastataḥ śuciḥ

jaigīṣavya uvāca //
pitṛmātṛgurūṃścāpi bhaktihīno na pālayet //
vācā'pi tāḍayettāṃśca sa kṛtaghra iti smṛtaḥ //
vācā ca tāḍayennityaṃ svāminaṃ kulaṭā ca yā

sā kṛtaghnīti vikhyātā bhārate pāpinī varā //
vahnikuṇḍaṃ mahāghoraṃ tau prayātassuniścitam

tatra vahnau vasatyeva yāvaccandradivākarau //
tato bhavejjalaukāśca saptajanmasvataḥ śuciḥ

vālmīkiruvāca //
yathā taruṣu vṛkṣatvaṃ sarvatra na jahāti ca //
tathā kṛtaghnatā rājansarvapāpeṣu varttate

mithyāsākṣyaṃ yo dadāti kāmātkrodhāttathā bhayāt //
sabhāyāṃ pākṣikaṃ vakti sa kṛtaghna iti smṛtaḥ

puṇyamātraṃ cāpi rājanyo hanti sa kṛtaghnakaḥ //
sarvatrāpi ca sarveṣāṃ puṇyahānau kṛtaghnatā

mithyāsākṣyaṃ pākṣikaṃ vā bhārate vakti yo nṛpa //
yāvadindrasahasraṃ ca sarpakuṇḍe vaseddhruvam

santataṃ veṣṭitaḥ sarpairbhīto vai bhakṣitastathā //
bhuṅkte ca sarvaviṇmūtraṃ yamadūtena tāḍitaḥ

kṛkalāso bhavettatra bhārate saptajanmasu //
saptajanmasu maṇḍūkaḥ pitṛbhiḥ saptabhiḥ saha

tato bhavedvai vṛkṣaśca mahāraṇye tu śālmaliḥ //
tato bhavennaro mūkastataḥ śūdrastataḥ śuciḥ

āstīka uvāca //
gurvaṅganānāṃ gamane mātṛgāmī bhavennaraḥ //
narāṇāṃ mātṛgamane prāyaścittaṃ na vidyate

bhārate ca nṛpaśreṣṭa yo doṣo mātṛgāminām //
brāhmaṇīgamane caiva śūdrāṇāṃ tāvadeva hi

brāhmaṇyāstāvadeva syāddoṣaḥ śūdreṇa maithune //
kanyānāṃ putrapatnīnāṃ śvaśrūṇāṃ gamane tathā

sagarbhabhrātṛpatnīnā bhaginīnāṃ tathaiva ca //
doṣaṃ vakṣyāmi rājendra yadāha kamalodbhavaḥ

yaḥ karoti mahāpāpī caitābhiḥ saha maithunam //
jīvanmṛto bhavetso'pi caṇḍālo'spṛśya eva ca

nādhikāro bhavettasya sūryyamaṇḍaladarśane //
śālagrāmaṃ tajjalaṃ ca tulasyāśca dalaṃ jalam

sarvatīrthajalaṃ caiva viprapādodakaṃ tathā //
spraṣṭuṃ ca naiva śaknoti viṭtulyaḥ pātakī naraḥ

daivaṃ guruṃ brāhmaṇaṃ ca namaskartuṃ na cārhati //
viṣṭhādhikaṃ tadannaṃ ca jalaṃ mūtrādhikaṃ tathā

devatāḥ pitaro viprā naiva gṛhṇanti bhārate //
bhavettadaṅgavātena tīrthamaṅgāravāhanam

saptarātraṃ hyupavaseddaivasparśāttathā dvijaḥ //
bhārakrāntā ca pṛthivī tadbhāraṃ voḍhumakṣamā

tatpāpātpatito deśaḥ kanyāvikrayiṇo yathā //
tatsparśācca tadālāpācchayanāśrayabhojanāt

nṛṇāṃ ca tatsamaṃ pāpaṃ bhavatyeva na saṃśayaḥ //
kumbhīpāke vasetso'pi yāvadvai brahmaṇaḥ śatam

divāniśaṃ bhramettatra cakrāvarttaṃ nirantaram //
dagdho vā'gniśikhābhiśca yamadūtaiśca tāḍitaḥ

evaṃ nityaṃ mahāpāpī bhuṅkte nirayayātanām //
viṣṭhāhāraśca sarvatra kumbhīpāke'tha pātitaḥ

gate prākṛtike ghore mahati pralaye tathā //
punaḥ sṛṣṭeḥ samārambhe tadvidho vā bhavetpunaḥ

ṣaṣṭivarṣasahasrāṇi viṣṭhāyāṃ ca kṛmirbhavet //
tato bhavati caṇḍālo bhāryyāhīno napuṃsakaḥ

saptajanmasu śuddhaśca galatkuṣṭhī napuṃsakaḥ //
tato bhavedbrāhmaṇaścāpyandhaḥ kuṣṭhī napuṃsakaḥ

labdhvaivaṃ sapta janmāni mahāpāpī bhavecchuciḥ

munaya ūcuḥ//
ityevaṃ kathitaṃ sarvamasmābhirvo yathāgamam //
ebhistulyo bhaveddoṣo'pyatithīnāṃ parābhave

praṇāmaṃ kuru viprendraṃ gṛhaṃ prāpaya niścitam //
saṃpūjya brāhmaṇaṃ yatnādgṛhītvā brāhmaṇāśiṣam

vanaṃ gaccha mahārāja tapasyāṃ kuru satvaram//
brahmaśāpairvinirmuktaḥ punarevāgamiṣyasi

ityuktvā munayaḥ sarve yayustūrṇaṃ svamandiram//
surāścāpi ca rājāno bandhuvargāśca pārvati

iti śrībrahmavaivartte mahāpurāṇe dvitīye prakṛtikhaṇḍe nāradanārāyaṇasaṃvādāntargataharagaurīsaṃvāde rādhopākhyāne suyajñopākhyāne karmavipāko nāma dvipañcāśattamo'dhyāyaḥ