Brahmavaivarta Purana · Chapter 2.53

śrīpārvatyuvāca //
gateṣu munisaṃgheṣu śrutvā karmaphalaṃ nṛṇām //
kiṃ cakāra nṛpaśreṣṭho brahmaśāpena vihvalaḥ

atithirbrāhmaṇo vā'pi kiṃ cakāra tadā prabho //
jagāma nṛpagehaṃ vā na vā tadvaktumarhasi

maheśvara uvāca //
gateṣu munisaṃgheṣu nindāgrasto narādhipaḥ //
preritaśca vasiṣṭhena dharmiṣṭhena purodhasā //

papāta daṇḍavadbhūmau pādayorbrāhmaṇasya ca //
tyaktvā manyuṃ dvijaśreṣṭho dadau tasmai śubhāśiṣam

sasmitaṃ brāhmaṇaṃ dṛṣṭvā tyaktamanyuṃ kṛpāmayam //
uvāca nṛpatiśreṣṭhaḥ sāśrunetraḥ kṛtāñjaliḥ

rājovāca //
kutra vaṃśe bhavāñjātaḥ kiṃ nāma bhavataḥ prabho //
kiṃnāmā vā'pi tadbrūhi kva vāsaḥ kathamāgataḥ

viprarūpī svayaṃ viṣṇurgūḍhaḥ kapaṭamānuṣaḥ //
sākṣātsa mūrtimānagniḥ prajvalanbrahmatejasā

ko vā guruste bhagavanniṣṭadevaśca bhārate //
tava veṣaḥ kathamayaṃ jñānapūrṇasya sāmpratam

gṛhāṇa rājyaṃ nikhilamaiśvaryyaṃ kośameva ca //
svabhṛtyaṃ kuru me putraṃ māṃ ca dāsīṃ striyaṃ mune

saptasāgarasaṃyuktāṃ saptadvīpāṃ vasundharām //
aṣṭādaśopadvīpāḍhyāṃ saśailavanaśobhitām

mayā bhṛtyena śādhi tvaṃ rājendro bhava bhārate //
ratnendrasārakhacite tiṣṭha siṃhāsane vare //

nṛpasya vacanaṃ śrutvā jahāsa munipuṅgavaḥ //
uvāca paramaṃ tattvamajñātaṃ sarvadurlabham

atithiruvāca //
marīcirbrahmaṇaḥ putrastatputraḥ kaśyapaḥ svayam //
kaśyapasya sutāḥ sarve prāptā devatvamīpsitam

teṣu tvaṣṭā mahājñānī cakāra paramaṃ tapaḥ //
divyaṃ varṣasahasraṃ ca puṣkare duṣkaraṃ tapaḥ

siṣeve brāhmaṇārthaṃ ca devadevaṃ hariṃ param//
nārāyaṇādvaraṃ prāpa vipraṃ tejasvinaṃ sutam

tato babhūva tejasvī viśvarūpastapodhanaḥ//
purodhasaṃ cakārendro vākpatau taṃ krudhā gate

mātāmahebhyo daityebhyo dattavantaṃ ghṛtāhutim //
ciccheda taṃ śunāsīro brāhmaṇaṃ māturājñayā

viśvarūpasya tanayo virūpo matpitā nṛpa //
ahaṃ ca sutapā nāma virāgī kaśyapo dvijaḥ // / १८//
mahādevo mama gururvidyājñānamanupradaḥ //
abhīṣṭadevaḥ sarvātmā śrīkṛṣṇaḥ prakṛteḥ paraḥ

taccintayāmi pādābjaṃ na me vāñchā 'sti sampadi //
sālokyasārṣṭisārūpyasāmīpyaṃ rādhikāpateḥ

tena dattaṃ na gṛhṇāmi vinā tatsevanaṃ śubham //
brahmatvamamaratvaṃ vā manye'haṃ jalabimbavat

bhaktivyavahitaṃ mithyābhramameva tu naśvaram //
indratvaṃ vā manutvaṃ vā sauratvaṃ vā narādhipa

na manye jalarekheti nṛpatvaṃ kena gaṇyate //
śrutvā suyajñayajñe te munīnāṃ gamanaṃ nṛpa

lālasāṃ viṣṇubhaktiṃ te saṃprāpayitumāgataḥ //
kevalānugṛhītastvaṃ nahi śapto mayā'dhunā

samuddhṛtaśca patito ghore nimne bhavārṇave //
nahyammayāni tīrthāni na devā mṛcchilāmayāḥ

te punantyurukālena kṛṣṇabhaktāśca darśanāt //
rājannirgamyatāṃ gehāddehi rājyaṃ sutāya ca

putre nyasya priyāṃ sādhvīṃ gaccha vatsa vanaṃ drutam //
brahmādistambaparyantaṃ sarvaṃ mithyaiva bhūmipa

śrīkṛṣṇaṃ bhaja rādheśaṃ paramātmā namīśvaram //
dhyānasādhyaṃ durārādhyaṃ brahmaviṣṇuśivādibhiḥ

āvirbhūtaistirobhūtaiḥ prākṛtaiḥ prakṛteḥ param //
brahmā sraṣṭā hariḥ pātā haraḥ saṃhārakārakaḥ

dikpālāśca digīśāśca bhramantyevāsya māyayā //
yadājñayā vāti vāyuḥ sūryyo dinapatiḥ sadā//

niśāpatiḥ śaśī śaśvatsasyasusnigdhatākaraḥ //
kālena mṛtyuḥ sarveṣāṃ sarvaviśveṣu vai bhavet

kāle varṣati śakraśca dahatyagniśca kālataḥ//
bhītavadviśvaśāstā ca prajāsaṃyamano yamaḥ

kālaḥ saṃharate kāle kāle sṛjati pāti ca//
svadeśe vai samudraśca svadeśe vai vasundharā

svadeśe parvatāścaiva svāḥ pātālāḥ svadeśataḥ//
svarlokāḥ sapta rājendra saptadvīpā vasundharā

śailasāgarasaṃyuktāḥ pātālāḥ sapta caiva hi //
brahmāṇḍamebhirlokaiśca ḍimbākāraṃ jalaplutam

santyeva pratividhyaṇḍe brahmaviṣṇuśivādayaḥ //
surā narāśca nāgāśca gandharvā rākṣasādayaḥ

āpātālādbrahmalokaparyyantaṃ ḍimbarūpakam //
idameva tu vidhyaṇḍamuttamaṃ kṛtrimaṃ nṛpa

nābhipadme virāḍviṣṇoḥ kṣudrasya jalaśāyinaḥ //
sthitaṃ yathā padmabījaṃ karṇikāyāṃ ca paṅkaje

evaṃ so'pi śayānassyājjalatalpe suviplute //
dhyāyatyeva mahāyogī prākṛtaḥ prakṛteḥ param

kālabhītaśca kāleśaṃ kṛṣṇamātmānamīśvaram // /
mahāviṣṇorlomakūpasādhāraḥ so'sti vistṛte //
kūpeṣu lomnāṃ pratyekamevaṃ viśvāni santi vai

mahāviṣṇorgātralomnāṃ brahmāṇḍānāṃ ca bhūmipa //
saṃkhyāṃ karttuṃ na śaknoti kṛṣṇo'pyanyasya kā kathā

mahāviṣṇuḥ prākṛtikaḥ so'pi ḍimbodbhavaḥ sadā//
bhavetkṛṣṇecchayā ḍimbaḥ prakṛtergarbhasambhavaḥ

sarvādhāro mahānviṣṇuḥ kālabhītaḥ sa śaṅkitaḥ //
kāleśaṃ dhyāyati svairaṃ kṛṣṇamātmānamīśvaram

evaṃ ca sarvaviśvasthā brahmaviṣṇuśivādayaḥ //
mahānvirāṭ kṣudravirāṭ sarve prākṛtikāḥ sadā

/
sā sarvabījarūpā ca mūlaprakṛtirīśvarī //
kāle līnā ca kāleśe kṛṣṇe taṃ dhyāyati sma sā

evaṃ sarve kālabhītāḥ prakṛtiḥ prākṛtāstathā //
āvirbhūtāstirobhūtāḥ kālena paramātmani

ityevaṃ kathitaṃ sarvaṃ mahājñānaṃ sudurlabham //
śivena guruṇā dattaṃ kiṃ bhūyaḥ śrotumicchasi

iti śrībrahmavaivartte mahāpurāṇe dvitīye prakṛtikhaṇḍe nāradanārāyaṇasaṃvādāntargataharagaurīsaṃvāde rādhopākhyāne suyajñaṃ pratyatithyupadeśo nāma tripañcāśattamo'dhyāyaḥ