Brahmavaivarta Purana · Chapter 2.35

nārada uvāca //
śrīkṛṣṇasyātmanaścaiva nirguṇasya nirākṛteḥ //
sāvitrīyamasaṃvāde śrutaṃ suvimalaṃ yaśaḥ

tadguṇotkīrttanaṃ satyaṃ maṃgalānāṃ ca maṅgalam //
adhunā śrotumicchāmi lakṣmyupākhyānamīśvara

kenādau pūjitā sā'pi kimbhūtā kena vā purā //
tadguṇotkīrttanaṃ satyaṃ vada vedavidāṃ vara///

nārāyaṇa uvāca //
sṛṣṭerādau purā brahmankṛṣṇasya paramātmanaḥ //
devī vāmāṃśasaṃbhūtā cāsītsā rāsamaṇḍale

atīva sundarī śyāmā nyagrodhaparimaṇḍalā //
yathā dvādaśavarṣīyā ramyā susthirayauvanā

śvetacampakavarṇābhā sukhadṛśyā manoharā //
śaratpārvaṇakoṭīnduprabhāsaṃśobhitānanā

śaranmadhyāhnapadmānāṃ śobhāśobhitalocanā //
sā ca devī dvidhābhūtā sahasaiveśvarecchayā

samā rūpeṇa varṇena tejasā vayasā tviṣā //
yaśasā vāsasā mūrtyā bhūṣūṇena guṇena ca

smitena vīkṣaṇenaiva vacasā gamanena ca //
madhureṇa svareṇaiva nayenānunayena ca

tadvāmāṃśā mahālakṣmīrdakṣiṇāṃśā ca rādhikā //
rādhā''dau varayāmāsa dvibhujaṃ ca parātparam

mahālakṣmīśca tatpaścāccakame kamanīyakam //
kṛṣṇastadgauraveṇaiva dvidhārūpo babhūva ha

dakṣiṇāṃśo vai dvibhujo vāmāṃśaśca caturbhujaḥ //
caturbhujāya dvibhujo mahālakṣmīṃ dadau purā

lakṣyate dṛśyate viśvaṃ snigdhadṛṣṭyā yayā'niśam//
devīṣu yā ca mahatī mahālakṣmīśca sā smṛtā

dvibhujo rādhikākānto lakṣmīkāntaścaturbhujaḥ//
goloke dvibhujastasthau gopairgopībhirāvṛtaḥ

caturbhujaśca vaikuṇṭhaṃ prayayau padmayā saha //
sarvāṃśena samau tau dvau kṛṣṇanārāyaṇau parau

mahālakṣmīśca yogena nānārūpā babhūva sā//
vaikuṇṭhe ca mahālakṣmīḥ paripūrṇatamā parā

śuddhasattvasvarūpā ca sarvasaubhāgyasaṃyutā//
premṇā sā vai pradhānā ca sarvāsu ramaṇīṣu ca

svarge ca svargalakṣmīśca śakrasampatsvarūpiṇī//
pātāleṣu ca martyeṣu rājalakṣmīśca rājasu

gṛhalakṣmīrgṛheṣveva gṛhiṇī ca kalāṃśayā//
sampatsvarūpā gṛhiṇāṃ sarvamaṅgalamaṃgalā

gavāṃ prasūḥ sā surabhirdakṣiṇā yajñakāminī//
kṣīrodasindhu kanyā sā śrīrūpā padminīṣu ca

śobhārūpā ca candre sā sūryyamaṇḍalamaṇḍitā//
vibhūṣaṇeṣu ratneṣu phaleṣu jalajeṣu ca

nṛpeṣu nṛpapatnīṣu divyastrīṣu gṛheṣu ca //
sarvasasyeṣu vastreṣu sthāne sā saṃskṛte tathā

pratimāsu ca devānāṃ maṅgaleṣu ghaṭeṣu ca //
māṇikyeṣu ca muktāsu mālyeṣu ca manoharā

maṇīṃdreṣu ca hāreṣu kṣīraṃ vai candaneṣu ca //
vṛkṣaśākhāsu ramyāsu navamegheṣu vastuṣu

vaikuṇṭhe pūjitā sā''dau devī nārāyaṇena ca //
dvitīye brahmaṇā bhaktyā tṛtīye śaṅkareṇa ca

viṣṇunā pūjitā sā ca kṣīrode bhārate mune //
svāyambhuvena manunā mānavendraiśca sarvataḥ

ṛṣīndraiśca munīndraiśca sadbhiśca gṛhibhirbhavet //
gandharvādyaiśca nāgādyaiḥ pātāleṣu ca pūjitā

śuklāṣṭamyāṃ bhādrapade pūjā vai brahmaṇā kṛtā //
bhaktyā ca pakṣaparyantaṃ triṣu lokeṣu nārada

caitre pauṣe ca bhādre ca puṇye maṅgalavāsare //
viṣṇunā nirmitā pūjā triṣu lokeṣu bhaktitaḥ

varṣānte pauṣasaṃkrāṃtyāṃ medhyāmāvāhya cāṅgaṇe //
manustāṃ pūjayāmāsa sā bhūtā bhuvanatraye

rājñā saṃpūjitā sā vai maṅgalenaiva maṅgalā//
kedāreṇaiva nīlena nalena subalena ca

dhruveṇauttānapādena śakreṇa balinā tathā //
kaśyapena ca dakṣeṇa manunā ca vivasvatā

priyavratena candreṇa kubereṇaiva vāyunā //
yamena vahninā caiva varuṇenaiva pūjitā

evaṃ sarvatra sarvaiśca vanditā pūjitā sadā //
sarvaiśvaryyādhidevī sā sarvasampatsvarūpiṇī

iti śrībrahmavaivartte mahāpurāṇe dvitīye prakṛtikhaṇḍe nāradanārāyaṇasaṃvāde lakṣmyupākhyāne lakṣmīsvarūpapūjādivarṇanaṃ nāma pañcatriṃśo'dhyāyaḥ