Brahmanda Purana · Chapter 2.45

iti śrībrahmāṇḍe mahāpurāṇe vāyuprokte madhyamabhāge tṛtīya upoddhātapāde
sagaropākhyāne bhārgavacarite catuścatvāriṃśattamo 'dhyāyaḥ // 44//
vasiṣṭha uvāca
tataḥ kadācidvipine caturaṅgabalānvitaḥ /
mṛgayāmagamacchūraḥ śūrasenādibhiḥ saha

te praviśya mahāraṇyaṃ hatvā bahuvidhānmṛgān /
jagmustṛṣārttā madhyāhne saritaṃ narmadāmanu

tatra snātvā ca pītvā ca vāri nadyā gataśramāḥ /
gacchanto dadṛśurmārgo jamadagnerathāśramam

ddaṣṭvāśramapadaṃ ramyaṃ munīnāgacchataḥ pathi /
kasyedamiti papracchurbhāvikarmapracoditāḥ

te procuratiśāntātmā jamadagnermahātapāḥ /
vasatyasminsuto yasya rāmaḥ śastrabhṛtāṃ varaḥ

tachrutvā bhīrabhūtteṣāṃ rāmanāmānukīrttanāt /
krodhaṃ prasaṅyānṛśaṃsyaṃ pūrvavairamanusmaran

atha te procuranyonyaṃ pitṛhanturvadhātpituḥ /
vaira niryātanaṃ kiṃ tu kariṣyāmo diśādhunā

ityaktvā khaḍgahastāste saṃpraviśya tadāśramam /
prajāghnire prayāteṣu munivīreṣu sarvataḥ

taṃ hatvāsya śiro hṛtvā niṣādā iva nirdayāḥ /
prayayuste durātmānaḥ sabalāḥ svapurīṃ prati

putrāstasya mahātmānau dṛṣṭvā svapitaraṃ hatam /
parivārya mahārāja ruruduḥ śokakarśitāḥ

bharttāraṃ nihataṃ bhūmau patitaṃ vīkṣya reṇukā /
papāta mūrcchitā sadyo latevāśanitāḍitā

sā svacetasi saṃmūcchya śokapāvakadīpitāḥ /
dūrapranaṣṭasaṃjñeva sadyaḥ prāṇairvyayujyata

anālapantyāṃ tasyāṃ tu saṃjñāṃ yātā hi te punaḥ /
nyapatanmūrcchitā bhūmau nimagnāḥ śokasāgare

tatastapodhanā ye 'nye tatta povanavāsinaḥ /
sametyāśvāsayāmāsustulyaduḥkhāḥ sutānmune

sāṃtvyamānā munigaṇairjāmadagnyā yathāvidhi /
ādhakṣurvacasā teṣāmagnau pitroḥ kalevare

cakrureva tadūrddhvaṃ vai yatkarttavyamanantaram /
pitrormaraṇaduḥkhena pīḍyamānā divāniśam

tataḥ kāle gate rāmaḥ samānāṃ dvādaśāvadhau /
nivṛttastapasaḥ sakhyā sahāgādāśramaṃ pituḥ