Brahma Purana · Chapter 99

ṛṇapramocanaṃ nāma tīrthaṃ vedavido viduḥ
tasya svarūpaṃ vakṣyāmi śṛṇu nārada tanmanāḥ //

āsīt pṛthuśravā nāma priyaḥ kakṣīvataḥ sutaḥ
na dārasaṃgrahaṃ lebhe vairāgyān nāgnipūjanam //

kanīyāṃs tu samartho 'pi parivittibhayān mune
nākarod dārakarmādi naivāgnīnām upāsanam //

tataḥ procuḥ pitṛgaṇāḥ putraṃ kakṣīvataḥ śubham
jyeṣṭhaṃ caiva kaniṣṭhaṃ ca pṛthak pṛthag idaṃ vacaḥ //

ṛṇatrayāpanodāya kriyatāṃ dārasaṃgrahaḥ //

nety uvāca tato jyeṣṭhaḥ kim ṛṇaṃ kena yujyate
kanīyāṃs tu pitṝn prāha na yogyo dārasaṃgrahaḥ //

jyeṣṭhe sati mahāprājñaḥ parivittibhayād iti
tāv ubhau punar apy evam ūcus te vai pitāmahāḥ //

yātām ubhau gautamīṃ tu puṇyāṃ kakṣīvataḥ sutau
kurutāṃ gautamīsnānaṃ sarvābhīṣṭapradāyakam //

gacchatāṃ gautamīṃ gaṅgāṃ lokatritayapāvanīm
snānaṃ ca tarpaṇaṃ tasyāṃ kurutāṃ śraddhayānvitau //

dṛṣṭāvanāmitā dhyātā gautamī sarvakāmadā
na deśakālajātyādi niyamo 'trāvagāhane
jyeṣṭho 'nṛṇas tato bhūyāt parivittir na cetaraḥ //

tataḥ pṛthuśravā jyeṣṭhaḥ kṛtvā snānaṃ satarpaṇam
trayāṇām api lokānāṃ kākṣīvato 'nṛṇo 'bhavat //

tataḥ prabhṛti tat tīrtham ṛṇamocanam ucyate
śrautasmārta-ṛṇebhyaś ca itarebhyaś ca nārada
tatra snānena dānena ṛṇī muktaḥ sukhī bhavet //