બ્રહ્મ પુરાણ · અધ્યાય 99

ઋણપ્રમોચનં નામ તીર્થં વેદવિદો વિદુઃ
તસ્ય સ્વરૂપં વક્ષ્યામિ શૃણુ નારદ તન્મનાઃ ॥

આસીત્ પૃથુશ્રવા નામ પ્રિયઃ કક્ષીવતઃ સુતઃ
ન દારસંગ્રહં લેભે વૈરાગ્યાન્ નાગ્નિપૂજનમ્ ॥

કનીયાંસ્ તુ સમર્થો ઽપિ પરિવિત્તિભયાન્ મુને
નાકરોદ્ દારકર્માદિ નૈવાગ્નીનામ્ ઉપાસનમ્ ॥

તતઃ પ્રોચુઃ પિતૃગણાઃ પુત્રં કક્ષીવતઃ શુભમ્
જ્યેષ્ઠં ચૈવ કનિષ્ઠં ચ પૃથક્ પૃથગ્ ઇદં વચઃ ॥

ઋણત્રયાપનોદાય ક્રિયતાં દારસંગ્રહઃ ॥

નેત્ય્ ઉવાચ તતો જ્યેષ્ઠઃ કિમ્ ઋણં કેન યુજ્યતે
કનીયાંસ્ તુ પિતૄન્ પ્રાહ ન યોગ્યો દારસંગ્રહઃ ॥

જ્યેષ્ઠે સતિ મહાપ્રાજ્ઞઃ પરિવિત્તિભયાદ્ ઇતિ
તાવ્ ઉભૌ પુનર્ અપ્ય્ એવમ્ ઊચુસ્ તે વૈ પિતામહાઃ ॥

યાતામ્ ઉભૌ ગૌતમીં તુ પુણ્યાં કક્ષીવતઃ સુતૌ
કુરુતાં ગૌતમીસ્નાનં સર્વાભીષ્ટપ્રદાયકમ્ ॥

ગચ્છતાં ગૌતમીં ગઙ્ગાં લોકત્રિતયપાવનીમ્
સ્નાનં ચ તર્પણં તસ્યાં કુરુતાં શ્રદ્ધયાન્વિતૌ ॥

દૃષ્ટાવનામિતા ધ્યાતા ગૌતમી સર્વકામદા
ન દેશકાલજાત્યાદિ નિયમો ઽત્રાવગાહને
જ્યેષ્ઠો ઽનૃણસ્ તતો ભૂયાત્ પરિવિત્તિર્ ન ચેતરઃ ॥

તતઃ પૃથુશ્રવા જ્યેષ્ઠઃ કૃત્વા સ્નાનં સતર્પણમ્
ત્રયાણામ્ અપિ લોકાનાં કાક્ષીવતો ઽનૃણો ઽભવત્ ॥

તતઃ પ્રભૃતિ તત્ તીર્થમ્ ઋણમોચનમ્ ઉચ્યતે
શ્રૌતસ્માર્ત-ઋણેભ્યશ્ ચ ઇતરેભ્યશ્ ચ નારદ
તત્ર સ્નાનેન દાનેન ઋણી મુક્તઃ સુખી ભવેત્ ॥