Brahma Purana · Chapter 100

suparṇāsaṃgamaṃ nāma kādravāsaṃgamaṃ tathā
maheśvaro yatra devo gaṅgāpulinam āśritaḥ //

agnikuṇḍaṃ ca tatraiva raudraṃ vaiṣṇavam eva ca
sauraṃ saumyaṃ tathā brāhmaṃ kaumāraṃ vāruṇaṃ tathā //

apsarā ca nadī yatra saṃgatā gaṅgayā tathā
tattīrthasmaraṇād eva kṛtakṛtyo bhaven naraḥ //

sarvapāpapraśamanaṃ śṛṇu yatnena nārada
indreṇa hiṃsitāḥ pūrvaṃ vālakhilyā maharṣayaḥ
dattārdhatapasaḥ sarve procus te kāśyapaṃ munim //

putram utpādayānena indradarpaharaṃ śubham
tapaso 'rdhaṃ tu dāsyāmas tathety āha munis tu tān //

suparṇāyāṃ tato garbham ādadhe sa prajāpatiḥ
kadrvāṃ caiva śanair brahman sarpāṇāṃ sarpamātari //

te garbhiṇyāv ubhe āha gantukāmaḥ prajāpatiḥ
aparādho na ca kvāpi kāryo gamanam eva ca //

anyatra gamanāc chāpo bhaviṣyati na saṃśayaḥ //

ity uktvā sa yayau patnyau gate bhartari te ubhe
tadaiva jagmatuḥ sattram ṛṣīṇāṃ bhāvitātmanām //

brahmavṛndasamākīrṇaṃ gaṅgātīrasamāśritam
unmatte te ubhe nityaṃ vayaḥsaṃpattigarvite //

nivāryamāṇe bahuśo munibhis tattvadarśibhiḥ
vikurvatyau tatra sattre samāni ca havīṃṣi ca //

yoṣitāṃ durvilasitaṃ kaḥ saṃvaritum īśvaraḥ
te dṛṣṭvā cukṣubhur viprā apamārgarate ubhe //

apamārgasthite yasmād āpage hi bhaviṣyathaḥ
suparṇā caiva kadrūś ca nadyau te saṃbabhūvatuḥ //

sa kadācid gṛhaṃ prāyāt kaśyapo 'tha prajāpatiḥ
ṛṣibhyas tatra vṛttāntaṃ śāpaṃ tābhyāṃ savistaram //

śrutvā tu vismayāviṣṭaḥ kiṃ karomīty acintayat
ṛṣibhyaḥ kathayām āsa vālakhilyā iti śrutāḥ //

ta ūcuḥ kaśyapaṃ vipraṃ gatvā gaṅgāṃ tu gautamīm
tatra stuhi maheśānaṃ punar bhārye bhaviṣyataḥ //

brahmahatyābhayād eva yatra devo maheśvaraḥ
gaṅgāmadhye sadā hy āste madhyameśvarasaṃjñayā //

tathety uktvā kaśyapo 'pi snātvā gaṅgāṃ jitavrataḥ
tuṣṭāva stavanaiḥ puṇyair devadevaṃ maheśvaram //

lokatrayaikādhipater na yasya kutrāpi vastuny abhimānaleśaḥ
sa siddhanātho 'khilaviśvakartā bhartā śivāyā bhavatu prasannaḥ

tāpatrayoṣṇadyutitāpitānām itas tato vai paridhāvatāṃ ca
śarīriṇāṃ sthāvarajaṅgamānāṃ tvam eva duḥkhavyapanodadakṣaḥ

sattvādiyogas trividho 'pi yasya śakrādibhir vaktum aśakya eva
vicitravṛttiṃ paricintya somaṃ sukhī sadā dānaparo vareṇyaḥ

ityādistutibhir devaḥ stuto gaurīpatiḥ śivaḥ
prasanno hy adadāc chaṃbhuḥ kaśyapāya varān bahūn //

bhāryārthinaṃ tu taṃ prāha syātāṃ bhārye ubhe tu te
nadīsvarūpe patnyau ye gaṅgāṃ prāpya saridvarām //

tatsaṃgamanamātreṇa tābhyāṃ bhūyāt svakaṃ vapuḥ
te garbhiṇyau punar jāte gaṅgāyāś ca prasādataḥ //

tataḥ prajāpatiḥ prīto bhārye prāpya mahāmanāḥ
āhvayām āsa tān viprān gautamītīram āśritān //

sīmantonnayanaṃ cakre tābhyāṃ prītaḥ prajāpatiḥ
brāhmaṇān pūjayām āsa vidhidṛṣṭena karmaṇā //

bhuktavatsv atha vipreṣu kaśyapasyātha mandire
bhartṛsamīpopaviṣṭā kadrūr viprān nirīkṣya ca //

tataḥ kadrūr ṛṣīn akṣṇā prāhasat te ca cukṣubhuḥ
yenākṣṇā hasitā pāpe bhajyatāṃ te 'kṣi pāpavat //

kāṇābhavat tataḥ kadrūḥ sarpamāteti yocyate
tataḥ prasādayām āsa kaśyapo bhagavān ṛṣīn //

tataḥ prasannās te procur gautamī saritāṃ varā
aparādhasahasrebhyo rakṣiṣyati ca sevanāt //

bhāryānvitas tathā cakre kaśyapo munisattamaḥ
tataḥ prabhṛti tat tīrtham ubhayoḥ saṃgamaṃ viduḥ
sarvapāpapraśamanaṃ sarvakratuphalapradam //