Brahma Purana · Chapter 98

agnitīrtham iti khyātaṃ sarvakratuphalapradam
sarvavighnopaśamanaṃ tattīrthasya phalaṃ śṛṇu //

jātavedā iti khyāto agner bhrātā sa havyavāṭ
havyaṃ vahantaṃ devānāṃ gautamyās tīra eva tu //

ṛṣīṇāṃ sattrasadane agner bhrātaram uttamam
bhrātuḥ priyaṃ tathā dakṣaṃ madhur ditisuto balī //

jaghāna ṛṣimukhyeṣu paśyatsu ca sureṣv api
havyaṃ devā naiva cāpur mṛte vai jātavedasi //

mṛte bhrātari sa tv agniḥ priye vai jātavedasi
kopena mahatāviṣṭo gāṅgam ambhaḥ samāviśat //

gaṅgāmbhasi samāviṣṭe hy agnau devāś ca mānuṣāḥ
jīvam utsarjayām āsur agnijīvā yato matāḥ //

yatrāgnir jalam āviṣṭas taṃ deśaṃ sarva eva te
ājagmur vibudhāḥ sarva ṛṣayaḥ pitaras tathā //

vināgninā na jīvāmaḥ stuvanto 'gniṃ viśeṣataḥ
agniṃ jalagataṃ dṛṣṭvā priyaṃ cocur divaukasaḥ //

devāñ jīvaya havyena kavyena ca pitṝṃs tathā
mānuṣān annapākena bījānāṃ kledanena ca //

agnir apy āha tān devāñ śakto yo me gato 'nujaḥ
kriyamāṇe bhavatkārye yā gatir jātavedasaḥ //

sā vāpi syān mama surā notsahe kāryasādhane
kāryaṃ tu sarvatas tasya bhavatāṃ jātavedasaḥ //

imāṃ sthitim anuprāpto na jāne me kathaṃ bhavet
iha cāmutra ca vyāptau śaktir apy atra no bhavet //

athāpi kriyamāṇe vai kārye saiva gatir mama
devās tam ūcur bhāvena sarveṇa ṛṣayas tathā //

āyuḥ karmaṇi ca prītir vyāptau śaktiś ca dīyate
prayājān anuyājāṃś ca dāsyāmo havyavāhana //

devānāṃ tvaṃ mukhaṃ śreṣṭham āhutyaḥ prathamās tava
tvayā dattaṃ tu yad dravyaṃ bhokṣyāmaḥ surasattama //

tatas tuṣṭo 'bhavad vahnir devavākyād yathākramam
iha cāmutra ca vyāptau havye vā laukike tathā //

sarvatra vahnir abhayaḥ samartho 'bhūt surājñayā
jātavedā bṛhadbhānuḥ saptārcir nīlalohitaḥ //

jalagarbhaḥ śamīgarbho yajñagarbhaḥ sa ucyate
jalād ākṛṣya vibudhā abhiṣicya vibhāvasum //

ubhayatra pade vāsaḥ sarvago 'gnis tato 'bhavat
yathāgataṃ surā jagmur vahnitīrthaṃ tad ucyate //

tatra sapta śatāny āsaṃs tīrthāni guṇavanti ca
teṣu snānaṃ ca dānaṃ ca yaḥ karoti jitātmavān //

aśvamedhaphalaṃ sāgraṃ prāpnoty avikalaṃ śubham
devatīrthaṃ ca tatraiva āgneyaṃ jātavedasam //

agnipratiṣṭhitaṃ liṅgaṃ tatrāste 'nekavarṇavat
taddevadarśanād eva sarvakratuphalaṃ labhet //