Brahma Purana · Chapter 97

paulastyaṃ tīrtham ākhyātaṃ sarvasiddhipradaṃ nṛṇām
prabhāvaṃ tasya vakṣyāmi bhraṣṭarājyapradāyakam //

uttarāśāpatiḥ pūrvam ṛddhisiddhisamanvitaḥ
purā laṅkāpatiś cāsīj jyeṣṭho viśravasaḥ sutaḥ //

tasyaite bhrātaraś cāsan balavanto 'mitaprabhāḥ
sāpatnā rāvaṇaś caiva kumbhakarṇo vibhīṣaṇaḥ //

te 'pi viśravasaḥ putrā rākṣasyāṃ rākṣasās tu te
maddattena vimānena dhanado bhrātṛbhiḥ saha //

mamāntikaṃ bhaktiyukto nityam eti tu yāti ca
rāvaṇasya tu yā mātā kupitā sābravīt sutān //

mariṣye na ca jīviṣye putrā vairūpyakāraṇāt
devāś ca dānavāś cāsan sāpatnā bhrātaro mithaḥ //

anyonyavadham īpsante jayaiśvaryavaśānugāḥ
tadbhavanto na puruṣā na śaktā na jayaiṣiṇaḥ
sāpatnyaṃ yo 'numanyate tasya jīvo nirarthakaḥ //

tan mātṛvacanaṃ śrutvā bhrātaras te trayo mune
jagmus te tapase 'raṇyaṃ kṛtavantas tapo mahat //

matto varān avāpuś ca traya ete ca rākṣasāḥ
mātulena marīcena tathā mātāmahena tu //

tanmātṛvacanāc cāpi tato laṅkām ayācata
rakṣobhāvān mātṛdoṣād bhrātror vairam abhūn mahat //

tatas tad abhavad yuddhaṃ devadānavayor iva
yuddhe jitvāgrajaṃ śāntaṃ dhanadaṃ bhrātaraṃ tathā //

puṣpakaṃ ca purīṃ laṅkāṃ sarvaṃ caiva vyapāharat
rāvaṇo ghoṣayām āsa trailokye sacarācare //

yo dadyād āśrayaṃ bhrātuḥ sa ca vadhyo bhaven mama
bhrātrā nirasto vaiśravaṇo naiva prāpāśrayaṃ kvacit
pitāmahaṃ pulastyaṃ taṃ gatvā natvābravīd vacaḥ //

bhrātrā nirasto duṣṭena kiṃ karomi vadasva me
āśrayaḥ śaraṇaṃ yat syād daivaṃ vā tīrtham eva ca //

tat pautravacanaṃ śrutvā pulastyo vākyam abravīt //

gautamīṃ gaccha putra tvaṃ stuhi devaṃ maheśvaram
tatra nāsya praveśaḥ syād gaṅgāyā jalamadhyataḥ //

siddhiṃ prāpsyasi kalyāṇīṃ tathā kuru mayā saha //

tathety uktvā jagāmāsau sabhāryo dhanadas tathā
pitrā mātrā ca vṛddhena pulastyena dhaneśvaraḥ //

gatvā tu gautamīṃ gaṅgāṃ śuciḥ snātvā yatavrataḥ
tuṣṭāva devadeveśaṃ bhuktimuktipradaṃ śivam //

svāmī tvam evāsya carācarasya viśvasya śaṃbho na paro 'sti kaścit
tvām apy avajñāya yadīha mohāt pragalbhate kopi sa śocya eva

tvam aṣṭamūrtyā sakalaṃ bibharṣi tvadājñayā vartata eva sarvam
tathāpi vedeti budho bhavantaṃ na jātv avidvān mahimā purātanam

malaprasūtaṃ yad avocad ambā hāsyāt suto 'yaṃ tava deva śūraḥ
tvatprekṣitād yaḥ sa ca vighnarājo jajñe tv aho ceṣṭitam īśadṛṣṭeḥ

aśruplutāṅgī girijā samīkṣya viyuktadāṃpatyam itīśam ūce
manobhavo 'bhūn madano ratiś ca saubhāgyapūrvatvam avāpa somāt

ityādi stuvatas tasya purato 'bhūt trilocanaḥ
vareṇa cchandayām āsa harṣān novāca kiṃcana //

tūṣṇīṃbhūte tu dhanade pulastye ca maheśvare
punaḥ punar varasveti śive vādini harṣite //

etasminn antare tatra vāg uvācāśarīriṇī
prāptavyaṃ dhanapālatvaṃ vadantīdaṃ maheśvaram //

pulastyasya tu yac cittaṃ pitur vaiśravaṇasya tu
viditveva tadā vāṇī śubham artham udīrayat //

bhūtavad bhavitavyaṃ syād dāsyamānaṃ tu dattavat
prāptavyaṃ prāptavat tatra daivī vāg abhavac chubhā //

prabhūtaśatruḥ paribhūtaduḥkhaḥ saṃpūjya someśvaram āpa liṅgam
digīśvaratvaṃ draviṇaprabhutvam apāradātṛtvakalatraputrān

tāṃ vācaṃ dhanadaḥ śrutvā devadevaṃ triśūlinam
evaṃ bhavatu nāmeti dhanado vākyam abravīt //

tathaivāstv iti deveśo daivīṃ vācam amanyata
pulastyaṃ ca varaiḥ puṇyais tathā viśravasaṃ munim //

dhanapālaṃ ca deveśo hy abhinandya yayau śivaḥ
tataḥ prabhṛti tat tīrthaṃ paulastyaṃ dhanadaṃ viduḥ //

tathā vaiśravasaṃ puṇyaṃ sarvakāmapradaṃ śubham
teṣu snānādi yat kiṃcit tat sarvaṃ bahupuṇyadam //