Brahma Purana · Chapter 96

indratīrtham iti khyātaṃ brahmahatyāvināśanam
smaraṇād api pāpaugha kleśasaṃghavināśanam //

purā vṛtravadhe vṛtte brahmahatyā tu nārada
śacīpatiṃ cānugatā tāṃ dṛṣṭvā bhītavad dhariḥ //

indras tato vṛtrahantā itaś cetaś ca dhāvati
yatra yatra tv asau yāti hatyā sāpīndragāminī //

sa mahat sara āviśya padmanālam upāgamat
tatrāsau tantuvad bhūtvā vāsaṃ cakre śacīpatiḥ //

sarastīre 'pi hatyāsīd divyaṃ varṣasahasrakam
etasminn antare devā nirindrā hy abhavan mune //

mantrayām āsur avyagrāḥ katham indro bhaved iti
tatrāham avadaṃ devān hatyāsthānaṃ prakalpya ca //

indrasya pāvanārthāya gautamyām abhiṣicyatām
yatrābhiṣiktaḥ pūtātmā punar indro bhaviṣyati //

tathā te niścayaṃ kṛtvā gautamīṃ śīghram āgaman
tatra snātaṃ surapatiṃ devāś ca ṛṣayas tathā //

abhiṣektukāmās te sarve śacīkāntaṃ ca tasthire
abhiṣicyamānam indraṃ taṃ prakopād gautamo 'bravīt //

abhiṣekṣyanti pāpiṣṭhaṃ mahendraṃ gurutalpagam
tān sarvān bhasmasāt kuryāṃ śīghraṃ yāntv asurārayaḥ //

tad ṛṣer vacanaṃ śrutvā parihṛtya ca gautamīm
narmadām agaman sarva indram ādāya satvarāḥ //

uttare narmadātīre abhiṣekāya tasthire
abhiṣekṣyamāṇam indraṃ taṃ māṇḍavyo bhagavān ṛṣiḥ //

abravīd bhasmasāt kuryāṃ yadi syād abhiṣecanam
pūjayām āsur amarā māṇḍavyaṃ yuktibhiḥ stavaiḥ //

ayam indraḥ sahasrākṣo yasmin deśe 'bhiṣicyate
tatrātidāruṇaṃ vighnaṃ mune samupajāyate //

tacchāntiṃ kuru kalyāṇa prasīda varado bhava
malaniryātanaṃ yasmin kurmas tasmin varān bahūn //

deśe dāsyāmahe sarve tad anujñātum arhasi
yasmin deśe surendrasya abhiṣeko bhaviṣyati //

sa sarvakāmadaḥ puṃsāṃ dhānyavṛkṣaphalair yutaḥ
nānāvṛṣṭir na durbhikṣaṃ bhaved atra kadācana //

mene tato muniśreṣṭho māṇḍavyo lokapūjitaḥ
abhiṣekaḥ kṛtas tatra malaniryātanaṃ tathā //

devais tadokto munibhiḥ sa deśo mālavas tataḥ
abhiṣikte surapatau jāte ca vimale tadā //

ānīya gautamīṃ gaṅgāṃ taṃ puṇyāyābhiṣecire
surāś ca ṛṣayaś caiva ahaṃ viṣṇus tathaiva ca //

vasiṣṭho gautamaś cāpi agastyo 'triś ca kaśyapaḥ
ete cānye ca ṛṣayo devā yakṣāḥ sapannagāḥ //

snānaṃ tatpuṇyatoyena akurvann abhiṣecanam
mayā punaḥ śacībhartā kamaṇḍalubhavena ca //

vāriṇāpy abhiṣiktaś ca tatra puṇyābhavan nadī
siktā ceti ca tatrāsīt te gaṅgāyāṃ ca saṃgate //

saṃgamau tatra vikhyātau sarvadā munisevitau
tataḥ prabhṛti tat tīrthaṃ puṇyāsaṃgamam ucyate //

siktāyāḥ saṃgame puṇyam aindraṃ tad abhidhīyate
tatra sapta sahasrāṇi tīrthāny āsañ śubhāni ca //

teṣu snānaṃ ca dānaṃ ca viśeṣeṇa tu saṃgame
sarvaṃ tad akṣayaṃ vidyān nātra kāryā vicāraṇā //

yad etat puṇyam ākhyānaṃ yaḥ paṭhec ca śṛṇoti vā
sarvapāpaiḥ sa mucyeta manovākkāyakarmajaiḥ //