Brahma Purana · Chapter 94

śvetatīrtham iti khyātaṃ trailokye viśrutaṃ śubham
tasya śravaṇamātreṇa sarvapāpaiḥ pramucyate //

śveto nāma purā vipro gautamasya priyaḥ sakhā
ātithyapūjānirato gautamītīram āśritaḥ //

manasā karmaṇā vācā śivabhaktiparāyaṇaḥ
dhyāyantaṃ taṃ dvijaśreṣṭhaṃ pūjayantaṃ sadā śivam //

pūrṇāyuṣaṃ dvijavaraṃ śivabhaktiparāyaṇam
netuṃ dūtāḥ samājagmur dakṣiṇāśāpates tadā //

nāśaknuvan gṛhaṃ tasya praveṣṭum api nārada
tadā kāle vyatikrānte citrako mṛtyum abravīt //

kiṃ nāyāti kṣīṇajīvo mṛtyo śvetaḥ kathaṃ tv iti
nādyāpy āyānti dūtās te mṛtyor naivocitaṃ tu te //

tataś ca kupito mṛtyuḥ prāyāc chvetagṛhaṃ svayam
bahiḥsthitāṃs tadā paśyan mṛtyur dūtān bhayārditān
provāca kim idaṃ dūtā mṛtyum ūcuś ca dūtakāḥ //

śivena rakṣitaṃ śvetaṃ vayaṃ no vīkṣituṃ kṣamāḥ
yeṣāṃ prasanno giriśas teṣāṃ kā nāma bhītayaḥ //

pāśapāṇis tadā mṛtyuḥ prāviśad yatra sa dvijaḥ
nāsau vipro vijānāti mṛtyuṃ vā yamakiṃkarān //

śivaṃ pūjayate bhaktyā śvetasya tu samīpataḥ
mṛtyuṃ pāśadharaṃ dṛṣṭvā daṇḍī provāca vismitaḥ //

kim atra vīkṣase mṛtyo daṇḍinaṃ mṛtyur abravīt //

śvetaṃ netum ihāyātas tasmād vīkṣe dvijottamam //

tvaṃ gacchety abravīd daṇḍī mṛtyuḥ pāśān athākṣipat
śvetāya muniśārdūla tato daṇḍī cukopa ha //

śivadattena daṇḍena daṇḍī mṛtyum atāḍayat
tataḥ pāśadharo mṛtyuḥ papāta dharaṇītale //

tatas te satvaraṃ dūtā hataṃ mṛtyum avekṣya ca
yamāya sarvam avadan vadhaṃ mṛtyos tu daṇḍinā //

tataś ca kupito dharmo yamo mahiṣavāhanaḥ
citraguptaṃ bahubalaṃ yamadaṇḍaṃ ca rakṣakam //

mahiṣaṃ bhūtavetālān ādhivyādhīṃs tathaiva ca
akṣirogān kukṣirogān karṇaśūlaṃ tathaiva ca //

jvaraṃ ca trividhaṃ pāpaṃ narakāṇi pṛthak pṛthak
tvarantām iti tān uktvā jagāma tvarito yamaḥ //

etair anyaiḥ parivṛto yatra śveto dvijottamaḥ
tam āyāntaṃ yamaṃ dṛṣṭvā nandī provāca sāyudhaḥ //

vināyakaṃ tathā skandaṃ bhūtanāthaṃ tu daṇḍinam
tatra tad yuddham abhavat sarvalokabhayāvaham //

kārttikeyaḥ svayaṃ śaktyā bibheda yamakiṃkarān
dakṣiṇāśāpatiṃ cāpi nijaghāna balānvitam //

hatāvaśiṣṭā yāmyās te ādityāya nyavedayan
ādityo 'pi suraiḥ sārdhaṃ śrutvā tan mahad adbhutam //

lokapālair anuvṛto mamāntikam upāgamat
ahaṃ viṣṇuś ca bhagavān indro 'gnir varuṇas tathā //

candrādityāv aśvinau ca lokapālā marudgaṇāḥ
ete cānye ca bahavo vayaṃ yātā yamāntikam //

mṛta āste dakṣiṇeśo gaṅgātīre balānvitaḥ
samudrāś ca nadā nāgā nānābhūtāny anekaśaḥ //

tatrājagmuḥ sureśānaṃ draṣṭuṃ vaivasvataṃ yamam
taṃ dṛṣṭvā hatasainyaṃ ca yamaṃ devā bhayārditāḥ
kṛtāñjalipuṭāḥ śaṃbhum ūcuḥ sarve punaḥ punaḥ //

bhaktipriyatvaṃ te nityaṃ duṣṭahantṛtvam eva ca
ādikartar namas tubhyaṃ nīlakaṇṭha namo 'stu te
brahmapriya namas te 'stu devapriya namo 'stu te //

śvetaṃ dvijaṃ bhaktam anāyuṣaṃ te netuṃ yamādiḥ sakalo 'samarthaḥ
saṃtoṣam āptāḥ paramaṃ samīkṣya bhaktapriyatvaṃ tvayi nātha satyam

ye tvāṃ prapannāḥ śaraṇaṃ kṛpāluṃ nālaṃ kṛtānto 'py anuvīkṣituṃ tān
evaṃ viditvā śiva eva sarve tvām eva bhaktyā parayā bhajante

tvam eva jagatāṃ nātha kiṃ na smarasi śaṃkara
tvāṃ vinā kaḥ samartho 'tra vyavasthāṃ kartum īśvaraḥ //

evaṃ tu stuvatāṃ teṣāṃ purastād abhavac chivaḥ
kiṃ dadāmīti tān āha idam ūcuḥ surā api //

ayaṃ vaivasvato dharmo niyantā sarvadehinām
dharmādharmavyavasthāyāṃ sthāpito lokapālakaḥ //

nāyaṃ vadham avāpnoti nāparādhī na pāpakṛt
vinā tena jagaddhātur naiva kiṃcid bhaviṣyati //

tasmāj jīvaya deveśa yamaṃ sabalavāhanam
prārthanā saphalā nātha mahatsu na vṛthā bhavet //

tataḥ provāca bhagavāñ jīvayeyam asaṃśayam
yamaṃ yadi vaco me 'dya anumanyanti devatāḥ //

tataḥ procuḥ surāḥ sarve kurmo vākyaṃ tvayoditam
haribrahmādisahitaṃ vaśe yasyākhilaṃ jagat //

tataḥ provāca bhagavān amarān samupāgatān
madbhakto na mṛtiṃ yātu nety ūcur amarāḥ punaḥ //

amarāḥ syus tato deva sarvalokāś carācarāḥ
amartyamartyabhedo 'yaṃ na syād deva jaganmaya //

punar apy āha tāñ śaṃbhuḥ śṛṇvantu mama bhāṣitam
madbhaktānāṃ vaiṣṇavānāṃ gautamīm anusevatām //

vayaṃ tu svāmino nityaṃ na mṛtyuḥ svāmyam arhati
vārttāpy eṣāṃ na kartavyā yamena tu kadācana //

ādhivyādhyādibhir jātu kāryo nābhibhavaḥ kvacit
ye śivaṃ śaraṇaṃ yātās te muktās tatkṣaṇād api //

sānugasya yamasyāto namasyāḥ sarva eva te
tathety ūcuḥ suragaṇā devadevaṃ śivaṃ prati //

tataś ca bhagavān nātho nandinaṃ prāha vāhanam //

gautamyā udakena tvam abhiṣiñca mṛtaṃ yamam //

tato yamādayaḥ sarve abhiṣiktās tu nandinā
utthitāś ca sajīvās te dakṣiṇāśāṃ tato gatāḥ //

uttare gautamītīre viṣṇvādyāḥ sarvadaivatāḥ
sthitā āsan pūjayanto devadevaṃ maheśvaram //

tatrāsann ayutāny aṣṭa sahasrāṇi caturdaśa
tathā ṣaṭ ca sahasrāṇi punaḥ ṣaṭ ca tathaiva ca //

ṣaḍ dakṣiṇe tathā tīre tīrthānām ayutatrayam
puṇyam ākhyānam etad dhi śvetatīrthasya nārada //

yatrāsau patito mṛtyur mṛtyutīrthaṃ tad ucyate
tasya śravaṇamātreṇa sahasraṃ jīvate samāḥ //

tatra snānaṃ ca dānaṃ ca sarvapāpapraṇāśanam
śravaṇaṃ paṭhanaṃ cāpi smaraṇaṃ ca malakṣayam
karoti sarvalokānāṃ bhuktimuktipradāyakam //