Brahma Purana · Chapter 91

tato govardhanaṃ tīrthaṃ sarvapāpapraṇāśanam
pitṝṇāṃ puṇyajananaṃ smaraṇād api pāpanut //

tasya prabhāva eṣa syān mayā dṛṣṭas tu nārada
brāhmaṇaḥ karṣakaḥ kaścij jābālir iti viśrutaḥ //

na vimuñcaty anaḍvāhau madhyaṃ yāte 'pi bhāskare
pratodena pratudati pṛṣṭhato 'pi ca pārśvayoḥ //

tau gāvāv aśrupūrṇākṣau dṛṣṭvā gauḥ kāmadohinī
surabhir jagatāṃ mātā nandine sarvam abravīt //

sa cāpi vyathito bhūtvā śaṃbhave tan nyavedayat
śaṃbhuś ca vṛṣabhaṃ prāha sarvaṃ sidhyatu te vacaḥ //

śivājñāsahito nandī gojātaṃ sarvam āharat
naṣṭeṣu goṣu sarveṣu svarge martye tatas tvarā //

mām avocan suragaṇā vinā gobhir na jīvyate
tān avocaṃ surān sarvāñ śaṃkaraṃ yāta yācata //

tathaiveśaṃ tu te sarve stutvā kāryaṃ nyavedayan
īśo 'pi vibudhān āha jānāti vṛṣabho mama //

te vṛṣaṃ procur amarā dehi gā upakāriṇaḥ
vṛṣo 'pi vibudhān āha gosavaḥ kriyatāṃ kratuḥ //

tataḥ prāpsyatha gāḥ sarvā yā divyā yāś ca mānuṣāḥ
tataḥ pravartate yajño gosavo devanirmitaḥ //

gautamyāś ca śubhe pārśve gāvo vavṛdhire tataḥ
govardhanaṃ tu tat tīrthaṃ devānāṃ prītivardhanam //

tatra snānaṃ muniśreṣṭha gosahasraphalapradam
kiṃcid dānādinā yat syāt phalaṃ tat tu na vidmahe //